საცხოვრებლის შესანიშნავი ფოტოების გადაღება ტელეფონით

დაწყებამდე შეარჩიეთ საუკეთესო განათება და მოამზადეთ საცხოვრებელი სივრცე ფოტოგადაღების სახელმძღვანელოში მოცემული რჩევების გათვალისწინებით. გადაიღეთ თითოეული ოთახის ხუთი‑ექვსი ფოტო.

საცხოვრებლის ფოტოების გადაღებისას მნიშვნელოვანია, იცოდეთ, როგორ განთავსდება ისინი Airbnb‑ზე:

• განცხადების გვერდის მთავარ ნაწილში და საძიებო შედეგებში პირველი გარეკანის ფოტო ჩანს.
• პირველი ხუთი ფოტო, გარეკანის ფოტოს ჩათვლით, განცხადების გვერდის ზედა ნაწილში კოლაჟის სახით თავსდება და კვადრატების სახით იჭრება, ამიტომ არ დაგავიწყდეთ მათი ცენტრირება.
• ფოტოგალერეაში სტუმრებს თქვენ მიერ დამატებული ყველა ფოტოს დათვალიერება შეუძლიათ.

კარგი ფოტოების გადაღება ბევრი ტელეფონით შეიძლება. გაგაცნობთ რამდენიმე სასარგებლო ფუნქციასა და მათი გამოყენების წესს.

ჩართეთ ბადის ფუნქცია
ბადე კადრირებასა და ფოტოს გასწორებაში დაგეხმარებათ. ბადის დასაყენებლად:

• iPhone‑ზე: გადადით აქ: პარამეტრები > კამერა, შემდეგ კი ჩართეთ ბადის ხაზების გადამრთველი.
• Android‑ზე: გახსენით კამერის აპი და გადადით პარამეტრებზე, შემდეგ კი ჩართეთ ქვედა ნაწილში ბადის ხაზები.

ბადის გამოყენებასთან დაკავშირებით დამატებითი რჩევებისთვის გაეცანით ქვემოთ მოცემულ სექციას მესამედების წესის შესახებ.

გამორთეთ ბლიცი
ბლიცი ზედმეტად მკვეთრია — ფოტოს გადასაღებად იდეალურია კაშკაშა ბუნებრივი განათება. თუ საცხოვრებელს ფანჯრები აქვს, გადაიღეთ ფოტოები დღის ყველაზე ნათელ პერიოდში. წინააღმდეგ შემთხვევაში, აანთეთ შუქი მყუდრო გარემოს შესაქმნელად.

ბლიცის გამოსართავად გახსენით კამერის აპი, იპოვეთ ელვის ნიშანი და აირჩიეთ გამორთვა.

შეამოწმეთ გამოსახულებების გარჩევადობა
ფოტოები მაქსიმალურად მკაფიო რომ გამოვიდეს, გამოსახულების გარჩევადობა უნდა იყოს მინიმუმ 1024 პიქსელი 683 პიქსელზე. შესაძლოა, პარამეტრები ნაგულისხმევად განსაზღვრული გქონდეთ იმგვარად, რომ მხოლოდ დაბალი გარჩევადობის გამოსახულებები შეინახოს, ამიტომ საცხოვრებლისთვის ფოტოების გადაღებამდე შეამოწმეთ, რომ ფოტოები ნამდვილად მაღალი გარჩევადობით შეინახება. როცა ფოტოების გადაღებას დაასრულებთ, სურვილისამებრ, პარამეტრების ძველ მნიშვნელობებზე დაბრუნებას შეძლებთ.

აი, რას გირჩევთ ხარისხიანი სურათების გადასაღებად და რას — არა:

იზრუნეთ ხაზების სისწორეზე
გირჩევთ: სწორად დაიჭიროთ ტელეფონი, იატაკის პარალელურად. ავეჯის ძირითადი ელემენტი ცენტრში რომ მოაქციოთ, შესაძლოა, ხელების აწევა ან დაწევა დაგჭირდეთ. საძინებლების შემთხვევაში, ყურადღება გაამახვილეთ საწოლზე, მისაღები ოთახების შემთხვევაში კი — სავარაუდოდ, დივანზე. დაიხმარეთ უნივერსალური წესი: დაიჭირეთ კამერა ისეთ სიმაღლეზე, რომ კადრში მოექცეს საწოლების, მაგიდებისა და სხვა ავეჯის ზედა ნაწილი.

არ გირჩევთ: ასწიოთ ტელეფონი თავზე მაღლა ან დახაროთ ის, რომ ობიექტები უკეთ გამოჩნდეს. ხშირ შემთხვევაში, ფოტო თვალისთვის არასასიამოვნო გამოვა.

გამოიყენეთ მესამედის წესი
მესამედების წესი არის პრინციპი, რომლის მიხედვითაც გამოსახულება იყოფა მესამედებად როგორც ჰორიზონტალურად, ისე ვერტიკალურად. შედეგად, ვიღებთ ცხრა მართკუთხედს და ხაზების კვეთის ოთხ წერტილს. ტელეფონში ბადის ფუნქციის ჩართვისა და მესამედების წესის გამოყენების შემთხვევაში, კადრი გასწორებული იქნება, ფოტოებს კი კარგი კომპოზიცია ექნება.

გირჩევთ: ტელეფონი ისე დაიჭიროთ, რომ მთავარი ობიექტები (მაგალითად, ტახტი, საწოლი ან მაგიდა) კადრის იმ ნაწილში მოაქციოთ, სადაც ბადის ხაზები იკვეთება (ანუ არა მაინცდამაინც ცენტრში).

არ გირჩევთ: მოაქციოთ მნიშვნელოვანი ობიექტები ქვედა ან ზედა მესამედებში, რადგან გამოსახულების ნაწილი შეიძლება ჩამოიჭრას.

გაასწორეთ ფოკუსი

გირჩევთ: გამოიყენოთ ავტომატური ფოკუსირების რეჟიმი, რომ ფოკუსის გასწორება ხელით არ მოგიწიოთ.

იცოდეთ, როდის ღირს საფოკუსე მანძილის ცვლა
სმარტფონების უახლეს მოდელებში გათვალისწინებულია ფოტოების გადაღების სხვადასხვა რეჟიმი: პორტრეტის, პეიზაჟის, ფართო კადრისა და ა.შ. თუ ტელეფონში ეს ვარიანტები გაქვთ, გამოიყენეთ ისინი კამერის ფიზიკურად გადაადგილების ნაცვლად.

საფოკუსე მანძილის ცვლა სასარგებლოა, როცა დიზაინის კონკრეტული ელემენტების აქცენტირებას — მაგალითად, ჟურნალების მაგიდის, დივნის ან ნახატის ნაწილის გამოყოფას ცდილობთ.

თუ თქვენს ტელეფონში არ არის ეს რეჟიმები, გადაიღეთ მთელი ოთახის ფოტო ნაგულისხმევი პარამეტრების გამოყენებით და ცვალეთ საფოკუსე მანძილი მხოლოდ ახლო მანძილებიდან გადასაღები ობიექტებისთვის, როგორიცაა ყვავილების თაიგული საძინებლის ტუმბოზე ან ტახტი, რომლის თავზეც ნახატი ჰკიდია.

წარმოაჩინეთ ყველაფერი, რაც თქვენ მიერ შეთავაზებულ საცხოვრებელს შთამბეჭდავად აქცევს. საცხოვრებლის აღწერილობა მნიშვნელოვან ინფორმაციას მოიცავს, თუმცა ერთი ფოტო Airbnb‑ზე ნამდვილად ათას სიტყვაზე უკეთესია.

წარმოაჩინეთ საყოფაცხოვრებო პირობები
სტუმრებს აინტერესებთ, რით გამოირჩევა ესა თუ ის საცხოვრებელი, ამიტომ აუცილებლად გადაიღეთ მნიშვნელოვანი საყოფაცხოვრებო პირობების ამსახველი ფოტოები. სასურველია, ისინი ინტერიერის სხვა ელემენტებთან ერთად წარმოაჩინოთ. მაგალითად, აბაზანის გვერდით მდგარ სკამზე დაკეცილი პირსახოცები ფართო კადრი უკეთ წარმოჩნდება, ვიდრე აბაზანის ახლო კადრით გადაღებული სახელურები.

მაგალითისთვის გთავაზობთ რამდენიმე საყოფაცხოვრებო პირობასა თუ ნივთს, რომლებიც შეგიძლიათ აღბეჭდოთ ფოტოებზე და წარწერებში ახსენოთ:

• სივრცე ლეპტოპით მუშაობისთვის
• ოჯახებისთვის განკუთვნილი ნივთები: ბავშვის სკამ‑მაგიდა, ჩვილის საწოლი და ა.შ.
• გარე სივრცე: პატიო, ბაღი ან აივანი
• ყავის აპარატი, ჩაიდანი ან ჩაის სერვიზი
• სააბაზანოს პრემიუმკლასის ნივთები: აბაზანის პლუშის პირსახოცები, ხალათები ან ჩუსტები

ცვალეთ კამერის ორიენტაცია
სასურველია, პირველ ხუთ ფოტოს ჰორიზონტალური ორიენტაცია ჰქონდეს, განცხადების გვერდზე, ფოტოების ნაკრებში, საცხოვრებელი საუკეთესოდ რომ წარმოჩნდეს.

გირჩევთ: ვერტიკალურად გადაუღოთ ფოტოები ვიწრო სივრცეებს: საგარდერობო ოთახს, პატარა სააბაზანოსა და ა.შ.

არ გირჩევთ: გამოიყენოთ ვერტიკალურად გადაღებული ფოტოები პირველი ხუთი ფოტოსგან შემდგარ კოლაჟში განსათავსებლად, რადგან ისინი მოიჭრება, რომ მოერგოს ჰორიზონტალურ ფორმატს.

ცვალეთ კომპოზიცია
დაეხმარეთ სტუმრობის მსურველებს, თავი წარმოიდგინონ მათთვის შეთავაზებულ საცხოვრებელში: აჩვენეთ მათ არა მხოლოდ ის სივრცეები, სადაც დაიძინებენ, ჭამენ და დაისვენებენ, არამედ საინტერესო დეტალებიც.

თითოეული ოთახისთვის ატვირთეთ სხვადასხვა კომპოზიციის მქონე რამდენიმე ფოტო და იზრუნეთ, რომ მათ შორის მოხვდეს ფართო კუთხით, ასევე, საშუალო და ახლო მანძილებიდან გადაღებული, ჰორიზონტალური და ვერტიკალური ორიენტაციის მქონე კადრები. გაეცანით რჩევებს, თუ როდის გამოიყენოთ კომპოზიციის თითოეული ტიპი:

• ფართო კუთხით გადაღებული ფოტოები ქმნის საერთო სურათს, რაც სტუმრობის მსურველებს ოთახების ზომის წარმოდგენაში ეხმარება, ასევე, ამცნობს, რა დახვდებათ საცხოვრებელში.
• საშუალო მანძილიდან გადაღებული ფოტოები კარგია ობიექტების პირდაპირ და არა კუთხიდან საჩვენებლად. ასეთი სურათები კარგად წარმოაჩენს ამა თუ იმ ოთახის მთავარ თავისებურებას.
• ახლო კადრით გადაღებული ფოტოები დაგეხმარებათ, წარმოაჩინოთ ინდივიდუალური შტრიხები (მაგალითად, წიგნები საძინებლის ტუმბოზე). ახლო კადრების გადაღებისას განსაკუთრებული ყურადღება მიაქციეთ, რა ხვდება კადრში: არ დაგავიწყდეთ ბალიშებისა თუ ზეწრების გასწორება და სადენების დამალვა.

გირჩევთ: ფოტოებზე აღბეჭდოთ, როგორ უკავშირდება ოთახები ერთმანეთს. მაგალითად, ახლო კადრი ისე გადაიღეთ, რომ ფონზე მისაღები ოთახი ჩანდეს. წარმოიდგინეთ, რომ ფოტოგალერეა ერთგვარი ექსკურსიაა, რომლის მეშვეობითაც სტუმრები მთელ საცხოვრებელს ათვალიერებენ.

გადაიღეთ საჭიროზე მეტი ფოტო
საცხოვრებლის მოსამზადებლად ბევრი იშრომეთ, ამიტომ გადაუღეთ ფოტოები ყველაფერს. საუკეთესო ფოტოებს მოგვიანებით აირჩევთ.

ფოტოების არჩევისას გაითვალისწინეთ, რომ ისინი ერთგვარ ამბავს უნდა კრავდეს და სტუმრებს სათანადო მოლოდინს უქმნიდეს. აი, რამდენიმე რჩევაც:

• ფოტოების რაოდენობა საკმარისი უნდა იყოს იმისთვის, რომ სტუმრებს სათანადო წარმოდგენა შეუქმნათ
• დაამატეთ სტუმრებისთვის შეთავაზებული თითოეული ოთახის ორი‑ოთხი ფოტო
• საერთო სურათის შესაქმნელად თითოეულ ოთახს ფოტოები სხვადასხვა რაკურსით გადაუღეთ
• ინდივიდუალური შტრიხების წარმოსაჩენად გადაიღეთ ფოტოები ახლო კადრით
• მკაფიოდ აღბეჭდეთ ადაპტირებული პირობები

გამოიყენეთ საკონტროლო სია
დაიხმარეთ რეკომენდებული ფოტოებისა და რაკურსების სია, რომელიც ფოტოგადაღების პროცესს გაგიმარტივებთ.

საძინებლები

• თითოეული საძინებლის ფოტო ფართო კუთხით
• სხვადასხვა რაკურსი ოთახების უკეთ წარმოსაჩენად
• საშუალო მანძილიდან გადაღებული კადრი, რომელზეც აღბეჭდილია მთავარი ობიექტები, მაგალითად, საწოლი და მაგიდა
• ახლო კადრი, რომელიც წარმოაჩენს ინდივიდუალურ შტრიხებს (მაგალითად, წიგნს ან ყვავილებს მაგიდაზე)

მისაღები ოთახი

• ფართო კადრი, რომელზეც აღბეჭდილია მისაღები ოთახის სივრცე მთლიანად (სასურველია, ჩანდეს ფანჯრიდან შემომავალი სინათლე)
• საშუალო მანძილიდან გადაღებული კადრი, რომელზეც აღბეჭდილია ტახტი ან დასასვენებელი სივრცე
• ახლო კადრი, რომელიც წარმოაჩენს ინდივიდუალურ შტრიხებს (მაგალითად, ლამაზ ბუხარს)

სააბაზანო

• მთავარი სააბაზანოს ფართო კადრი
• საშუალო მანძილიდან გადაღებული კადრი, რომელზეც აღბეჭდილია აბაზანა ან საშხაპე და ხელსაბანი
• ერთმანეთზე დაწყობილი პირსახოცების ახლო კადრი ან ხედი ფანჯრიდან

სამზარეულო

• მთელი სამზარეულოს/მინისამზარეულოს ფართო კადრი
• საშუალო მანძილიდან გადაღებული კადრი, რომელზეც აღბეჭდილია ჰაერღუმელი სამზარეულოს კარგად ორგანიზებული სამუშაო ზედაპირების გვერდით
• მაგიდის ცენტრში დადგმული ყვავილების თაიგულის ახლო კადრი
• ახლო კადრი, რომელზეც აღბეჭდილია საწმენდი საშუალებების ნაკრები სტუმრებისთვის

გარე სივრცე

• ფართო კადრი, რომელზეც აღბეჭდილია აივანი, ბაღი, პატიო ან მთლიანად ტერასა
• საშუალო მანძილიდან გადაღებული კადრი, რომელზეც აღბეჭდილია დასასვენებელი ზონა (სასურველია, ხედიც, რომელიც იქიდან იშლება)
• ახლო კადრი, რომელზეც აღბეჭდილია დეკორის კარგად გააზრებული ელემენტები (მაგალითად, ქოთნის მცენარე გარე ავეჯის გვერდით)
• შესასვლელისკენ მიმავალი ბილიკის ფართო კადრი

თქვენ მიერ განთავსებულ საცხოვრებელს თქვენზე უკეთ არავინ იცნობს, ამიტომ აღბეჭდეთ ის, რაც თავად მოგწონთ და ის, რასაც სტუმრები მიმოხილვებში აღნიშნავენ. სანამ ფოტოგადაღებას დაასრულებთ, დაათვალიერეთ გადაღებული კადრები და დარწმუნდით, რომ მნიშვნელოვანი არაფერი გამოგრჩათ.

გაეცანით ფოტოგადაღების სახელმძღვანელოს:

• ნაწილი 1: საცხოვრებლის მომზადება ფოტოების სმარტფონით გადასაღებად
• ნაწილი 2: ხარისხიანი ფოტოების გადაღება ტელეფონის მეშვეობით
• ნაწილი 3: განცხადებისთვის ფოტოების არჩევა და მათი დამუშავება