შემოთავაზებულ შედეგებზე წვდომისთვის გადადით წინ
    ეს კონტენტი თქვენ მიერ არჩეულ ენაზე მიუწვდომელია, ამიტომაც ამჟამად იმ ენაზე გთავაზობთ, რომელიც მასთან ყველაზე ახლოსაა.

    საცხოვრებლის საუკეთესოდ აღწერის ხერხები

    საცხოვრებლის გულწრფელად და დეტალურად აღწერა სტუმრებს მის შესახებ სრულ წარმოდგენას შეუქმნის.
    ავტორი: Airbnb (18 ნოე, 2020)
    10-წუთიანი საკითხავი
    განახლების თარიღი: 14 მაი, 2021

    ყველაზე მნიშვნელოვანი

    • გაამახვილეთ ყურადღება იმაზე, რაც სტუმრებისთვის შეთავაზებულ საცხოვრებელს გამოარჩევს

    • დაიცავით სიზუსტე საცხოვრებელთან დაკავშირებით, რომ სტუმრებს სათანადო მოლოდინი შეუქმნათ

    • განაახლეთ განცხადებაში მითითებული ინფორმაცია
    • დაიხმარეთ ჩვენი სრული გზამკვლევი ეფექტური განცხადების შესაქმნელად

    საცხოვრებლის შესანიშნავი აღწერილობა დაგეხმარებათ მეტი ჯავშნის მიღებაში და სტუმრებისთვის სათანადო მოლოდინის შექმნაში. სუპერმასპინძლების თქმით, არ არის აუცილებელი, საცხოვრებელი იდეალური იყოს, მთავარია, სტუმრებს მის შესახებ მკაფიო წარმოდგენა ჰქონდეთ. ამ სტატიიდან შეიტყობთ, როგორ დააინტერესოთ პოტენციური სტუმრები.

    ხაზი გაუსვით განსაკუთრებულ მახასიათებლებს

    Airbnb‑ზე მილიონობით განცხადებაა. გამოყავით რამდენიმე წუთი და დაფიქრდით, რით გამოირჩევა თქვენ მიერ სტუმრებისთვის შეთავაზებული საცხოვრებელი და რა უნიკალური თავისებურებები აქვს. მაგალითად, შეგიძლიათ აღნიშნოთ მისი განსაკუთრებული მდებარეობა ან უჩვეულო საყოფაცხოვრებო პირობები. „საცხოვრებელი ბენდის საუკეთესო რესტორნებიდან და ლუდსახარშებიდან ფეხით 5‑10 წუთის სავალზე მდებარეობს“, — ამბობენ მაიკი და ჯილი, სუპერმასპინძლები ბენდიდან (ორეგონი) და დასძენენ: „პოპულარულ ველომარშრუტებამდე ველოსიპედით 15 წუთში მიხვალთ, მანქანით კი 5 წუთიც არ უნდა“.

    მოიფიქრეთ დასამახსოვრებელი სათაური

    განცხადების სათაური და პირველი ფოტო საცხოვრებლის ძლიერ მხარეებზე უნდა აკეთებდეს აქცენტს, რომ პოტენციური სტუმრები განცხადებაზე გადასვლისთვის განაწყოს. კარგი იქნება, თუ შედარებით გრძელ სათაურს მოიფიქრებთ, რომელშიც საყოფაცხოვრებო პირობებს აღნიშნავთ, ხოლო ყოველ პირველ ასოს გაამთავრულებთ (ლათინური ან სხვა დამწერლობების გამოყენების შემთხვევაში). მაგალითად, „ერთოთახიანი ქალაქის ბინის“ ნაცვლად სცადეთ „მომხიბლავი ერთოთახიანი ბინა ცენტრთან ახლოს“. კარგი სათაურების სხვა მაგალითებია:

    • „სახლი სანაპიროზე: საუნა, კაიაკები და სახლის კინოთეატრი“
    • „ქალაქის ისტორიულ ცენტრში მდებარე ბინა ბუხრითა და სახლის ოფისით“
    • „ბავშვებისთვის შესაფერისი ხის სახლი სალაშქრო ბილიკებთან და ტბასთან ახლოს“

    მოყევით საცხოვრებლის ამბავი

    განცხადება სტუმრებისთვის შეთავაზებული საცხოვრებლის პოპულარიზაციის ძირითადი საშუალებაა, რომლის მნიშვნელოვანი ელემენტიც ამბის თხრობაა. გაანდეთ სტუმრებს, რა ელით წინ — დაეხმარეთ, წინასწარ წარმოიდგინონ, როგორი იქნება თქვენთან სტუმრობა. ბინა ზედა სართულებზეა და ფანჯრიდან დიდი ხე ჩანს? მაშინ დაწერეთ, რომ სტუმრებს თავი ხეზე აშენებულ სახლში ეგონებათ. ცენტრში მდებარე ყველაზე პატარა, სადა ოთახიც კი შეიძლება იყოს „იდეალური საწყისი წერტილი ქალაქის შესასწავლად“. ქვემოთ გთავაზობთ ვიდეორგოლს, რომელშიც სუპერმასპინძლები ტერეზა და დევიდი საცხოვრებლის ეფექტურ აღწერასთან დაკავშირებით სხვა რჩევებს გვიზიარებენ.

    წარმოიდგინეთ თავი სტუმრის ადგილას

    საცხოვრებლის საინტერესო აღწერილობის შესადგენად სულაც არ არის აუცილებელი, მწერალი იყოთ, უბრალოდ, შეეცადეთ, მოკლედ და დამაჯერებლად წეროთ. წარმოიდგინეთ თავი მოგზაურის ადგილზე: დაიწყეთ ყველაზე მნიშვნელოვანი ინფორმაციით და ნურც მთავარი ძლიერი მხარეების აღნიშვნა დაგავიწყდებათ.

    მაგალითად, რაიანი, მასპინძელი სანტა‑მარტადან (კოლუმბია), სტუმრებს წინასწარ აწვდის ყველაზე მნიშვნელოვან ინფორმაციას. „აქაურობა ძალზე შორს მდებარეობს, ამიტომ ჩამომსვლელებისთვის ბევრი ინფორმაციის მიწოდება გვიწევს“, — ამბობს ის და დასძენს: „მიყრუებული ადგილი ნამდვილად არ არის, თუმცა ცივილიზაციისგან საკმაოდ მოშორებულია. ზოგჯერ დენი რამდენიმე დღე არ გვაქვს“. ამ შემთხვევაში მთავარია, პოტენციურმა სტუმრებმა ყველაფერი დაჯავშნამდე იცოდნენ — ისინი მიხვდებიან, რომ უჩვეულო სტუმრობა ელით და სათანადოდ მოემზადებიან.

    თუ არ იცით, საიდან დაიწყოთ, სცადეთ მეგობარს მოუყვეთ, როგორი იქნება თქვენ მიერ სტუმრებისთვის შეთავაზებულ საცხოვრებელში გაჩერება. როგორც წესი, საცხოვრებლის საუკეთესო მახასიათებლები ეგრევე იკვეთება, თანაც ბუნებრივად და არაფორმალურად — ეს სტილი ძალიან უხდება საცხოვრებლის აღწერილობას განცხადებაში.

    კარგად გაიაზრეთ და აღწერეთ თითოეული დეტალი

    „პირდაპირი გასასვლელი პლაჟზე და ოკეანის შესანიშნავი ხედები თითოეული ოთახიდან“, — აი, როგორ იწყებს მეთიუ იმ საცხოვრებლის აღწერას, რომელსაც სტუმრებს ნიკარაგუაში სთავაზობს.

    ოლგა, მასპინძელი მამოთ‑ლეიკსიდან (კალიფორნია), ყურადღებას ამახვილებს პარკირების მოსახერხებელ ადგილზე, რადგან საკუთარი გამოცდილებით იცის, რამდენად მნიშვნელოვანია ეს სათხილამურო აღჭურვილობის გადაადგილებისთვის. მასპინძელი იმასაც აღნიშნავს, რომ საცხოვრებელში შეშის ბუხარია, რომელიც ასე ძალიან უყვართ მოთხილამურეებს.

    წერეთ მოკლედ

    პოტენციური სტუმრები ხშირად სწრაფად ეცნობიან საცხოვრებლების აღწერილობებს, რომ მათთვის საჭირო პირობები იპოვონ, თუმცა თითოეულ სიტყვას გულდასმით არ კითხულობენ. ინტერნეტში მოკლე სიტყვა ფასობს, ამიტომ შეეცადეთ, სათქმელი არ გაიმეოროთ ხოლმე და აღნიშნოთ ის, რაც განცხადებაში მითითებული არ გაქვთ. არ დაგავიწყდეთ საყოფაცხოვრებო პირობების სია — აუცილებლად ჩამოთვალეთ ყველაფერი, რასაც სტუმრებს სთავაზობთ: Wi‑Fi ქსელი, პარკირების ადგილი, კონდიციონერი და ა.შ. ეს საშუალებას მისცემს სტუმრებს, ფილტრების დახმარებით იპოვონ თქვენი განცხადება.

    იყავით გულწრფელი

    საცხოვრებლის განსაკუთრებულობის ხაზგასმა, რა თქმა უნდა, მნიშვნელოვანია, თუმცა შეეცადეთ, არ გადააჭარბოთ. მკაფიოდ აღნიშნეთ როგორც მისი უნიკალური უპირატესობები, ისე თავისებურებები, რომ პოტენციურმა სტუმრებმა პირდაპირ გადაწყვიტონ, შეეფერებათ თუ არა თქვენ მიერ შეთავაზებული ვარიანტი.

    განსაკუთრებით მნიშვნელოვანია ადაპტირებული პირობების მითითება და ისეთი ასპექტების აღნიშვნა, რომლებიც ზოგიერთი სტუმრისთვის, შესაძლოა, სირთულეს წარმოადგენდეს. ამ ტიპის ინფორმაცია შეგიძლიათ დაურთოთ სექციებში „სხვა გასათვალისწინებელი“ და „საცხოვრებელი სივრცე“.

    „თუ საცხოვრებელში რაიმე უჩვეულოა, აუცილებლად აღნიშნეთ აღწერილობაში“, — ამბობს ნიკი, სუპერმასპინძელი სან‑ფრანცისკოდან და დასძენს: „შეეცადეთ, გულწრფელად და მკაფიოდ გადმოსცეთ, თუმცა მაინცდამაინც ნუ დააშინებთ სტუმრებს. აღწერილობა საკმარისად გამჭვირვალე უნდა იყოს, რომ სტუმრებმა სწორი არჩევანი გააკეთონ“.

    წარმოაჩინეთ თქვენი ინდივიდუალურობა

    მნიშვნელობა არ აქვს, რა ტიპის საცხოვრებელს სთავაზობთ სტუმრებს — ცალკე ოთახს თუ რამდენიმე ვილას — მათ აინტერესებთ მეტი თქვენ შესახებ, ამიტომ არ მოგერიდოთ აქა-იქ ინდივიდუალურობის დემონსტრირება.

    ისარგებლეთ ფოტოებისთვის წარწერების დამატების ფუნქციით

    როცა სტუმრები საცხოვრებლის დაჯავშნის შესახებ გადაწყვეტილებას იღებენ, ფოტოები ერთ‑ერთი მნიშვნელოვანი ფაქტორია, ამიტომ ისარგებლეთ ფოტოებისთვის წარწერების დამატების ფუნქციით, რომ ვიზუალურ მასალასთან ერთად შესაბამისი ინფორმაციაც მიაწოდოთ დაინტერესებულ პირებს. თუ ზუსტად არ იცით, რა წარწერა დაურთოთ ამა თუ იმ ფოტოს, დაფიქრდით, სტუმრებისთვის მნიშვნელოვანი რა ნიუანსების აღბეჭდვა არ შეუძლია კამერას.

    თუ ფოტოზე საწოლია, შეატყობინეთ სტუმრებს მისი ზომა და მატრასის ტიპი (საჭიროებისამებრ). მყუდრო საკითხავი კუთხეა აღბეჭდილი? მაშინ აღნიშნეთ, როგორი კარგია იქ საღამოს გატარება წიგნით ხელში.

    იპოვეთ შთაგონება სხვა განცხადებებში

    შთაგონების მისაღებად წაიკითხეთ საინტერესო საცხოვრებლების აღწერილობები. ამას გარდა, ისარგებლეთ შემთხვევით და გაეცანით სხვა მასპინძლების მიერ მიღებულ მიმოხილვებს, რომ გაარკვიოთ, კონკრეტულად რა მოსწონთ სტუმრებს. მნიშვნელობა არ აქვს, რა ტიპის საცხოვრებელს სთავაზობთ სტუმრებს, მასში აუცილებლად იქნება ის, რაც სხვებს ესიამოვნებათ და სწორედ ამ ნიუანსის ხაზგასმა გამოარჩევს თქვენს განცხადებას.

    სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

    ყველაზე მნიშვნელოვანი

    • გაამახვილეთ ყურადღება იმაზე, რაც სტუმრებისთვის შეთავაზებულ საცხოვრებელს გამოარჩევს

    • დაიცავით სიზუსტე საცხოვრებელთან დაკავშირებით, რომ სტუმრებს სათანადო მოლოდინი შეუქმნათ

    • განაახლეთ განცხადებაში მითითებული ინფორმაცია
    • დაიხმარეთ ჩვენი სრული გზამკვლევი ეფექტური განცხადების შესაქმნელად

    Airbnb
    18 ნოე, 2020
    სასარგებლო იყო?

    სხვა საინტერესო

    სხვა საინტერესო

    გაეცანით სხვა თემებს