განცხადების გაუმჯობესების ხერხები

საცხოვრებლის მსგავსად, განცხადებასაც პერიოდულად სჭირდება კოსმეტიკური რემონტი. რეგულარულად ჩაასწორეთ ფოტოები, საყოფაცხოვრებო პირობები და ფასი — ეს დაგეხმარებათ მეტი სტუმრის დაინტერესებაში და დასახული მიზნების უფრო სწრაფად მიღწევაში.

სტუმრობის ზოგიერთი მსურველი მეტ ყურადღებას ფოტოების თვალიერებას უთმობს, ვიდრე საცხოვრებლის აღწერილობის წაკითხვას. ისინი, როგორც წესი, მოელიან, რომ საცხოვრებელი ისეთივე იქნება, როგორც Airbnb‑ზე განთავსებულ ფოტოებშია.

თუ ბოლო დროს საცხოვრებელში რამე შეცვალეთ, გირჩევთ, ფოტოებიც განაახლოთ. ამას გარდა, ქვემოთ გიზიარებთ, სხვა რა შეგიძლიათ.

• შექმენით ფოტოტური ხელოვნური ინტელექტის ხელშეწყობით: ფოტოტურის მეშვეობით სტუმრები უკეთ წარმოიდგენენ საცხოვრებლის განლაგებას. ხელოვნური ინტელექტის მორგებული ალგორითმი ავტომატურად დაალაგებს საცხოვრებლის ფოტოებს 19 ტიპის ოთახებისა თუ სივრცეების მიხედვით. ამის შემდეგ ფოტოტურის შემოწმებისა და თითოეული ოთახისთვის დეტალური ცნობების დართვის საშუალება გექნებათ.

• დაურთეთ ფოტოებს აღწერილობები: აღნიშნეთ წარწერებში, რა დახვდებათ სტუმრებს განსაკუთრებული თითოეულ ოთახსა თუ სივრცეში, მაგალითად, ესპრესოს აპარატი სამზარეულოში ან უჩვეულოდ ღუნღულა პირსახოცები სააბაზანოში.

• იზრუნეთ კომპოზიციაზე ფოტოების გადაღებისას: დაარეგულირეთ ტელეფონის ან ფოტოაპარატის პარამეტრები იმგვარად, რომ ფოტოების გადაღებისას ბადის ხაზებით იხელმძღვანელოთ, ასევე, აირჩიეთ გამოსახულების მაღალი გარჩევადობა. გირჩევთ, გამორთოთ ბლიცი და ბუნებრივი განათება გამოიყენოთ. მონაცვლეობით დაამატეთ როგორც ფართო, ისე საშუალო და ახლო კადრით გადაღებული ფოტოები. სხვა რჩევები ფოტოების დამოუკიდებლად გადაღებასთან დაკავშირებით

• დაიქირავეთ ექსპერტი: თუ ფოტოების გადაღება თქვენი ძლიერი მხარე არ არის, მიმართეთ პროფესიონალს. ზოგიერთ რეგიონში Airbnb‑ც გთავაზობთ პროფესიონალური ფოტოგადაღების მომსახურებას.

სტუმრობის მსურველები განცხადების საშუალებით ეცნობიან თქვენ მიერ მათთვის შეთავაზებულ საცხოვრებელს. განცხადებისთვის მაქსიმალურად მეტი ინფორმაციის დართვა დაგეხმარებათ მეტი ჯავშნის მიღებაში.

• წარმოაჩინეთ პოპულარული საყოფაცხოვრებო პირობები: სტუმრობის მსურველები ხშირად ეძებენ საცხოვრებლებს სამზარეულოთი, Wi‑Fi კავშირითა და უფასო საპარკინგე ადგილით. ამას გარდა, მათ შეუძლიათ სხვა ფილტრების გამოყენებაც, მაგალითად, ისეთი საცხოვრებლების საპოვნელად, რომლებშიც შინაური ცხოველები დაიშვებიან, ანდაც საწოლების საჭირო რაოდენობისა თუ ზომების მისათითებლად.
• რეგულარულად განაახლეთ ინფორმაცია: სტუმრები მოელიან, რომ თქვენს განცხადებაში მითითებული ყველა საყოფაცხოვრებო პირობითა თუ ნივთით შეძლებენ სარგებლობას. აქედან გამომდინარე, თუ, მაგალითად, საცურაო აუზი ზამთარში მიუწვდომელია, მკაფიოდ აღნიშნეთ ამის შესახებ.
• მიანიჭეთ უპირატესობა სიმარტივეს: დაფიქრდით, როგორ შეუქმნათ სტუმრობის მსურველებს სათანადო მოლოდინი და შეეცადეთ, პასუხი გასცეთ მათ ყველა შესაძლო შეკითხვას. აღნიშნეთ ყველაფერი, რაც მათ უნდა იცოდნენ, სტუმრობამ მაქსიმალურად სასიამოვნოდ რომ ჩაიაროს.
• გაითვალისწინეთ სტუმრებისგან მიღებული გამოხმაურება: თუ, მაგალითად, რომელიმე სტუმარი პატიოთი მოიხიბლა და ამის შესახებ თავის მიმოხილვაშიც აღნიშნა, კარგად წარმოაჩინეთ პატიო ფოტოებში. თუ ვინმე უკმაყოფილო დარჩა საცხოვრებლის სიშორით აეროპორტიდან, უფრო დააკონკრეტეთ მდებარეობა.

სტუმრების მიერ გადასახდელი თანხის გარკვევა, შესაძლოა, დაგეხმაროთ სტუმრებისთვის ხელსაყრელი ფასის დაწესებაში. ჯამური ფასი მოიცავს ერთი ღამის ფასსა და თქვენ მიერ დაწესებულ დამატებით გადასახადებს (მაგ., დასუფთავებისთვის, დამატებითი სტუმრებისა თუ შინაური ცხოველებისთვის), ასევე, Airbnb‑ს მომსახურების გადასახადებსა და ოფიციალურ მოსაკრებლებს.

რაც უფრო კონკურენტუნარიანი ფასები გექნებათ დაწესებული, მით უფრო დიდი ალბათობით იქნება თქვენი განცხადება სხვებისგან გამორჩეული და ის უკეთეს პოზიციებზე მოხვდება ძიების შედეგებში. ალგორითმი პრიორიტეტს ანიჭებს როგორც საცხოვრებლის ჯამურ ფასს, ისე მის ხარისხს ადგილობრივ დონეზე სხვა მსგავს ვარიანტებთან შედარებით.

ზოგიერთი ხარჯი, რომელსაც ფასის განსაზღვრისას ითვალისწინებთ, შესაძლოა, პოტენციური სტუმრებისთვის ნაკლებად აშკარა იყოს. თუ მათ სთავაზობთ რაიმე განსაკუთრებულს — მაგალითად, ხელით დამზადებულ სააბაზანო საშუალებებს ან სტრიმინგული სერვისების დიდ არჩევანს — აუცილებლად აღნიშნეთ ამის შესახებ საცხოვრებლის აღწერილობაში, რომ სტუმრობის მსურველებს საცხოვრებელზე სათანადო წარმოდგენა შეექმნათ.