განცხადების გაუმჯობესების ხერხები

წარმატებულ მასპინძლებს საცხოვრებლისთვის ყოველთვის რაღაც ახლის შემატება სურთ, ასეთი დამოკიდებულებით კი განვითარების შესაძლებლობებსაც მუდმივად პოულობენ. განცხადების განახლება ნებისმიერ დროს შეგიძლიათ — წარმოაჩინეთ მასში პოპულარული საყოფაცხოვრებო პირობები და განახლებული სივრცეები, ან დააწესეთ უფრო კონკურენტუნარიანი ფასი.

არ იცით, საიდან დაიწყოთ? გაეცანით რამდენიმე იდეას:

შესაძლოა, სტუმრებმა აღწერილობა ყოველთვის არ წაიკითხონ, თუმცა დარწმუნებული იყავით, რომ გულდასმით დაათვალიერებენ სურათებს. აქედან გამომდინარე, თუ საცხოვრებელი ახალგარემონტებული გაქვთ, ახალი საყოფაცხოვრებო პირობები დაამატეთ, ან, უბრალოდ, ფოტოგადაღებაში მეტი დროისა და თანხის ინვესტირება გადაწყვიტეთ, აუცილებლად განაახლეთ ფოტოები განცხადებაში.

• პრიორიტეტი მიანიჭეთ გარეკანის ფოტოს. საძიებო შედეგებში პირველი სწორედ გარეკანის ფოტო ჩანს, ამიტომ მნიშვნელოვანია, რომ მან პოტენციური სტუმრების ყურადღება მიიპყროს.
• დაამატეთ მოკლე წარწერები. წარწერების მეშვეობით შეგიძლიათ სტუმრებს მნიშვნელოვანი ინფორმაცია მიაწოდოთ, მაგალითად, რა ზომისაა საწოლი მთავარ საძინებელში ან რა ფირმისაა ესპრესოს ყავის აპარატი სამზარეულოში.
  
• დაიქირავეთ ექსპერტი. პროფესიონალური ფოტოგადაღება საკუთარ ხარჯებს თავად ფარავს. შეამოწმეთ, გთავაზობთ თუ არა Airbnb პროფესიონალური ფოტოგადაღების მომსახურებას თქვენს რეგიონში.
• გადაიღეთ ფოტოები პროფესიონალივით. საცხოვრებლის ფოტოების გაუმჯობესების მრავალი ხერხი არსებობს, სმარტფონის გამოყენებითაც კი. ამ 5 რჩევის გათვალისწინებით დამოუკიდებლადაც შესანიშნავ ფოტოებს გადაიღებთ.

ეცადეთ, განცხადების ყველა დეტალი მაქსიმალურად ზუსტი და განახლებული იყოს. მაგალითად, თუ საერთო საცურაო აუზზე წვდომა აღარ გაქვთ, არ დაგავიწყდეთ მისი წაშლა შეთავაზებული საყოფაცხოვრებო პირობებიდან.

• გაამარტივეთ აღწერილობა. ცოტას თუ აქვს დრო, რომ ყველა დეტალს გაეცნოს, ამიტომ მთავარია, მიუთითოთ ის, რაც სტუმრებს ყველაზე მეტად აინტერესებთ.
• წარმოაჩინეთ მასპინძლობის თქვენეული სტილი. გამოცდილების მატებასთან ერთად, ალბათ, უკვე შეამჩნიეთ, რომ მასპინძლობის საკუთარი სტილი შეიმუშავეთ. დროა, თქვენი ინდივიდუალურობა განცხადების ყველა დეტალში იგრძნობოდეს.
• წერისას იფიქრეთ სტუმრებზე, რომელთა დაინტერესებაც გსურთ. მაგალითად, თუ ოჯახებს ან საქმიან მოგზაურებს მასპინძლობთ ხოლმე, წერეთ მათთვის შესაფერისი ტონით და ხაზიც იმ პირობებს გაუსვით, რომლებიც მათ ყველაზე მეტად დააინტერესებთ.

სტუმრებმა ფენის შესახებ იკითხეს? მიმოხილვებში აღნიშნეს, რომ ჩაიდანი არ დახვდათ? ეს გამოხმაურების შესანიშნავი მაგალითებია — გამოიყენეთ ისინი საყიდლების სიის შესადგენად და განაახლეთ საყოფაცხოვრებო პირობები, რომლებიც სტუმრებს განსაკუთრებით აინტერესებთ, მაგალითად:*

• აუზი
• Wi‑Fi კავშირი
• სამზარეულო
• უფასო საპარკინგე ადგილი
• ჯაკუზი
• სარეცხი მანქანა ან საშრობი
• კონდიციონერი ან გათბობა
• დამოუკიდებლად დაბინავების შესაძლებლობა
• სივრცე ლეპტოპით მუშაობისთვის
• შინაურ ცხოველებთან ერთად სტუმრობის შესაძლებლობა

თუ Airbnb‑ს მეშვეობით მასპინძლობა ახლახან დაიწყეთ, მეტი სტუმრის ყურადღება რომ მიიქციოთ, გირჩევთ, ერთ ღამეზე საბაზრო ღირებულებაზე დაბალი ფასი დააწესოთ, მასპინძლობის გამოცდილებისა და რამდენიმე დადებითი მიმოხილვის მიღების შემდეგ კი, მაქსიმალურად კონკურენტუნარიანი ტარიფის შესარჩევად, შეგიძლიათ საფასო პოლიტიკასაც გადახედოთ.

Airbnb‑ს ალგორითმი 100‑ზე მეტ ფაქტორს ითვალისწინებს იმისთვის, რომ ძიების შედეგებში სტუმრებს სასურველი განცხადებები შეხვდეთ.

გაითვალისწინეთ სტუმრებისგან მიღებული გამოხმაურება: რა მოეწონათ ყველაზე მეტად და რა დააკლდათ. განსაკუთრებული შთაბეჭდილება გარე პატიომ მოახდინა? წარმოაჩინეთ ის ფოტოებში. აღნიშნეს, რომ აეროპორტიდან საცხოვრებლამდე მისასვლელი გზა მოუხერხებელია? თუ ამ ტიპის ინფორმაციას განცხადების აღწერილობაში მკაფიოდ მიუთითებთ, მომავალ სტუმრებს სათანადო მოლოდინს შეუქმნით.

თუ მიღებულ გამოცდილებას განცხადებისა და საცხოვრებლის გაუმჯობესებისთვის გამოიყენებთ, შედეგიც არ დააყოვნებს: ჯავშნების რაოდენობა თანდათან გაიზრდება, სტუმრებიც უფრო კმაყოფილი იქნებიან და უკეთეს შეფასებებს მიიღებთ, რაც მნიშვნელოვნად დაგეხმარებათ სუპერმასპინძლის სტატუსის მოპოვებაში.