საფასო პოლიტიკის დასახვა

ფასის რეგულარული კორექტირება კონკურენტუნარიანობის შენარჩუნებაში დაგეხმარებათ. საფასო პოლიტიკის დასახვისას გაითვალისწინეთ ქვემოთ მოცემული რჩევები.

გადაწყვიტეთ, რა სიხშირით გსურთ ფასის გადახედვა და კორექტირება. ამასთან, გაითვალისწინეთ ქვემოთ რეკომენდებული მოქმედები, რომელთა შესრულებაც თქვენთვის სასურველი თანმიმდევრობით შეგიძლიათ.

• განბლოკეთ მეტი ღამე: კალენდარში განბლოკეთ ყველა თარიღი, რომლებშიც მასპინძლობა შეგიძლიათ. ამგვარად, განცხადება ძიების მეტ შედეგში მოხვდება, რაც საბოლოოდ მეტი შემოსავლის მიღებაში დაგეხმარებათ.
• ჩაასწორეთ სტუმრობის ხანგრძლივობები: იპოვეთ შუალედები ჯავშნებს შორის. თუ შუალედები თქვენ მიერ განსაზღვრულ სტუმრობის მინიმალურ ხანგრძლივობაზე ნაკლები აღმოჩნდება, ვერავინ შეძლებს მათ დაჯავშნას. კონკრეტულ თარიღებში სტუმრობის მინიმალური ხანგრძლივობის შემცირება ხელს შეგიწყობთ კალენდრის შევსებაში.
• შეადარეთ მსგავსი საცხოვრებლები: თქვენ მახლობლად დაჯავშნილი და დაუჯავშნელი საცხოვრებლების ფასების შემოწმება კონკურენტუნარიან ფასზე შეჯერებაში დაგეხმარებათ.

„მსგავსი საცხოვრებლების ფასებს ვეცნობი, ჩემსას რომ შევადარო. ხელსაყრელი ფასი არც ძალიან მაღალი უნდა იყოს და არც ზედმეტად დაბალი“, — გვიზიარებს კარენი, სუპერმასპინძელი ნელსონიდან (კანადა).

ამას გარდა, ნებისმიერ დროს შეგიძლიათ გონივრული ფასწარმოქმნის გააქტიურება, ფასები ავტომატურად რომ განისაზღვროს ადგილობრივ დონეზე არსებული მოთხოვნის მიხედვით. აღნიშნული ხელსაწყო განსაკუთრებით სასარგებლოა, თუ გსურთ, ოპტიმალური ფასები გქონდეთ, მაგრამ მათი მუდმივი მონიტორინგის საშუალება არ გაქვთ.

ზოგჯერ ყველაზე მოთხოვნადი საცხოვრებლების შემთხვევაშიც კი მცირდება ჯავშნების რაოდენობა. ქვემოთ გთავაზობთ არასეზონზე განცხადებისადმი ყურადღების მიქცევის რამდენიმე ხერხს.

• დააწესეთ ფასდაკლებები: ერთ კვირასა და თვეზე დაწესებული ფასდაკლებები დაგეხმარებათ კალენდრის შევსებასა და სტუმრების ხშირი ცვლით გამოწვეული საზრუნავის შემცირებაში. მეორე მხრივ, ბოლო წუთის ფასდაკლებები დააინტერესებს დაგეგმილ დაბინავებამდე 1‑28 დღით ადრე აფორმებს ჯავშნებს.
• შეამცირეთ დრო დაბინავებამდე: რაც უფრო მცირე იქნება დაბინავებამდე განსაზღვრული დრო, მით უფრო მეტი ალბათობით მიიღებთ ჯავშნებს. აირჩიეთ დრო, რომელიც გჭირდებათ ჯავშნის გაფორმებიდან სტუმრის დაბინავებამდე. შეგიძლიათ, სტუმრობის მსურველებს ჯავშნის გაფორმების დღესვე დაბინავების საშუალებაც კი მისცეთ.
• დაუშვით უფრო ხანმოკლე სტუმრობები: მინიმალური ხანგრძლივობის შემცირებით მოკლე ხნით სტუმრობის მსურველებს დააინტერესებთ. სტუმრობის მინიმალური ხანგრძლივობის განსაზღვრა იმის მიხედვითაც შეგიძლიათ, თუ კვირის რომელ დღეს იგეგმება დაბინავება.

„შედარებით ხანმოკლე სტუმრობები სულ უფრო პოპულარული ხდება“, — ამბობს ჯიმი, სუპერმასპინძელი პალმ‑სპრინგზიდან (კალიფორნია, აშშ), და დასძენს: „როგორც წესი, ესენი ბოლო წუთს სპონტანურად გაფორმებული ჯავშნებია, ორი დღით დასასვენებლად. მოქნილი პირობები ყველას მოსწონს“.

Airbnb‑ზე არაერთი ხელსაწყოა, რომლებიც დაგეხმარებათ, სტუმრობაზე გაზრდილი მოთხოვნის პერიოდებში მაქსიმალური სარგებელი მიიღოთ. გავიხსენოთ რამდენიმე ტაქტიკა.

• დააწესეთ ფასდაკლება ადრეულ დაჯავშნაზე: ის გავრცელდება დაგეგმილ დაბინავებამდე 1‑24 თვით ადრე გაფორმებულ ჯავშნებზე და დაგეხმარებათ სტუმრობის იმ მსურველების დაინტერესებაში, რომლებიც ყველაფერს წინასწარ გეგმავენ. მინიმუმ 3%‑იანი ფასდაკლებების შემთხვევაში, ძიების შედეგებსა და განცხადების გვერდზე განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.
• დააწესეთ ინდივიდუალური პრომოაქცია: პრომოაქციები კონკრეტულ პერიოდებში მეტი ჯავშნის მიღების შესანიშნავი ხერხია. მინიმუმ 15%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. პრომოაქციის დასაწესებლად უნდა აკმაყოფილებდეთ გარკვეულ მოთხოვნებს (მაგალითად, გასული წლის განმავლობაში მიღებული გქონდეთ მინიმუმ ერთი ჯავშანი).
• გაახანგრძლივეთ ხელმისაწვდომი პერიოდი: კალენდრის განბლოკვა შესაძლებელია ორი წლით წინასწარაც კი. ამგვარად, თქვენი განცხადება ძიების მეტ შედეგში მოხვდება, თანაც ის უფრო შესამჩნევი იქნება იმ პერიოდებში, როცა არც ისე ბევრი სხვა საცხოვრებელია დასაჯავშნად ხელმისაწვდომი.

„ზოგჯერ საზაფხულო ჯავშნებს ერთი წლით ადრეც კი ვიღებ, ან საშობაოდ — ექვსი თვით ადრე“, — აღნიშნავს ენი, სუპერმასპინძელი ტარაგონიდან (ესპანეთი) და დასძენს: სტუმრები, როგორც წესი, არ აუქმებენ დიდი ხნით ადრე გაფორმებულ ჯავშნებს და ესეც მნიშვნელოვანია, რადგან შესაძლებელი ხდება მომავლის წინასწარ დაგეგმვა“.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

ინტერვიუებში მონაწილეობისთვის მასპინძლებმა კომპენსაცია მიიღეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.