ზრუნვა სტუმრებზე, რომლებიც დისტანციურად მუშაობენ

დისტანციურად მუშაობას სულ უფრო მეტი ადამიანი იწყებს და შევნიშნეთ, რომ მოგზაურობის კუთხითაც ბევრი რამ მნიშვნელოვნად იცვლება. ასეთ მომავალში კიდევ უფრო მეტ სტუმარს დააინტერესებს საცხოვრებლები, რომლებშიც დისტანციურად მუშაობისთვის კარგი პირობები ექნებათ.

ქვემოთ გთავაზობთ რჩევებს, თუ როგორ შესთავაზოთ სტუმრებს საჭირო საყოფაცხოვრებო პირობები, მოაწყოთ სამუშაო სივრცე და იზრუნოთ საცხოვრებლის პოპულარიზაციაზე.

დისტანციურად მომუშავე სტუმრებს სწრაფი და საიმედო Wi‑Fi სჭირდებათ ვიდეოზარებისა თუ სხვა საქმეებისთვის.

Wi‑Fi კავშირის სიჩქარის შემოწმება Airbnb‑ს აპიდანვე შეგიძლიათ, მიღებულ შედეგს კი პირდაპირ გამოაქვეყნებთ განცხადებაში.

თუ ზოგან სიგნალი სუსტია, გირჩევთ, გამოიყენოთ გამაძლიერებლები. Wi‑Fi კავშირის სიჩქარის გასაკონტროლებლად, ასევე, კარგი იქნება, იცოდეთ, როგორ შეამოწმოთ როუტერი დისტანციურად.

Wi‑Fi კავშირის სიჩქარის შემოწმება

ძიებისას სტუმრებს განსაკუთრებით აინტერესებთ სამუშაო სივრცე, მისი მოწყობა კი არც ისე რთულია. ამისთვის საცხოვრებელში უნდა იყოს მაგიდა, რომელიც მხოლოდ სამუშაოდ გამოიყენება, როზეტი და კომფორტული სკამი.

დისტანციურად მომუშავე წყვილებს, შესაძლოა, ინდივიდუალური სივრცეები დასჭირდეთ, ამიტომ გირჩევთ, ორი სამუშაო სივრცე მოაწყოთ. არანაკლებ მნიშვნელოვანია, სტუმრობის მსურველებს მკაფიო ინფორმაცია მიაწოდოთ. არ დაგავიწყდეთ, აირჩიოთ სამუშაო სივრცე განცხადების „საყოფაცხოვრებო პირობების“ სექციაში, ასევე, წარმოაჩინოთ შეთავაზებული სამუშაო სივრცეები განცხადების აღწერილობაში, ფოტოებსა თუ წარწერებში.

დისტანციურად მომუშავე სტუმრებს სამუშაო სივრცის გარეშეც შეგიძლიათ დაეხმაროთ. „სამზარეულოს ერთ მაგიდასთან სკამებს ოფისის რბილი გორგოლაჭებიანი სავარძლით ვანაცვლებ, სტუმრებს სამუშაო პირობები რომ შევუქმნა“, — აღნიშნავს ემილია, სუპერმასპინძელი ორონოდან (მენი), და დასძენს: „ერთი სკამიც კი ბევრ რამეს ცვლის“.

სამუშაო სივრცის გარდა, სტუმრებისთვის დიდი მნიშვნელობა აქვს დამატებით შტრიხებსაც, რომლებიც ნაყოფიერი მუშაობისთვის სასიამოვნო გარემოს ქმნის.

აი, კიდევ რა შეგიძლიათ შესთავაზოთ:

• ალტერნატიული სამუშაო სივრცეები. მისაღები ოთახი, სასადილო ოთახი და პატიო კარგი ვარიანტებია სტუმრებისთვის განსხვავებული გარემოს შესათავაზებლად. სივრცეც საკმარისი იქნება, რომ რამდენიმე ადამიანმა ერთდროულად იმუშაოს.
• ერგონომიული გადაწყვეტა. ლეპტოპის სადგამი, ოფისის ერგონომიული სკამი და ფეხის დასადები პატარა რეგულირებადი სკამი სტუმრებს ხანგრძლივი სამუშაო დღის სასიამოვნოდ გატარებაში დაეხმარება.
• კარგი განათება. ფანჯრები ან მინის კარები იდეალურ ბუნებრივ განათებას იძლევა, თუმცა სამუშაო სივრცის გასანათებლად მაგიდის ნათურაც გამოდგება.
• ყავის აპარატი და ჩაიდანი: სტუმრები ნამდვილად დააფასებენ დილით ყავის მომზადების შესაძლებლობას. სტუმრებს განსაკუთრებული მზრუნველობა რომ აგრძნობინონ, ზოგიერთი მასპინძელი მათ ჩაის და ყავასაც კი ახვედრებს. ელსი, ბლოგერი და სუპერმასპინძელი ნეშვილიდან (ტენესი), გირჩევთ, რომ სტუმრებს შესთავაზოთ ყავის მომზადების რამდენიმე ვარიანტი (მაგალითად, ფრენჩ‑პრესი და ავტომატური ყავის აპარატი).
• საოფისე ნივთები. ისეთი უბრალო ნივთებიც გამოსადეგია, როგორიცაა ახალი კალმები და ბლოკნოტები, მეტი ყურადღების მისაქცევად კი პრინტერის შეთავაზებაც შეგიძლიათ.
• ტექნიკა. სამუშაო სივრცის გასაუმჯობესებლად კარგი ვარიანტებია, მაგალითად, კომპიუტერის მონიტორი, ჭკვიანი დინამიკები და ტელეფონის დამატებითი დამტენები.
• ფონი ვიდეოზარებისთვის. სტუმრებს, რომლებიც ხშირად მონაწილეობენ ვიდეოკონფერენციებში, ნამდვილად მოეწონებათ სამუშაო სივრცეში საინტერესო ფონი (მაგალითად, მცენარეები ან ნახატი).
• უხმაურო გარემო. ხმაურის დონის შესამცირებლად დაამატეთ ფარდები, ხალიჩები, საბნები, ბალიშები და სხვა ქსოვილები.

დისტანციურად მუშაობისთვის კომფორტული გარემოს შექმნის შემდეგ მნიშვნელოვანია, ამის შესახებ სტუმრებს აცნობოთ. არ დაგავიწყდეთ, განაახლოთ განცხადების აღწერილობა, საყოფაცხოვრებო პირობები და ფოტოები.

• გამოიყენეთ საძიებო ფილტრები თქვენ სასარგებლოდ. საცხოვრებლების ძიებისას მრავალი სტუმარი იყენებს ფილტრებს სასურველი ვარიანტების საპოვნელად, ამიტომ განცხადებაში აუცილებლად მიუთითეთ სამუშაო სივრცე და ყველა სხვა საყოფაცხოვრებო პირობა, რომელსაც სთავაზობთ.
• განაახლეთ ფოტოები და წარწერები. თუ სტუმრებს სამუშაო სივრცეებს სთავაზობთ, არ დაგავიწყდეთ, დაურთოთ სურათები, რადგან აღწერილობის წაკითხვამდე ისინი საცხოვრებლის ფოტოებს ამოწმებენ ხოლმე. გაეცანით რჩევებს შესანიშნავი ფოტოების გადასაღებად.
• აგრძნობინეთ სტუმრებს, როგორი იქნება თქვენთან სტუმრობა. საცხოვრებლის აღწერილობა უნდა ასახავდეს, რა პირობებს სთავაზობთ დისტანციურად მომუშავე სტუმრებს. მეტი ყურადღება რომ მიიქციოთ, ამის შესახებ შეგიძლიათ განცხადების სათაურშიც მიუთითოთ.

სტუმრებს სათანადოდ მომზადებაში რომ დაეხმაროთ, სასურველია, მისწეროთ კიდეც, სანამ დააბინავებთ (მაგალითად, შეახსენეთ, რომ საცხოვრებელში დახვდებათ ყავა ან კომპიუტერის მონიტორი).

ვიმედოვნებთ, რომ ამ რჩევების დახმარებით დისტანციურად მომუშავე სტუმრების საჭიროებებს უკეთ გაითვალისწინებთ და ყველას სასიამოვნო გარემოს შეუქმნით ნაყოფიერი მუშაობისთვის.