შემოთავაზებულ შედეგებზე წვდომისთვის გადადით წინ

    საცხოვრებლის ფოტოების გაუმჯობესება

    ორი პროფესიონალი ფოტოგრაფი გიზიარებთ Airbnb საცხოვრებლის უკეთ წარმოჩენის ხუთ ხერხს.
    ავტორი: Airbnb (26 ივლ, 2022)
    6‑წუთიანი საკითხავი
    განახლების თარიღი: 26 ივლ, 2022

    ყველაზე მნიშვნელოვანი

    • გარეკანისთვის აირჩიეთ სურათი, რომელიც წარმოაჩენს საცხოვრებლის ხასიათს

    • მოაცილეთ ზედმეტი ნივთები, გადაიღეთ კადრები პირდაპირი რაკურსით და კარგად მოიფიქრეთ კომპოზიცია

    • დაიხმარეთ ჩვენი სრული გზამკვლევი მასპინძლობის დონის ასამაღლებლად

      იცოდით, რომ ფოტოები ერთ‑ერთი ძირითადი ფაქტორია, რომლითაც სტუმრები საცხოვრებლის შერჩევისას ხელმძღვანელობენ? ამასთან, ფოტოების ხარისხი შეიძლება განაპირობებდეს, რამდენად ხშირად ხვდება თქვენი განცხადება უკეთეს პოზიციებზე ძიების შედეგებში. სწორედ ამიტომ არის მაღალხარისხიანი ფოტოები უაღრესად მნიშვნელოვანი მასპინძლობის ბიზნესის განსავითარებლად.

      ჯეფი და კანდიდა პროფესიონალი ფოტოგრაფები და სუპერმასპინძლები არიან. შემოქმედებითი მიდგომა ეხმარება მათ, მეტი სტუმარი დააინტერესონ „El Rancho“‑თი — საცხოვრებლით, რომელიც ჯოშუა‑ტრიში, კალიფორნიაში, შუა უდაბნოში მდებარეობს. მათი საიდუმლო მარტივია: ფოტოებზე საცხოვრებელი ისევე ლამაზად უნდა გამოიყურებოდეს, როგორც სინამდვილეში.

      ამ სტატიიდან შეიტყობთ, რას გვირჩევენ ჯეფი და კანდიდა განცხადებისთვის უკეთესი ფოტოების გადაღებასთან დაკავშირებით.

      1. მოაცილეთ ზედმეტი ნივთები

      მოაწესრიგეთ საცხოვრებელი მისთვის ფოტოების გადაღებამდე. „გვიკვირს, რამდენს ავიწყდება ფოტოგადაღებამდე ზედმეტი ნივთების მოცილება“ — ამბობს ჯეფი და დასძენს: „სასურველი კადრები მარტივად რომ გამოგვივიდეს, ჯერ იქაურობას ვალაგებთ“.

      ეს, რა თქმა უნდა, არ ნიშნავს, რომ ოთახები სულ ცარიელი უნდა იყოს. „ოდნავ გამოაცოცხლეთ კადრი“, — გვიზიარებს კანდიდა, შემდეგ კი დასძენს: „მაგალითად, გამოაჩინეთ კადრში პლედი ან ერთმანეთზე დაწყობილი რამდენიმე წიგნი, რაც უფრო სასიამოვნოდ წარმოაჩენს საცხოვრებელ სივრცეს“.

      2. კარგად შეარჩიეთ გარეკანის ფოტო

      სწორედ მას დაინახავენ სტუმრობის მსურველები პირველად ძიების შედეგებსა და განცხადების გვერდზე. გამოიყენეთ ეს შანსი შესანიშნავი შთაბეჭდილების მოსახდენად.

      „დაფიქრდით, რას სთავაზობთ განსხვავებულს, რით გამოირჩევა საცხოვრებელი და გადმოსცემს თუ არა ფოტო ყოველივე ამას. საინტერესო და სასარგებლო გადაწყვეტილებების საპოვნელად გაეცანით სხვა განცხადებებს Airbnb‑ზე”, — გვირჩევს კანდიდა.

      აუცილებლად აღბეჭდეთ ზონები, რომლებმაც შეიძლება დააინტერესოს პოტენციური სტუმრები — მაგალითად, გადაიღეთ საცხოვრებლის გარე ტერიტორიის ფართო კადრი.

      3. შეარჩიეთ სწორი განათება

      „შესანიშნავი კადრის საიდუმლო სწორი განათებაა“, — გვარწმუნებს კანდიდა. აქვე გიზიარებთ რჩევებს, ფოტოგადაღებისთვის საჭირო განათება რომ იპოვოთ:

      • თვალი ადევნეთ განათებას. დააკვირდით, როგორ გამოიყურება საცხოვრებელი შიგნიდან თუ გარედან დღის სხვადასხვა მონაკვეთში.
      • გადაიღეთ ფოტოები შებინდებისას ან გამთენიისას. გარედან გადაღებული კადრები ყველაზე კარგად გამოდის ზუსტად მზის ჩასვლის წინ ან მზის ამოსვლის შემდეგ. განათება ამ დროს უფრო რბილი და არაპირდაპირია, რაც ფოტოებს სასიამოვნო თბილ ტონს სძენს.
      • შეაჩერეთ არჩევანი ბუნებრივ განათებაზე. გადაიღეთ საცხოვრებლის ინტერიერი დღის იმ მონაკვეთში, როცა მასში პირდაპირი, ბუნებრივი განათება შემოდის. ხელოვნური განათება ფოტოებში ზედმეტად ყვირის, ამიტომ მას მხოლოდ უკიდურეს შემთხვევაში მიმართეთ.
      • გამორთეთ ბლიცი. ხელოვნური განათების მსგავსად, არც ბლიცის გამოყენებაა რეკომენდებული, რადგან ის ზედმეტად მკვეთრია. თუ კონკრეტულ სივრცეში ბუნებრივი სინათლე საერთოდ არ შემოდის, ჩართეთ სანათი სიმყუდროვის განცდის შესაქმნელად.

      4. შეიმუშავეთ კომპოზიცია

      ფოტოს მაღალ ხარისხს განაპირობებს არა მხოლოდ სწორად შერჩეული ობიექტი, არამედ კომპოზიციაც: ორიენტაცია, ზომა, ნივთების განლაგება და სიმეტრია. გთავაზობთ რამდენიმე რჩევას ამ კუთხით:

      • იზრუნეთ ცენტრირებაზე. გახსოვდეთ, რომ განცხადებასა და ძიების შედეგებში ფოტოების სათანადოდ წარმოსაჩენად Airbnb მათ გვერდებს აჭრის. მოაქციეთ ძირითადი ობიექტი კადრის ცენტრში, რომ ჩამოჭრისას მნიშვნელოვანი არაფერი დაიკარგოს. „ელემენტები, რომლებიც განსაკუთრებით მოგწონთ, ფოტოს შუაში უნდა იყოს“, — ამბობს ჯეფი.
      • გადაიღეთ პირდაპირი რაკურსით. არ დახაროთ კამერა, რომ თავიდან აიცილოთ კუთხეების დამახინჯება, უზრუნველყოთ ბალანსი და მაქსიმალურად რეალისტურად წარმოაჩინოთ სივრცე.
      • გამოიყენეთ მესამედების წესი. „გაყავით კადრი სამ ტოლ ნაწილად და ამის მიხედვით შექმენით კომპოზიცია“, — გვიხსნის ჯეფი.
      • გადაიღეთ სხვადასხვაგვარი ფოტოები. ფართო კადრები იდეალურია ოთახის ზომის შესახებ წარმოდგენის შესაქმნელად, საშუალო კი — კონკრეტული ობიექტების (მაგალითად, ტელევიზორის ან ველოტრენაჟორის) ფოკუსში მოსაქცევად. ახლო კადრით შეგიძლიათ გადაიღოთ მცირე დეტალები, რომლებიც ხასიათს სძენს საცხოვრებელს.
      • მოჰყევით ამბავი. წარმოიდგინეთ, რომ ფოტოგალერეა ერთგვარი ექსკურსიაა, შემდეგ კი, შეეცადეთ ფოტოების მეშვეობით აჩვენოთ პოტენციურ სტუმრებს, როგორ უკავშირდება ოთახები ერთმანეთს.

      5. წარმოაჩინეთ საცხოვრებელი

      სანამ ფოტოების გადაღებას შეუდგებით, წარმოიდგინეთ თავი სტუმრის ადგილას.

      „შეარჩიეთ კადრები, რომლებიც საუკეთესოდ გადმოსცემს თქვენს ამბავს“, — ამბობს კანდიდა და დასძენს: „თქვენი აზრით, რა მოეწონებათ სტუმრებს საცხოვრებელში? რა მოულოდნელობების შესახებ უნდა იცოდნენ? დაფიქრდით, როგორ ასახოთ დეტალები ისე, რომ ზოგადი წარმოდგენაც შეუქმნათ სტუმრებს კონკრეტული ოთახის შესახებ“.

      გახსოვდეთ, რომ ამბის მოყოლისას გარემოს წარმოჩენაც მნიშვნელოვანია. „არ არის აუცილებელი მხოლოდ სახლს გადაუღოთ ფოტოები“, — აღნიშნავს ჯეფი. მაგალითად, შეგიძლიათ გადაუღოთ ფოტო ახლომდებარე სალაშქრო ბილიკის ან პატარა კაფეს, რომელიც ორ ნაბიჯზეა.

      რაც მთავარია, გამოიყენეთ მხოლოდ მაღალხარისხიანი ფოტოები საცხოვრებლისა თუ უბნის წარმოსაჩენად. მათი მეშვეობით პოტენციური სტუმრები უკეთ წარმოიდგენენ, როგორი იქნება თქვენთან სტუმრობა და, სავარაუდოდ, ჯავშნის გაფორმებასაც გადაწყვეტენ.

      სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.


      ყველაზე მნიშვნელოვანი

      • გარეკანისთვის აირჩიეთ სურათი, რომელიც წარმოაჩენს საცხოვრებლის ხასიათს

      • მოაცილეთ ზედმეტი ნივთები, გადაიღეთ კადრები პირდაპირი რაკურსით და კარგად მოიფიქრეთ კომპოზიცია

      • დაიხმარეთ ჩვენი სრული გზამკვლევი მასპინძლობის დონის ასამაღლებლად

        Airbnb
        26 ივლ, 2022
        სასარგებლო იყო?

        სხვა საინტერესო

        სხვა საინტერესო

        გაეცანით სხვა თემებს