წარმოგიდგენთ „განცხადებების“ ჩანართს

განცხადების მართვის შესაძლებლობა უაღრესად მნიშვნელოვანია მასპინძლებისთვის, რომელთაც სურთ, სტუმრებს საცხოვრებლის შესახებ სრული ინფორმაცია მიაწოდონ. როგორც პრაქტიკა აჩვენებს, იმ განცხადებების მასპინძლები, რომლებშიც შედარებით ვრცელი ინფორმაციაა მითითებული, დაახლოებით 20%‑ით მეტ ჯავშანს იღებენ. სამწუხაროდ, მრავალ განცხადებას აკლია სტუმრებისთვის საგულისხმო ცნობები, რადგან მათი დამატება ზედმეტად რთული იყო.

ჩვენ გადავწყვიტეთ, გამოვასწოროთ ვითარება და სწორედ ამიტომ, წარმოგიდგენთ ჩანართს „განცხადებები“, რომელზეც თავმოყრილია ხელსაწყოთა ახალი ნაკრები განცხადების სამართავად და საცხოვრებლის სხვადასხვა ასპექტის წარმოსაჩენად.

გაგაცნობთ „განცხადებების“ ახალი ჩანართის მთავარ ფუნქციებს:

• განცხადების რედაქტორი გაგიმარტივებთ საცხოვრებლის შესახებ სხვადასხვა ცნობის (მათ შორის, საყოფაცხოვრებო/საძილე პირობებისა და ა.შ.) დამატებას. სახეცვლილ ინტერფეისში იმ ინფორმაციის ჩასწორებაც მარტივია, რომელიც სტუმრებმა დაბინავებამდე უნდა იცოდნენ.
• ფოტოტური ხელოვნური ინტელექტის საფუძველზე დაგეხმარებათ, მყისიერად შექმნათ საცხოვრებლის ფოტოტური. ფოტოები ავტომატურად დალაგდება ოთახების მიხედვით, რაც დაეხმარება სტუმრებს, უფრო ცხადად წარმოიდგინონ საცხოვრებლის განლაგება. ფოტოტურის ჩასწორებასა და თითოეული ოთახისთვის საყოფაცხოვრებო პირობების მითითებას ნებისმიერ დროს შეძლებთ.
• გონიერი საკეტების ინტეგრაცია საშუალებას მოგცემთ, დააკავშიროთ თავსებადი გონიერი საკეტები თქვენს ანგარიშს Airbnb‑ზე, რის შემდეგაც თითოეული ჯავშნისთვის უნიკალური კოდი ავტომატურად შეიქმნება.

შეხებით აირჩიეთ „განცხადებების“ ჩანართი, რომელიც მოცემულია სანავიგაციო ზოლის ცენტრალურ ნაწილში. თქვენ მოხვდებით განცხადების რედაქტორში. ამ სახეცვლილი ხელსაწყოს საშუალებით უფრო მარტივად დაამატებთ ინფორმაციას განცხადებას და შეიტყობთ, როგორ ჯობს სხვადასხვა დეტალის მითითება.

განცხადების რედაქტორი შედგება ორი სექციისგან:

• შეთავაზებული საცხოვრებელი არის სექცია, რომლიდანაც შეგიძლიათ თქვენი განცხადების გვერდის მართვა და საცხოვრებელთან დაკავშირებით სხვადასხვა ცნობის მითითება.

• დაბინავების გზამკვლევი საშუალებას გაძლევთ, მიუთითოთ ცნობები, რომლებიც სტუმრებმა დაბინავებამდე უნდა იცოდნენ.

აქ შეგიძლიათ მიუთითოთ სხვადასხვა ცნობა საცხოვრებელთან დაკავშირებით (მაგალითად, განცხადების სათაური, საცხოვრებლის აღწერილობა და საყოფაცხოვრებო პირობები).

საყოფაცხოვრებო პირობების მითითება
განცხადებაში საყოფაცხოვრებო პირობების მითითება ასეთი მარტივი ჯერ არასდროს ყოფილა. გადადით საყოფაცხოვრებო პირობების სექციაზე, შემდეგ კი შეხებით აირჩიეთ პლუსის ნიშანი. თქვენთვის ასარჩევად წარმოდგენილი იქნება დაახლოებით 150 საყოფაცხოვრებო პირობა — მათი დალაგება შეგიძლიათ ანბანურად ან კატეგორიების (მაგალითად, გართობა, ოჯახისთვის, გარე და ა.შ.) მიხედვით. ამას გარდა, კონკრეტული საყოფაცხოვრებო პირობის პოვნა შეგიძლიათ სახელითაც — ჩამონათვალში ძებნა რომ არ დაგჭირდეთ. აირჩიეთ დამატება იმ საყოფაცხოვრებო პირობის გვერდით, რომელიც არის საცხოვრებელში.

ფოტოტურის შექმნა
განცხადება იშვიათად არის საინტერესო მაღალხარისხიანი ფოტოების გარეშე. ისინი სტუმრების ყურადღებას იქცევს და მეტი ჯავშნის მიღებაში გეხმარებათ.

ხელოვნურ ინტელექტზე დაფუძნებული ფოტოტურის ახალი ფუნქცია დაგეხმარებათ, მყისიერად შექმნათ ფოტოტური საცხოვრებლის ფოტოებისგან, რაც სტუმრობის მსურველებს უკეთეს წარმოდგენას შეუქმნის საცხოვრებლის განლაგებაზე. ამისთვის საკმარისია, შეხებით აირჩიოთ ფოტოტურის შექმნა. სულ ეს არის.

ხელოვნური ინტელექტის მორგებული ალგორითმი ავტომატურად ამოიცნობს საცხოვრებლის შიგნიდან და გარედან გადაღებულ ფოტოებს, შემდეგ კი თითოეულ ფოტოს მიაკუთვნებს ოთახებისა თუ სივრცეების 19 ტიპიდან ერთ‑ერთს.

ამის შემდეგ საშუალება გექნებათ, მიუთითოთ დეტალური ინფორმაცია თითოეულ ოთახთან დაკავშირებით. მაგალითად, შეძლებთ, აღნიშნოთ, რომ საძინებელში არის ძალიან დიდი ორადგილიანი საწოლი, ან რომ მისაღებ ოთახში ტელევიზორი დგას. ამას გარდა, ადაპტირებული პირობების აღნიშვნასაც შეძლებთ საგანგებო მითითებების შესაბამისად.

ფოტოტურის ჩასწორებას ნებისმიერ დროს შეძლებთ. ფოტოების წაშლა, გადაადგილება ან დამატება საჭიროებისამებრ შეგიძლიათ. თუ შესწორებები შეიტანეთ და შედეგის ნახვა გსურთ, შეეხეთ ჩვენების ღილაკს.

აქ შეძლებთ დაამატოთ ცნობები, რომლებიც სტუმრებმა ჯავშნის გაფორმებიდან დაბინავებამდე პერიოდში უნდა იცოდნენ, მაგალითად, საცხოვრებელში შესვლის დრო, განსაკუთრებული მითითებები საცხოვრებლამდე მისასვლელ გზასთან დაკავშირებით ან პარკირების კუთხით გასათვალისწინებელი ინფორმაცია. ამას გარდა, ამიერიდან დაბინავებასთან დაკავშირებული ინფორმაციის ნახვას შეძლებთ ზუსტად ისე, როგორც მას სტუმრები ხედავენ. ამისთვის შეეხეთ ჩვენების ღილაკს.

დაბინავებასთან დაკავშირებული ცნობების მითითება
დაბინავების გზამკვლევის სახით მარტივად გაუზიარებთ საცხოვრებელში შესვლასთან დაკავშირებულ ინფორმაციას სტუმრებს, რომლებმაც უკვე გააფორმეს ჯავშანი. დაბინავების მეთოდისა და დროის, ასევე, საცხოვრებლამდე მისასვლელი გზის, სტუმრის ცნობარის, Wi‑Fi ქსელის მონაცემებისა და სხვა ინფორმაციის დამატებასა თუ ჩასწორებას ერთი სივრციდან შეძლებთ.

გონიერი საკეტის დაკავშირება
მალე საშუალება გექნებათ, დააკავშიროთ გონიერი საკეტი თქვენს ანგარიშს Airbnb‑ზე, რის შემდეგაც თითოეული ჯავშნისთვის უნიკალური კოდი ავტომატურად შეიქმნება. სტუმრობებს შორის კოდების ხელით შეცვლა აღარ მოგიწევთ.

სტუმრები კოდისა და მისი შეყვანის ინსტრუქციის გაცნობას Airbnb‑ზე, ჯავშნის დეტალებში შეძლებენ. კარის კოდი მათ ელფოსტითაც მიუვათ ჯავშნის გაფორმების შემდეგ, ხოლო დაბინავების დროის მოახლოებისას გავაფრთხილებთ. თითოეული კოდი მოქმედი იქნება კონკრეტული სტუმრობის განმავლობაში. კოდები მოქმედებას წყვეტს საცხოვრებლიდან გასვლის დაგეგმილი დროიდან 30 წუთის შემდეგ, თუ მათი მოქმედების ვადას ხელით არ შეცვლით კონკრეტული სტუმრებისთვის.

გონიერი საკეტების ინტეგრაციის შესაძლებლობა ეტაპობრივად გახდება ხელმისაწვდომი 2024 წლის პირველ ნახევარში — პირველ ეტაპზე აშშ‑სა და კანადაში მდებარე საცხოვრებლების მასპინძლებს შეეძლებათ Schlage‑ს ფირმის ზოგიერთი საკეტის ინტეგრირება. როცა აღნიშნული ფუნქცია თქვენთან ხელმისაწვდომი გახდება, ის დაბინავების მეთოდების ჩამონათვალში მიეთითება. Airbnb‑ზე თქვენს განცხადებასთან გონიერი საკეტის დასაკავშირებლად შესაბამის ინსტრუქციას მოგაწვდით.

„განცხადებების“ ჩანართი შემოთავაზებულია Airbnb‑ს 2023 წლის ზამთრის განახლების ფარგლებში. ის ამჟამად ხელმისაწვდომია მასპინძლებისთვის, რომლებსაც მაქსიმუმ ექვსი განცხადება აქვთ. მოითხოვეთ ადრეული წვდომა, რომ დღესვე დაიწყოთ ახალი ფუნქციებით სარგებლობა.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.