საცხოვრებლის ფოტოტურში სურათების დალაგების წესი

არჩევა, დათვალიერება, დაჯავშნა — ხომ კარგი იქნებოდა, ამ თანმიმდევრობით რომ იღებდეს გადაწყვეტილებებს ყველა, ვინც თქვენს განცხადებას ძიების შედეგებში ეცნობა? მაშინ გეტყვით, რომ ხშირად ყველაფერს საცხოვრებლის სურათები წყვეტს.

ალბათ უკვე იცით, რამდენად მნიშვნელოვანია საცხოვრებლის შესანიშნავი ფოტოების გადაღება და მათგან საუკეთესო ვარიანტების შერჩევა, თუმცა მნახველების დასაინტერესებლად თქვენთვის კიდევ ერთი რჩევა გვაქვს: დაალაგეთ ფოტოები ისე, რომ სტუმრებმა საცხოვრებლის ვირტუალურად დათვალიერება შეძლონ.

ფოტოგალერეა განცხადებაში დამატებულ ყველა სურათს მოიცავს. პატარაეკრანიანი მოწყობილობების (მაგალითად, სმარტფონების) მომხმარებლებს მისი გაცნობა განცხადების გვერდის ზედა ნაწილში განთავსებულ ერთადერთ გარეკანის სურათზე შეხების მეშვეობით შეუძლიათ.

შედარებით დიდ (მაგალითად, პლანშეტებისა და ლეპტოპების) ეკრანებზე, გარეკანის ერთ სურათს 5 ფოტო ანაცვლებს, რაც საცხოვრებელს თავიდანვე უფრო საინტერესო კუთხით წარმოაჩენს. ამ ფოტოებიდან ნებისმიერის არჩევა საკმარისია, რომ მთელი გალერეა გაიხსნას უფრო ფართო, ვერტიკალური ბადის სახით.

თუ გალერეის ამ დიდ ბადეში სურათებს ოთახების ან სივრცეების მიხედვით დაალაგებთ, სტუმრებს საშუალებას მისცემთ, რომ დაჯავშნამდე საცხოვრებლის ყველა კუთხე ვირტუალურად დაათვალიერონ.

პირველ რიგში, შეამოწმეთ, რომ სტუმრებისთვის შეთავაზებული თითოეული ოთახისა თუ სივრცისთვის მკაფიო და ნათელი სურათები გაქვთ შერჩეული. „გადაუღეთ თითოეულ საძინებელს მინიმუმ 2 ფოტო სხვადასხვა რაკურსით ისე, რომ კარგად ჩანდეს, არის თუ არა ოთახში კარადა, მაგიდა და ყველაფერი, რაც იქ გაქვთ“, — გვირჩევს სუპერმასპინძელი სარა საიულიტიდან (მექსიკა).

ამის შემდეგ დაამატეთ განსაკუთრებული საყოფაცხოვრებო პირობების ან სხვა საინტერესო დეტალების ამსახველი რამდენიმე ფოტო (თუ ეს ჯერ არ გაგიკეთებიათ). მაგალითად, წარმოაჩინეთ სამზარეულო საჭირო მარაგით, კარიანი კაბინეტი ან სრულად აღჭურვილი სათამაშო ოთახი ბავშვებისთვის.

დაბოლოს, არანაკლებ მნიშვნელოვანია ადაპტირებული პირობების (მაგალითად, საცხოვრებლის უსაფეხურო ან ფართო შესასვლელების) ამსახველი ფოტოები. მთავარია, მკაფიოდ ჩანდეს, რა გამოარჩევს შეთავაზებულ საცხოვრებელს და რა აქცევს შესანიშნავ არჩევანად სტუმრობისთვის.

როცა ფოტოგალერეის შიგთავსით კმაყოფილი იქნებით, შეგიძლიათ ვირტუალური ტურის მომზადებას შეუდგეთ. განცხადების გასაახლებლად ორი მარტივი ნაბიჯის შესრულება დაგჭირდებათ:

1. სექციაში „განცხადების დეტალები“ აირჩიეთ ობიექტი და ოთახები, შემდეგ კი გადადით ქვედა ნაწილში, რომ ჩაასწოროთ ოთახები და სივრცეები.
2. ნაჩვენები იქნება სტუმრებისთვის ხელმისაწვდომი სივრცეებისა თუ ოთახების სია (ოთახების დასამატებლად ან წასაშლელად, გადადით ოთახებისა და სივრცეების ჩასწორებაზე). აირჩიეთ ოთახი სიიდან, დააწკაპუნეთ ღილაკზე ფოტოების დამატება, შემდეგ კი აირჩიეთ შესაბამისი ოთახის სურათები ფოტოგალერეიდან. გაიმეორეთ იგივე თითოეული ოთახისთვის.

ფოტოგალერეაში ოთახებისა თუ სივრცეების მიხედვით დალაგებული სურათები სტუმრებს მთელი საცხოვრებლის მარტივად დათვალიერების საშუალებას მისცემს. თუ რამდენიმე ფოტოს ვერსად დააჯგუფებთ, არა უშავს. ისინი ავტომატურად გადაინაცვლებს გალერეის ქვედა სექციაში „დამატებითი ფოტოები“. მთავარია, გაუგებრობის თავიდან ასაცილებლად კარგად შეამოწმოთ, რომ ისინი სხვა დაჯგუფებულ სურათებს ნამდვილად არ მიესადაგება.

განცხადების განახლების შემდეგ გალერეაში სურათები თქვენ მიერ არჩეული ოთახებისა თუ სივრცეების მიხედვით დალაგდება და სტუმრობის ყველა მსურველი შეძლებს როგორც თითოეული სივრცის ინდივიდუალურად შემოწმებას, ისე მთელი საცხოვრებლის დათვალიერებას ფოტოტურის მეშვეობით, რომელიც, როგორც წესი, მისაღები ოთახიდან იწყება, შემდეგ კი სამზარეულოს, საძინებლებს, სააბაზანოებს, გარე ტერიტორიასა და სხვა შესაძლო სივრცეებს მოიცავს.

უნდა აღინიშნოს, რომ გალერეის ახალი ფორმატი არც გარეკანის ფოტოზე იმოქმედებს და არც 5‑სურათიან ბადეზე განცხადების ზედა ნაწილში. მისი მთავარი დანიშნულება ის არის, რომ სტუმრობის მსურველებს საცხოვრებელი უფრო ახლოს გააცნოს და თავდაჯერებულად დაჯავშნის შესაძლებლობა მისცეს.