შემოთავაზებულ შედეგებზე წვდომისთვის გადადით წინ

    სირთულეების თავიდან აცილების ხერხები მასპინძლებისთვის

    სუპერმასპინძელი დაიანა გვიზიარებს, როგორ გავუმკლავდეთ გამოწვევებს მასპინძლობის პროცესში.
    ავტორი: Airbnb (11 დეკ, 2019)
    2-წუთიანი ვიდეო
    განახლების თარიღი: 19 ნოე, 2021

    ყველაზე მნიშვნელოვანი

    • წინასწარ მოამზადეთ სანტექნიკოსის, ელექტრიკოსისა და თანამასპინძლის საკონტაქტო ინფორმაცია, რომ უფრო მარტივად მოაგვაროთ პრობლემები

    • რეგულარული ტექნიკური მომსახურების მეშვეობით საცხოვრებელი მუდამ შესანიშნავ მდგომარეობაში იქნება

    • გულწრფელი კომუნიკაცია და თანაგრძნობა დაგეხმარებათ გამოწვევებთან გამკლავებასა და მათ თავიდან აცილებაში

    დიდი ძალისხმევის მიუხედავად, ხანდახან პრობლემები მაინც იჩენს თავს — მაგალითად, შესაძლოა, სტუმარმა მისთვის დატოვებული გასაღები ვერ იპოვოს ან კანალიზაცია გაიჭედოს. სერიოზული ინციდენტები იშვიათია, თუმცა გამოცდილი მასპინძლები ყოველთვის მზად არიან გაუთვალისწინებელი სიტუაციებისთვის.

    ამ სტატიაში დაიანა, სუპერმასპინძელი ოკლენდიდან (კალიფორნია), გვირჩევს, თუ როგორ გავუმკლავდეთ მასპინძლობისას წარმოშობილ სირთულეებს.

    1. დააკომპლექტეთ პროფესიონალთა გუნდი

    მასპინძლობა წარმოუდგენელია ადამიანებთან ურთიერთობის გარეშე. ამ ადამიანებს ისინიც განეკუთვნებიან, ვინც მასპინძლობის ბიზნესის დაუბრკოლებლად წარმართვაში გეხმარებათ.

    „სანტექნიკოსის, ელექტრიკოსისა და დამლაგებლის სახელები და ტელეფონის ნომრები გვაქვს ჩამოწერილი“, — გვიზიარებს დაიანა, რომელსაც მასპინძლობაში თავისი და ეხმარება, როცა ის ქალაქიდან გადის. „როცა პრობლემა იჩენს თავს, ყოველთვის ვიცით, ვის მივმართოთ“, — დასძენს ის.

    სანტექნიკოსის, ელექტრიკოსისა და დამლაგებლის სახელები და ტელეფონის ნომრები გვაქვს ჩამოწერილი.
    Diana,
    ოკლენდი, კალიფორნია

    2. ჩაატარეთ რეგულარული ტექნიკური შემოწმება

    მჟონავი მილის ან გაფუჭებული გამათბობლის სწრაფად შეკეთება, რა თქმა უნდა, კარგია, თუმცა მსგავსი პრობლემების საერთოდ თავიდან აცილება უკეთესია.

    „სპეციალური საკონტროლო სია მაქვს, რომლის მიხედვითაც ყველაფრის გამართულ მუშაობას ვამოწმებ წელიწადში ერთხელ“, — ამბობს დაიანა და დასძენს: „ზოგიერთ ამოცანას თავად ვუმკლავდები, სხვებში კი პროფესიონალები მეხმარებიან. ყველა საცხოვრებელი სივრცე, რა თქმა უნდა, განსხვავებულია, თუმცა ზუსტად უნდა განსაზღვროთ, რაზე უნდა იზრუნოთ, სტუმრებს კომფორტული პირობები რომ ჰქონდეთ“.

    დაიანას ყოველწლიური ამოცანებია:

    • ფოთლებისა და სხვა ნარჩენების მოშორება წყლის ჩასადენი თხრილებიდან
    • გათბობის, ვენტილაციისა და კონდიცირების ყველა მოწყობილობის გამართული მუშაობის შემოწმება
    • სახურავზე დამონტაჟებული, რთულად მისაწვდომი ფანჯრების გაწმენდა, რომ საცხოვრებელი უკეთ განათებული იყოს

    3. ყურადღება მიაქციეთ კომუნიკაციას

    გულწრფელობა და რეალისტურობა სტუმრებთან კონსტრუქტიული ურთიერთობის წინაპირობაა.

    „ზედმეტს ნურაფერს დაჰპირდებით სტუმრებს, თუმცა ყოველთვის ყველაფერი ზედმიწევნით აუხსენით“, — ამბობს დაიანა და დასძენს: „მაგალითად, თუ რაიმე სიტუაციიდან გამოსავალი ჯერ ნაპოვნი არ მაქვს, სტუმარს ვუყვები, კონკრეტულად რა საკითხზე ვმუშაობ იმ მომენტში“.

    როცა ერთ‑ერთი სტუმრის დაბინავებამდე ცოტა ხნით ადრე საცხოვრებელში მილი გასკდა, დაიანამ მაშინვე დაურეკა.

    „ავუხსენი ვითარება და ვთხოვე, რომ შეძლებისდაგვარად გვიან მოსულიყო“, — იხსენებს დაიანა და დასძენს: „სანაცვლოდ, საცხოვრებლიდან უფრო გვიან გასვლა შევთავაზე, რაც ძალიან მოეწონა, ოთახში კი ღვინო და სამადლობელი წერილი დავახვედრე. გულწრფელ კომუნიკაციასა და მცირე ჟესტებს — იქნება ეს ღვინო თუ ადგილობრივი კაფეს სასაჩუქრე ბარათი — დიდი მნიშვნელობა აქვს მრავალი სტუმრისთვის“.

    ზედმეტს ნურაფერს დაჰპირდებით სტუმრებს, თუმცა ყოველთვის ყველაფერი ზედმიწევნით აუხსენით.
    Diana,
    ოკლენდი, კალიფორნია

    4. მოუსმინეთ სტუმრებს და შეეცადეთ, შეხვიდეთ მათ მდგომარეობაში

    „თავისებური კარი გვაქვს და სტუმრებს ხშირად უჭირთ მისი გაღება იმის მიუხედავად, რომ დეტალურად აღვუწერეთ პროცესი როგორც სტუმრის ცნობარში, ისე დაბინავების ინსტრუქციაში“, — გვიზიარებს დაიანა და დასძენს: „უკვე მივეჩვიე, ამიტომ მშვიდად ვეხმარები ტელეფონით ან ადგილზევე“.

    სტუმრებთან მრავალწლიანმა ურთიერთობამ დაიანას ასწავლა, რომ:

    • გასაღების გარეშე დაბინავების სისტემა ამარტივებს საცხოვრებელში შესვლას
    • გვიან საათებში სტუმრების უსაფრთხო დაბინავებისთვის საჭიროა გარე განათების მოწესრიგება
    • სტუმრობის შესახებ ინფორმაციის წინასწარ მიღება აიოლებს საცხოვრებელში შესვლისა და გასვლის საათების შეთანხმებას
    მოსმენის უნარი, გულისხმიერება და, უბრალოდ, ადამიანურობა უაღრესად მნიშვნელოვანია.
    Diana,
    ოკლენდი, კალიფორნია

    5. მზად იყავით ყველაზე გავრცელებული სირთულეებისთვის

    დაგეგმილზე ადრე დაბინავების სურვილმა, საცხოვრებლიდან დაგვიანებით გასვლამ და დასუფთავებასთან დაკავშირებულმა პრობლემებმა, შესაძლოა, გარკვეული სირთულეები შეგიქმნათ. გთავაზობთ რამდენიმე რჩევას უსიამოვნო შედეგების მინიმუმამდე შესამცირებლად:

    • მკაფიოდ განმარტეთ საცხოვრებელში შესვლისა და გასვლის საათები, ასევე, მიუთითეთ მიზეზები (მაგ., „გთხოვთ, დაბინავდეთ არაუადრეს 15:00‑ისა, რომ ოთახის დალაგება მოვასწროთ“).
    • განსაზღვრეთ დაჯავშნის პარამეტრები იმგვარად, რომ დასუფთავებისთვის საკმარისი დრო დაიტოვოთ.
    • შესთავაზეთ სტუმრებს ბარგის შენახვა, თუ წინასწარ იცით, რომ ადრე ჩამოდიან.
    • საცხოვრებლის აღწერილობაში და დაბინავების ინსტრუქციაში მიუთითეთ საკვანძო ინფორმაცია: საცხოვრებელში მოხვედრის წესი, როგორ გამოიყურება შენობა გარედან და ა.შ. აღნიშნული სტუმრებს სათანადო მოლოდინს შეუქმნის.
    • მოამზადეთ სტუმრის ცნობარი, რომელსაც დაურთავთ Wi‑Fi ქსელთან დაკავშირებისა და სხვადასხვა ელექტრომოწყობილობით სარგებლობის ინსტრუქციას.

    შესაძლო დაბრკოლებების წინასწარ განჭვრეტით უფრო მომზადებული იქნებით, რაც, თავის მხრივ, თქვენთან შესანიშნავი სტუმრობის ერთ‑ერთ წინაპირობად იქცევა.

    თუ შეკითხვები დაგრჩათ, მზად ვართ თქვენ დასახმარებლად. გაესაუბრეთ Airbnb‑ს მხარდაჭერის გუნდის წარმომადგენელს ონლაინ ან დარეკეთ გაერთიანების წევრების მხარდაჭერის ცხელ ხაზზე: 1 844 234 25 00 (აშშ) ან +1 415 800 50 50 (საერთაშორისო).

    დაიანა არ არის Airbnb‑ს თანამშრომელი და არც Airbnb‑ს მითითებებს ასრულებს. მან თავად გადაწყვიტა მოსაზრებების გაზიარება და წინამდებარე ვიდეორგოლის შექმნა Airbnb‑სთან თანამშრომლობით. მის მიერ გაზიარებული მოსაზრებები და ცხოვრებისეული ისტორიები ასახავს დაიანას და არა Airbnb‑ს ოფიციალურ პოზიციას.

    ყველაზე მნიშვნელოვანი

    • წინასწარ მოამზადეთ სანტექნიკოსის, ელექტრიკოსისა და თანამასპინძლის საკონტაქტო ინფორმაცია, რომ უფრო მარტივად მოაგვაროთ პრობლემები

    • რეგულარული ტექნიკური მომსახურების მეშვეობით საცხოვრებელი მუდამ შესანიშნავ მდგომარეობაში იქნება

    • გულწრფელი კომუნიკაცია და თანაგრძნობა დაგეხმარებათ გამოწვევებთან გამკლავებასა და მათ თავიდან აცილებაში

    Airbnb
    11 დეკ, 2019
    სასარგებლო იყო?

    სხვა საინტერესო

    სხვა საინტერესო

    გაეცანით სხვა თემებს