განცხადების განახლება

ხუთვარსკვლავიანი მასპინძლობა იწყება სტუმრობის მსურველთათვის სათანადო მოლოდინის შექმნით განცხადების გვერდზევე. სტუმრებისთვის მნიშვნელოვანია, რომ საცხოვრებელი არა მხოლოდ შესანიშნავ მდგომარეობაში იყოს, არამედ ისევე გამოიყურებოდეს, როგორც ის ფოტოებზეა აღბეჭდილი. ამას გარდა, განცხადებაში თქვენ მიერ აღნიშნული საყოფაცხოვრებო პირობებისა თუ ნივთების პოვნა და გამოყენებაც ადვილი უნდა იყოს.

რაც უფრო დეტალურ ინფორმაციას მიაწვდით სტუმრებს, მით უფრო ნაკლებსავარაუდოა, რომ მათ საცხოვრებელთან დაკავშირებით შეკითხვები ან არასწორი მოლოდინი გაუჩნდებათ. განცხადებაში მითითებული ცნობების გასაახლებლად საჭირო ხელსაწყოებს „განცხადებების“ ჩანართში იპოვით.

ფოტოტურის ფუნქცია, რომელიც ავტომატურად ალაგებს საცხოვრებლის ამსახველ ფოტოებს ოთახების მიხედვით, დაეხმარება სტუმრობის მსურველებს, უფრო ცხადად წარმოიდგინონ საცხოვრებლის განლაგება.

დასაწყისისთვის დაურთეთ განცხადებას თითოეული ოთახისა და საზიარო სივრცის ბოლოდროინდელი ფოტოები.

• გამოიყენეთ მაღალხარისხიანი ფოტოები: გადაიღეთ ჰორიზონტალური ფოტოები უხვი განათების პირობებში. ატვირთეთ ისინი მაქსიმალურად დიდი ზომით (მინიმუმ 1024×683 პიქსელი). დაფიქრდით, ხომ არ ჯობს პროფესიონალი ფოტოგრაფის დაქირავება.
• ატვირთეთ თითოეული ოთახის რამდენიმე კადრი: იზრუნეთ, რომ მათ შორის მოხვდეს ფართო კუთხით, ასევე, საშუალო და ახლო მანძილებიდან გადაღებული კადრები. ახლო მანძილიდან გადაიღეთ მნიშვნელოვანი დეტალები, მაგალითად, ტელეფონის უნივერსალური დამტენი ტუმბოზე ან ყავისა და ჩაის მოსამზადებლად საჭირო ატრიბუტები სამზარეულოში.
• წარმოაჩინეთ კონკრეტული საყოფაცხოვრებო პირობები და ნივთები: იქონიეთ ფოტოები, რომლებიც ასახავს, მაგალითად, საძილე პირობებს, გარე ზონებსა და რაიმე განსაკუთრებულს, რასაც სთავაზობთ მათ, ვინც, ვთქვათ, შინაურ ცხოველებსა თუ ბავშვებთან ერთად ან დისტანციურად სამუშაოდ აპირებს სტუმრობას.
• აღნიშნეთ ადაპტირებული პირობები: წარმოაჩინეთ, რომ საცხოვრებელი შეეფერება გადაადგილების შეზღუდვის მქონე სტუმრების საჭიროებებს. შეიტყვეთ, სწორად როგორ გადაიღოთ ადაპტირებული პირობების ამსახველი ფოტოები.

ამის შემდეგ მიჰყევით ქვემოთ მოცემულ ნაბიჯებს ფოტოტურის შესაქმნელად.

1. აირჩიეთ ფოტოტურის შექმნა. ხელოვნური ინტელექტის მორგებული ალგორითმი ავტომატურად დაალაგებს საცხოვრებლის ფოტოებს 19 ტიპის ოთახისა თუ სივრცის მიხედვით. ფოტოები, რომლებსაც ის ვერ ამოიცნობს, გადავა დამატებითი ფოტოების სექციაში.

2. შეამოწმეთ მომზადებული ფოტოტური. დარწმუნდით, რომ მასში წარმოდგენილია საცხოვრებელში არსებული თითოეული ოთახის მინიმუმ ერთი ფოტო. სურვილისამებრ, შეგიძლიათ ფოტოების გადაადგილება, დამატება ან წაშლა.

3. დაურთეთ თითოეულ ფოტოს მკაფიო აღწერილობა — აღნიშნეთ, რა დახვდებათ სტუმრებს ამა თუ იმ ოთახში ან სივრცეში.

4. თუ გაინტერესებთ, როგორ გამოჩნდება ფოტოები თქვენს განცხადებაში, გადადით შეთავაზებული საცხოვრებლის სექციაზე და შეხებით აირჩიეთ ჩვენების ღილაკი.

„მრავალი ადამიანი გაცილებით მეტ ყურადღებას ფოტოებს აქცევს, ვიდრე საცხოვრებლის აღწერილობას“, — ამბობს სედი, სუპერმასპინძელი სანტა‑ფედან (ნიუ‑მექსიკო, აშშ).

სტუმრებისთვის მნიშვნელოვანია, რომ Airbnb‑ს მეშვეობით დაჯავშნილი საცხოვრებლები შეესაბამებოდეს აღწერილობებს. კარგ განცხადებებში მაქსიმალურად ზუსტად არის აღწერილი ის, თუ რა დახვდებათ საბოლოო ჯამში სტუმრებს.

1. განცხადების სათაურში სასურველია, იყოს უნიკალური ინფორმაცია საცხოვრებლისა და მისი შემოგარენის შესახებ. მაგალითად, ისეთი მოკლე სათაურიდან, როგორიცაა „მშვიდი სტუდიო უფიცის მახლობლად“, მომენტალურად გასაგებია, რომ საცხოვრებელი იტალიის ქალაქ ფლორენციის ცენტრალურ ნაწილში მდებარე ბინაა.

2. საცხოვრებლის აღწერილობის სექციაში აცნობეთ პოტენციურ სტუმრებს, რა არის მოსალოდნელი სტუმრობებისას. მიუთითეთ სასარგებლო ინფორმაცია მდებარეობის, ინტერიერისა და მასპინძლობის თქვენეული სტილის შესახებ. მაგალითად, შეგიძლიათ აღნიშნოთ, რომ მზის ჩასვლისას ტერასიდან კანიონის შესანიშნავი ხედი იშლება, ან ის, რომ, ვთქვათ, საცხოვრებელი მდებარეობს კაფეს თავზე, იქ კი ხალხმრავლობაა 06:00‑დან 22:00‑მდე.

3. საცხოვრებელი ობიექტის სექციაში ზოგადად აღწერეთ ოთახები და სივრცეები. შეეცადეთ, იქვე დაურთოთ სასარგებლო ცნობები, რომლებიც, შესაძლოა, აინტერესებდეთ სტუმრებს. მაგალითად, შეგიძლიათ მიუთითოთ, რომ უკანა ეზო შემოღობილია, ამიტომ იქაურობა უსაფრთხოა ბავშვებისა და შინაური ცხოველებისთვის.

4. მდებარეობის გაზიარების სექციიდან შეგიძლიათ ისიც აირჩიოთ, რომ სტუმრობის მსურველები საცხოვრებლის ზუსტ მდებარეობას ხედავდნენ, შემოგარენზე უფრო დეტალური წარმოდგენა რომ შეიქმნან. წინააღმდეგ შემთხვევაში ისინი მხოლოდ მიახლოებით მდებარეობას დაინახავენ, სანამ ჯავშანს არ გააფორმებენ.

პრაქტიკა აჩვენებს, რომ საცხოვრებლის მკაფიოდ და გულწრფელად აღწერას უფრო მეტი დადებითი მოაქვს, ვიდრე გადაჭარბებული მოლოდინის შექმნას. ეს უკანასკნელი სტუმრებში იმედგაცრუებას იწვევს, რაც უარყოფით მიმოხილვებში აისახება.

განცხადების რედაქტორი საგრძნობლად ამარტივებს საყოფაცხოვრებო პირობების მითითების პროცესს.

1. საყოფაცხოვრებო პირობების სექციიდან შეხებით აირჩიეთ პლუსის ნიშანი (+). თქვენთვის ასარჩევად წარმოდგენილი იქნება დაახლოებით 150 საყოფაცხოვრებო პირობა — მათი დალაგება შეგიძლიათ ანბანურად ან კატეგორიების მიხედვით. ამასთან, საყოფაცხოვრებო პირობების სახელით მოძიებასაც შეძლებთ.

2. აირჩიეთ პლუსის ნიშანი იმ საყოფაცხოვრებო პირობის გვერდით, რომელიც არის საცხოვრებელში.

3. შეხებით აირჩიეთ ჩვენების ღილაკი, რომ იხილოთ, როგორ აისახება განცხადების გვერდში თქვენ მიერ შეტანილი ცვლილებები სტუმრებისთვის.

აუცილებლად მიუთითეთ ყველა საყოფაცხოვრებო პირობა, რომელიც არის საცხოვრებელში, და ყურადღება მიაქციეთ, რომ ისინი მუდამ გამართულ მდგომარეობაში იყოს. სტუმრების მსურველებს საშუალება აქვთ, გაფილტრონ ძიების შედეგები ისეთი პოპულარული საყოფაცხოვრებო პირობებისა თუ ნივთების მითითების გზით, როგორიც არის, მაგალითად, კონდიციონერი, უფასო საპარკინგე ადგილი, სარეცხი მანქანა ან საშრობი.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.