დროული რეაგირება სტუმრების საჭიროებებზე

დროული და მკაფიო კომუნიკაცია ხუთ ვარსკვლავზე მასპინძლობის ერთ‑ერთი ძირითადი შემადგენელია. სტუმრების თქმით, მათთვის უაღრესად მნიშვნელოვანია სასარგებლო მითითებებისა და სწრაფი პასუხების მიღება. „სათანადო კომუნიკაცია სტუმრებს მათზე ზრუნვას აგრძნობინებს, ზრუნვა კი სტუმარ‑მასპინძლობის ფუნდამენტური პრინციპია“, — ამბობს სედი, სუპერმასპინძელი სანტა‑ფედან (ნიუ‑მექსიკო, აშშ).

შეეცადეთ, სტუმრებს საჭირო ინფორმაცია საჭირო დროს მიაწოდოთ.

მოგზაურ ადამიანებს, ხშირ შემთხვევაში, ერთდროულად ბევრი გადაწყვეტილების მიღება უწევთ. შეეცადეთ, მათ საჭირო დროს მიაწოდოთ სასარგებლო ცნობები, თანაც ისე, რომ ზედმეტი ინფორმაციით არ დატვირთოთ.

• დაგეგმეთ შეტყობინებების გაგზავნა: ეს ფუნქცია საშუალებას გაძლევთ, მიაწოდოთ სტუმრებს გარკვეული ინფორმაცია სწორედ იმ მომენტებში, როცა ის მათ, დიდი ალბათობით, ყველაზე მეტად დასჭირდებათ. მაგალითად, მრავალი მასპინძელი უთითებს საცხოვრებლამდე მისასვლელ გზას იმ მისასალმებელ შეტყობინებაში, რომლის სტუმრებისთვის გაგზავნაც მათ დაბინავებამდე ერთი დღით ადრე აქვთ დაგეგმილი.

• მოამზადეთ სტუმრის დეტალური ცნობარი: გასაგებად განმარტეთ მასში ის, თუ სად შეიძლება ამა თუ იმ მნიშვნელოვანი ნივთის პოვნა. არც საცხოვრებელში არსებული მოწყობილობების გამოყენების ინსტრუქციის დართვა დაგავიწყდეთ.

• განათავსეთ სასარგებლო ინფორმაცია სხვადასხვა ადგილას: მაგალითად, თერმოსტატითა თუ გარე გამოყენების გრილით სარგებლობის ინსტრუქციის დახვედრება შეგიძლიათ როგორც უშუალოდ მოწყობილობების გვერდით, ისე სტუმრის ცნობარში. სტუმრებს მათთვის საჭირო ცნობების მიღება უნდა შეეძლოთ ზედმეტი ძიების საჭიროების გარეშე.

სტუმრები მოელიან, რომ მათ სწრაფად უპასუხებთ (განსაკუთრებით, დაბინავების დღეს ან პრობლემის წარმოქმნის შემთხვევაში). სტუმრობისას გაჩენილ არასასწრაფო შეკითხვებზე პასუხის გაცემა ჯობს 12 საათის განმავლობაში, ხოლო თუ საკითხი სასწრაფოა (მაგალითად, თუ სტუმარი ვერ პოულობს გასაღებს), სტუმარს პასუხი საათის განმავლობაში უნდა გასცეთ.

• დააყენეთ გაფრთხილებების მიღება: ისარგებლეთ Airbnb‑ს აპით, რომ სტუმრების შეტყობინებები არ გამოგრჩეთ. განაცხადეთ თანხმობა push‑გაფრთხილებების მიღებაზე (აპიდან და თქვენი მოწყობილობის პარამეტრებიდან), თან იქონიეთ მოწყობილობა ჩართული ხმით და რეგულარულად შეამოწმეთ ახალი შეტყობინებები სტუმრობის პერიოდებში.

• იქონიეთ სათადარიგო გეგმა: დაფიქრდით, ვინ ჩაგანაცვლებთ, როცა მიუწვდომელი იქნებით. დაამატეთ თანამასპინძელი ან სხვა დამხმარე პირი, შემდეგ კი გაუზიარეთ მისი საკონტაქტო ინფორმაცია სტუმრებს.

• ისარგებლეთ მზა პასუხების ფუნქციით: ის საშუალებას მოგცემთ, კიდევ უფრო სწრაფად უპასუხოთ კონკრეტულ შეკითხვებს (პასუხების წინასწარ მომზადების გზით). მაგალითად, შეგიძლიათ მოამზადოთ მზა პასუხი საცხოვრებელთან ახლოს მდებარე თქვენს საყვარელ რესტორნებთან დაკავშირებით, შემდეგ კი გაუგზავნოთ ის სტუმრებს, რომლებიც მათ შესახებ შეკითხვას დაგისვამენ.

შეეცადეთ, ყველა სიტუაციას სტუმრის თვალით შეხედოთ, განსაკუთრებით მაშინ, როცა რაღაც გაუთვალისწინებელი ხდება.

• შეინარჩუნეთ სიმშვიდე: მოულოდნელი პრობლემები არავის სიამოვნებს. მსგავს შემთხვევებში შეეცადეთ, დამშვიდდეთ და საკითხის მოგვარებაზე კონცენტრირდეთ.
• ჩააყენეთ სტუმრები საქმის კურსში: აცნობეთ სტუმრებს, რომ მათ შეტყობინებას გაეცანით და უკვე მუშაობთ ამა თუ იმ საკითხის მოგვარებაზე. აუხსენით მათ, დაახლოებით როდის არის მოსალოდნელი საკითხის გადაჭრა და რა პერიოდულობით შეეხმიანებით მის თაობაზე.
• გამოიჩინეთ თანაგრძნობა პასუხის გაცემისას: წარმოიდგინეთ თავი სტუმრების ადგილას. ერთი შეხედვით უმნიშვნელო რაღაცასაც კი შეიძლება უდიდესი მნიშვნელობა ჰქონდეს ადამიანისთვის, რომელიც სახლიდან შორს იმყოფება.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.