ფასის შემოწმება

თავდაპირველ საბაზისო ფასს „Airbnb სტარტერში“ აწესებთ. საწყის ეტაპზე შედარებით დაბალი ფასის მითითება, შესაძლოა, დაგეხმაროთ პირველი სტუმრების დაინტერესებასა და მიმოხილვების მიღებაში, რაც შემოსავლის კუთხით დასახულ მიზნებთან დაგაახლოებთ. კონკურენტუნარიანობა რომ შეინარჩუნოთ, რეგულარულად შეამოწმეთ თქვენ მიერ დაწესებული ფასი.

თუ საცხოვრებელს მსგავს ახლომდებარე ვარიანტებზე მაღალ ფასს დაადებთ, შესაძლოა, ნაკლები ჯავშანი მიიღოთ. Airbnb‑ზე ფასების დაწესების ხელსაწყოების გამოყენება მოთხოვნის კუთხით ცვლილებების გათვალისწინებაში დაგეხმარებათ. ასეთი ხელსაწყოებია:

• ერთ ღამეზე რეკომენდებული ფასები. პერსონალური რეკომენდაციები დაგეხმარებათ, განასხვაოთ ფასები სხვადასხვა დღის, სეზონისა და განსაკუთრებული ღონისძიების მიხედვით. აღნიშნული რეკომენდაციები ეფუძნება საცხოვრებლის მდებარეობას, საყოფაცხოვრებო პირობებს, თქვენ მიერ ადრე მიღებულ ჯავშნებს, უახლეს ფასებს თქვენს რეგიონში და სხვა ფაქტორებს. მათი ჩვენება ან დამალვა შესაძლებელია კალენდრის ზემოთ მოცემულ ჯადოსნური ჯოხის ხატულაზე შეხებით.
• მსგავსი საცხოვრებლები. ეს ხელსაწყო გაძლევთ საშუალებას, რომ შეადაროთ დაჯავშნილი და დაუჯავშნელი საცხოვრებლების საშუალო ფასები თქვენი რეგიონის რუკაზე. მსგავსი საცხოვრებლების სანახავად შეეხეთ ნებისმიერ თარიღს კალენდარში, ან ფასების პარამეტრებიდან გახსენით საბაზისო ფასი.
• გონივრული ფასწარმოქმნა. ეს ხელსაწყო იყენებს რეკომენდებულ ფასებში გათვალისწინებულ ფაქტორებს და ავტომატურად აახლებს თქვენ მიერ დაწესებულ ფასს არსებული მოთხოვნის შესაბამისად. ფასთა დიაპაზონს თავად განსაზღვრავთ, საჭიროებისამებრ კი ფუნქციის მხოლოდ კონკრეტული თარიღებისთვის გააქტიურება/გათიშვა შეგიძლიათ ფასების პარამეტრებიდან. გონივრული ფასწარმოქმნის გამოყენების შემთხვევაში ნაჩვენები არ იქნება რეკომენდებული ფასები.

„ვიცი, რა მდგომარეობაცაა ჩვენთან, ამიტომ ფასებს უფრო თავდაჯერებულად ვაწესებ“, — გვიზიარებს ფელისიტი, სუპერმასპინძელი ახალი სამხრეთ უელსიდან (ავსტრალია), და დასძენს: „მესმის, როდის მაქვს დაწესებული ხელსაყრელი ფასი, რომელიც არ უნდა შეცვალო, და როდის ღირს ფასის დაკლებაზე ფიქრი“.

სტუმრები ისეთ საცხოვრებლებს ეძებენ, რომელთა ფასიც ხარისხის შესაბამისია. ფასის განხილვისას გაითვალისწინეთ:

• სტუმრების მიერ გადასახდელი ჯამური ფასი. სტუმრების მიერ გადასახდელი თანხის გარკვევა კონკურენტუნარიანი ფასის დაწესებაში დაგეხმარებათ. აირჩიეთ თარიღები კალენდარში, რომ გაეცნოთ ფასის დეტალიზაციას (Airbnb‑ს მომსახურების გადასახადის ჩათვლით). გახსოვდეთ, რომ ჯამურ ფასზე აისახება თქვენ მიერ დამატებული ნებისმიერი გადასახადი (მაგალითად, დასუფთავებისთვის).
• სტუმრებისგან მიღებული მიმოხილვები. გამოიყენეთ სტუმრებისგან მიღებული გამოხმაურება, რომ გაარკვიოთ, რა იმსახურებს მოწონებას და რისი გაუმჯობესება შეგიძლიათ. დადებითი მიმოხილვების მიღების შემდეგ შეგიძლიათ ერთი ღამის ფასსაც გადახედოთ.
• საცხოვრებელში შეთავაზებული პირობები. გარკვეული ცვლილებების შეტანა, მაგალითად, ადაპტირებული თუ პოპულარული საყოფაცხოვრებო პირობების დამატება, ხელს უწყობს სტუმრობის მეტი მსურველის დაინტერესებას.

„კარგი დიზაინი და საყოფაცხოვრებო პირობები ფასებისა და ჯავშნების რაოდენობის გაზრდის შესანიშნავი საშუალებაა“, — გვიზიარებს კეიტი კეი, მრჩეველ მასპინძელთა საბჭოს წევრი ლეიკ‑ეროუჰედიდან (კალიფორნია, აშშ).

პრომოაქციებისა თუ ფასდაკლებების მეშვეობით შესაძლებელია განცხადების პოზიციის გაუმჯობესება ძიების შედეგებში და სტუმრობის მსურველთა ყურადღების მიქცევა. ასეთი ვარიანტებია:

• პრომოაქცია „ახალი განცხადება“. დააწესეთ 20%‑იანი ფასდაკლება პირველ სამ ჯავშანზე, საწყის ეტაპზე ჯავშნები და მიმოხილვები უფრო სწრაფად რომ მიიღოთ.
• ფასდაკლება ადრეულ დაჯავშნაზე. გსურთ, დააინტერესოთ სტუმრობის მსურველები, რომლებიც ყველაფერს წინასწარ გეგმავენ? შეამცირეთ ფასი ჯავშნებისთვის, რომლებიც გაფორმდება დაბინავებამდე 1‑24 თვით ადრე.
• ბოლო წუთის ფასდაკლება. შეამცირეთ ფასი ჯავშნებისთვის, რომლებიც გაფორმდება დაბინავების დაგეგმილ თარიღამდე 1-დან 28 დღემდე პერიოდში. ეს დაგეხმარებათ კალენდრის შევსებაში.
• ფასდაკლებები ერთ კვირასა და თვეზე. კალენდარი უფრო სწრაფად რომ შეგევსოთ და სტუმრების ხშირი ცვლით გამოწვეული საზრუნავიც შეამციროთ, დააწესეთ ფასდაკლებები გრძელვადიან სტუმრობებზე.

„ერთ კვირასა და თვეზე ფასდაკლებების დაწესების შემდეგ უფრო გრძელვადიანი ჯავშნების მიღება დავიწყე“, — გვიზიარებს დანიელი, სუპერმასპინძელი კანარის კუნძულებიდან (ესპანეთი), და დასძენს: „როგორც წესი, სტუმრები მინიმუმ ერთი კვირის ხანგრძლივობის ჯავშნებს აფორმებენ და ეს უკვე საქმეა“.

თუ სტუმრობის მსურველებისთვის შეთავაზებული გექნებათ პრომოაქცია „ახალი განცხადება“ ან სულ მცირე 10%‑იანი ფასდაკლება საცხოვრებლის მინიმუმ ერთი კვირით ან თვით დაჯავშნაზე, განცხადების გვერდსა და ძიების შედეგებში სპეციალური აღნიშვნა განთავსდება.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

ინტერვიუებში მონაწილეობისთვის მასპინძლებმა კომპენსაცია მიიღეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.