ხელსაწყოები და რჩევები ოთახებზე ფასების დასაწესებლად

ხელმისაწვდომი ფასები ერთ‑ერთი მთავარი მიზეზია, რატომაც სტუმრები ჯავშნიან ოთახებს Airbnb‑ს მეშვეობით. 2022 წელს საერთაშორისო მასშტაბით განთავსებული ოთახების 80%‑ზე მეტი ღამეში 100 აშშ დოლარზე ნაკლები ღირდა, საშუალო ფასი კი ღამეში 67 აშშ დოლარი იყო.*

ფასი ყოველთვის თქვენი გადასაწყვეტია. Airbnb გთავაზობთ სხვადასხვა ხელსაწყოს, რომელთა მეშვეობითაც ფასების დაწესება და ჩასწორება შეგიძლიათ.

ახლომახლო შემოთავაზებული მსგავსი ვარიანტების ფასების გაანალიზება დაგეხმარებათ, გადაწყვიტოთ, თავად რა ფასი დააწესოთ.

ახლომახლო მსგავსი საცხოვრებლების ფასების შესადარებლად გადადით სამასპინძლო კალენდარზე. აირჩიეთ თარიღი ან თარიღთა დიაპაზონი, შემდეგ კი შეხებით ან დაწკაპუნებით აირჩიეთ ერთ ღამეზე თქვენ მიერ დაწესებული ფასი. მის ქვემოთ აირჩიეთ „მსგავსი საცხოვრებლების შედარების“ ღილაკი. გამოჩნდება რუკა, რომელზეც მოცემული იქნება თქვენის მსგავსი ვარიანტების ფასები. სურვილისამებრ, შეგიძლიათ აირჩიოთ, რომ აისახოს შესაბამის თარიღებში დაჯავშნილი ან დაუჯავშნელი საცხოვრებლები.

რიჩარდი, რომელიც სტუმრებს ოთახს ტორონტოს ცენტრთან ახლოს სთავაზობს, გადაწყვიტა, კონკურენტუნარიანზე ოდნავ დაბალი ფასით დაეწყო, სტუმრები უფრო სწრაფად რომ მიეღო. მისი თქმით, ამგვარმა სტრატეგიამ გაამართლა, რადგან პირველი სამი თვე თითქმის მთლიანად დაჯავშნილი ჰქონდა.

„ჯერჯერობით მაინც ოდნავ დაბალი ფასი მაქვს დაწესებული, თუმცა ვიცი, რის მიღწევას ვცდილობ ამით“, — გვიზიარებს რიჩარდი და დასძენს: „ფასს ნელ‑ნელა გავზრდი დროთა განმავლობაში“.

კონკურენტუნარიანი ფასების დაწესებაში თქვენს რეგიონში მოგზაურობის ტენდენციების შესწავლაც დაგეხმარებათ. სტუმრები, რომლებიც თქვენს რეგიონში მხოლოდ შაბათ‑კვირას ჩამოდიან, სეზონურად ისვენებენ, დროებით მუშაობენ და სხვა, შესაძლოა, სხვადასხვაგვარად აღიქვამდნენ ფასების „ხელმისაწვდომობას“.

რიდმა, სუპერმასპინძელმა ფილადელფიიდან (აშშ), ჯერ გამოიკვლია ადგილობრივი ტენდენციები, სანამ მესამე სართულზე მდებარე თავის კეთილმოწყობილ საძინებელს ფასი დაადო. ვინაიდან ის უნივერსიტეტებთან და საავადმყოფოებთან ახლოს ცხოვრობს, მან ფასების დაწესებისას სტუდენტებისა და სტაჟიორების შეზღუდული ბიუჯეტი გაითვალისწინა. „უამრავ ადამიანს ვუმასპინძლეთ, რომლებიც კვლევით ან სამედიცინო სტაჟირებას გადიოდნენ და რამდენიმე კვირით სჭირდებოდათ საცხოვრებელი“, — იხსენებს ის.

დაბალი ფასის შენარჩუნებითა და სტუმრების გრძელი ვადით მასპინძლობით რიდმა თავისი კალენდრის ჯავშნებით შევსება და იპოთეკური სესხის წინსწრებით დაფარვა შეძლო. „მეტი დაჯავშნილი ღამე მაქვს, სტუმრები კი ნაკლები სიხშირით იცვლებიან“, — აღნიშნავს ის და დასძენს: „გონივრული გადაწყვეტილება იყო და ბევრ ძალისხმევასაც არ მოითხოვს“.

საცხოვრებლის გრძელი ვადით მაძიებელი სტუმრები, ხშირ შემთხვევაში, ყურადღებას აქცევენ ფასდაკლებებს. სტუმრობის მსურველების დასაინტერესებლად რიდს დაწესებული აქვს ფასდაკლებები ერთ კვირასა და თვეზე. „სტუმრობის მსურველები, რომლებიც ჩვენ მიერ განთავსებულ ოთახს პოულობენ, მის დაჯავშნას რამდენიმე კვირით აპირებენ ხოლმე“, — აღნიშნავს ის.

ამას გარდა, შეგიძლიათ რამდენიმე ფასდაკლების დაწესება სხვადასხვა სიტუაციისთვის. შესაბამისი ვარიანტები ხელმისაწვდომია კალენდრის „ფასების“ ჩანართში. კერძოდ:

• პრომოაქცია „ახალი განცხადება“. აღნიშნული პრომოაქციის გააქტიურების შემთხვევაში, თქვენთან გაფორმებული პირველი სამი ჯავშნისთვის იმოქმედებს 20%‑იანი ფასდაკლება ერთი ღამის ფასზე. ის, შესაძლოა, დაგეხმაროთ სტუმრებისგან მიმოხილვების უფრო სწრაფად მიღებაში, რაც, თავის მხრივ, თქვენ მიერ განთავსებული ოთახის შეფასებასაც განაპირობებს.

• ფასდაკლებები ადრეულ დაჯავშნაზე. ეს ფასდაკლება ვრცელდება ჯავშნებზე, რომლებსაც სტუმრები კარგა ხნით ადრე აფორმებენ. შესაძლებელია დაგეგმილ დაბინავებამდე 1‑დან 24 თვემდე პერიოდის არჩევა. ადრეულ დაჯავშნაზე ფასდაკლებებით შეგიძლიათ დააინტერესოთ სტუმრები, რომლებიც წინასწარ გეგმავენ ყველაფერს.

• ბოლო წუთის ფასდაკლებები. ეს ფასდაკლება ვრცელდება ჯავშნებზე, რომლებსაც სტუმრები ბოლო წუთს აფორმებენ. შესაძლებელია დაგეგმილ დაბინავებამდე 1‑დან 28 დღემდე პერიოდის არჩევა. ოთახების მაძიებელი სტუმრები, ხშირ შემთხვევაში, მარტო მოგზაურობენ. მათ შედარებით მეტი თავისუფლება აქვთ საცხოვრებლის ბოლო წუთს ძიების კუთხით, ვიდრე, ვთქვათ, წყვილებსა თუ ოჯახებს.

• ფასდაკლებები ერთ კვირასა და თვეზე. ერთ კვირაზე დაწესებული ფასდაკლებები ვრცელდება მინიმუმ 7 ღამის ხანგრძლივობის ჯავშნებზე, ხოლო ერთ თვეზე — მინიმუმ 28 ღამისაზე. აღნიშნული ფასდაკლებები, შესაძლოა, დაგეხმაროთ კალენდრის უფრო სწრაფად შევსებაში, თანაც ისე, რომ ნაკლებად გიწევდეთ სტუმრების ცვლა.

არ დაგავიწყდეთ, სტუმრობის მინიმალური და მაქსიმალური ხანგრძლივობები ადგილობრივი წესებისა და რეგულაციების შესაბამისად განსაზღვროთ. ამის შემდეგ უკვე შეგიძლიათ სტუმრობის მაქსიმალური ხანგრძლივობა ჩაასწოროთ იმგვარად, რომ ის მინიმუმ იმდენ ღამეს შეადგენდეს, რამდენზეც გსურთ ფასდაკლების დაწესება.

*ერთი ღამის ფასი გადასახადებისა და მოსაკრებლების ჩათვლით 2022 წლის 1 იანვრიდან 31 დეკემბრამდე

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.