ოთახების სტუმრებთან ურთიერთობა

ზოგიერთი სტუმარი ოთახებს იმიტომ ჯავშნის, რომ მათ მოსწონთ ახალი ადამიანების გაცნობა, თუმცა ზოგს განმარტოება ურჩევნია. რა ინტენსივობით გირჩევნიათ ურთიერთობა სტუმრებთან? შეატყობინეთ მათ ამის შესახებ განცხადების პარამეტრების გამოყენებით.

განცხადების პარამეტრებიდან შეგიძლიათ აირჩიოთ სტუმრებთან ურთიერთობის ინტენსივობის ოთხი ვარიანტიდან ერთ‑ერთი:

• მომწონს სოციალიზაცია და სტუმრებთან ერთად დროის გატარება.

• პირადი მისალმების წინააღმდეგი არ ვარ, მაგრამ სხვა მხრივ მირჩევნია, ჩემთვის ვიყო.

• სტუმრებთან პირადად ურთიერთობას ვერ შევძლებ — მათთან აპის მეშვეობით კომუნიკაცია მირჩევნია.

• ნებისმიერი მიდგომა მისაღებია. სტუმრების სურვილის შესაბამისად ვიმოქმედებ.

ამას გარდა, საცხოვრებლის აღწერილობაშიც შეგიძლიათ დააზუსტოთ სხვადასხვა საკითხი. მაგალითად, რომელ საათებში იქნებით ხელმისაწვდომი.

რიჩარდი, რომელიც სტუმრებს ოთახს ტორონტოს (კანადა) ცენტრში სთავაზობს, დიდი სიამოვნებით მასპინძლობს მათ. „საცხოვრებელი არ არის უბრალოდ კედლები, იატაკი და ჭერი“, — ამბობს ის და დასძენს: „სტუმრებთან ზოგჯერ მნიშვნელოვან თემებზე საუბრობ, იხსნები მათთან და მათ მოსაზრებებსაც უსმენ“.

რიჩარდი სტუმრებს შესასვლელ კართანვე ხვდება და მათ იქაურობას ათვალიერებინებს. „ადამიანური ფაქტორი მნიშვნელოვანია“, — გვიზიარებს ის და დასძენს: „სტუმრებისთვის ხელმისაწვდომია ყველაფერი — აივნიდან გრილ‑ბარბექიუმდე, ამიტომ ისინი თავს ისე გრძნობენ, როგორც საკუთარ სახლში“.

რიჩარდი სტუმრებს ქალაქსაც სიამოვნებით აცნობს. „სტუმრების ინტერესებს ვითვალისწინებ“, — აღნიშნავს ის და დასძენს: „შემდეგ კი იმის შესახებ ვუყვები, რასაც ჩვეულებრივი ექსკურსიის დროს ვერ გაიგებდნენ. მოგზაურობა ჩემთვის ცხოვრების სახელმძღვანელოა“.

რუთს, მასპინძელს პერთიდან (ავსტრალია), უყვარს სტუმრების დახვედრა. ის მათ ათვალიერებინებს საცხოვრებელს, რომელიც შედგება სამი საძინებლისგან, ორი ცალკე სააბაზანოსა და მისაღები ოთახისგან. ყველაფერი ეს არის ის, რასაც რუთი სტუმრებს „ოთახის“ სახით სთავაზობს.

სახლში ხანმოკლე ექსკურსიის შემდეგ რუთი სტუმრებს მარტო დარჩენის საშუალებას აძლევს. სტუმრებისკენ რუთი მხოლოდ მაშინ გადის, როცა სარეცხი აქვს გასარეცხი.

„ვფიქრობ, რომ პირველი შეხვედრა ყველაზე მნიშვნელოვანია“, — ამბობს რუთი და დასძენს: „ზოგიერთ სტუმარს საერთოდ არ სურს ურთიერთობა, სხვები კი სიამოვნებით კონტაქტობენ და ასე ბევრი კარგი ადამიანი გავიცანი. საკმაოდ მოულოდნელი იყო“.

დანდარა, მრჩეველ მასპინძელთა საბჭოს წევრი მასეიოდან (ბრაზილია), ამჯობინებს, სტუმრებმა თავად გადაწყვიტონ, რა ინტენსივობით სურთ მასთან ურთიერთობა. დანდარას თქმით, როცა ის სტუმრებს საცხოვრებელს ათვალიერებინებს, პარალელურად ცდილობს, გაარკვიოს, რამდენად არიან ისინი განწყობილი საუბრისთვის.

საცხოვრებლის დათვალიერებას ის ყოველთვის ასრულებს აივანზე, საიდანაც სტუმრებს ურჩევს, რომელ ადგილებს ეწვიონ, ასევე, პასუხობს მათ შეკითხვებს. როგორც დანდარა აღნიშნავს, სტუმრები დროთა განმავლობაში იხსნებიან, ზოგიერთი მათგანი კი ისეთი ახლო მეგობარი ხდება, რომ თავს ოჯახის წევრად გრძნობს.

როგორც წესი, დანდარა სტუმრებთან საუზმის დროს ურთიერთობს. ყველას რაღაც წვლილი შეაქვს სუფრის გაშლაში: ზოგს ხილი მოაქვს, ზოგს კი — ნამცხვრები. „და აი, ისიც — ჯადოსნური მომენტი“, — აღნიშნავს დანდარა.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.