სტუმრებმა თავი ადგილობრივივით რომ იგრძნონ…

Airbnb‑ს შექმნის თავდაპირველი მიზანი იყო, მოგზაურებს საშუალება მისცემოდათ, ხელმისაწვდომ ფასად გაეთიათ ღამე სხვა ადამიანის საცხოვრებელში. მიზანმა გაამართლა — მსოფლიო მასშტაბით სულ უფრო მეტმა მასპინძელმა დაიწყო სტუმრობის მსურველთათვის საცხოვრებლების შეთავაზება და მათთან აქტიური კომუნიკაცია.

ოთახები აგრძელებს ამ ტრადიციას: ისინი შესანიშნავი ვარიანტია მათთვის, ვისაც პირად სივრცესთან ერთად ადგილობრივებთან ურთიერთობაც სურს. ოთახის არჩევისას სტუმრებს აქვთ პირადი ოთახი საცხოვრებელში, ასევე, საზიარო სივრცეებით სარგებლობის შესაძლებლობა.

გთავაზობთ რამდენიმე რჩევას, მსურველებს თქვენთან სტუმრობასთან დაკავშირებით გადაწყვეტილების მიღება რომ გაუმარტივოთ.

სტუმრებს თქვენი უბნის შესახებ წარმოდგენა რომ შეუქმნათ, განცხადებისთვის გზამკვლევის შექმნა შეგიძლიათ. ამგვარად მათ მარტივად გაუზიარებთ სხვადასხვა რეკომენდაციას.

მრავალი მასპინძელი სტუმრებს სხვადასხვა ადგილს პირისპირაც ურჩევს. რიდი და თავისი მეუღლე, რომლებიც სტუმრებს ოთახს ფილადელფიაში (აშშ) სთავაზობენ, გვიყვებიან, რომ ისინი ხშირად იწვევენ სტუმრებს საკვირაო ვახშამზე. რიდი ცდილობს, სტუმრებს ურჩიოს არასტანდარტული ადგილები, მაგალითად, ახლომდებარე კაფე, სადაც წიგნებით სავსე კედლებია.

ზოგჯერ რიდი სტუმრებს სალსას საცეკვაოდ წასვლასაც სთავაზობს, რაც თვითონაც ძალიან უყვარს. „ერთი ადგილი ვიცი, სადაც ლათინოამერიკულ მუსიკას უკრავენ და იქ დავდივართ ხოლმე სტუმრებთან ერთად განწყობის ასამაღლებლად“, — გვიყვება ის და დასძენს: „ზოგიერთი სტუმარი ახლა ჩვენთვის შვილივით არის“.

ზოგჯერ სტუმრები ოთახს მხოლოდ მასპინძლის პროფილის დამსახურებით ჯავშნიან: მათ ეუფლებათ შეგრძნება, რომ მასპინძელს გარკვეულწილად უკვე იცნობენ და მასთან ერთად საცხოვრებელი სივრცის გაზიარება პრობლემას არ შეუქმნით.

ნიკოლა, რომელიც სტუმრებს ოთახს ფიცროიში (ავსტრალია) სთავაზობს, სიამოვნებით ეცნობა სხვადასხვა ქვეყნის კულტურასა და სამზარეულოს. მან აღმოაჩინა, რომ ზოგიერთ სტუმარს განსაკუთრებით მოსწონს მასპინძელთან ერთად დროის შინაურულად გატარება.

ნიკოლა და მისი ძმა, მელბურნში სახელგანთქმული შეფ‑მზარეული, სტუმრებს ზოგჯერ კერძების ერთად მომზადებას სთავაზობენ. „კომერციული სამზარეულო გვაქვს, სადაც საკუთარი ხელით არის შესაძლებელი პასტისა და პანინის მომზადება“, — გვიყვება ის.

სტუმრების ერთ‑ერთმა ჯგუფმა თავი ისე კომფორტულად იგრძნო, რომ იოგით პირდაპირ ნიკოლას მისაღებ ოთახში დაკავდა. „მიხარია, რომ ჩემთან ასე ძალიან მოეწონათ“, — აღნიშნავს ნიკოლა. როგორც კი ნიკოლამ შეამჩნია, რომ სტუმრებს ვარჯიში მოსწონდათ, მან ისინი ახლომდებარე პარკში წაიყვანა. იქ მათ ნახევარი დღე გაატარეს ხეებზე ძრომიალსა და იმ ადგილების განხილვაში, რომლებიც მოგვიანებით შეეძლოთ მოენახულებინათ.

დაფიქრდით, რა ინტენსივობით გირჩევნიათ სტუმრებთან ურთიერთობა, შემდეგ კი აცნობეთ მათ ამის შესახებ. თუ ხშირი კომუნიკაცია მოგწონთ, არ არის გამორიცხული, ბევრი საინტერესო მეგობარი გაიჩინოთ.

გართი, რომელიც სტუმრებს ოკლენდში (ახალი ზელანდია) მასპინძლობს, ამბობს, რომ სტუმრებთან დროის გატარება საშუალებას აძლევს, მოგზაურობის გარეშე გაეცნოს სხვა ქვეყნების კულტურას. „ჯობს, ჩემთან ჩამოვიდნენ“, — გადაწყვიტა მან.

გართს განსაკუთრებით დაამახსოვრდა საფრანგეთიდან ჩამოსული ოჯახი. სტუმრად მყოფმა ერთ‑ერთმა ქალმა ჰკითხა გართს, შეეძლო თუ არა მის ვაჟს ეყურებინა, როგორ მუშაობს გართი თავის ავტოფარეხში მოწყობილ სახელოსნოში. „ბავშვს მოსწონდა ყველაფერი, რასაც ვაკეთებდი“, — იხსენებს გართი.

გართმა მოიფიქრა პროექტი, რომელზეც ისინი ერთად შეძლებდნენ მუშაობას. „პატარა გემი ავაწყვეთ და ერთად შევღებეთ“, — გვიყვება ის და დასძენს: „ცოტა გულის ამაჩუყებელიც კი იყო, რადგან ბავშვი ინგლისურად არ საუბრობდა, თუმცა საერთო ენა მაინც გამოვნახეთ“.

მასპინძელთა სხვა ამბების და რჩევების გასაცნობად შეგიძლიათ გაწევრიანდეთ მასპინძელთა ადგილობრივ კლუბში. კლუბები მასპინძელთა მიერ მასპინძლებისთვის იქმნება, წევრები კი პერიოდულად იკრიბებიან როგორც ფიზიკურად, ისე ვირტუალურად, მუდმივად ეხმარებიან ერთმანეთს და აზიარებენ სიახლეებს Airbnb‑ს პროდუქტებისა თუ მომსახურებების შესახებ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.