ფასის დაწესება გრძელვადიანი ჯავშნებისთვის

Airbnb‑ს მეშვეობით 5‑დან თითქმის 1 ღამე 28 ან მეტი ღამის ხანგრძლივობის სტუმრობის ფარგლებში იჯავშნება.* გრძელვადიან ჯავშნებს, ხშირ შემთხვევაში, თავისი უპირატესობები აქვს, მაგალითად:

• დაკავებულობის უფრო მაღალი მაჩვენებელი ნაკლები ძალისხმევით

• ნაკლები შეტყობინება სტუმრებისგან და მათი მართვის არახშირი საჭიროება

• უფრო სტაბილური შემოსავალი (მოკლევადიან ჯავშნებთან შედარებით)

საცხოვრებლის გრძელი ვადით მაძიებელი სტუმრები, ხშირ შემთხვევაში, ყურადღებას აქცევენ ფასდაკლებებს. მასპინძლებს საშუალება აქვთ, დააწესონ ფასდაკლება ერთ კვირაზე (მინიმუმ 7 ღამის ხანგრძლივობის ჯავშნებისთვის) ან ერთ თვეზე (მინიმუმ 28 ღამის ხანგრძლივობის ჯავშნებისთვის).

აღნიშნული ფასდაკლებების დაწესებამ, შესაძლოა, ხელი შეგიწყოთ განცხადების პოზიციის გაუმჯობესებაში ძიების შედეგებში, სადაც ერთ კვირასა თუ თვეზე დაწესებული ფასდაკლება გამოიყოფა თავდაპირველი ფასის ფონზე.

ფასდაკლების დაწესებამდე, შესაძლოა, კარგი აზრი იყოს ადგილობრივ დონეზე არსებული მოთხოვნის გარკვევა. თუ თქვენს რეგიონს სეზონურად სტუმრობენ, დაფიქრდით, წაადგება თუ არა კონკრეტული თვეების ფასების შეცვლა თქვენს საფასო პოლიტიკას.

ამას გარდა, გირჩევთ, გაითვალისწინოთ ისეთი რეგულარული ხარჯები, როგორიცაა, მაგალითად:

• იპოთეკა ან ქირა. ერთ კვირაზე ან თვეზე ფასდაკლების დაწესებისას ამომავალ წერტილად შეგიძლიათ ეს თანხა აიღოთ.

• საყოფაცხოვრებო ხარჯები. ფასში შეგიძლიათ გაითვალისწინოთ ყველაფერი, რის გადახდაც გიწევთ. მაგალითად, კომუნალური გადასახადები (წყლის, ბუნებრივი აირისა თუ ელექტროენერგიის საფასური), პერიოდული მომსახურებების (დასუფთავებისა თუ ბაღში სამუშაოების) ღირებულება, ასევე, იმ ნივთებისა თუ პროდუქტების ფასი, რომლებსაც ახვედრებთ სტუმრებს (დამატებითი საპონი, საჭმლის მოსამზადებლად აუცილებელი მინიმუმი და ა.შ.).

• ტექნიკური მომსახურება. ფასში შეგიძლიათ ასახოთ ის თანხა, რომელსაც ხარჯავთ იმაზე, რომ საცხოვრებელი სტუმრებისთვის უფრო კომფორტულად აქციოთ — მაგალითად, რაიმეს შეკეთების ან რემონტის შემთხვევაში.

„კარგი იქნება, თუ გამოთვლით, ჯამში რა ოდენობის შემოსავალს იღებთ თვეში იმ შემთხვევაში, როცა სტუმრები საცხოვრებელს დღიურად ჯავშნიან“, — გვირჩევს ოლივერი, მასპინძელი ნიუ‑იორკიდან (აშშ), და დასძენს: „შემდეგ უკვე გეცოდინებათ, როგორ ჩაასწოროთ ერთ თვეზე დაწესებული ფასდაკლება ისე, რომ უფრო საიმედო შემოსავალი გქონდეთ“.

ფასდაკლებების დაწესება თქვენი კალენდრიდან, ფასების დაწესების ხელსაწყოების მეშვეობით შეგიძლიათ. შეეხეთ პარამეტრების ხატულას, რომელიც ეკრანის ზედა მარჯვენა ნაწილში იქნება მოცემული. „ფასების“ ჩანართიდან გადადით „ფასდაკლებების“ სექციაზე, შემდეგ კი აირჩიეთ „ერთ კვირაზე“ ან „ერთ თვეზე“.

ჩვენ შემოგთავაზებთ პროცენტს, როგორც თქვენ მიერ სტუმრებისთვის შეთავაზებული საცხოვრებლის თავისებურებების, ისე თქვენს რეგიონში განთავსებულ მსგავს ვარიანტებზე არსებული მოთხოვნის გათვალისწინებით. ფასდაკლების ჩასასწორებლად გადააადგილეთ სლაიდერი 0‑დან 99%‑მდე და დააკვირდით, როგორ იცვლება ერთი კვირის ან თვის საშუალო ფასი. ამას გარდა, რიცხვის მითითება ხელითაც შეგიძლიათ პროცენტის ნიშნის გვერდით. როცა დაასრულებთ, ფასდაკლების გასააქტიურებლად შეხებით ან დაწკაპუნებით აირჩიეთ „შენახვა“.

თუ გაინტერესებთ, როგორ აისახება ფასდაკლება თქვენს შემოსავალზე, აირჩიეთ „სტუმრის მიერ გადასახდელი“, რომელიც მოცემული იქნება ერთი კვირის ან ერთი თვის ფასის ქვემოთ. ჩვენ შემოგთავაზებთ ფასის დეტალიზაციას, რომელშიც მითითებული იქნება ერთი ღამის ფასი, პლატფორმის გადასახადები, ფასდაკლებები ან პრომოაქციები (ასეთის არსებობის შემთხვევაში), ასევე, ოფიციალური მოსაკრებლები და თქვენი შემოსავლის ოდენობა.

ამას გარდა, შეგიძლიათ დააწესოთ ფასდაკლებები სტუმრებისთვის, რომლებიც საცხოვრებელს დიდი ხნით ადრე ან ბოლო წუთს დაჯავშნიან. ამისთვის „ფასების“ ჩანართიდან გადადით „ფასდაკლების სხვა ვარიანტებზე“. მიუთითეთ, თვეების რაოდენობა მათთვის, ვინც ჯავშნებს დიდი ხნით ადრე აფორმებს ხოლმე, ან დღეების რაოდენობა — მათთვის, ვისაც ბოლო წუთს უწევს საცხოვრებლის დაჯავშნა, შემდეგ კი ფასდაკლების პროცენტი.

*Airbnb‑ს მიერ საერთაშორისო მასშტაბით შეგროვებული შიდა მონაცემების მიხედვით, მინიმუმ 28 ღამის ხანგრძლივობის ჯავშნებზე მოდიოდა 2022 წელს დაჯავშნილი ღამეების 21%, ხოლო 2023 წლის პირველ სამ თვეში — 18%.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.