მომენტალური დაჯავშნის შესახებ

მომენტალური დაჯავშნის ფუნქციის მეშვეობით, სტუმრობის მსურველებს მყისიერად შეუძლიათ საცხოვრებლის დაჯავშნა ხელმისაწვდომ თარიღებში, რაც თავიდან აგაცილებთ დაჯავშნის თითოეული მოთხოვნის ინდივიდუალურად გადახედვისა თუ დაკმაყოფილების აუცილებლობას. სტუმრებს მოსწონთ საცხოვრებლის მომენტალურად დაჯავშნის შესაძლებლობა, მასპინძლებისგან კი არაერთხელ გვსმენია, რომ ეს ფუნქცია მოსახერხებელია და მისი მეშვეობით მეტ შემოსავალს იღებენ.

მომენტალური დაჯავშნის ფუნქცია ეფექტურად რომ გამოიყენოთ, მუდმივად განაახლეთ კალენდარი. წინააღმდეგ შემთხვევაში, შესაძლოა, მოულოდნელი ჯავშნები მიიღოთ და მათი გაუქმება მოგიწიოთ გადასახადის სანაცვლოდ. Airbnb‑ზე კალენდარი ყოველთვის განახლებული რომ გქონდეთ, დაასინქრონეთ ის თქვენს ძირითად კალენდართან (iCal, Google და ა.შ.).

მასპინძლები მომენტალური დაჯავშნის ფუნქციას თავიდან მაინცდამაინც თამამად არ იყენებენ ხოლმე, რადგან შიშობენ, რომ ჯავშნის გაფორმებამდე პოტენციური სტუმრების შესახებ საკმარისი ინფორმაცია არ აქვთ. შეგახსენებთ, რომ მომენტალურად დაჯავშნამდე სტუმრები უნდა აკმაყოფილებდნენ თქვენს მოთხოვნებს და სახლის წესებსაც ეთანხმებოდნენ.

მომენტალურად დაჯავშნის შესაძლებლობა შეგიძლიათ მხოლოდ იმ სტუმრებს მისცეთ, რომლებსაც აქვთ კარგი ისტორია (ანუ მინიმუმ ერთი სტუმრობა და არცერთი უარყოფითი მიმოხილვა), ასევე, მათ, ვისაც Airbnb‑ზე გავლილი აქვს ვინაობის დადასტურების მრავალეტაპიანი პროცედურა.

Airbnb‑ს მეშვეობით ჯავშნების გაფორმების მსურველთა ვინაობის დადასტურება უკვე ხორციელდება 35 ძირითად ქვეყანასა და რეგიონში, ანუ ჯავშნების 90%‑ის შემთხვევაში. 2023 წლის დასაწყისში ეს პროცედურა მსოფლიო მასშტაბით ამოქმედდება. თუ სტუმრებისგან პირადობის დამადასტურებელი ოფიციალური დოკუმენტის წარდგენას მოითხოვთ, ან თუ ეს სავალდებულოა, სადაც თქვენ მიერ შეთავაზებული საცხოვრებელი მდებარეობს, შეგიძლიათ სტუმრებს მასპინძლის შემომავალი შეტყობინებების ჩანართიდან მისწეროთ.

დაჯავშნის მოთხოვნები, შესაძლოა, მომენტალური დაჯავშნის ფუნქციის გააქტიურების შემთხვევაშიც კი მიიღოთ, მაგალითად, კალენდრის დიდი ხნის განმავლობაში განუახლებლობის ან ერთ‑ერთი ბოლოდროინდელი ჯავშნის გაუქმების გამო. დაჯავშნის მოთხოვნა დასჭირდებათ იმ სტუმრებსაც, რომლებიც მომენტალურად დაჯავშნისთვის თქვენ მიერ დაწესებულ კრიტერიუმებს არ აკმაყოფილებენ. გახსოვდეთ, რომ პოტენციურ სტუმრებს 24 საათის განმავლობაში უნდა გამოეხმაუროთ: დააკმაყოფილოთ/უარყოთ დაჯავშნის მოთხოვნა ან მისწეროთ.

მომენტალური დაჯავშნის უპირატესობების მიუხედავად, ზოგიერთ მასპინძელს დაჯავშნის მოთხოვნების მიღება უფრო აწყობს შემდეგი მიზეზების გამო:

• მასპინძლები მხოლოდ გრძელვადიან ჯავშნებს იღებენ: ენი, მასპინძელი სონომის ოლქიდან (კალიფორნია), დაჯავშნის მოთხოვნებს თავად ადასტურებს, რადგან მხოლოდ გრძელვადიან (მინიმუმ 30 დღის ხანგრძლივობის) ჯავშნებს იღებს, მასპინძლებისთვის მოქმედი ადგილობრივი რეგულაციების შესაბამისად. „მომენტალური დაჯავშნის ფუნქციას სიამოვნებით გამოვიყენებდი, თუმცა ბევრი საორგანიზაციო საკითხია მოსაგვარებელი, როცა ვინმეს ამდენი ხნით მასპინძლობ“, — ამბობს ის.
• მასპინძლებს არასტანდარტული მოთხოვნები აქვთ: ნიკოლას, მასპინძელს გველფიდან (კანადა), სხვადასხვა სუნის მიმართ ალერგია აქვს და საცხოვრებელში შესაბამისი პირობების დაცვა სჭირდება. დაჯავშნის მოთხოვნები მას საშუალებას აძლევს, დააზუსტოს სტუმრობის მსურველებთან, ნამდვილად თანახმა არიან თუ არა ისინი, დაიცვან ეს სპეციფიკური წესები. „არომატიზებული პროდუქტები შაკიკს მმართებს, ამიტომ დანამდვილებით უნდა ვიცოდე, რომ სტუმრები ჩემს ალერგიებს გაითვალისწინებენ“, — ამბობს ის.
• საცხოვრებელს მნიშვნელოვანი თავისებურებები აქვს: მაგალითად, სტუმრებისთვის შეთავაზებულია ცალკე ოთახი საცხოვრებელში, სადაც პატარა ბავშვები თუ შინაური ცხოველებიც არიან, ანდაც საცხოვრებელი სოფლის სტილისაა და მასში არ არის შექმნილი ყველა ტიპის სტუმრისთვის აუცილებელი პირობები. სტუმრებთან ასეთ შემთხვევებში ყველაფერი წინასწარ რომ დააზუსტოთ, დაჯავშნის მოთხოვნების მიღება კარგი არჩევანია.

თქვენი გადასაწყვეტია, ისარგებლებთ თუ არა მომენტალური დაჯავშნით, თუმცა გახსოვდეთ, რომ საიმედოობა შესანიშნავი მასპინძლობის საწინდარია. არ დაგავიწყდეთ Airbnb-ს წესები, რომლებიც ვრცელდება მასპინძლების მხრიდან ჯავშნების გაუქმების შემთხვევებზე და მაქსიმალურად შეეცადეთ, არ გააუქმოთ ჯავშანი.

ამავე დროს, თუ მომენტალურად გაფორმებული ჯავშანი თქვენთვის დისკომფორტის შემქმნელია (მაგალითად, როცა ის, რასაც პოტენციური სტუმრები ითხოვენ, თქვენს სახლის წესებს არღვევს), შეგახსენებთ, რომ ონლაინრეჟიმში შესაძლებელია ჯავშნის გაუქმება ჯარიმის გარეშე, ერთი კალენდარული წლის განმავლობაში მაქსიმუმ 3‑ჯერ.

გაითვალისწინეთ, რომ გაუქმების მიზეზი არ უნდა ეწინააღმდეგებოდეს Airbnb‑ს ანტიდისკრიმინაციულ პოლიტიკას. თუ ჯავშნის გაუქმება მაინც მოგიწევთ, ეს შეიძლება იმის მანიშნებელი იყოს, რომ მომენტალური დაჯავშნის ფუნქცია ამ ეტაპზე სათქვენო არ არის. ამ შემთხვევაში, შესაძლოა, მომდევნო რამდენიმე სტუმრისგან დაჯავშნის მოთხოვნები მიიღოთ.