ჯავშნების დადასტურების მეთოდის შერჩევა

Airbnb‑ს მეშვეობით სტუმრებისგან ჯავშნების მიღება ორი მეთოდიდან ერთ‑ერთით შეგიძლიათ: ავტომატურად, მომენტალური დაჯავშნის ფუნქციის გამოყენებით, ან არაავტომატურად, რა შემთხვევაშიც უნდა გამოეხმაუროთ დაჯავშნის მოთხოვნებს, რომლებიც შეტყობინებების სახით შემოვა. მრავალი სტუმარი უპირატესობას ანიჭებს მომენტალურ დაჯავშნას, რომელიც მასპინძლებსაც ეხმარება დროის დაზოგვაში და ჯავშნების რაოდენობის გაზრდაშიც კი.

მომენტალური დაჯავშნის პარამეტრის გააქტიურების შემთხვევაში, სტუმრობის მსურველებს საშუალება ექნებათ, მყისიერად დაჯავშნონ თქვენ მიერ განთავსებული საცხოვრებელი თქვენს კალენდარში დასაჯავშნად ხელმისაწვდომ თარიღებში. ამ შემთხვევაში, დაჯავშნის თითოეული მოთხოვნის ცალ‑ცალკე შემოწმება და დადასტურება არ მოგიწევთ.

ჯავშნის გასაფორმებლად ყველა სტუმარი უნდა დაეთანხმოს თქვენ მიერ დადგენილ სახლის წესებს, დამატებით კი ისინი უნდა აკმაყოფილებდნენ Airbnb‑ს მოთხოვნებს. განცხადების გამოქვეყნების შემდეგ საშუალება გექნებათ, განსაზღვროთ პარამეტრები, რომელთა მიხედვითაც სტუმრობის მსურველები ვალდებული იქნებიან:

• ჰქონდეთ სტუმრობის კარგი ისტორია Airbnb‑ზე (არცერთი მიმოხილვა 3 ვარსკვლავზე დაბალი შეფასებით და არც მხარდაჭერის გუნდისთვის შეტყობინებული ინციდენტები მათი მონაწილეობით)

• წაიკითხონ თქვენ მიერ მომზადებული დაჯავშნისწინა შეტყობინება, რომელსაც ისინი ავტომატურად მიიღებენ, და უპასუხონ მას

დაჯავშნის მოთხოვნების ვარიანტი საშუალებას მოგცემთ, შესაბამისი მოთხოვნები Airbnb‑ზე შემოსული შეტყობინებების სახით მართოთ. როცა სტუმრობის მსურველი დაჯავშნის მოთხოვნას გამოგიგზავნით, მის დასაკმაყოფილებლად ან უარსაყოფად 24 საათი გექნებათ. წინააღმდეგ შემთხვევაში, მოთხოვნის მოქმედების ვადა ამოიწურება. საჭიროებისამებრ, გაფრთხილებების მიღების დაყენებასაც შეძლებთ, რომ დაჯავშნის მოთხოვნების შესახებ დროულად შეიტყოთ.

როცა სტუმრობის მსურველი დაჯავშნის მოთხოვნით მოგმართავთ, შესაბამისი თარიღები იბლოკება თქვენს კალენდარში, რომ მათი დაჯავშნა სხვამაც არ მოითხოვოს. აღნიშნული თარიღები დაბლოკილი დარჩება თქვენს კალენდარში, თუ დაჯავშნის მოთხოვნას დააკმაყოფილებთ, ან მას მოქმედების ვადა ამოეწურება, ამიტომ არ დაგავიწყდეთ, დროულად გამოეხმაუროთ დაჯავშნის თითოეულ მოთხოვნას.

ჯავშნების დადასტურების მეთოდის შერჩევისას გაითვალისწინეთ შემდეგი:

მომენტალური დაჯავშნა

• სტუმრების მსურველებს მოსწონთ, როცა ჯავშნები მყისიერად დასტურდება, რაც, თავის მხრივ, მეტი ჯავშნის მიღებაში დაგეხმარებათ

• მომენტალური დაჯავშნის ფუნქციით მხოლოდ ის ჯავშნები დადასტურდება, რომლებიც თქვენ მიერ განსაზღვრულ პარამეტრებს აკმაყოფილებს

• დაგჭირდებათ კალენდრის რეგულარული განახლება და მისი სინქრონიზაცია თქვენ მიერ გამოყენებულ სხვა კალენდრებთან (ასეთის არსებობის შემთხვევაში)

დაჯავშნის მოთხოვნები

• სტუმრებს მოსწონთ, როცა მასპინძლები მათ სწრაფად ეხმაურებიან, ამიტომ უმჯობესია, ეს ვარიანტი გამოიყენოთ მხოლოდ იმ შემთხვევაში, თუ, ზოგადად, პასუხის სწრაფად გაცემა შეგიძლიათ (მაქსიმუმ 24 საათის განმავლობაში)

• მასპინძლებს, რომლებსაც დაჯავშნის მოთხოვნების მიღება ურჩევნიათ, საშუალება აქვთ, უფრო სიღრმისეულად გააცნონ სტუმრებს საცხოვრებელთან დაკავშირებული განსაკუთრებული წესები ან თავისებურებები, მაგალითად, ის, რომ ერთადერთ შესასვლელთან მიმავალი კიბე საკმაოდ დაქანებულია

• დაჯავშნის მოთხოვნების უარყოფა დაუშვებელია ისეთი მიზეზით, რომელიც წინააღმდეგობაშია Airbnb‑ს ანტიდისკრიმინაციულ პოლიტიკასთან

აირჩიეთ მეთოდი, რომელიც დაგეხმარებათ, თავიდან აიცილოთ ჯავშნების არასაპატიო მიზეზით გაუქმების შემთხვევები, რომელთა გამოც, შესაძლოა, გარკვეული ჯარიმები დაგეკისროთ კიდეც. არჩევანის ჩასწორებას ნებისმიერ დროს შეძლებთ დაჯავშნის პარამეტრებიდან.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.