დასუფთავების გადასახადის დაწესება

გვესმის, რომ ოპტიმალური ფასის დაწესება მასპინძლებისთვის მარტივი არ არის. ერთი ღამის ფასისა და დამატებითი გადასახადების განსაზღვრისას სათანადო ბალანსი უნდა დაიცვათ მასპინძლობასთან დაკავშირებული ხარჯების დაფარვასა და სტუმრებისთვის ფასის შესაბამისი პირობების შეთავაზებას შორის.

სტუმრები ერთ‑ერთ ყველაზე დიდ პრიორიტეტს სუფთა საცხოვრებელ სივრცეს ანიჭებენ. სპეციალისტის დაქირავებასთან და საწმენდი საშუალებების შეძენასთან დაკავშირებული ხარჯების დაფარვაში დაგეხმარებათ დასუფთავების გადასახადის დაწესება.

დასუფთავების გადასახადის დაწესებისას გახსოვდეთ, რომ ის ჯავშნის ჯამურ ღირებულებას გაზრდის. აღნიშნული გადასახადი განსაკუთრებით საგრძნობია მოკლევადიანი სტუმრობების შემთხვევაში, ვიდრე გრძელვადიანის დროს.

სტუმრობის მაქსიმალურად მეტი მსურველი რომ დააინტერესოთ, შეეცადეთ, ჯამური ფასი კონკურენტუნარიანი იყოს. სხვადასხვა დროს და სხვადასხვა ტიპის სტუმრობის ფასის გაგება შეგიძლიათ ფასების დაწესების ხელსაწყოების მეშვეობით, რომლებსაც კალენდარში იპოვით. დასუფთავების მაღალმა გადასახადებმა, შესაძლოა, გადააფიქრებინოს სტუმრობის მსურველს საცხოვრებლის დაჯავშნა.

დასუფთავების გადასახადის კუთხით რამდენიმე ვარიანტი გაქვთ. კერძოდ, შეგიძლიათ:

• განსაზღვროთ დასუფთავების სტანდარტული გადასახადი ყველა სტუმრისთვის (სტუმრობის ხანგრძლივობის მიუხედავად).
• დააწესოთ დასუფთავების შედარებით დაბალი გადასახადი მხოლოდ მოკლე ვადით (1‑2 ღამით) სტუმრობისთვის, სტანდარტული გადასახადი კი დანარჩენი ჯავშნებისთვის.
• დასუფთავების ხარჯები მთლიანად ან ნაწილობრივ გაითვალისწინოთ ერთი ღამის ფასში, კონკურენტუნარიანობა რომ შეინარჩუნოთ.

სტუმრებისთვის გასაგები უნდა იყოს, რას მიიღებენ ისინი დასუფთავების გადასახადის სანაცვლოდ. გვსმენია, რომ მათ არ სურთ არაგონივრული ამოცანების შესრულება, მაგალითად, საწოლებიდან თეთრეულის მოხსნა, სარეცხის გარეცხვა და საცხოვრებლის გაწმენდა მტვერსასრუტით.

ამასთან, სტუმრებს თავისუფლად შეგიძლიათ სთხოვოთ, რომ საცხოვრებლიდან გასვლისას გამორთონ სინათლე, ნარჩენი საჭმელი ნაგავში გადაყარონ ან, მაგალითად, ყველა კარი და ფანჯარა დაკეტონ.

თუ დასუფთავების გადასახადის დაწესებაზე ფიქრობთ, გაითვალისწინეთ შემდეგი:

• დასუფთავების გადასახადი არ უნდა აქციოთ შემოსავლის დამატებით წყაროდ — ის დასუფთავებასთან დაკავშირებულ გონივრულ ხარჯებს უნდა ფარავდეს.
• შეეცადეთ, დასუფთავების გადასახადი იყოს ერთი ღამის ფასზე ნაკლები.
• დაფიქრდით, ხომ არ არსებობს დასუფთავების ხარჯების დაფარვის სხვა ხერხი — მაგალითად, საგადასახადო შეღავათებით სარგებლობის გზით.
• შეიძინეთ საწმენდი საშუალებები ბითუმად — ეს დაგეხმარებათ თანხის დაზოგვაში ხანგრძლივ პერსპექტივაში.
• თუ მასპინძლობა ახლახან დაიწყეთ, დასუფთავების გადასახადის დაწესებამდე გირჩევთ, რამდენიმე დადებითი მიმოხილვა დააგროვოთ, რომ ჯერ სტუმრობის მსურველები დააინტერესოთ.

მასპინძელთა ზარალისგან დაცვა, რომელიც შედის პროგრამაში „AirCover მასპინძლებისთვის“, ითვალისწინებს ანაზღაურებას 3 მლნ აშშ დოლარის ფარგლებში იმ იშვიათ შემთხვევებში, როცა Airbnb‑ს მეშვეობით გაფორმებული ჯავშნის მოქმედების პერიოდში სტუმრები მატერიალურ ზიანს მოგაყენებენ. კონკრეტულ შემთხვევებში გათვალისწინებულია დამატებითი დასუფთავების ხარჯების ანაზღაურებაც, მაგალითად, როცა საჭიროა სიგარეტის სუნის ან ჩამჯდარი ლაქების მოცილება.

ანაზღაურების მოთხოვნა საკითხების გადაწყვეტის ცენტრის მეშვეობით შეგიძლიათ.

პროგრამის „AirCover მასპინძლებისთვის“ ფარგლებში მასპინძელთა ზარალისგან დაცვა, საცხოვრებლის შეთავაზებისას წარმოშობილი პასუხისმგებლობის დაზღვევა და შთაბეჭდილების შეთავაზებისას წარმოშობილი პასუხისმგებლობის დაზღვევა არ მოქმედებს Airbnb Travel LLC‑თი სარგებლობის შემთხვევაში, ასევე, არ ეხება იაპონიაში მოღვაწე მასპინძლებს (მათზე ვრცელდება იაპონიაში მასპინძელთა დაზღვევა და იაპონიაში შთაბეჭდილებების დაზღვევა). მასპინძლებისთვის, რომლებიც სტუმრებს კონტინენტურ ჩინეთში სთავაზობდნენ საცხოვრებლებსა თუ შთაბეჭდილებებს, მოქმედებს ჩინეთში მასპინძლების დაცვის გეგმა. გაითვალისწინეთ, რომ დაფარვის ყველა ლიმიტი მითითებულია აშშ დოლარში.

ვაშინგტონის შტატში განთავსებული განცხადებების შემთხვევაში, მასპინძელთა ზარალისგან დაცვის პროგრამის ფარგლებში Airbnb‑ს სახელშეკრულებო ვალდებულებებს ფარავს Airbnb‑ს მიერ შეძენილი სადაზღვევო პოლისი. მასპინძელთა ზარალისგან დაცვა არ არის კავშირში საცხოვრებლის შეთავაზებისას წარმოშობილი პასუხისმგებლობის დაზღვევასთან. მასპინძელთა ზარალისგან დაცვის ფარგლებში თქვენ აგინაზღაურდებათ სტუმრების მიერ საცხოვრებლისთვის ან მასში არსებული ნივთებისთვის მიყენებული ზიანი, თუ სტუმარი უარს იტყვის ზარალის ანაზღაურებაზე.

მასპინძლებისთვის, რომლებიც ცხოვრობენ ან ახორციელებენ საქმიანობას ავსტრალიის ფარგლებს გარეთ, მასპინძელთა ზარალისგან დაცვა ექვემდებარება ამ წესებს, შეზღუდვებსა და გამონაკლისებს. მასპინძლებისთვის, რომლებიც ცხოვრობენ ან ახორციელებენ საქმიანობას ავსტრალიის ტერიტორიაზე, მასპინძელთა ზარალისგან დაცვა ექვემდებარება ამ წესებს, შეზღუდვებსა და გამონაკლისებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.