შინაურ ცხოველებთან ერთად სტუმრობის მსურველთა მასპინძლობა

მრავალი ადამიანი მოგზაურობს ოჯახთან ერთად და ხშირად — შინაური ცხოველების თანხლებით. გვესმის, რომ შინაური ცხოველების მიღება ზოგჯერ ვერ ხერხდება, თუმცა თუ ამის შესაძლებლობა გაქვთ, ერთ ღამეზე დაწესებულ ფასს შეგიძლიათ შინაური ცხოველების გადასახადიც დაამატოთ.

შინაური ცხოველების გადასახადი არის თანხა, რომლის გამოყენებაც შესაძლებელია შინაური ცხოველების თანხლებით სტუმრობის შემდეგ მოსალოდნელი დასუფთავების ხარჯების დასაფარად — მაგალითად, ავეჯიდან ბეწვის მოსაცილებლად და მინის კარებზე ცხვირის ან თათების ანაბეჭდების მოსაწმენდად.

შინაური ცხოველების გადასახადი ერთ ღამეზე დაწესებულ ფასს ემატება და თანაბრად ნაწილდება ჯავშანში მითითებულ ღამეებზე. ანგარიშსწორების დროს ის ჯამურ ფასში აისახება და არა როგორც ცალკე გადასახადი.

მრავალი შინაური ცხოველი მიჩვეულია პატრონთან ერთად მოგზაურობას და მასპინძლის მხრიდან განსაკუთრებულ ყურადღებას არ საჭიროებს. ამის მიუხედავად, თუ საცხოვრებელში შინაურ ცხოველებთან ერთად სტუმრობას დაუშვებთ, კარგი იქნება, ყოველი შემთხვევისთვის იქონიოთ:

• წყლისა და საკვების თასები;
• ავეჯის გადასაფარებლები;
• პირსახოცები კარებთან თათების გასაწმენდად;
• საფხაჭნი და ტუალეტი (მაგალითად, მუყაოსი) კატებისთვის;
• დამატებითი საწმენდი საშუალებები.

მათ, ვინც შინაური ცხოველებთან ერთად აპირებს სტუმრობას, შესაძლოა, აინტერესებდეთ, რა დახვდებათ საცხოვრებელში, ასევე, მაგალითად, არის თუ არა შემოღობილი ეზო ან პირადი პატიო. აქედან გამომდინარე, აუცილებლად აღნიშნეთ განცხადებაში შინაური ცხოველებისთვის შესაფერისი ყველა საშუალება და პირობა.

ასევე, შეგიძლიათ:

• განაახლოთ სახლის წესები და აცნობოთ სტუმრობის მსურველებს, ერთდროულად რამდენი შინაური ცხოველის წამოყვანა შეუძლიათ (ერთიდან ხუთამდე). სახლის წესებშივე დააზუსტეთ, რომელი შინაური ცხოველები დაიშვებიან, შესაძლებელია თუ არა საცხოვრებელში მათი მარტო დატოვება, სად არ უნდა შევიდნენ ისინი, როდის არის საჭირო მათი დაბმა და რა წესით უნდა გადაიყაროს შესაბამისი ნაგავი.
• განაახლოთ გზამკვლევი და დაამატოთ მას რეკომენდაციები ადგილობრივ ვეტკლინიკებთან, ზოომაღაზიებთან და ძაღლების სასეირნო სივრცეებთან დაკავშირებით. ასევე, შეგიძლიათ სტუმრებს ურჩიოთ ვოლიერები და შინაური ცხოველების შინ მოვლის სამსახურები.

დასუფთავებისა და შინაური ცხოველების გადასახადები მოსალოდნელ ხარჯებს უნდა ფარავდეს. ამის მიუხედავად, რაც არ უნდა კარგად მომზადებული და თვინიერი იყოს სტუმრის თანმხლები შინაური ცხოველი, გაუთვალისწინებელი შემთხვევებისგან არავინაა დაზღვეული.

არსებობს ალბათობა, რომ შინაური ცხოველები გადასაკრავ მასალას გაკაწრავენ ან მას ლაქებს დაამჩნევენ. სწორედ ასეთი მოულოდნელი ხარჯების დასაფარად მოქმედებს AirCover მასპინძლებისთვის, რომელიც მასპინძელთა ზარალისგან დაცვას ითვალისწინებს. ანაზღაურების მოთხოვნა საკითხების გადაწყვეტის ცენტრის მეშვეობით შეგიძლიათ, რა დროსაც აუცილებლად უნდა წარმოადგინოთ ზიანის ამსახველი ფოტოები.

მნიშვნელოვანია, გესმოდეთ, რომ შინაურ ცხოველებად არ ითვლებიან დამხმარე ცხოველები, რადგან ისინი (როგორც წესი, ძაღლები) საგანგებოდ არიან გაწვრთნილი შშმ პირებისთვის სხვადასხვა ამოცანის შესასრულებლად.

ემოციური თანადგომის გამწევი ცხოველები ემოციურ დონეზე ეხმარებიან ადამიანებს, გაუმკლავდნენ შეზღუდული შესაძლებლობის სიმპტომებსა თუ შედეგებს. ამ ფუნქციას, როგორც წესი, ითავსებენ ყველასთვის ჩვეული ძაღლები, კატები და სხვა შინაური ცხოველები. დამხმარე ცხოველისგან განსხვავებით, არ არის აუცილებელი, რომ ემოციური თანადგომის გამწევი ცხოველი გაწვრთნილი იყოს შშმ პირებისთვის სხვადასხვა ამოცანის შესასრულებლად.

იმ შემთხვევაშიც კი, თუ მითითებული გაქვთ, რომ საცხოვრებელში შინაური ცხოველები არ დაიშვებიან, დამხმარე ცხოველის თანხლებით სტუმრობა ყოველთვის დაშვებული უნდა იყოს ყოველგვარი დამატებითი გადასახადის გარეშე (თუ ამ ვალდებულებისგან არ თავისუფლდებით).

აღნიშნული მითითებები ვრცელდება ემოციური თანადგომის გამწევ ცხოველებზეც ყველგან, სადაც მათი განთავსება სავალდებულოა მოქმედი კანონმდებლობის თანახმად, სხვაგან კი მათთვის შეგიძლიათ შინაური ცხოველების გადასახადი დააწესოთ, ან აამოქმედოთ წესი „შინაური ცხოველები არ დაიშვებიან“.

ვრცლად ადაპტირებულობასთან დაკავშირებით Airbnb‑ზე მოქმედი წესების შესახებ

მასპინძელთა ზარალისგან დაცვა არ არის სადაზღვევო პოლისი, ხოლო პროგრამა ექვემდებარება გარკვეულ წესებს, პირობებსა და შეზღუდვებს. ის არ მოქმედებს Airbnb Travel LLC‑თი მოსარგებლე მასპინძლებისთვის, ასევე, არ ეხება იაპონიაში მოღვაწე მასპინძლებს (მათზე ვრცელდება იაპონიაში მასპინძელთა დაზღვევა). მასპინძლები, რომლებიც ცხოვრობენ ან ახორციელებენ საქმიანობას ავსტრალიის ტერიტორიაზე, ექვემდებარებიან მასპინძელთა ზარალისგან დაცვის პირობებს ავსტრალიელი მომხმარებლებისთვის. გაითვალისწინეთ, რომ დაფარვის ყველა ლიმიტი მითითებულია აშშ დოლარში.

ვაშინგტონის შტატში განთავსებული განცხადებების შემთხვევაში, მასპინძელთა ზარალისგან დაცვის პროგრამის ფარგლებში Airbnb‑ს სახელშეკრულებო ვალდებულებებს ფარავს Airbnb‑ს მიერ შეძენილი სადაზღვევო პოლისი. მასპინძელთა ზარალისგან დაცვა არ არის კავშირში საცხოვრებლის შეთავაზებისას წარმოშობილი პასუხისმგებლობის დაზღვევასთან. მასპინძელთა ზარალისგან დაცვის ფარგლებში თქვენ აგინაზღაურდებათ სტუმრების მიერ საცხოვრებლისთვის ან მასში არსებული ნივთებისთვის მიყენებული ზიანი, თუ სტუმარი უარს იტყვის ზარალის ანაზღაურებაზე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.