რა ოდენობის გადასახადს აკისრებს Airbnb მასპინძლებს?

მომსახურების გადასახადები საშუალებას აძლევს Airbnb‑ს, გვერდში ედგეს მასპინძლებს და დაფაროს ხარჯები, რომლებიც დაკავშირებულია, მაგალითად, საგადახდო ოპერაციების დამუშავების სისტემასთან, მარკეტინგულ გადაწყვეტილებებთან თუ მომხმარებელთა მხარდაჭერის სამსახურთან.

ისინი თქვენ მიერ ერთ ღამეზე დაწესებული ფასისა და სხვა გადასახადების (მაგალითად, დასუფთავების) პროცენტული წილია. თქვენი კუთვნილი ანაზღაურება გამოითვლება თქვენ მიერ დაწესებული ფასიდან მომსახურების გადასახადების გამოქვითვის საფუძველზე. Airbnb‑ზე 2 ტიპის მომსახურების გადასახადია: გაყოფილი და ერთიანი.

მასპინძლები და სტუმრები მომსახურების გადასახადის თავ‑თავიანთ წილს იხდიან. თქვენი კუთვნილი ანაზღაურება გამოითვლება თქვენ მიერ დაწესებული ფასიდან მასპინძელთა მომსახურების 3%‑იანი გადასახადის გამოქვითვის საფუძველზე.* ამას გარდა, თქვენ მიერ განსაზღვრულ თანხასთან ერთად, სტუმრებიც იხდიან მომსახურების გადასახადს, რომელიც 14,1%‑დან 16,5%‑მდე მერყეობს. ამ შემთხვევაში გამოდის, რომ თქვენ ერთ ფასს აწესებთ, სტუმრები კი სხვა ფასს ხედავენ და იხდიან. მაგალითად, თუ ფასად 100 აშშ დოლარს დააწესებთ, 97 აშშ დოლარი თქვენ გერგებათ, სტუმრებს კი დაახლოებით 115 აშშ დოლარის გადახდა მოუწევთ.

თქვენი კუთვნილი ანაზღაურება გამოითვლება თქვენ მიერ დაწესებული ფასიდან მომსახურების ერთიანი გადასახადის გამოქვითვის საფუძველზე. ის, როგორც წესი, 14‑დან 16%‑მდე მერყეობს.** ამ შემთხვევაში თქვენ მიერ დაწესებული ფასი იქნება ის თანხა, რომელსაც სტუმრები დაინახავენ და გადაიხდიან. მაგალითად, თუ ერთიანი გადასახადი 15,5%‑ს შეადგენს და ფასად 115 აშშ დოლარს დააწესებთ, 97,18 აშშ დოლარი გერგებათ, სტუმრებს კი ზუსტად 115 აშშ დოლარის გადახდა მოუწევთ.

ერთიანი გადასახადის სტრუქტურა სავალდებულოა ტრადიციული სასტუმრო ობიექტების — მაგალითად, სასტუმროებისა და აპარტამენტების უმეტესობის — შესახებ განთავსებული განცხადებებისთვის. ამას გარდა, ერთიანი გადასახადის სტრუქტურით სარგებლობს იმ მასპინძელთა უმეტესობაც, რომლებიც იყენებენ ობიექტებისა თუ არხების მართვის პროგრამულ უზრუნველყოფას.

მომსახურების გადასახადები ეხმარება Airbnb‑ს, უზრუნველყოს შეუფერხებელი მუშაობა და გვერდში ედგეს მასპინძლებს. მათი მეშვეობით, ასევე, იფარება:

• სტუმრების მიერ განხორციელებული საგადახდო ოპერაციების დამუშავების ხარჯები;
• სტუმრობის მსურველებს შორის განცხადებების პოპულარიზაციის ხარჯები;
• მომხმარებელთა სადღეღამისო მხარდაჭერის ხარჯები.

ფასის დეტალიზაციის გასაცნობად გახსენით ნებისმიერი ჯავშანი თქვენი კალენდრიდან ან ნებისმიერი ტრანსაქცია შემოსავლის მართვის პანელიდან. მომსახურების გადასახადის ოდენობა მოცემული იქნება ცალკე სტრიქონზე.

მომსახურების გადასახადების შესახებ დამატებითი ინფორმაციის მიღება შეგიძლიათ დახმარების ცენტრიდან, რომელშიც ხელმისაწვდომია სტატიები შემდეგ საკითხებზე:

• Airbnb‑ს მომსახურების გადასახადები
• დამატებული ღირებულების გადასახადი (დღგ)
• Airbnb‑შთაბეჭდილებები და Airbnb‑მომსახურებები
• მომსახურების გადასახადის დაბრუნება სტუმრებისთვის

* ზოგიერთს მეტის გადახდა უწევს, მათ შორის, მასპინძლებს, რომლებსაც იტალიასა და ბრაზილიაში აქვთ განთავსებული განცხადებები.

** მასპინძლებს, რომლებსაც გაუქმების უმკაცრესი წესები აქვთ დადგენილი, შესაძლოა, უფრო მაღალი გადასახადი ეკისრებოდეთ.

ზოგიერთ ქვეყანასა და რეგიონში ისედაც სავალდებულოა ჯამური ფასების ჩვენება ოფიციალური მოსაკრებლების გათვალისწინებით. ჯამური ფასი (ოფიციალური მოსაკრებლების ჩათვლით) ყოველთვის აისახება ანგარიშსწორებამდე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.