საყოფაცხოვრებო პირობების დამატება და რედაქტირება გამარტივდა

ისეთი მცირე დეტალები, როგორიცაა, მაგალითად, რომელი ყავა თუ ხედები ხვდებათ სტუმრებს ყოველ დილით საცხოვრებელში, ზოგჯერ მნიშვნელოვნად აისახება მთელ სტუმრობაზე. სწორედ ამიტომ, გადავწყვიტეთ, გაგიმარტივოთ პოტენციური სტუმრებისთვის სათანადო მოლოდინის შექმნა და საშუალება მოგცეთ, მეტად დააკონკრეტოთ, რას სთავაზობთ მათ 5‑ვარსკვლავიანი სტუმრობისთვის. კერძოდ, ჩვენ დავამატეთ საყოფაცხოვრებო პირობების 40 ახალი ვარიანტი, ასევე, განცხადებაში მითითებული დეტალების ჩასწორების ახალი ხერხები.

სავსებით შესაძლებელია, რომ ყველაზე მეტად გეამაყებოდეთ ტყის ლანდშაფტი, რომელიც მისაღები ოთახიდან ჩანს, ან ოკეანის პანორამული ხედი შემინული ტერასიდან — ამ ყველაფრის მითითებას ამიერიდან საყოფაცხოვრებო პირობების „თვალწარმტაცი ხედების“ ვარიანტის მეშვეობით შეძლებთ. მნიშვნელობა არ აქვს, რა ხედი იშლება საცხოვრებლიდან — მთის ხედი, ტბის ხედი ან, თუნდაც, ტბის ნაწილობრივი ხედი — დეტალების დაკონკრეტება სტუმრებს არა მხოლოდ რეალისტურ მოლოდინს გაუჩენს, არამედ სასურველი პეიზაჟების პოვნაში დაეხმარება.

თვალწარმტაცი ხედი რომ დაამატოთ, „საცხოვრებლის მართვის“ სექციიდან გადადით „განცხადების დეტალებზე“. ჩასასწორებლად, უბრალოდ, აირჩიეთ შესაბამისი განცხადება.

გარე სამზარეულოს სთავაზობთ სტუმრებს? პატიოს? ბლენდერს, დილით გემრიელი სმუზი რომ მოამზადონ? აუცილებლად აღნიშნეთ! საყოფაცხოვრებო პირობების ახალი ვარიანტებიდან კი შეგიძლიათ, მაგალითად, აირჩიოთ:

• პლაჟზე გასასვლელი
• შესასვლელი კურორტის ტერიტორიაზე
• სავარჯიშო აღჭურვილობა
• ჰამაკი
• საკითხავი მასალა

რაც უფრო ზუსტი ინფორმაცია ექნებათ სტუმრებს მომავალი სტუმრობის შესახებ, მით უფრო სათანადოდ მოემზადებიან. სწორი მოლოდინის შექმნა უაღრესად მნიშვნელოვანია და როგორც სუპერმასპინძლები აღნიშნავენ, არ არის აუცილებელი, საცხოვრებელი უნაკლო იყოს — მთავარია, სტუმრებმა წინასწარ იცოდნენ, რა დახვდებათ.

ჩვენ დავაჯგუფეთ ყველაზე პოპულარული საყოფაცხოვრებო პირობები, რომ მათი პოვნა და არჩევა გაგიადვილოთ. მაგალითად, ამიერიდან ერთი სივრციდან შეძლებთ მიუთითოთ, რომ სტუმრებს Wi‑Fi კავშირს, ტელევიზორს, სამუშაო სივრცეს, სარეცხ მანქანას, კონდიციონერსა და სხვა მოთხოვნად პირობებს სთავაზობთ.

საყოფაცხოვრებო პირობები ძველებურად, ოთახების მიხედვითაც იქნება ორგანიზებული, ამიტომ კვლავ ერთდროულად აირჩევთ ყველაფერს, რაც, ვთქვათ, სამზარეულოშია ხელმისაწვდომი. პოპულარული საყოფაცხოვრებო პირობების სექციის მიზანია, დაგეხმაროთ, უფრო მარტივად აცნობოთ სტუმრებს, სთავაზობთ თუ არა მათ იმ პირობებს, რომლებსაც ყველაზე ხშირად ეძებენ.

ადრე, საყოფაცხოვრებო პირობების ფუნქციის მეშვეობით, Airbnb‑ზე შეგეძლოთ მიგეთითებინათ, რომ სტუმრებს სამუშაო ზონასა თუ პატიოს მსგავს გარე სივრცეებს სთავაზობთ, ახლა კი საშუალება გაქვთ, მეტად დაკონკრეტდეთ. მაგალითად, მათ, ვინც დისტანციურად მუშაობს, აინტერესებთ, არის თუ არა საცხოვრებელში საგანგებო სამუშაო მაგიდა, მონიტორი ან ოფისის სკამი, თუ ჩვეულებრივ მაგიდას ახვედრებთ. ამას გარდა, შეძლებთ დააზუსტოთ, ვთქვათ, პატიო საზიაროა თუ მთლიანად სტუმრების განკარგულებაში იქნება.

უფრო კონკრეტულად შეგიძლიათ რამდენიმე სხვა საყოფაცხოვრებო პირობაც განსაზღვროთ, კერძოდ:

• სტრიმინგის სერვისები და მოწყობილობები (მათ შორის, Apple TV, Netflix, Disney+ და სხვა)
• ყავის აპარატი (წვეთოვანი ტიპის, Keurig‑ის ან ესპრესოს ყავის აპარატი)
• გრილ‑ბარბექიუ (ნახშირის, შეშის და ა.შ.)
• შიდა ბუხარი (მაგ., ელექტრო, შეშის და ა.შ.)
• გათბობისა და გაგრილების სისტემები

თუ საცხოვრებელში საყოფაცხოვრებო პირობები შეიცვლება, განცხადებაში შესაბამისი განახლებების შეტანას მარტივად შეძლებთ, რაც საშუალებას მოგცემთ, კონცენტრირდეთ თქვენს საყვარელ საქმეზე — მასპინძლობაზე.