საცხოვრებლის (და სტუმრების) მომზადება ძლიერი ხანძრებისთვის

ძლიერი ხანძრები რეკორდებს ხსნის და მთელი მსოფლიოს მასშტაბით აისახება როგორც მასპინძლების, ისე სტუმრების ცხოვრებაზე. აქედან გამომდინარე, ახლა განსაკუთრებით მნიშვნელოვანია, ზუსტად იცოდეთ, როგორ იმოქმედოთ ძლიერი ხანძრების დროს საკუთარი თავის, სტუმრებისა და საცხოვრებლის დასაცავად.

Airbnb მთელი სერიოზულობით ეკიდება თქვენი და თქვენი სტუმრების უსაფრთხოებას. ახლახან ნდობისა და უსაფრთხოების საკითხებზე საკონსულტაციო კოალიცია შევქმენით, რომლის ფარგლებშიც თანამშრომლობა დავიწყეთ სახანძრო რაზმების უფროსთა საერთაშორისო ასოციაციასთან (IAFC). თანამშრომლობის მიზანია, გაგიზიაროთ რესურსები, რომლებიც დაგეხმარებათ ძლიერი ხანძრების დროს საცხოვრებლის უსაფრთხოების დაცვასა და სტუმრებისთვის მნიშვნელოვანი ინფორმაციის მიწოდებაში, რაც საგანგებო სიტუაციაში გამოადგებათ.

თქვენ ყოველთვის შეგიძლიათ გქონდეთ სამოქმედო გეგმა იმ შემთხვევისთვის, თუ თქვენთან ძლიერი ხანძრები იჩენს თავს. IAFC‑ს პროგრამა „Ready, Set, Go!“ შესანიშნავი რესურსია რჩევების მისაღებად ძლიერი ხანძრების დროს უსაფრთხოების დაცვასთან დაკავშირებით. მართალია, პროგრამა აშშ‑ში მოქმედებს, თუმცა რეკომენდაციები უნივერსალურია.

გთავაზობთ რამდენიმე მათგანს:

• მოაშორეთ ჭარბი მცენარეულობა სახლის, ავტოფარეხისა და საცხოვრებლის ტერიტორიაზე არსებული სხვა ნაგებობების 9 მეტრის რადიუსში, რომ ერთგვარი დამცავი სივრცე შექმნათ.
• გამოიყენეთ მყარი ზედაპირები (მაგალითად, ბეტონი, ქვა ან საკირწყლავი ფილები) 1,5 მეტრის მანძილზე სახლის შენობის ირგვლივ.
• სახლთან ახლოს რაიმეს დათესვისას უპირატესობა მიანიჭეთ ცეცხლგამძლე, დაბალ, ბალახოვან მცენარეულობას.
• მოჭერით დაბალი ტოტები, რომ ბალახს, ბუჩქებსა და უფრო მაღალ ხეებს შორის მანძილი მინიმუმ 2 მეტრი იყოს.

მასპინძლობისას აქტუალური ინფორმაცია რომ მიიღოთ, შეგიძლიათ გამოიწეროთ საგანგებო გაფრთხილებები იმ ტერიტორიის შესახებ, სადაც თქვენ მიერ სტუმრებისთვის შეთავაზებული საცხოვრებელი მდებარეობს. როგორც წესი, ამის გაკეთება შესაძლებელია ქალაქის ან მუნიციპალიტეტის ოფიციალურ ვებსაიტზე. ეს დაგეხმარებათ მიმდინარე მოვლენების შესახებ ინფორმაციის მიღებაში მაშინაც კი, როცა სტუმრებთან ახლოს არ იმყოფებით.

ზოგიერთი ადამიანი შეიძლება გსტუმრობდეთ რეგიონებიდან, რომლებსაც ძლიერი ხანძრები არ შეხებია და, შესაბამისად, ვერ აცნობიერებდეს რისკს. ასეა თუ ისე, შეგიძლიათ დაეხმაროთ სტუმრებს სათანადოდ მომზადებაში.

აი, რას გვირჩევს „Ready, Set, Go!“:

• დაამატეთ სახლის წესებს ძირითადი ინფორმაცია ძლიერი ხანძრების შედეგების შესახებ, რომ სტუმრობის მსურველებმა ჯავშნის გაფორმებამდე იცოდნენ ტყის ხანძრების გაჩენის ალბათობის შესახებ.
• დატოვეთ გადაუდებელი დახმარების ადგილობრივი სამსახურების საკონტაქტო ნომრები თვალსაჩინო ადგილას, მაგალითად, მაცივარზე ან ჟურნალების მაგიდაზე.
• მიუთითეთ უბნის ან რეგიონის ზოგადი სახელწოდება (მაგალითად, ასურეთის აგარაკები, თეთრიწყაროს მუნიციპალიტეტი, ქვემო ქართლის მხარე). ამ ინფორმაციის დართვა შეგიძლიათ როგორც სახლის წესებისთვის, ისე გადაუდებელი დახმარების ადგილობრივი სამსახურების სიისთვის.
• მიაწოდეთ სტუმრებს ადგილობრივი რუკა, რომელზეც მკაფიოდ არის აღნიშნული საცხოვრებლის მისამართი, ახლომდებარე გზების სახელწოდებები, რამდენიმე საევაკუაციო მარშრუტი და პოტენციურად უსაფრთხო ადგილები, სადაც ისინი შეძლებენ გარიდებას.
• ურჩიეთ სტუმრებს, გამოიწერონ საგანგებო გაფრთხილებები ადგილობრივი ხანძრების შესახებ იმ შემთხვევაშიც კი, თუ საცხოვრებელთან სიმშვიდეა.
• შეატყობინეთ სტუმრებს, რომ მათ არ სჭირდებათ ევაკუაციის შესახებ ბრძანების ლოდინი, განსაკუთრებით, თუ უცნობ მდებარეობაზე ორიენტირებისთვის დამატებითი დრო სჭირდებათ.

ძლიერი ხანძრებისთვის მზადყოფნის შესახებ დამატებითი ინფორმაციისთვის მიმართეთ ადგილობრივ სახანძრო სამსახურს. თუ აშშ‑ში იმყოფებით, ასევე, შეგიძლიათ გაეცნოთ „Ready, Set, Go!“‑ს, რომლის დახმარებითაც ვრცლად შეიტყობთ ძლიერი ხანძრების შესახებ და სამოქმედო გეგმას შეიმუშავებთ.