ბიზნესის წამოწყება Airbnb‑ს მეშვეობით

Airbnb‑ს მეშვეობით წარმატების მისაღწევად სულაც არ არის საჭირო სამეწარმეო გამოცდილება. ამას ადასტურებენ ბრაიანი და კეტრინი, სუპერმასპინძლები კოლუმბუსიდან (ოჰაიო). თავისუფალი საძინებლის შესახებ Airbnb‑ზე განცხადების განთავსებამდე მათ არც მცირე ბიზნესი ჰქონიათ და არც მასპინძლობის სფეროში უმუშავიათ.

„რვა წელი გავიდა და უკვე ოთხი განცხადება გვაქვს, მალე კი B&B‑ს გახსნას ვგეგმავთ“, — გვიყვება ბრაიანი.

თუ სტუმრებისთვის თქვენი სახლის ან სხვა საცხოვრებელი სივრცის შეთავაზებაზე ფიქრობთ და გაინტერესებთ, როგორ გადადგათ პირველი ნაბიჯები Airbnb‑ზე, მაშინ ეს სტატია სწორედ თქვენთვისაა. ყველაფერი ძალიან მარტივია: ჩვენ აგიხსნით, როგორ გამოთვალოთ პოტენციური შემოსავალი, რა შედის ყოველდღიურ ამოცანებში და ყველაფერ დანარჩენს, რისი ცოდნაც ამ ეტაპზე გჭირდებათ.

პირველ რიგში, იპოვეთ ადგილობრივი B&B‑ები და Airbnb‑ზე განთავსებული საცხოვრებლები, რომლებიც თქვენსას ჰგავს. გაანალიზეთ ნაპოვნი ვარიანტები — გაარკვიეთ, რას სთავაზობენ მასპინძლები სტუმრებს, ან ხომ არ არის ისეთი რამ, რისი შეთავაზებაც მხოლოდ თქვენ შეგიძლიათ.

დაფიქრდით, ვისთვის იქნება შესაფერისი საცხოვრებელი, რომლის შეთავაზებასაც აპირებთ. მაგალითად, ზოგიერთ რეგიონს მრავალი საქმიანი ადამიანი სტუმრობს, ზოგში კი ბევრი დამსვენებელი ჩამოდის ბავშვებთან ერთად. ამასთან, ზოგან ახლომდებარე ღირსშესანიშნაობებია, მაგალითად, ეროვნული პარკები თუ ისტორიული ადგილები. მსგავსი ინფორმაციის მეშვეობით უფრო მარტივად ჩამოყალიბდებით დიზაინის, საყოფაცხოვრებო პირობებისა და სტუმრობის ხანგრძლივობის საკითხებზე.

როცა ადგილობრივი ბაზრის კვლევას დაასრულებთ, პოტენციური შემოსავლის გამოთვლაში დაგეხმარებით. შემოსავლის კუთხით მიზნების დასახვისას გირჩევთ, დაფიქრდეთ ხარჯებსა და საფასო პოლიტიკაზე:

ჩაიწერეთ ყველა ხარჯი
პოტენციური მოგება რომ განსაზღვროთ, გაითვალისწინეთ როგორც ერთჯერადი (მაგალითად, დეკორი, Wi‑Fi ქსელი და საცხოვრებლის მოსამზადებლად საჭირო სხვა საბაზისო კომპონენტები), ისე რეგულარული ხარჯები (მაგალითად, საწოლის თეთრეული, სააბაზანოს ნივთები, დასუფთავება, იპოთეკა და ა.შ.). არ დაგავიწყდეთ ტექნიკური მომსახურების ღირებულებაც, მაგალითად, შეკეთება‑რემონტის ან საკვამურის ყოველწლიური შემოწმების საჭიროების შემთხვევაში.

შეიმუშავეთ საფასო პოლიტიკა
საფასო პოლიტიკის შემუშავებისას გაითვალისწინეთ სხვა ადგილობრივი მასპინძლების ტარიფები და დააკვირდით მათ მთელი წლის განმავლობაში. ამას გარდა, შესაძლებელია ფასების კორექტირება სეზონების, შაბათ-კვირისა და მასშტაბური ღონისძიებების ჩატარების პერიოდების მიხედვით.

გაითვალისწინეთ, რომ ერთი ღამის ღირებულების გარდა, სტუმრები იხდიან მომსახურებისა და თქვენ მიერ დაწესებულ სხვა გადასახადებს. არ შეგეშინდეთ დაბალი ფასით დაწყება, რადგან რამდენიმე 5‑ვარსკვლავიანი მიმოხილვის მიღების შემდეგ თავისუფლად შეძლებთ მის გაზრდას.

ისარგებლეთ გონივრული ფასწარმოქმნით
ფასები ავტომატურად რომ დაწესდეს ხოლმე, სურვილისამებრ, შეგიძლიათ ჩართოთ გონივრული ფასწარმოქმნის ფუნქცია, რომელიც ითვალისწინებს 70‑ზე მეტ სხვადასხვა ფაქტორს, მათ შორის, სეზონს და არსებულ მოთხოვნას. ფუნქციის პარამეტრებში შეგიძლიათ ერთი ღამის მინიმალური ტარიფის მითითებაც, რომ ფასი ამ ნიშნულზე დაბლა არასოდეს ჩამოვიდეს.

Airbnb‑ს მეშვეობით მასპინძლობა სხვადასხვაგვარად არის შესაძლებელი. ზოგიერთი მასპინძელი შედარებით მეტ დროს უთმობს ამ საქმეს, ზოგი კი — ნაკლებს. გადაწყვიტეთ, რომელი რეჟიმი შეგეფერებათ, ჩვენ კი შესაბამის ხელსაწყოებსა და სერვისებზე ვიზრუნებთ.

როცა ბრაიანმა და კეტრინმა მასპინძლობა დაიწყეს, ყველაფერს თვითონ აკეთებდნენ. ბრაიანის თქმით, თეთრეულსაც თავად რეცხავდნენ და მცირე სარემონტო სამუშაოებსაც ასრულებდნენ. რაღაც მომენტში წყვილმა გადაწყვიტა, რამდენიმე ამოცანა პროფესიონალებისთვის მიენდო.

ამასთან, ზოგიერთი ყოველდღიური ამოცანის ავტომატიზაციაც არის შესაძლებელი — მაგალითად, ჩვენ გთავაზობთ დაგეგმილი შეტყობინებების, მზა პასუხებისა და მომენტალური დაჯავშნის ფუნქციებს.

თქვენ თავად წყვეტთ, როდის და რა სიხშირით მიიღოთ სტუმრები Airbnb‑ს მეშვეობით. კალენდრისა და დაჯავშნის პარამეტრების დახმარებით შეგიძლიათ განსაზღვროთ დასაჯავშნად ხელმისაწვდომობა, სტუმრობის მინიმალური და მაქსიმალური ხანგრძლივობები თუ სხვა დეტალები.

წარმატებას აღწევენ ის მასპინძლები, რომლებთან სტუმრობაც ადამიანებს სასიამოვნო მოგონებად რჩებათ. თუ ზუსტად ამას აპირებთ, ყველაფერი მარტივად გამოგივათ.

გადაწყვიტეთ, ვისი დაინტერესება გსურთ საცხოვრებლით (მაგალითად, შინაური ცხოველების პატრონების, წყვილების, ოჯახების თუ დისტანციური მუშაკების), შემდეგ კი იზრუნეთ საყოფაცხოვრებო პირობებზე, რომლებიც შესაბამისი კატეგორიის სტუმრებს სჭირდებათ. დაფიქრდით, საცხოვრებლის რომელი თავისებურებების ხაზგასმა ღირს და როგორ აგრძნობინოთ სტუმრებს თავი განსაკუთრებულად. მაგალითად, თბილი მისასალმებელი წერილი ან ადგილობრივი სუვენირები ბევრს დაამახსოვრდება.

„ადგილობრივ მხატვარს ვთხოვეთ, დაეხატა ჩვენი სახლები გარედან, შემდეგ კი მისი ნამუშევრების მიხედვით დავბეჭდეთ ღია ბარათები, რომლებსაც სტუმრები სამახსოვროდ იტოვებდნენ ან სახლში აგზავნიდნენ“, — გვიყვება კეტრინი.

Airbnb‑ზე განცხადების განთავსება სრულიად უფასოა, მომსახურების გადასახადს კი მხოლოდ ჯავშნის დადასტურების შემთხვევაში იხდით. ამ პროცესს თავი უპრობლემოდ რომ გაართვათ, ჩვენ მოგიმზადეთ მარტივი ინსტრუქცია.

გახსოვდეთ, რომ იდეალური სტუმარი ნებისმიერი ტიპის საცხოვრებლისთვის მოიძებნება. საჭიროა მხოლოდ სათანადო მოლოდინის შექმნა განცხადებაში მითითებული ზუსტი ინფორმაციისა და უახლესი ფოტოების მეშვეობით.

Airbnb მაქსიმალურად ცდილობს, ყველა ეტაპზე დაეხმაროს მასპინძლებს, რომ მათ დაბრკოლებები არ შეექმნათ.

• ჩვენ გთავაზობთ AirCover‑ს მასპინძლებისთვის — კომპლექსურ დაცვას, რომელიც უფასოდ მოჰყვება ყველა ჯავშანს, მხოლოდ Airbnb‑ზე.
• სხვა მასპინძლებთან კონტაქტისთვის ისარგებლეთ გაერთიანების ცენტრით ან გაწევრიანდით მასპინძელთა ადგილობრივ კლუბში.
• თუ საწყის ეტაპზე ბევრი შეკითხვა გაქვთ ან დახმარება გჭირდებათ, დაიხმარეთ სუპერმასპინძელი.
• მასპინძლობასთან დაკავშირებულ სხვა რჩევებს შეგიძლიათ გაეცნოთ რესურსების ცენტრში.
• მომხმარებელთა მხარდაჭერის სპეციალიზებული გუნდი კი ხელმისაწვდომია დღე‑ღამის ნებისმიერ მონაკვეთში.