პენსიონერი ბრენდას შესახებ, რომელიც შემოსავალს Airbnb‑ს მეშვეობით იღებს
ბრენდა Airbnb‑ს მეშვეობით სტუმრებს სთავაზობს თავის მეორე საცხოვრებელს, რომელიც ახალი ორლეანის ჯენტილის უბანში მდებარეობს. მასპინძელი ახალ ორლეანში დაიბადა და გაიზარდა, ამჟამად კი ის სიამოვნებით აცნობს მსოფლიოს სხვადასხვა კუთხიდან ჩამოსულ სტუმრებს არა მხოლოდ საცხოვრებელს, არამედ ქალაქსაც. „ჩემი ცხოვრების 66‑ვე წელი ამ ქალაქში გავატარე, ეს საცხოვრებელი კი 32 წელია, მეკუთვნის“, — იხსენებს ბრენდა და დასძენს: „ახალ ორლეანში საჯარო სკოლებში დავდიოდი და მომწონს, როცა სხვებს ჩემს ქალაქს ვაჩვენებ“. როცა ბრენდა საცხოვრებლად თავის მეორე ქმართან გადავიდა, მას არ სურდა, გაეყიდა სახლი, რომელშიც თავის ბავშვებს ზრდიდა. მასპინძლობამ მას საშუალება მისცა, შეენარჩუნებინა სახლი, პენსიაზე გასვლის შემდეგ კი საკუთარი თავი ერჩინა.
ბრენდამ Airbnb მაშინ აღმოაჩინა, როცა თავის ქალიშვილს ესპანეთში ფეხის ადგმაში ეხმარებოდა: „ერთ ქალბატონთან გავჩერდით, ძალიან კარგი ადამიანი იყო, სხვა საცხოვრებელში გადასვლაშიც კი დაეხმარა ჩემს გოგოს. ერთი სიტყვით, არაჩვეულებრივად დამამახსოვრდა და სურვილი გამიჩინა, მეც დავდგომოდი ასე მხარში ვინმეს“. ახლა ის ასეც იქცევა. როცა სტუმრები ჰყავს, ბრენდა მათ ნუგბარსა და რეკომენდაციებს ახვედრებს. ის მათ საინტერესო ადგილებს ურჩევს და ცდილობს, სტუმრებმა მაქსიმალურად სასიამოვნოდ გაატარონ დრო ქალაქში: „სტუმრებთან ჩემი საფირმო სიტყვით გამოვდივარ, ერთ‑ერთმა მათგანმა ისიც კი აღნიშნა, რომ თავი ისე იგრძნო, როგორც თავის საყვარელ დეიდასთან“.
ბრენდას მართლაც ძალიან მოსწონს, როცა სტუმრებს სხვადასხვა ადგილს ურჩევს, თანაც ისეთ ვარიანტებს არჩევს, რომელთა შესახებაც ახალ ორლეანში ჩამოსულმა ადამიანებმა, ხშირ შემთხვევაში, არ იციან. „ყოველთვის ვურჩევ, მოინახულონ ლეიკფრონტის აეროპორტი, რომელიც კერძო თვითმფრინავებს იღებს. იქ ერთი პატარა რესტორანია, Messina's, სადაც მსოფლიოში საუკეთესო ბლინებს ამზადებენ. ორ ცალსაც კი ვერ გაუმკლავდებით, იმხელებია“, — იცინის ბრენდა და დასძენს: „ჩემი შემდეგი რეკომენდაციაა Sassafras, სადაც ახალ ორლეანში გუმბოს საუკეთესო წვნიანს მიირთმევთ, თანაც ყოველდღე ახალ‑ახალს ამზადებენ“.
ბრენდა თვლის, რომ იმ თანხით, რომელსაც სტუმრები ზოგავენ, როცა მის მიერ Airbnb‑ს მეშვეობით შეთავაზებულ საცხოვრებელში რჩებიან, ისინი ადგილობრივ ბიზნესს ეხმარებიან: „ადამიანებს, რომლებიც ჩემთან ჩერდებიან, შესაძლოა, არ ჰქონდეთ 600 $ სამი დღე ცენტრალურ სასტუმროში რომ გაატარონ, თუმცა მზად არიან, ეს თანხა ახალი ორლეანის სხვადასხვა დაწესებულებაში თუ მაღაზიაში დახარჯონ. ეს ადგილობრივი ეკონომიკის განვითარებას უწყობს ხელს“.
ბრენდასთვის მასპინძლობა საცხოვრებლის შენარჩუნებისა და თავის რჩენის საშუალებაა. სერიოზული ტრავმის შემდეგ მას ნაადრევად მოუწია პენსიაზე გასვლა. „კისერზე ოპერაცია გადავიტანე და მუშაობა ამეკრძალა“ — აღნიშნავს ბრენდა. ქარიშხალ „კატრინას“ შემდეგ სადაზღვევო ტარიფებმა და ქონების გადასახადმა ორზე მეტჯერ იმატა. „რისი იმედი უნდა გქონდეს ადამიანს, როცა კომუნალური გადასახადები, დაზღვევის ღირებულება და გადასახადები ასე გაიზარდა?! მხოლოდ ოჯახისა და მეგობრების“, — ამბობს ბრენდა.
მასპინძლობით მიღებული შემოსავალი მნიშვნელოვნად დაეხმარა მას მსხვილი ხარჯების დაფარვაში. „სოციალური დახმარების გარდა, მასპინძლობა ჩემი შემოსავლის ერთადერთი წყაროა“, — ამბობს ბრენდა. მას ისიც აღელვებს, რომ ქალაქის მმართველობის გადაწყვეტილებით მან, შესაძლოა, ეს თანხაც ვეღარ მიიღოს: „თუ მუნიციპალიტეტი სამუდამოდ აკრძალავს მთლიანად შეთავაზებული საცხოვრებლების მოკლე ვადით გაქირავებას, ძალიან სამწუხარო და საზარალო იქნება. ისიც კი არ ვიცი, რით აპირებენ იმ შემოსავლის ჩანაცვლებას, რომელსაც მოკლე ვადით გაქირავების ნებართვები უზრუნველყოფდა. ყოველივე ეს მნიშვნელოვნად აისახება ჩემს შემოსავალზე. ძალიან გული მწყდება“.
ბრენდა იმედოვნებს, რომ, საბოლოო ჯამში, მუნიციპალიტეტი გონივრულ გადაწყვეტილებას მიიღებს და საშუალებას მისცემს მათ, ვისაც მეორე საცხოვრებელი აქვს ან ვინც მოკლე ვადით გაქირავების ნებართვას ფლობს, გააგრძელონ საცხოვრებლების მთლიანად შეთავაზება. „იმედი მაქვს, რომ გადაწყვეტილება მიღებული იქნება კერძო ბინათმფლობელების სასარგებლოდ — ადამიანების, რომლებიც ჩემსავით მუდამ აქ ცხოვრობდნენ“, — ამბობს ბრენდა. მოკლევადიანი გაქირავების სამართლიანი და გონივრული რეგულაციები საშუალებას მისცემს ბრენდას, კვლაც მიიღოს ის მნიშვნელოვანი შემოსავალი, რომელიც თავის სარჩენად სჭირდება, პარალელურად კი განაგრძოს თავისი უმშვენიერესი ქალაქის გამორჩეული ელჩობა.
სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.