ახალი სამასპინძლო ხელსაწყოები თქვენი ბიზნესის განვითარების ხელშესაწყობად

ჩვენ გარდავქმენით აპი, რომ მასში შემოგთავაზოთ ყველაფერი, რაც თქვენ მიერ ჩვენს პლატფორმაზე განთავსებული საცხოვრებლის სამართავად გჭირდებათ. ამიერიდან გაცილებით მარტივად გააკონტროლებთ ჯავშნებს და იოლადვე ჩაასწორებთ დასაჯავშნად ხელმისაწვდომობასა თუ ფასებს.

როცა სისტემაში მასპინძლის სტატუსით იქნებით შესული, ყველა სამასპინძლო ხელსაწყო წარმოდგენილი იქნება ქვემოთ ჩამოთვლილ 5 სხვადასხვა ჩანართში.

განახლებული ჩანართი „დღეს“ აისახება აპის გახსნისთანავე. ჩანართიდან სწრაფად შეიტყობთ ცნობებს თითოეული ჯავშნის შესახებ, რაც დღის დაგეგმვასა და სათანადო მასპინძლობის გაწევაში დაგეხმარებათ.

• გადაერთეთ მიმდინარე და მომავალი ჯავშნების ხედებს შორის, რომ შეიტყოთ, ვის მასპინძლობთ და როდის.
• დაამატეთ ჯავშნებს პირადი მინაწერები, რომ მოგვიანებით გაიხსენოთ განსაკუთრებული თარიღები ან კონკრეტული თხოვნები.
• მიიღეთ სამოქმედო რჩევები თითოეულ ჯავშანთან დაკავშირებით — მაგალითად, როცა სტუმრების მოკითხვის ან მათი დატოვებული მიმოხილვის წაკითხვის დრო მოვა.

სახეცვლილ კალენდარში საგრძნობლად მარტივია დასაჯავშნად ხელმისაწვდომობისა თუ ფასების შემოწმება და ჩასწორება.

• განბლოკეთ დასაჯავშნად ხელმისაწვდომი მეტი თარიღი და დაბლოკეთ ის ღამეები, რომლებში მასპინძლობასაც ვერ ახერხებთ.
• პირდაპირ კალენდრიდან დაარეგულირეთ ხელმისაწვდომობისა და ფასების პარამეტრები — მაგალითად, სტუმრობის მინიმალური ხანგრძლივობები და ფასდაკლებები.
• იხილეთ ახალი პერსონალური რეკომენდაციები თითოეული ღამის ფასთან დაკავშირებით. რეკომენდებული ფასები ეფუძნება საცხოვრებლის მდებარეობას, საყოფაცხოვრებო პირობებს, თქვენ მიერ ადრე მიღებულ ჯავშნებს, უახლეს ფასებს თქვენს რეგიონში და სხვა ფაქტორებს.

„განცხადებების“ ჩანართი გთავაზობთ თქვენს განცხადებასთან დაკავშირებული სხვადასხვა მონაცემის მართვის მეტ ხერხს. ისარგებლეთ შემოთავაზებული ხელსაწყოებით, რომ მაქსიმალურად ზუსტი და სრული წარმოდგენა შეუქმნათ სტუმრობის მსურველებს საცხოვრებელზე.

• განაახლეთ განცხადება — მაგალითად, დაამატეთ მას მაღალხარისხიანი ფოტოები ყურადღების მისაპყრობად ან დაბინავების დეტალური გამკვლევი.
• მეტი ჯავშანი რომ მიიღოთ, ჩამოთვალეთ ყველა საყოფაცხოვრებო პირობა, რომლებიც ხელმისაწვდომია საცხოვრებელში (ადაპტირებული პირობების ჩათვლით).
• გადახედეთ თქვენს განცხადებას, რომ გაიგოთ, როგორ ხედავენ მას სტუმრობის მსურველები.

„შეტყობინებების“ ჩანართი დაგეხმარებათ სტუმრებთან კომუნიკაციაში როგორც სტუმრობამდე, ისე მისი მსვლელობისას და დასრულების შემდეგ.

• ისარგებლეთ მზა პასუხების ახალი რედაქტორით, რომ საჭიროებისამებრ ჩაასწოროთ პასუხები ხშირად დასმულ შეკითხვებზე, ასევე, დაგეგმეთ შეტყობინებების ავტომატური გაგზავნა სხვადასხვა მნიშვნელოვან მომენტში.
• გააზიარეთ ფოტოები, რომ წარუდგინოთ სხვებს თავი ან რაიმე მნიშვნელოვანზე გაამახვილოთ ყურადღება.
• იხილეთ უფრო თვალსაჩინოდ წარმოდგენილი დაჯავშნის მოთხოვნები, რომელთაც დართული ექნება კონკრეტული ინფორმაცია — მაგალითად, სტუმრობის თარიღები და სტუმრების რაოდენობა.

„მენიუ“ წვდომას განიჭებთ თქვენს შემოსავალზე, ანალიტიკასა და სხვადასხვა პარამეტრზე. ჩვენ შემოგთავაზებთ პერსონალურ რჩევებსა და საინფორმაციო რესურსებს, რომლებიც მასპინძლობის ბიზნესის განვითარებაში დაგეხმარებათ.

• გაარკვიეთ თქვენი შემოსავალი და მოამზადეთ ინდივიდუალური ანგარიშები შემოსავლის მართვის პანელიდან.
• გაეცანით სტუმრებისგან მიღებულ შეფასებებსა და მიმოხილვებს „ანალიტიკის“ სექციაში.
• მართეთ თქვენი ანგარიში და იპოვეთ სხვადასხვა სამასპინძლო რესურსი.

ახლავე მოითხოვეთ ადრეული წვდომა, რომ დაუყოვნებლივ დაიწყოთ ახალი სამასპინძლო ხელსაწყოების გამოყენება.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.