მზა პასუხების გამოყენება დროის დაზოგვის მიზნით

მასპინძლებს, რომლებიც სტუმრებს საცხოვრებლებსა და შთაბეჭდილებებს სთავაზობენ, ხშირად ეკითხებიან ერთსა და იმავეს: როგორ მოგაგნოთ? რა არის Wi‑Fi‑ს პაროლი? ივნისში გაქვთ თავისუფალი თარიღები?

მზა პასუხების ფუნქცია, რომელიც „შეტყობინებების“ ჩანართშია წარმოდგენილი, საშუალებას გაძლევთ, ისარგებლოთ წინასწარ შედგენილი პასუხებით, რომ ყოველთვის ოპერატიულად გამოეხმაუროთ დაინტერესებულ პირებს.

მზა პასუხები გულისხმობს შეტყობინებების მოკლე შაბლონებს, რომლებიც შეიცავს წინასწარ შედგენილ პასუხებს ხშირად დასმულ შეკითხვებზე. შეტყობინებებისთვის პერსონალური ელფერის შესაძენად ზოგიერთ პასუხში გამოიყენება ცვლადები, რომლებიც ავტომატურად ჩანაცვლდება კონკრეტული ცნობებით საცხოვრებლისა და სტუმრის მიერ გაფორმებული ჯავშნის შესახებ.

მზა პასუხის გაგზავნა შეგიძლიათ სტუმრებთან კომუნიკაციის ნებისმიერ ეტაპზე. სურვილისამებრ, შეგიძლიათ, გამოიყენოთ როგორც თქვენ მიერვე მომზადებული შაბლონები, ისე Airbnb‑ს მიერ შედგენილი ტექსტი, რომ ყველაფრის ნულიდან აკრეფა არ მოგიწიოთ.

„შეტყობინებების“ ჩანართი იყენებს ხელოვნურ ინტელექტს სტუმრების შეკითხვების შინაარსის გასაგებად, რის საფუძველზეც ის შემდეგ ავტომატურად შემოგთავაზებთ ერთ-ერთ მზა პასუხს. შემოთავაზება აისახება მიმოწერაში და მას მხოლოდ თქვენ დაინახავთ. გაგზავნამდე შეძლებთ როგორც მზა პასუხის ჩასწორებას, ისე განსხვავებული შეტყობინების აკრეფას.

შეტყობინების სხვა დროისთვის გაგზავნა რომ დაგეგმოთ, აირჩიეთ ხატულა, რომელიც მოცემულია შეტყობინების აკრეფის გვერდით. აირჩიეთ შაბლონი და მისი გაგზავნის დრო. როცა შეტყობინების გაგზავნის თქვენ მიერ მითითებული დრო მოახლოვდება, სტუმართან მიმოწერაში შეხსენება გამოჩნდება. თქვენ საშუალება გექნებათ, ჩაასწოროთ შეტყობინება, ან გამოტოვოთ მისი გაგზავნა, თუ ის იმეორებს ინფორმაციას, რომელიც უკვე გაუზიარეთ სტუმარს.

უმჯობესია, თუ მზა პასუხები იქნება მოკლე და მხოლოდ ერთ საკითხზე კონცენტრირებული.

ისარგებლეთ მზა პასუხების ფუნქციით, რომ უფრო ოპერატიულად გასცეთ პასუხი ხშირად დასმულ შეკითხვებს. მაგალითად, მათი გამოყენება შეგიძლიათ, როცა შეკითხვა ეხება ერთ‑ერთ ქვემოთ მოცემულ თემას.

• ხელმისაწვდომობა: აცნობეთ სტუმრობის მსურველებს, რომ მათ თავისუფლად შეუძლიათ დაჯავშნონ ნებისმიერი თარიღი, რომელიც განბლოკილია კალენდარში.
• მისასვლელი გზა ან ტრანსპორტი: დაადასტურეთ საცხოვრებლის ან შეხვედრის ადგილის მისამართი და დაურთეთ შეტყობინებას მითითებები იმასთან დაკავშირებით, თუ როგორ მივიდნენ სტუმრები მისამართზე.
• Wi‑Fi ქსელი: მიუთითეთ საცხოვრებელსა თუ კონკრეტულ ადგილას ხელმისაწვდომი Wi‑Fi ქსელის სახელი და მისი პაროლი.
• დაგეგმილზე ადრე დაბინავება: შეადგინეთ ტექსტი იმ შემთხვევისთვის, როცა საშუალება გექნებათ, დააბინაოთ სტუმარი სტანდარტულ დროზე ადრე.
• დაგეგმილზე გვიან გასვლა: შეადგინეთ ტექსტი იმ შემთხვევისთვის, როცა საშუალება გექნებათ, სტუმარს საცხოვრებლიდან სტანდარტულ დროზე გვიან გასვლის უფლება მისცეთ.
• საძილე პირობები: დაადასტურეთ საცხოვრებელში არსებული საძინებლების, საწოლებისა და სააბაზანოების რაოდენობა.

თუ სტუმრებს საცხოვრებელს სთავაზობთ, მზა პასუხების მათთვის ავტომატურად გაგზავნის დაგეგმვა შეგიძლიათ ქვემოთ ჩამოთვლილ მნიშვნელოვან ეტაპებზე.

• ჯავშნის დადასტურება: გაუგზავნეთ სტუმარს მისასალმებელი ტექსტი, როცა მისი ჯავშანი დადასტურდება.
• დაბინავებამდე: შეეხმიანეთ სტუმარს დაბინავებამდე 24‑48 საათით ადრე, როცა მისთვის უკვე ხელმისაწვდომი იქნება სტუმრობასთან დაკავშირებული ყველა დეტალი.
• სტუმრობის პირველი ღამის შემდეგ: მოიკითხეთ სტუმარი და ჰკითხეთ, რამე ხომ არ სჭირდება დამატებითი კომფორტისთვის.
• საცხოვრებლიდან გასვლამდე: სტუმრობის დასრულების წინა საღამოს შეახსენეთ სტუმარს საცხოვრებლიდან გასვლის დრო და შესაბამისი მითითებები.
• სტუმრობის დასრულების შემდეგ: საცხოვრებლიდან გასვლის შემდეგ 24‑დან 48 საათამდე პერიოდში გადაუხადეთ სტუმრებს მადლობა სტუმრობისთვის და შეახსენეთ, მიმოიხილონ, როგორ მოეწონათ ყველაფერი.

თუ სტუმრებს შთაბეჭდილებას სთავაზობთ, მზა პასუხების მათთვის ავტომატურად გაგზავნის დაგეგმვა შეგიძლიათ ქვემოთ ჩამოთვლილ მნიშვნელოვან ეტაპებზე.

• ჯავშნის დადასტურება: გაუგზავნეთ სტუმარს მისასალმებელი ტექსტი, როცა მისი ჯავშანი დადასტურდება.
• შეხვედრამდე: შეეხმიანეთ სტუმარს და ჰკითხეთ, რამე ხომ არ უნდა გაითვალისწინოთ კვებასთან, ადაპტირებულობასთან ან მისთვის მნიშვნელოვან სხვა საკითხებთან დაკავშირებით. დაიტოვეთ საკმარისი დრო სტუმრების თხოვნების გასათვალისწინებლად.
• შეხსენება შეხვედრის შესახებ: მიწერეთ სტუმრებს შეხვედრამდე 24 საათით ადრე — აცნობეთ მათ მისასვლელი გზა და კონკრეტული მითითებები იმასთან დაკავშირებით, თუ სად ხვდებით.
• შეხვედრის შემდეგ: გადაუხადეთ სტუმრებს მადლობა ჯავშნისთვის და სთხოვეთ, დაგიტოვონ გამოხმაურება.

ზოგიერთი მზა პასუხი შეიცავს ცვლადებს, რომლებიც შეტყობინების გაგზავნისას ავტომატურად ჩანაცვლდება, მაგალითად, სტუმრის სახელით ან გარკვეული სხვა ინფორმაციით ჯავშნისა თუ საცხოვრებლის შესახებ. აქედან გამომდინარე, იზრუნეთ, რომ განცხადებაში ყველა ცნობა სრული და განახლებული იყოს. ცარიელი ცვლადების შემცველი შეტყობინება სწორად არ გაიგზავნება.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.