სუპერმასპინძლობის კრიტერიუმები

Airbnb‑ს სუპერმასპინძლობის პროგრამა აღიარებს ყველაზე მაღალი შეფასებისა და გამოცდილების მქონე მასპინძლებს.

განსაკუთრებული სტუმარ‑მასპინძლობისთვის თქვენს განცხადების გვერდზე განთავსდება სპეციალური აღნიშვნა, რომელმაც, შესაძლოა, მეტი ჯავშნის მიღებაში შეგიწყოთ ხელი. სტუმრების დაახლოებით 59%‑ის თქმით, სუპერმასპინძლის სტატუსი საცხოვრებლის ხარისხის სარწმუნოობას უსვამს ხაზს, თავად სუპერმასპინძლები კი სხვებთან შედარებით 60%‑ით მეტ შემოსავალს იღებენ.* ამას გარდა, სუპერმასპინძლები სარგებლობენ მხარდაჭერის სპეციალური გუნდის დახმარებით, იღებენ სამოგზაურო ვაუჩერებსა თუ მოსაწვევებს საგანგებო ღონისძიებებზე და გამორჩეულ ადგილს იკავებენ ძიების შედეგებში.

სუპერმასპინძლის სტატუსი 1,3 მილიონზე მეტმა მასპინძელმა მოიპოვა — ამას თქვენც შეძლებთ, თუ მაქსიმალურად მეტ ჯავშანს მიიღებთ და სტუმრებს შესანიშნავ მასპინძლობას გაუწევთ.** კალენდარში რამდენიმე პარამეტრის შეცვლა, განცხადების განახლება და კომუნიკაციის გაუმჯობესება უკვე საგრძნობი შედეგის მომტანი იქნება.

სუპერმასპინძლის სტატუსი ენიჭება განცხადების მფლობელს, თუ მას კარგი ისტორიით გამორჩეული ანგარიში აქვს, ბოლო 365 დღის მონაცემებით კი მის მიერ კმაყოფილდება შემდეგი ოთხი კრიტერიუმი:

• მიღებულია საკმარისი რაოდენობის ჯავშნები. ნამასპინძლევია მინიმუმ 10 სტუმრობა, ან გროვდება სტუმრობის 100 ან მეტი ღამე (მინიმუმ სამი ჯავშნის ფარგლებში).
• გაუქმების შემთხვევები მინიმალურია. გაუქმების სიხშირე 1%‑ზე ნაკლებია (გამონაკლისები დაიშვება მნიშვნელოვნად შემაფერხებელი გარემოებების ან სხვა საფუძვლიანი მიზეზების შემთხვევაში).
• სტუმრების მომართვები პასუხგაცემულია. ნარჩუნდება გამოხმაურების მინიმუმ 90%‑იანი სიხშირე. გამოხმაურების სიხშირე ასახავს, სტუმრების პირველი მომართვების რამდენ პროცენტს გაეცა პასუხი 24 საათის განმავლობაში.
• სტუმარ-მასპინძლობა გამორჩეულია. საერთო შეფასებაა 4,8 ვარსკვლავი ან მეტი.

მკაფიო პასუხებით სწრაფი გამოხმაურება, გაუქმების შემთხვევების თავიდან აცილება და განსაკუთრებული სტუმარ-მასპინძლობა კარგია იმისთვისაც, რომ თქვენ მიერ განთავსებული საცხოვრებელი გამორჩეულ პოზიციებზე მოხვდეს ძიების შედეგებში და მეტი შემოსავალი მიიღოთ.

ქვემოთ გთავაზობთ რამდენიმე რჩევას, თუ როგორ დააკმაყოფილოთ აღნიშნული კრიტერიუმები, რომ მალევე დაიწყოთ სუპერმასპინძლობის ყველა უპირატესობთ სარგებლობა.

თუ კალენდარში მეტ ღამეს განბლოკავთ, თქვენი განცხადება ძიების მეტ შედეგში მოხვდება და უფრო დიდი ალბათობით მიიღებთ სუპერმასპინძლობისთვის საჭირო რაოდენობის ჯავშნებს.

გადადით თქვენი განცხადების კალენდარზე და მოძებნეთ დაბლოკილი ღამეები, რომლებიც განაცრისფრებულია. განბლოკეთ ისინი, თუ შესაბამის ღამეებში მასპინძლობას ახერხებთ.

ძიების მეტ შედეგში მოხვედრის კიდევ ერთი ხერხია უფრო ხანმოკლე სტუმრობების დაშვება. სტუმრობის მინიმალური ხანგრძლივობის განსაზღვრა იმის მიხედვითაც შეგიძლიათ, თუ კვირის რომელ დღეს იგეგმება დაბინავება. მაგალითად, თუ სტუმრობის მსურველების მხრიდან მოთხოვნა შაბათ‑კვირას უფრო მაღალია, შეგიძლიათ აირჩიოთ ერთი ღამით სტუმრობის დაშვება შუა კვირაში, მაგრამ არა პარასკევის ან შაბათის ღამის დაჯავშნის შემთხვევაში.

მეტი ჯავშნის მიღებაში, ასევე, დაგეხმარებათ სტუმრებისთვის უფრო მოქნილი პირობების შეთავაზება და დაბინავებამდე სავალდებულო დროის შემცირება. აირჩიეთ მინიმალური დრო, რომელიც გჭირდებათ ჯავშნის გაფორმებიდან სტუმრის დაბინავებამდე. სტუმრობის მსურველებს შეგიძლიათ ჯავშნის გაფორმების დღესვე დაბინავების საშუალებაც კი მისცეთ.

სურვილისამებრ, შეგიძლიათ განსაზღვრულზე უფრო მოკლე დროში დაბინავების მოთხოვნების დაშვებაც. აღნიშნულ მოთხოვნებს ინდივიდუალურად გაეცნობით და შეძლებისდაგვარად დააკმაყოფილებთ.

ძიების შედეგებში უფრო მაღალ პოზიციებზე ხვდება ხოლმე განცხადებები იმ საცხოვრებლების შესახებ, რომელთა ფასიც სხვა მსგავსი, ახლომდებარე ვარიანტებისაზე დაბალია. მინიმუმ 10 ჯავშანი რომ მიიღოთ, გირჩევთ, ჩაასწოროთ ერთ ღამეზე დაწესებული ფასი თქვენი უშუალო კონკურენტების ფასების გათვალისწინებით.

მსგავსი ახლომდებარე საცხოვრებლების ფასების შესამოწმებლად გადადით თქვენი განცხადების კალენდარზე და აირჩიეთ თარიღთა დიაპაზონი 31 დღის ფარგლებში.

ამის შემდეგ გამოჩნდება თქვენი რეგიონის რუკა, რომელზეც მითითებული იქნება მსგავსი საცხოვრებლების საშუალო ფასები. საცხოვრებლების მსგავსებას განაპირობებს სხვადასხვა ფაქტორი — მაგალითად, მდებარეობა, ფართობი, თავისებურებები, საყოფაცხოვრებო პირობები, შეფასებები, მიმოხილვები და ის, თუ სხვა რომელ ვარიანტებს ეცნობიან სტუმრობის მსურველები თქვენი განცხადების პარალელურად.

თუ ყოველ ღამეზე ერთი და იგივე ფასი გაქვთ დაწესებული, მეტი სტუმრის დასაინტერესებლად შეგიძლიათ განასხვაოთ სამუშაო დღეებისა და შაბათ‑კვირების ფასები. ღამეების მიხედვით ფასების ცვლა მაქსიმალურად მეტი ჯავშნისა და შემოსავლის მიღებაში შეგიწყობთ ხელს.

სტუმრობის მსურველთა ყურადღების მიქცევის კიდევ ერთი კარგი ხერხი ფასდაკლებების შეთავაზებაა. მათი განსხვავებული ინტერესების გასათვალისწინებლად შეგიძლიათ დააწესოთ:

• ფასდაკლებები ერთ კვირასა და თვეზე. ერთ კვირაზე დაწესებული ფასდაკლებები ვრცელდება მინიმუმ 7 ღამის ხანგრძლივობის ჯავშნებზე, ხოლო ერთ თვეზე — მინიმუმ 28 ღამისაზე. აღნიშნული, შესაძლოა, დაგეხმაროთ თქვენ მიერ განთავსებულ საცხოვრებლებში სტუმრობის საშუალო ხანგრძლივობის გაზრდაში (რაც, თავის მხრივ, თავიდან აგაცილებთ საცხოვრებლის ხშირი მომზადების საჭიროებას).
• ფასდაკლება ადრეულ დაჯავშნაზე. ის გავრცელდება დაბინავებამდე 1‑24 თვით ადრე გაფორმებულ ჯავშნებზე და დაგეხმარებათ, მაქსიმალურად მეტი ჯავშანი მიიღოთ მომავალი სეზონებისთვის.

ერთ კვირაზე ან თვეზე მინიმუმ 10%‑იანი და ადრეულ დაჯავშნაზე მინიმუმ 3%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

გაითვალისწინეთ, რომ ფასდაკლება ადრეულ დაჯავშნაზე მიუწვდომელია, როცა ჩართულია გონივრული ფასწარმოქმნა, ხოლო ფასდაკლება გრძელვადიან ჯავშნებზე ადგილობრივი წესებისა და რეგულაციების შესაბამისად უნდა განსაზღვროთ.

სტუმრებისთვის მნიშვნელოვანია მკაფიო კომუნიკაცია, სუპერმასპინძლობის კრიტერიუმების მიხედვით კი მასპინძლები გამოხმაურების მინიმუმ 90%‑იან სიხშირეს უნდა ინარჩუნებდნენ. მზა პასუხების მომზადება დაგეხმარებათ, სტუმრებს მარტივად და ეფექტურად უპასუხოთ.

მზა პასუხები გულისხმობს შეტყობინებების მოკლე შაბლონებს, რომლებიც სხვადასხვა აქტუალურ თემას ეხება. მათი შექმნა თუ ჩასწორება წინასწარ შეგიძლიათ, რომ შემდეგ სტუმართან მიმოწერისას გამოიყენოთ.

ხუთვარსკვლავიანი მიმოხილვები რომ მიიღოთ, სხვა დანარჩენთან ერთად, სტუმრების საჭიროებებიც უნდა გაითვალისწინოთ და შეძლებისდაგვარად დააკმაყოფილოთ.

• არ დაგავიწყდეთ პერსონალური შტრიხები. ზოგჯერ მცირედიც კი საკმარისია იმისთვის, რომ სტუმრებმა თავი განსაკუთრებულად იგრძნონ. მაგალითად, შეგიძლიათ, ურჩიოთ მათ თქვენი საყვარელი კაფე ან დაუწეროთ მისასალმებელი წერილი.
• შეუქმენით სტუმრებს შინაურული გარემო. შეეცადეთ, სტუმრების თვალით შეხედოთ საცხოვრებელსა და ყველაფერს, რასაც მათ სთავაზობთ. თუ სტუმრებს დაგეგმილზე ადრე დაბინავების საშუალებას მისცემთ, ან ლამაზად დაკეცილ და დაწყობილ პირსახოცებს დაახვედრებთ, შესაძლოა, არა კარგი, არამედ შესანიშნავი საერთო შეფასება დაიმსახუროთ.
• იყავით კავშირზე. აცნობეთ სტუმრებს, რომ ნებისმიერ დროს შეუძლიათ თქვენთან ან თანამასპინძელთან დაკავშირება. დააყენეთ გაფრთხილებების მიღება, რომ გეცნობოთ, როცა სტუმრები მოგწერენ.

განცხადების გვერდის რეგულარული განახლება სტუმრობის სათანადო მსურველების დაინტერესებაში დაგეხმარებათ.

ხარისხიანი ფოტოები ყურადღებას იქცევს, რეალისტურ მოლოდინს ქმნის და სტუმრობის მსურველებს ეჭვებს უქარწყლებს. შესაბამისად, სუპერმასპინძლის სტატუსის მოსაპოვებლად გირჩევთ, განაახლოთ საცხოვრებლის ფოტოები.

• დაგეგმეთ კადრები. დაფიქრდით, როგორ გადაიღოთ სურათები ისე, რომ საუკეთესოდ წარმოაჩინოთ საცხოვრებლის თავისებურებები, მოთხოვნადი საყოფაცხოვრებო ნივთები და ადაპტირებული პირობები. სხვადასხვა რაკურსით აღბეჭდეთ ფოტოებზე თითოეული ოთახი და სივრცე, რომელიც სტუმრების განკარგულებაში იქნება.
• ატვირთეთ ჰორიზონტალური, მაღალი გარჩევადობის სურათები. ფოტოები უნდა იყოს მინიმუმ 800×1200 პიქსელი. რაც უფრო დიდია ფაილი, მით უკეთესი (მაქსიმუმ 10 მეგაბაიტი).
• დაიხმარეთ პროფესიონალი. დაფიქრდით, ხომ არ გირჩევნიათ პროფესიონალი ფოტოგრაფის დაქირავება. მსოფლიოს ზოგიერთ ქალაქში Airbnb‑ს მეშვეობითაც შესაძლებელია პროფესიონალთან დაკავშირება.
• შექმენით ფოტოტური. Airbnb‑ზე არსებული ხელსაწყო ავტომატურად გადაანაწილებს თქვენ მიერ ატვირთულ ფოტოებს ოთახების მიხედვით, რაც დაეხმარება სტუმრობის მსურველებს, უკეთ წარმოიდგინონ საცხოვრებლის განლაგება. სურვილისამებრ, შეგეძლებათ ფოტოების გადაადგილება, წაშლა და დამატება, ასევე, თითოეული ოთახისთვის დეტალური ინფორმაციის მითითება და ფოტოებისთვის წარწერების დართვა.

განცხადების ტექსტი ისეთივე მნიშვნელოვანია, როგორც მისი იერსახე. სათაური, აღწერილობა და საყოფაცხოვრებო პირობების ჩამონათვალი მეტ შესაძლებლობას გთავაზობთ, რომ დააინტერესოთ სტუმრობის მსურველები და მკაფიო წარმოდგენა შეუქმნათ საცხოვრებლის შესახებ.

• მოუფიქრეთ მოკლე და შინაარსიანი სათაური განცხადებას. სათაური უნდა გადმოსცემდეს ზუსტ და უნიკალურ ინფორმაციას საცხოვრებლისა და მისი შემოგარენის შესახებ. მაგალითად, ისეთი მოკლე სათაურიდან, როგორიცაა „მშვიდი სტუდიო უფიცის მახლობლად“, მომენტალურად გასაგებია, რომ საცხოვრებელი იტალიის ქალაქ ფლორენციის ცენტრალურ ნაწილში მდებარე, მშვიდი ბინაა.
• პრაქტიკა აჩვენებს, რომ უმჯობესია, საცხოვრებელი მკაფიოდ და გულწრფელად იყოს აღწერილი. მიუთითეთ კონკრეტული ინფორმაცია იმის შესახებ, თუ რა დახვდებათ საბოლოო ჯამში სტუმრებს. მაგალითად, აღნიშნეთ, რომ უკანა ეზო შემოღობილია და ბავშვებსა თუ შინაურ ცხოველებს დიდ სივრცეში სირბილი შეეძლებათ.
• ჩამოთვალეთ ყველა საყოფაცხოვრებო პირობა, რომლებსაც სტუმრებს სთავაზობთ. დაფიქრდით, სტუმრებს შორის მოთხოვნადი რომელი საყოფაცხოვრებო პირობების მოწყობა თუ გაუმჯობესება შეგიძლიათ (მაგალითად, შესაძლებელია მინისეიფის ჩანაცვლება გონიერი საკეტით, ან ინტერნეტის სიჩქარის გაზრდა). საყოფაცხოვრებო პირობები, რომლებსაც სტუმრები ყველაზე ხშირად ეძებენ, მოიცავს დამოუკიდებლად დაბინავების შესაძლებლობას, Wi‑Fi ქსელს, სარეცხ მანქანას, საშრობს, სტანდარტულ ან საკაბელო ტელევიზიასა და ბარბექიუსთვის გამოყოფილ ტერიტორიას.***

* ეფუძნება 2023 წლის ოქტომბრიდან 2024 წლის ოქტომბრამდე პერიოდში სუპერმასპინძლებისა და სხვა მასპინძლების მედიანურ შემოსავალს.

** ეფუძნება Airbnb‑ს შიდა მონაცემებს 2024 წლის 7 ოქტომბრის მდგომარეობით.

*** ეფუძნება Airbnb‑ს მიერ 2024 წლის 1 იანვრიდან 30 ივნისამდე ყველაზე მოთხოვნადი საყოფაცხოვრებო პირობების შესახებ შეგროვებულ მონაცემებს.

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან.

ინტერვიუებში მონაწილეობისთვის მასპინძლებმა კომპენსაცია მიიღეს.

მასპინძლობასთან დაკავშირებული რჩევები ექვემდებარება ადგილობრივ კანონმდებლობას.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.