სეზონისთვის იდეალურად მომზადება

სეზონი ახლოვდება, ამიტომ გვსურს, გაგაცნოთ Airbnb‑ზე არსებული ხელსაწყოების გამოყენების რამდენიმე ხერხი, მაქსიმალური სარგებელი რომ მიიღოთ, როცა სტუმრობაზე მოთხოვნა პიკს აღწევს.

სეზონისთვის მზად რომ იყოთ, პირველ რიგში, განბლოკეთ მეტი ღამე კალენდარში. ამგვარად, განცხადება ძიების მეტ შედეგში მოხვდება, რაც საბოლოოდ მეტი შემოსავლის მიღებაში დაგეხმარებათ.

კალენდარში ღამეების განბლოკვისას გაითვალისწინეთ სტუმრობის მინიმალური ხანგრძლივობის პარამეტრი. თქვენ მიერვე დადგენილ ზღვარს არ უნდა ჩამოსცდეთ, ან სტუმრობის სტანდარტული მინიმალური ხანგრძლივობა უნდა შეამციროთ. კონკრეტული განბლოკილი ღამეებისთვის ინდივიდუალურადაც შეგიძლიათ სტუმრობის ხანგრძლივობის განსაზღვრა.

„სეზონზე კალენდარში თარიღების განბლოკვა განსაკუთრებით მნიშვნელოვანია. სტუმრობებს შორის რამდენიმედღიანი შესვენების ნაცვლად, სეზონს უფრო მოქნილი პირობებით ვხდები, კიდევ უფრო მეტ სტუმარს რომ ვუმასპინძლო“, — აღნიშნავს მირანდა, სუპერმასპინძელი ლიტლ‑როკიდან (არკანზასი, აშშ)

გადადით თქვენი განცხადების კალენდარზე და მოძებნეთ დაბლოკილი ღამეები, რომლებიც განაცრისფრებულია. განბლოკეთ ისინი, თუ შესაბამის ღამეებში მასპინძლობას ახერხებთ.

თუ დასაჯავშნად ხელმისაწვდომ პერიოდს სტანდარტულ სამ თვეზე მეტი ხნით გაზრდით, სტუმრობის მსურველები კიდევ უფრო ადრე შეძლებენ ჯავშნების გაფორმებას. კალენდრის განბლოკვა შესაძლებელია ორი წლით ადრეც კი. ამგვარად, თქვენი განცხადება ძიების მეტ შედეგში მოხვდება, თანაც ის უფრო შესამჩნევი იქნება იმ პერიოდებში, როცა არც ისე ბევრი სხვა საცხოვრებელია დასაჯავშნად ხელმისაწვდომი.

კალენდარში ყოველდღიურად ერთი თარიღი განიბლოკება, არჩეული ხელმისაწვდომი პერიოდის მიხედვით. თუ, ვთქვათ, დასაჯავშნად ხელმისაწვდომ პერიოდად 12 თვეს განსაზღვრავთ, სტუმრობის მსურველები შეძლებენ ნებისმიერი პერიოდის დაჯავშნას მომავალი წლის დღეის სწორი თარიღის ჩათვლით.

„ისარგებლეთ გაზრდილი მოთხოვნის პერიოდებით. შესაძლოა, სხვა მასპინძლები არ იყვნენ მზად და არ ჰქონდეთ განბლოკილი თარიღები კალენდრებში, თქვენ კი წინდახედულობა მეტ სარგებელს მოგიტანთ“, — აღნიშნავს ჯიმი, სუპერმასპინძელი პალმ‑სპრინგზიდან (კალიფორნია, აშშ).

სეზონზე კონკურენტუნარიანობის შესანარჩუნებლად გაეცანით მსგავსი ახლომდებარე საცხოვრებლების ფასებს და შესაბამისად ჩაასწორეთ თქვენ მიერ ერთ ღამეზე დაწესებული ფასი. თუ ყოველ ღამეზე ერთი და იგივე ფასი გაქვთ განსაზღვრული, შეგიძლიათ განასხვაოთ სამუშაო დღეებისა და შაბათ‑კვირების ფასები მოთხოვნის ცვალებადობის შესაბამისად. დინამიკური ფასდადება მაქსიმალურად მეტი ჯავშნისა და შემოსავლის მიღებაშიც შეგიწყობთ ხელს.

მსგავსი საცხოვრებლების შესადარებლად გადადით თქვენი განცხადების კალენდარზე და აირჩიეთ თარიღთა დიაპაზონი 31 დღის ფარგლებში. 

ამის შემდეგ გამოჩნდება თქვენი რეგიონის რუკა, რომელზეც მითითებული იქნება მსგავსი ახლომდებარე საცხოვრებლების საშუალო ფასები. რუკაზე არსებული ღილაკების მეშვეობით საშუალება გექნებათ, აირჩიოთ, რომელი საცხოვრებლები იყოს გათვალისწინებული — უკვე დაჯავშნილი თუ ჯერ კიდევ დაუჯავშნელი. საცხოვრებლების მსგავსებას განაპირობებს სხვადასხვა ფაქტორი — მაგალითად, მდებარეობა, ფართობი, თავისებურებები, საყოფაცხოვრებო პირობები, შეფასებები, მიმოხილვები და ის, თუ სხვა რომელ ვარიანტებს ეცნობიან სტუმრობის მსურველები თქვენი განცხადების პარალელურად.

ძიების შედეგებში უფრო მაღალ პოზიციებზე ხვდება ხოლმე განცხადებები იმ საცხოვრებლების შესახებ, რომელთა ფასიც მსგავსი ახლომდებარე ვარიანტებისაზე დაბალია.

„თუ გაზრდილი მოთხოვნის პერიოდში ჯავშნებს მაინც არ ვიღებ, საგულდაგულოდ ვამოწმებ სხვა ახლომდებარე საცხოვრებლებს“, — გვიზიარებს ფელისიტი, სუპერმასპინძელი სიდნეიდან (ავსტრალია), და დასძენს: „ფასები კონკურენტუნარიან დონეზე უნდა შევინარჩუნო“.

სტუმრობის მსურველთა ყურადღების მიქცევის კიდევ ერთი კარგი ხერხი სეზონზე ფასდაკლებების შეთავაზებაა. მათი განსხვავებული ინტერესების გასათვალისწინებლად შეგიძლიათ დააწესოთ:

• ფასდაკლებები ერთ კვირასა და თვეზე. ერთ კვირაზე დაწესებული ფასდაკლებები გავრცელდება მინიმუმ 7 ღამის ხანგრძლივობის სტუმრობებზე, ხოლო ერთ თვეზე — მინიმუმ 28 ღამისაზე. ამ ტიპის ფასდაკლებები დაგეხმარებათ ძიების შედეგებში განცხადების პოზიციის გაუმჯობესებაში, კალენდრის შევსებასა და სტუმრების ხშირი ცვლით გამოწვეული საზრუნავის შემცირებაში.
• ფასდაკლება ადრეულ დაჯავშნაზე. ის გავრცელდება დაბინავებამდე 1‑24 თვით ადრე გაფორმებულ ჯავშნებზე და დაგეხმარებათ სტუმრობის იმ მსურველების დაინტერესებაში, რომლებიც ყველაფერს წინასწარ გეგმავენ.

ერთ კვირაზე ან თვეზე მინიმუმ 10%‑იანი და ადრეულ დაჯავშნაზე მინიმუმ 3%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

გაითვალისწინეთ, რომ ფასდაკლება ადრეულ დაჯავშნაზე მიუწვდომელია, როცა ჩართულია გონივრული ფასწარმოქმნა, ხოლო სტუმრობის ხანგრძლივობაზე დამოკიდებული ფასდაკლებები ადგილობრივი წესებისა და რეგულაციების შესაბამისად უნდა განსაზღვროთ.

„ადრეულ დაჯავშნაზე ფასდაკლებას წლის კალენდრის შედგენისას ვაწესებ. ამგვარად, როგორც წესი, კალენდარი სწრაფად მევსება, ფასდაკლების მიღების შემდეგ კი ცოტა თუ აუქმებს ჯავშანს“, — აღნიშნავს ენი, სუპერმასპინძელი ტარაგონიდან (ესპანეთი).

დაფიქრდით, რა გზით შეგიძლიათ სტუმრებისთვის დაბინავებისა და საცხოვრებლიდან გასვლის პროცესების გამარტივება. მაგალითად, წინასწარ მოუმზადეთ მათ ინფორმაცია იმის შესახებ, თუ როგორ მიაგნონ საცხოვრებელს და როგორ გახსნან მისი შესასვლელი კარი, როცა ადგილზე იქნებიან.

• დაამატეთ მნიშვნელოვანი ინფორმაცია. დაბინავების გზამკვლევში შეგიძლიათ, მიუთითოთ ან ჩაასწოროთ როგორც დაბინავების მეთოდი და დრო, ისე ცნობები საცხოვრებლამდე მისასვლელი გზის შესახებ. სტუმრებმა დაბინავება გვიან ღამითაც რომ შეძლონ ხოლმე, შესთავაზეთ მათ გონიერი საკეტის, ღილაკებიანი პანელის ან მინისეიფის საშუალებით დამოუკიდებლად დაბინავების შესაძლებლობა, შემდეგ კი მიაწოდეთ შესაბამისი კოდი.
• აჩვენეთ სტუმრებს, როგორ ხდება საცხოვრებელში მოხვედრა. მოქმედებათა მიმდევრობის დემონსტრირება შეგიძლიათ ფოტოების ან ვიდეორგოლების მეშვეობით. როცა დაასრულებთ, სთხოვეთ მეგობარს, იხელმძღვანელოს თქვენ მიერ მომზადებული მითითებებით, რომ გაარკვიოთ, რამდენად გასაგებია ისინი სხვისთვის.

ჩათვალეთ, რომ ის, რაც საცხოვრებლიდან გასვლისას ხდება, სტუმრობიდან ბოლო შთაბეჭდილებას ტოვებს. შეეცადეთ, ამ ეტაპზე არაფერი გაართულოთ, რომ სტუმრებს მხოლოდ კარგად გატარებული დრო დაამახსოვრდეთ.

• მოამზადეთ საცხოვრებლიდან გასვლის მკაფიო ინსტრუქცია. დაბინავების გზამკვლევში პირდაპირ მზა სიიდან შეძლებთ, შეარჩიოთ შესასრულებელი ამოცანები. აუხსენით სტუმრებს, აუცილებლად რა უნდა გააკეთონ წასვლამდე (მაგალითად, ყველგან გამორთონ შუქი და ყველაფერი დაკეტონ). ეს ინფორმაცია ყველასთვის იქნება ხელმისაწვდომი ჯავშნის გაფორმებამდე.
• მაქსიმალურად გაამარტივეთ ყველაფერი. დაფიქრდით, რამდენად საჭიროა ზოგიერთი ამოცანის შესრულება (მაგალითად, ნაგვის უპირობოდ გატანა ან გამოყენებული პირსახოცების შეგროვება).

„სტუმრებისთვის ერთი‑ორი მარტივი მითითებაც საკმარისია საცხოვრებლიდან გასვლის ეტაპზე, საქმე რომ არ გაურთულდეთ“, — აღნიშნავს კარენი, სუპერმასპინძელი ნელსონიდან (კანადა).

ფასებსა და სხვა პარამეტრებს ყოველთვის თავად აკონტროლებთ. თქვენი შედეგები, შესაძლოა, განსხვავდებოდეს სხვა მასპინძლების შედეგებისგან. 

ინტერვიუებში მონაწილეობისთვის მასპინძლებმა კომპენსაცია მიიღეს.

მასპინძლობასთან დაკავშირებული რჩევები ექვემდებარება ადგილობრივ კანონმდებლობას.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.