ბოლო წუთის ჯავშნების მიღების ექვსი ხერხი

ზოგჯერ ყველაზე მოთხოვნადი საცხოვრებლებიც კი რჩება დაუჯავშნელი. გაითვალისწინეთ ჩვენი ექვსი რჩევა, ბოლო წუთის ჯავშნებით მეტი შემოსავალი რომ მიიღოთ.

ბოლო წუთის ფასდაკლებები სტუმრების მსურველებს საცხოვრებლის დაჯავშნის სტიმულს აძლევს. ისინი ვრცელდება ჯავშნებზე, რომლებიც დაბინავებამდე 1‑28 დღით ადრე ფორმდება.

60 დღის მედიანურ ფასზე მინიმუმ 10%‑იანი ფასდაკლებების შემთხვევაში განცხადების გვერდსა და ძიების შედეგებში განთავსდება სპეციალური აღნიშვნა. ფასდაკლებული ფასი მითითებული იქნება გადახაზული თავდაპირველი ფასის გვერდით.

ბოლო წუთის ფასდაკლების დასაწესებლად:

• გადადით ფასების ჩანართზე თქვენი განცხადების კალენდარში.
• სექციაში ფასდაკლების სხვა ვარიანტები გახსენით ბოლო წუთის ფასდაკლებები.
• მიუთითეთ დღეების რაოდენობა დაბინავებამდე (1‑დან 28‑მდე).
• მიუთითეთ სასურველი პროცენტული ფასდაკლება.

სურვილისამებრ, ბოლო წუთის რამდენიმე ფასდაკლების დაწესება შეგიძლიათ. ვთქვათ, ისე, რომ, ფასდაკლება თანდათანობით იზრდებოდეს დაბინავებამდე დარჩენილი დღეების რაოდენობის მიხედვით.

გაითვალისწინეთ, რომ აღნიშნული ფასდაკლება მიუწვდომელია, როცა ჩართულია გონივრული ფასწარმოქმნა.

სპონტანური სტუმრობების მსურველებს, შესაძლოა, სულ ერთი‑ორი თავისუფალი დღე ჰქონდეთ. სტუმრობის მინიმალური ხანგრძლივობის შემცირებით მათ საშუალებას მისცემთ, მოკლევადიანი ჯავშნები გააფორმონ, ამგვარად კი იმ ადამიანებსაც დააინტერესებთ, რომლებსაც ბოლო წუთს უწევთ საცხოვრებლის დაჯავშნა.

სტუმრობის მინიმალური ხანგრძლივობის შესამცირებლად:

• გადადით ხელმისაწვდომობის ჩანართზე თქვენი განცხადების კალენდარში.
• სექციაში სტუმრობის ხანგრძლივობა შეხებით აირჩიეთ სტუმრობის მინიმალური ხანგრძლივობა (ღამე).
• ჩაასწორეთ სტუმრობის მინიმალური ხანგრძლივობა ღამეების იმ რაოდენობით, რომელიც გაწყობთ.

მსგავსი საცხოვრებლების შედარების ხელსაწყო, რომელსაც Airbnb გთავაზობთ, დაუჯავშნელ ღამეებზე კონკურენტუნარიანი ფასის დაწესებაში დაგეხმარებათ. გაეცანით მსგავსი ახლომდებარე საცხოვრებლების ფასებს იმავე თარიღებში და შესაბამისად ჩაასწორეთ თქვენ მიერ ერთ ღამეზე განსაზღვრული ფასი.

მსგავსი საცხოვრებლების შესადარებლად:

• გადადით ფასების ჩანართზე თქვენი განცხადების კალენდარში.
• აირჩიეთ 31 დღემდე დიაპაზონი.
• შეხებით აირჩიეთ მსგავსი საცხოვრებლების ჩვენება.

თქვენი რეგიონის რუკაზე გამოჩნდება მდებარეობის, ფართობის, საყოფაცხოვრებო პირობებისა და სხვა კუთხით მსგავსი, ახლომდებარე საცხოვრებლების საშუალო ფასები. გამოიყენეთ რუკაზე არსებული ღილაკები, რომ აირჩიოთ, რომელი საცხოვრებლები იყოს ნაჩვენები — უკვე დაჯავშნილი თუ ჯერ კიდევ დაუჯავშნელი.

„ყოველთვის ვამოწმებ, კვლავ კონკურენტუნარიანი ფასები მაქვს დაწესებული თუ არა, ამიტომ მაინტერესებს, სხვა ადგილობრივი მასპინძლები, რას აფასებენ საცხოვრებლებს ერთ ღამეზე“, — გვიზიარებს ფელისიტი, მრჩეველ მასპინძელთა საბჭოს წევრი და სუპერმასპინძელი ახალი სამხრეთ უელსიდან (ავსტრალია).

დაუჯავშნელ ღამეებზე ფასის დროებით შემცირება სტუმრობის მსურველების დაინტერესებაში დაგეხმარებათ. ძიების შედეგებში უფრო მაღალ პოზიციებზე ხვდება ხოლმე განცხადებები იმ საცხოვრებლების შესახებ, რომელთა ფასიც სხვა მსგავსი, ახლომდებარე ვარიანტებისაზე დაბალია. ფასის ჩასწორებას ნებისმიერ დროს შეძლებთ მოგვიანებით, როცა სტუმრობის მსურველთა რაოდენობა მოიმატებს და შემოსავლის კუთხით თქვენი მიზნების მიღწევა უფრო რეალური გახდება.

არასეზონზე კალენდარი რომ შეგევსოთ, გირჩევთ, შეამციროთ დრო, რომელიც გჭირდებათ ჯავშნის გაფორმებიდან სტუმრის დაბინავებამდე. სტუმრობის მსურველებს შეგიძლიათ ჯავშნის გაფორმების დღესვე დაბინავების საშუალებაც კი მისცეთ.

„თავად გამომიცდია, რას ნიშნავს საცხოვრებლის ძებნა ბოლო წუთს, როცა უკვე გზაში ხარ, ამიტომ სტუმრობის მსურველებს დროში არ ვზღუდავ“, — ამბობს მირანდა, სუპერმასპინძელი ლიტლ‑როკიდან (არკანზასი, აშშ), და დასძენს: „იმ შემთხვევაშიც კი, თუ მომდევნო დღეს ჯავშანი არ მაქვს, საცხოვრებელი ყოველთვის წესრიგშია და მზადაა სტუმრების მისაღებად“.

დაბინავებამდე განსაზღვრული დროის შესაცვლელად:

• გადადით ხელმისაწვდომობის ჩანართზე თქვენი განცხადების კალენდარში.
• გახსენით დრო დაბინავებამდე.
• აირჩიეთ დღეების საჭირო რაოდენობა.

სურვილისამებრ, შეგიძლიათ განსაზღვრულზე უფრო მოკლე დროში დაბინავების მოთხოვნების დაშვებაც. აღნიშნულ მოთხოვნებს ინდივიდუალურად გაეცნობით და შეძლებისდაგვარად დააკმაყოფილებთ.

მაქსიმალურად ბევრ ნაცნობს შეატყობინეთ (სოციალური ქსელების, ელფოსტისა თუ SMS‑ის მეშვეობით), რომ თქვენ მიერ განთავსებული საცხოვრებელი ხელმისაწვდომია დასაჯავშნად. არ არის გამორიცხული, რომ რომელიმე მათგანი სპონტანური სტუმრობით დაინტერესდეს.

ბოლო წუთს გაფორმებული ჯავშნების შემთხვევაში უაღრესად მნიშვნელოვანია მკაფიო კომუნიკაცია, როგორც ნებისმიერი სხვა სტუმრობის დროს (და, ალბათ, მეტადაც). სტუმრებს, რომლებიც ჯავშანს დაბინავებამდე 48 საათზე ნაკლებ დროში აფორმებენ, საშუალება აქვთ, დაბინავების დრო თქვენ მიერ განსაზღვრული ტიპური პერიოდის მიღმა აირჩიონ. თუ მომენტალური დაჯავშნის ფუნქცია გაქვთ გააქტიურებული, დაჯავშნით დაინტერესებას მიიღებთ. მზად იქონიეთ დაბინავების მკაფიო ინსტრუქცია და აუცილებლად აცნობეთ სტუმარს, თუ მოსამზადებლად მეტი დრო გჭირდებათ.

ინტერვიუებში მონაწილეობისთვის მასპინძლებმა კომპენსაცია მიიღეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.