მასპინძლების გზამკვლევი მდგრადი ტურიზმის მხარდაჭერისთვის

ეკოლოგიური პასუხისმგებლობით მასპინძლობის ფარგლებში აუცილებელია, სტუმრებმაც გაიზიარონ ეს პასუხისმგებლობა. შესაძლოა, მათთვის ეს საკითხი უცხო იყოს, ამიტომაც აუცილებელია იმის ახსნა, თუ როგორ შეუძლიათ გარემოს დაცვის საქმეში საკუთარი წვლილის შეტანა.

თქვენ დასახმარებლად თავი მოვუყარეთ მასპინძელთა გლობალური გაერთიანების წევრების რჩევებს და ვითანამშრომლეთ ისეთ ორგანიზაციებთან, როგორებიცაა „გაეროს გარემოსდაცვითი პროგრამა“ (რომელიც გლობალური გარემოს ავტორიტეტული დამცველია) და „ბუნების მსოფლიო ფონდი“ (რომელიც მსოფლიოს წამყვანი ბუნების დამცველი ორგანიზაციაა).

გააგრძელეთ კითხვა და შეიტყვეთ, როგორ შეუწყოთ ხელი მოგზაურობას, რომელიც გარემოს ზიანს არ აყენებს.

სატრანსპორტო საშუალებების გამონაბოლქვის სამი მეოთხედი* მოკლე დისტანციაზე მანქანით მგზავრობაზე მოდის. ურჩიეთ სტუმრებს საზოგადოებრივი ტრანსპორტით სარგებლობა.

სტუმრებისთვის რთულია უცხო ადგილებში ორიენტირება, ამიტომ კარგი იქნება, თუ გზამკვლევში შეიტანთ ავტობუსის, მეტროს ან ტრამვაის გამოყენებასთან დაკავშირებულ ინფორმაციას, სავარაუდო ტარიფებსა და ადგილობრივი ღირშესანიშნაობებისა თუ აეროპორტისკენ მიმავალი გზების საუკეთესო მარშრუტებს. დაახვედრეთ სტუმრებს ველოსიპედები ან ურჩიეთ, რომელი კომპანიისგან იქირაონ.

ნაგავში ბევრია პლასტმასის ნარჩენი, რომელიც ხშირად, გადამუშავებას არ ექვემდებარება. პლასტმასის პროდუქცია მავნეა პლანეტისთვის, ამიტომაც მათი შეძენისგან შეძლებისდაგვარად თავის შეკავება მნიშვნელოვანია.

საცხოვრებელში ყოფნის პერიოდში სტუმრებს პლასტმასის ნივთების შეძენა რომ არ დასჭირდეთ, სუპერმასპინძელი ტიფანი ჰოლივუდ‑ბიჩიდან (კალიფორნია) მათ მრავალჯერად ნივთებს, მაგალითად, ჭიქებსა და წყლის ბოთლებს, ახვედრებს. ჩიანგ-მაიში (ტაილანდი) სუპერმასპინძელი ნათი სტუმრებს აწვდის ინფორმაციას იმის შესახებ, თუ სეირნობის დროს სად აავსონ ბოთლები წყლით.

მრავალჯერადი თეფშები, ვერცხლის ჭურჭელი და საკვების შესანახი კონტეინერებიც დაეხმარება სტუმრებს სუფთა ჰაერზე პიკნიკის დროს ნარჩენების მინიმუმამდე შემცირებაში.

გამოიყენეთ სტუმრის ცნობარი ან გზამკვლევი და მიასწავლეთ სტუმრებს, რომელია თქვენი რჩეული ეკოლოგიურად მდგრადი რესტორანი, ფერმერული ბაზარი ან მაღაზია, რომელშიც ეკოლოგიურად სუფთა ადგილობრივი პროდუქციაა. არ დაგავიწყდეთ მითითება, თუ თქვენს რეგიონში რაიმე სეზონური პროდუქტია. „ჩვენს გზამკვლევში იპოვით არაერთ საოცარ კვების ობიექტს, სადაც ეკოლოგიაზე ზრუნავენ“, — ამბობს სუპერმასპინძელი ანა პემბრუკშირიდან (უელსი).

შეგიძლიათ მიუთითოთ ადგილობრივი პროდუქტებიც, რომელთა გასინჯვა ან სუვენირად წაღებაც შეიძლება მოისურვონ სტუმრებმა. ტასმანიაში (ავსტრალია) სუპერმასპინძელი მერიდითი სტუმრებს თაფლისა და ლავანდის ხელნაკეთ საპონს ახვედრებს.

სახლის წესებში ან სტუმრის ცნობარში შეგიძლიათ თხოვნით მიმართოთ სტუმრებს, რომ შეამცირონ ნარჩენები, ნაკლები დრო გაატარონ საშხაპეში, დალიონ ონკანის გაფილტრული წყალი, თერმოსტატი კი წინასწარ დაყენებულ ნიშნულზე დატოვონ. ამას გარდა, შეგიძლიათ საცხოვრებელში დაუტოვოთ წარწერები და შეახსენოთ, რომ გარეთ გასვლის წინ ჩააქრონ შუქი, კბილების გაწმენდისას კი დაკეტონ ონკანი.

სუპერმასპინძელი ომარი მეხიკოში იღებს ვიდეოებს, რომლების ნახვაც QR‑კოდის მეშვეობითაა შესაძლებელი. ვიდეოებში განმარტებულია საცხოვრებელში ნარჩენების გადამუშავების პროცესი და ერთჯერადი პლასტმასის ნივთების მავნე ზემოქმედება.

ამგვარად არა მარტო თანხის დაზოგვაა შესაძლებელი, არამედ იმ სტუმრების დაინტერესებაც, რომლებიც ეკოლოგიური პასუხისმგებლობით მოგზაურობენ.

მთელ მსოფლიოზე უარყოფითად მოქმედებს ძლიერი ხანძრები, წყალდიდობა და მძიმე მეტეოროლოგიური პირობები. სტუმრის ცნობარში ადგილობრივი თავისებურებების შესახებ ინფორმაციის მითითებით სტუმრებს აფრთხილებთ, რომ პასუხისმგებლობით იმოგზაურონ და გაითვალისწინონ ისეთი საფრთხეები, როგორიცაა ჰაერის დაბინძურება ან გვალვა.

მაგალითად, იმ რეგიონებში, სადაც ჰაერი დაბინძურებულია, კონკრეტულ დღეებში სასურველია თავშეკავება ბუნებაში გასვლისგან ან ისეთი აქტივობებისგან (მაგ., ავტომობილის მართვა, გრილ‑ბარბექიუების მოწყობა, ფოიერვერკების გაშვება), რომლებიც ჰაერს კიდევ უფრო დააბინძურებს.

საცხოვრებლის აღწერილობისა და სტუმრის ცნობარის მეშვეობით შეატყობინეთ პოტენციურ სტუმრებს, როგორ ზრუნავთ გარემოზე.

თუ სტუმრებს ბიოდეგრადირებად ხელის საპონს ან მრავალჯერად წყლის ბოთლებს სთავაზობთ, მიუთითეთ ამის შესახებ განცხადებაში.

ამგვარად, დადებით გავლენას მოახდენთ პლანეტაზე და სტუმრებსაც თავს ადგილობრივებივით აგრძნობინებთ. ვიცით, რომ ეკოლოგიური პასუხისმგებლობის ჩვევების დანერგვას გარკვეული დრო სჭირდება, ამიტომ ვაგროვებთ რესურსებს, რაც ამ პროცესში დაგეხმარებათ.

შემდეგი: შეიტყვეთ ერთი სუპერმასპინძლის შესახებ, რომელიც სულ უფრო მეტ ეკოლოგიურ პასუხისმგებლობას იჩენს

*„ბუნების მსოფლიო ფონდის“ სტატიიდან 60 ღონისძიება პლანეტისთვის, რომელიც 2021 წლის 5 მარტს გამოქვეყნდა

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.