თანამასპინძლობის ხელსაწყოებით სარგებლობა Airbnb‑ზე

გამოცდილი თანამასპინძლის სტატუსით წარმატების მისაღწევად მნიშვნელოვანია, გადაწყვიტოთ, როგორ გადაინაწილებთ საცხოვრებლის მართვასთან დაკავშირებულ სამუშაოს მასპინძელთან.

სტუმრებთან მიმოწერას ორივე ერთად აწარმოებთ თუ მხოლოდ ერთ‑ერთი თქვენგანი? შესაძლოა, საცხოვრებლის მართვის საკითხის მთლიანად თქვენს თავზე აღება გირჩევნიათ და მასპინძელთან მხოლოდ კონკრეტულ საკითხებზე დაკავშირება (მაგალითად, თანხის ანაზღაურების აუცილებლობისას). როგორიც არ უნდა იყოს თქვენი გადაწყვეტილება, გახსოვდეთ, Airbnb გთავაზობთ ხელსაწყოებს, რომლებიც გაგიმარტივებთ თანამასპინძლობას.

როცა მასპინძელი თანამასპინძლად მოგიწვევთ, მან გარკვეული ნებართვები უნდა მოგანიჭოთ. მაგალითად:

• სრული წვდომა
• კალენდარსა და შემომავალ შეტყობინებებზე წვდომა
• მხოლოდ კალენდარზე წვდომა

სრული წვდომით შეგეძლებათ:

• ახალი განცხადების შექმნა
• სტუმრებთან მიმოწერა და შესაბამისი გაფრთხილებების მიღება
• კალენდრის ჩასწორება
• ტრანსაქციების ისტორიის გაცნობა
• განცხადების მართვა (ფასებისა და სხვა დეტალების ჩათვლით)
• ჯავშნების მართვა (მათ შორის, სტუმრობის მოთხოვნების დაკმაყოფილება და უარყოფა, ასევე, ჯავშნების გაუქმების შემთხვევებისა და საკითხების გადაწყვეტის ცენტრისადმი მიმართვების მართვა)
• ანაზღაურების მოთხოვნის წარდგენა
• სხვა თანამასპინძლების დამატება ან წაშლა, ნებართვების ჩასწორება, ასევე, თქვენი თავის ან სხვა თანამასპინძლის დანიშვნა ძირითად მასპინძლად

გაითვალისწინეთ, რომ სრული წვდომითაც კი არ შეგეძლებათ:

• სხვა თანამასპინძლების კუთვნილი ანაზღაურების განსაზღვრა ან ჩასწორება

• ანაზღაურების მოთხოვნების მართვა მათი წარდგენის შემდეგ

• განცხადების მფლობელის ან სხვა თანამასპინძლების ანაზღაურების მიღების მეთოდისა თუ საგადასახადო ინფორმაციის ნახვა ან შეცვლა

გირჩევთ, შეუთანხმდეთ მასპინძელს იმაზე, თუ ვინ იქნება პასუხისმგებელი სტუმრებთან კომუნიკაციაზე. მან, შესაძლოა, მოისურვოს, რომ ეს საკითხი მთლიანად თქვენს თავზე აიღოთ, ან გადაინაწილოთ შესასრულებელი სამუშაო.

კერძოდ, კომუნიკაციაში იგულისხმება:

• ყოველდღიური მიმოწერა, შეკითხვებზე პასუხის გაცემა და ნებისმიერი პრობლემის მოგვარება

• დაჯავშნის მოთხოვნებზე გამოხმაურება, თუ საცხოვრებლისთვის არ არის გააქტიურებული მომენტალური დაჯავშნის ფუნქცია

• ანაზღაურების მოთხოვნების წარდგენა (გაითვალისწინეთ, რომ მოთხოვნების წარდგენის შემდეგ მათ მართვას მხოლოდ განცხადების მფლობელი შეძლებს)

• გაერთიანების მხარდაჭერის გუნდთან დაკავშირება დახმარების მისაღებად

• სხვა თანამასპინძლების მართვა

საბრინა, გამოცდილი თანამასპინძელი დენვერიდან (კოლორადო, აშშ), ამბობს, რომ უმჯობესია, სტუმრებთან კომუნიკაციის საკითხზე პასუხისმგებელი მხოლოდ ერთი ადამიანი იყოს, რადგან „ასე უფრო მარტივია ერთიანი მიდგომის შენარჩუნება ფასდაკლებების, თანხის დაბრუნებისა და სტუმრების პრობლემების კუთხით“.

როცა წინასწარ შემუშავებული გეგმა არ გაქვთ, შესაძლოა, პრობლემებმა იჩინოს თავი. „როცა ამ ტიპის სამუშაოს ორი ადამიანი ინაწილებს, შესაძლოა, რაიმე გაუგებრობა მოხდეს“, — ამბობს დომინიკი, გამოცდილი თანამასპინძელი კორნუოლიდან (ინგლისი), და დასძენს: „მაგალითად, რამე გამოგრჩეს, ან დაგავიწყდეს დამლაგებლის დანიშვნა“.

მასპინძლებისთვის ხელმისაწვდომია სპეციალური ხელსაწყოები, რომელთა მეშვეობითაც მათ, სურვილის შემთხვევაში, შეუძლიათ თქვენთან გარკვეული პროცენტის ან ფიქსირებული თანხის გაყოფა Airbnb‑ს მეშვეობით გაფორმებული თითოეული ჯავშნიდან. ანაზღაურების თქვენთან გაყოფის კუთხით ასარჩევად ხელმისაწვდომია ოთხი ვარიანტი:

• დასუფთავების გადასახადის გაყოფა

• დასუფთავების გადასახადისა და ჯავშნის ღირებულების გარკვეული პროცენტის გაყოფა

• ყოველი ანაზღაურებიდან გარკვეული პროცენტის გაყოფა

• ყოველი ანაზღაურებიდან ფიქსირებული თანხის გაყოფა

ანაზღაურების პარამეტრების განსაზღვრა მხოლოდ განცხადებათა მფლობელებს შეუძლიათ. ამ კუთხით, შესაძლოა, სხვა შეზღუდვებიც მოქმედებდეს იმის მიხედვით, თუ სად ცხოვრობს მასპინძელი ან თანამასპინძელი.

როცა მასპინძელი ანაზღაურების გაყოფას შემოგთავაზებთ, შემოთავაზების დასაკმაყოფილებლად ან უარსაყოფად 14 დღე გექნებათ. როგორც წესი, მასპინძლები და თანამასპინძლები წინასწარ თანხმდებიან ანაზღაურების ოდენობაზე, თუმცა თუ შემოთავაზებული ანაზღაურება არ დაგაკმაყოფილებთ და მასზე უარს განაცხადებთ, მასპინძელს ახალი შემოთავაზების გამოგზავნა დასჭირდება.

კუთვნილი ანაზღაურების ოდენობის დადასტურების შემდეგ ჯავშნებისთვის შემოსავლის მიღებას სტუმრის დაბინავებიდან დაახლოებით 24 საათის შემდეგ დაიწყებთ. თუ განცხადების მფლობელი თქვენს კუთვნილ ანაზღაურებაში რაიმე ცვლილებას შეიტანს, ის მხოლოდ თქვენი თანხმობით შევა ძალაში და გავრცელდება სტუმრობებზე, რომლებიც იმ მომენტიდან ითვალისწინებს დაბინავებას.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.