პატრისიას სახე უნათდება, როდესაც იხსენებს ბავშვობას, თუ როგორ თამაშობდა სხვა ბავშვებთან ერთად გორაკებზე ნაუკალპანთან ახლოს, მეხიკოს დასავლეთით, სადაც უხვადაა მწვანე ტყეები, გამოქვაბულები, ნაკადულები და გარეული ცხოველები. ახლა ის ტურების გიდია და სიამაყით აცნობს სტუმრებს ნაუკალპანს, რომელსაც არა მარტო პირველადი იერსახე შეუნარჩუნეს, არამედ ახალი, სიურეალისტური ხიბლი შესძინეს მექსიკური ხელოვნებისა და კულტურისადმი მოწიწების ნიშნად. „აქაურობით ვამაყობ და მიხარია, როცა სხვასაც ვაცნობ მას”, — ამბობს პატრისია. „მსურს, ჩემ და ჩემი მეზობლების გარდა სხვებმაც იცოდნენ მის შესახებ. ვფიქრობ, აქაურობა უნდა დაათვალიერო, შეიგრძნო და გაითავისო“. საყვარელი კუთხის შესახებ სხვებისთვის მოყოლის სურვილი არაერთი Airbnb მასპინძლის მოტივატორია. თუმცა ცოტას თუ აქვს იმის ფუფუნება, რომ სხვებს მომაჯადოებელი სილამაზით გამორჩეული ისეთი ადგილი გააცნოს, როგორიც კეცალკოატლის ბუდეა. აქაურობა აცტეკების ღმერთის, ფრთოსანი გველის, სახელს ატარებს. ის აერთიანებს ეგზოტიკურ პარკსა  და საცხოვრებელს, რომელიც უზარმაზარ, ორნამენტებით მორთულ, კაშკაშა სკულპტურული კომპლექსის ნაწილია და ბუნებას ერწყმის. „ორგანული არქიტექტურის“ სტილის ეს შედევრი მექსიკელმა არქიტექტორმა, ხავიერ სენოსიაინმა, შექმნა. პატრისიას სახლი კომპლექსში არსებული 10 სახლიდან ერთადერთია, რომელიც ხელმისაწვდომია Airbnb-ზე. ეს არის ფართო, 5-საძინებლიანი ბინა მომრგვალებული ფანჯრებით, მორკალული ჭერითა და გველის მუცელში ჩაშენებული სხვა უცნაური არქიტექტურული თავისებურებებით. თანამედროვე დეკორი თუ ინტერიერის დეტალები აქაურობას ჰაეროვან ელფერს სძენს და განუმეორებლად ერწყმის ბუნებრივ გარემოს.

მასპინძლობისთვის დროის დიდი ნაწილის დათმობის იდეა პატრისიას მიაწოდა მისი ერთ-ერთი დის მაგალითმა — მას ადრე გამოქვეყნებული ჰქონდა განცხადება სახლის შესახებ Airbnb-ზე. ამასთანავე, პატრისიას სურდა მეხიკოს ქაოსისა და ხმაურისთვის თავის დაღწევა სიმწვანითა და სიმშვიდით სავსე ადგილას. 2015 წლიდან ამ ახალ ამპლუას წარმატებით ართმევს თავს. პატრისია, როგორც წესი, პირადად ხვდება სტუმრებს და საცხოვრებელში მიუძღვება. მას ახარებს შემოგარენის დათვალიერებისას სტუმრების მიერ სხვადასხვა ენაზე გამოხატული აღფრთოვანება. „მართალია, სტუმრებს სურათები ნანახი აქვთ, მაგრამ ვერასოდეს წარმოიდგენდნენ ამ ზომის შენობასა და აქაური ბუნების სიმშვიდეს“, — ამბობს ის. პატრისია სიამოვნებით ათვალიერებინებს სტუმრებს ტერიტორიას. ბევრისთვის ეს კეცალკოატლის ბუდეში სტუმრობის ერთ-ერთი ყველაზე შთამბეჭდავი მომენტია. სტუმრების სურვილის შემთხვევაში ტური შეიძლება 3-4-საათიან თავგადასავლადაც კი იქცეს. ამ კეთილმოწყობილ და ბუნებრივად შენარჩუნებულ, თითქმის 16 ჰექტარიან ტერიტორიაზე სანახავი ბევრია. პატრისიაც არ ჩქარობს. ის სტუმრებს ბუნებრივი გამოქვაბულის გარშემო აგებული გველის ხახისკენ მიუძღვება, ყურადღებას ამახვილებინებს სხვადასხვა ყვავილსა და ხეზე, ფერად ფოთლებზე, ტყის ხმებსა და ბუნებრივი თუ ხელოვნური სტრუქტურების მრავალფეროვნებაზე. „ზოგჯერ სტუმრებს ვურჩევ, ბალახზე ფეხშიშველებმა იარონ და ისე შეიგრძნონ აქაურობა“, — ამბობს ის.

თავის ტურებზე ის სტუმრებს უყვება ჰუიჩოლებზე, მექსიკის ცენტრალური მთების ადგილობრივ ხალხზე, რომლებიც ცნობილი არიან თავიანთი ფერადი სამკაულებითა და მძივებით. „გველის თავი ჰუიჩოლების სტილის გავლენითაა შექმნილი“, — ამბობს პატრისია. ფერადი კერამიკული წრეები, რომლებითაც გველის თავი, თვალები და ეშვებია მოპირკეთებული, სენოსიაინის ფანტასტიკური სტრუქტურის სხვა დეტალების მსგავსად, ჰუიჩოლის ხელოვნებითაა შთაგონებული. „გვსურდა, მექსიკის ფერები ამ ადგილის განუყოფელ ნაწილად გვექცია“, — დასძენს პატრისია. ამასთანავე, პატრისია სტუმრებს უყვება იქაურ სამკურნალო მცენარეებზე და იმაზე, თუ როგორ იყენებენ მათ ჰუიჩოლები თუ სხვები. ტურის ბოლოს პატრისიამ შეიძლება სტუმრები მედიტაციაზეც კი მიიწვიოს, თუ ჩათვლის, რომ ისინი ამისთვის მზად არიან. ყველაზე მეტად მას სიამოვნებს, რომ ადამიანებს აზიარებს მექსიკურ ხელოვნებას, კულტურასა და ბუნებრივ სილამაზეს, პარალელურად კი ახალ ნაცნობებს იძენს და დაუვიწყარ შთაბეჭდილებებს უქმნის. „ერთ რამეს მივხვდი: მნიშვნელობა არ აქვს, რა ეროვნების იქნებიან ჩემი სტუმრები — ჩინელები, მექსიკელები, ესპანელები, ავსტრალიელები თუ სხვა — ჩვენ ყველას გვაქვს გრძნობები, ყველას გვიყვარს და ყველანი ადამიანები ვართ“, — ამბობს ის. ჩვენ შეიძლება გარეგნობით განვსხვავდებოდეთ, დასძენს პატრისია, „მაგრამ შინაგანად ერთმანეთს ძალიან ვგავართ“. მას იმედი აქვს, რომ მექსიკის ბუნება, კულტურა და კეცალკოატლის ბუდე სტუმრებზე წარუშლელ შთაბეჭდილებას დატოვებს. მთელ ამ პროცესში ყველაზე მეტად ის მიყვარს, რომ სტუმრებს უბრალო მოგზაურობას არ ვთავაზობ, არამედ შთაბეჭდილებას ვუქმნი, ეს კი მათთვის ძალიან მნიშვნელოვანია“, — ამბობს ის. „დასვენება ყოველდღიურობისგან თავის დაღწევასავითაა, ამიტომ მსურს, სტუმრებს დავეხმარო, უკეთ გაიცნონ საკუთარი თავი, თუ ვინ არიან და რა სურთ“.