რჩევები ადაპტირებული პირობების საჭიროების მქონე სტუმრების მასპინძლობისთვის

სტუმრობის მსურველებს, რომლებსაც ადაპტირებული პირობები სჭირდებათ, ჯავშნის გაფორმებამდე აინტერესებთ, როგორი იქნება ესა თუ ის საცხოვრებელი ამ კუთხით. სწორედ ამიტომ, Airbnb‑ზე მათ საშუალება აქვთ, ძიების შედეგები კონკრეტული პირობების (მაგალითად, უსაფეხურო წვდომის ან შშმ პირთათვის განკუთვნილი საპარკინგე ადგილის) ხელმისაწვდომობის მიხედვით გაფილტრონ.

ამას გარდა, საცხოვრებლები, რომელთა შემთხვევაშიც დადასტურებულია, რომ ისინი შესაფერისია ეტლით მოსარგებლე პირთათვის, წარმოდგენილია კატეგორიაში „ადაპტირებული“. აღნიშნულ კატეგორიაში მოსახვედრად მოითხოვება უსაფეხურო წვდომა შესასვლელზე, მინიმუმ ერთ საძინებელსა და სააბაზანოზე, რომელშიც არის, მაგალითად, ხელის მოსაჭიდი მილები, საშხაპეში დასაჯდომი ადგილი და სხვა მოწყობილობები.

მნიშვნელოვანია, რომ საცხოვრებლის შესახებ ინფორმაცია ზუსტი და მკაფიო იყოს, ხოლო თუკი გსურთ, რომ თქვენ მიერ განთავსებული საცხოვრებელი მშვიდად დაჯავშნონ მათ, ვისაც ადაპტირებული პირობები სჭირდება, გაითვალისწინეთ ის რამდენიმე რჩევა, რომლებსაც ქვემოთ გთავაზობთ.

სტუმრობის მეტი მსურველის ყურადღების მიქცევაში დაგეხმარებათ შემდეგი ადაპტირებული პირობები:

• საპარკინგე ადგილი შშმ პირთათვის;
• განათებული ბილიკი სტუმრების შესასვლელამდე;
• უსაფეხურო წვდომა სტუმრების შესასვლელზე;
• უსაფეხურო წვდომა ოთახებზე;
• მინიმუმ 81 სმ სიგანის შესასვლელები;
• უსაფეხურო საშხაპე;
• ხელის მოსაჭიდი მილები უნიტაზთან ან/და საშხაპეში;
• საშხაპის ან აბაზანის სკამი;
• ჭერის ან მობილური ამწე;
• საცურაო ან ჰიდრომასაჟის აუზის ამწე.

განცხადებაში გამოქვეყნებამდე ყველა ადაპტირებული პირობა მოწმდება Airbnb‑ს სახელმძღვანელო მითითებებთან შესაბამისობაზე. თუ ცალკეული პირობა მითითებებთან შეუსაბამო ან ფოტოზე არასათანადოდ ასახული აღმოჩნდება, ახალი ფოტოს ატვირთვას ან შესაბამისი პირობის განცხადებიდან წაშლას გთხოვთ.

თითოეული ოთახის რამდენიმე ფოტოთი სტუმრობის მსურველები უფრო მარტივად გადაწყვეტენ, რამდენად შეესაბამება საცხოვრებელი მათ საჭიროებებს.

• დაურთეთ თითოეულ ფოტოს აღწერილობითი წარწერები. მაგალითად, სააბაზანოს ფოტოსთვის დამატებულ წარწერაში შეგიძლიათ დააზუსტოთ: „საცხოვრებლის მხოლოდ ამ სააბაზანოშია შესაძლებელი საფეხურების გარეშე მოხვედრა. უნიტაზთან და საშხაპეში ხელის მოსაჭიდი მილებია“.

• გადაიღეთ ფოტოები სხვადასხვა რაკურსით. მაგალითად, სააბაზანოს ფოტოებზე შეგიძლიათ წარმოაჩინოთ ხელის მოსაჭიდი თითოეული მილის მდებარეობა და ის, რომ უნიტაზსა და საშხაპემდე მიმავალი გზა ფართო და ბრტყელია.

შეიტყვეთ ვრცლად ფოტოებზე ადაპტირებული პირობების ასახვის შესახებ

განიხილეთ ხოლმე ადაპტირებულ პირობებთან დაკავშირებული სხვადასხვა ნიუანსი სტუმრობის მსურველებთან მიმოწერაში. ამ კუთხით სულ რამდენიმე შეკითხვა და პასუხიც კი უაღრესად მნიშვნელოვანი იქნება ზოგიერთი მათგანისთვის.

საუბრის დაწყება შეგიძლიათ, მაგალითად, შემდეგი ფრაზებით:

• საცხოვრებელთან დაკავშირებით რამის დაზუსტება ხომ არ გსურთ?
• დამატებითი კომფორტისთვის სტუმრობისას რამე ხომ არ გჭირდებათ?

მაქსიმალურად შეეცადეთ, შეასრულოთ გონივრული თხოვნები, მაგალითად, საცხოვრებელში გადაადგილების გამარტივებასთან დაკავშირებით. დაფიქრდით, რა ტიპის მცირე ცვლილებები აგრძნობინებს სტუმრებს მათზე ზრუნვას. მაგალითად, შეგიძლიათ:

• ავეჯის გადაადგილება, ოთახებსა და სივრცეებში გასასვლელების გასაფართოებლად;
• საყოფაცხოვრებო ნივთების (მაგალითად, პირსახოცების ან თეფშების) დალაგება უფრო ხელმისაწვდომ ადგილებზე;
• როზეტებზე წვდომის გამარტივება.

გახსოვდეთ, რომ არ არსებობს საცხოვრებელი, რომელიც იდეალური იქნება აბსოლუტურად ყველასთვის, და ეს არ ეხება მხოლოდ მათ, ვისაც ადაპტირებული პირობები სჭირდება. ამის მიუხედავად, ჩვენი ანტიდისკრიმინაციული პოლიტიკის მიხედვით, დაჯავშნის მოთხოვნას ვერ უარყოფთ მხოლოდ იმიტომ, რომ სტუმრობის მსურველს შეზღუდული შესაძლებლობა აქვს. ამას გარდა, დაუშვებელია დამატებითი გადასახადის დაკისრება დამხმარე ცხოველებისთვის, რომლებიც არ ითვლებიან შინაურ ცხოველებად.

გზამკვლევის მომზადება დაგეხმარებათ, სტუმრებს განსაკუთრებული სტუმართმოყვარეობა აგრძნობინოთ და ქალაქი ახლოს გააცნოთ. მასში შეგიძლიათ, რეკომენდაცია გაუწიოთ ადგილობრივ რესტორნებს, ღირსშესანიშნაობებსა თუ გარე აქტივობებს.

გზამკვლევის შედგენისას გაითვალისწინეთ ისიც, რაც ადაპტირებული პირობების საჭიროების მქონე ადამიანებს გამოადგებათ. მაგალითად, შეგიძლიათ, აღნიშნოთ პანდუსების მქონე რესტორნები, სალაშქრო ბილიკები მყარი საფარით და ღირსშესანიშნაობები შშმ პირთათვის განკუთვნილი ადგილებით. ამას გარდა, შეგიძლიათ, მიუთითოთ, როგორ არის მოწყობილი საზოგადოებრივი ტრანსპორტი.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.