მიმოხილვების მნიშვნელობის შესახებ

მიმოხილვები და შეფასებები ეხმარება სტუმრობის მსურველს, გადაწყვიტოს, რამდენად შესაფერისია მისთვის ესა თუ ის საცხოვრებელი. დადებითი მიმოხილვები და შეფასებები, შესაძლოა, მეტი ჯავშნისა და შემოსავლის მიღებაში დაგეხმაროთ.

მასპინძელსა და სტუმარს, რომელმაც დაჯავშნა საცხოვრებელი, ერთმანეთის მიმოხილვისთვის 14 დღე აქვთ სტუმრობის დასრულებიდან. მიმოხილვები ქვეყნდება, როცა ორივე მხარე დაასრულებს მათ დაწერას ან მიმოხილვის 14‑დღიანი პერიოდი ამოიწურება (გააჩნია, რომელი მოხდება უფრო ადრე).

სტუმრებისგან, შესაძლოა, რამდენიმე სახის გამოხმაურება მიიღოთ. კერძოდ:

• საჯარო მიმოხილვა. აღნიშნული მიმოხილვა დაერთვება როგორც თქვენს განცხადებას, ისე პროფილს. თუ საჯარო მიმოხილვაზე პასუხის გაცემას გადაწყვეტთ, ისიც საჯაროდ გამოქვეყნდება სტუმრის მიერ დატოვებული მიმოხილვის ქვეშ.
• კომენტარი მასპინძლისთვის. ასეთი კომენტარი არ გამოჩნდება თქვენს განცხადებაში.

ნაგულისხმევად, თავიდან ჩანს ყველაზე შესაბამისი მიმოხილვები. ამას გარდა, სტუმრობის მსურველებს საშუალება აქვთ, მოიძიონ კონკრეტული ტექსტი მიმოხილვებში, ასევე, დაალაგონ ისინი სიახლის ან უმაღლესი/უდაბლესი შეფასების მიხედვით.

აღიქვით სტუმრებისგან მიღებული გამოხმაურება შემდგომი განვითარების შესაძლებლობად. გაეცანით თითოეულ მიმოხილვას, საჭიროებისამებრ კი გაეცით კონსტრუქციული პასუხი, რითაც აგრძნობინებთ სტუმრობის მსურველებს, რომ გამოხმაურებას სერიოზულად ეკიდებით.

სტუმრებს ვთხოვთ, 1‑დან 5‑მდე ვარსკვლავით შეაფასონ როგორც ზოგადად სტუმრობა, ისე მისი 6 სხვადასხვა ასპექტი, რომლებიც წარმოდგენილია კატეგორიების სახით. გაითვალისწინეთ, რომ ზოგადი შთაბეჭდილების შეფასება არ წარმოადგენს სხვადასხვა კატეგორიაში მიღებულ შეფასებათა საშუალო მაჩვენებელს.

კატეგორიებს განეკუთვნება:

• დაბინავება. ფასდება ის, თუ რამდენად მარტივი იყო საცხოვრებლის პოვნა და შიგნით მოხვედრა.
• სისუფთავე. ფასდება ის, თუ რამდენად სუფთა იყო საცხოვრებელი სტუმრის დაბინავების მომენტში.
• სიზუსტე. ფასდება ის, თუ რამდენად შეესაბამებოდა საცხოვრებელი სტუმრის იმ მოლოდინს, რომელიც მას განცხადებაში აღწერილის საფუძველზე შეექმნა.
• კომუნიკაცია. ფასდება ის, თუ რამდენად ეფექტური იყო მასპინძელთან კომუნიკაცია ჯავშნის გაფორმების მომენტიდან სტუმრობის დასრულებამდე.
• მდებარეობა. ფასდება ის, თუ რამდენად მოეწონა სტუმარს საცხოვრებლის მიმდებარე ტერიტორია და ზოგადად უბანი.
• ფასი/ხარისხი. ფასდება ის, თუ რამდენად შეესაბამებოდა ხარისხი ფასს.

თითოეული სტუმრის მიერ დატოვებული მიმოხილვის გვერდით მოცემული იქნება მის მიერვე ვარსკვლავებით დაფიქსირებული საერთო შეფასებაც. როცა მინიმუმ 3 სტუმრისგან მიიღებთ შეფასებას, ვარსკვლავებით დაფიქსირებული საშუალო შეფასება აისახება როგორც ძიების შედეგებში, ისე თქვენი განცხადების გვერდზე.

შეფასებები Airbnb‑ს ეხმარება მოწინავე მასპინძლებისა თუ განცხადებების პოვნასა და გამორჩევაში — მაგალითად, მათთვის სუპერმასპინძლის ან „სტუმართა რჩეულის“ სტატუსის მინიჭების გზით.

სუპერმასპინძლები განსაკუთრებული სტუმარ‑მასპინძლობის ისტორიით ხასიათდებიან. მათ უნდა შეინარჩუნონ მინიმუმ 4,8‑ვარსკვლავიანი საერთო შეფასება და სხვა კრიტერიუმებიც დააკმაყოფილონ.

სტუმრების მიმოხილვით მათ ერთგვარად შეახსენებთ, რომ თქვენც დაგიტოვონ მიმოხილვა. თქვენ მიერ დაწერილი მიმოხილვა დაერთვება იმ სტუმრის პროფილის გვერდს, რომელმაც გააფორმა ჯავშანი. ამას გარდა, ის აისახება იმ ადამიანების პროფილებშიც, რომლებიც დაფიქსირებული იყვნენ ჯავშანში. მიმოხილვის დროს გაითვალისწინეთ შემდეგი:

• გამოხატეთ მადლიერება. მარტივი ფრაზაც საკმარისია, მაგალითად, შემდეგი ტიპის: „გმადლობთ სტუმრობისთვის!“.
• აღნიშნეთ დეტალები. მაგალითად, შეგიძლიათ მიუთითოთ შემდეგი: „სტუმარმა იდეალურად დაიცვა საცხოვრებლიდან გასვლის ინსტრუქცია“.
• გამოიჩინეთ პატივისცემა. უმჯობესია, თუ სათუთ საკითხებს პირად მიმოწერაში განიხილავთ.

სტუმრების შეფასებას რამდენიმე კატეგორიის (კერძოდ, სისუფთავის, კომუნიკაციისა და სახლის წესების დაცვის) მიხედვით გთხოვთ. თქვენი მხრიდან გამოხმაურება ხელს გვიწყობს, გავაკონტროლოთ, რამდენად მისდევენ სტუმრები იმ ძირითად წესებს, რომელთა მიხედვითაც ისინი უნდა გაუფრთხილდნენ საცხოვრებელს და დაიცვან სახლის წესები.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.