ჯანმრთელობასა და უსაფრთხოებასთან დაკავშირებული მითითებები Airbnb შთაბეჭდილებების შეთავაზებისთვის რეგიონებში, სადაც შეზღუდვები მოიხსნა

შეზღუდვები მსუბუქდება და მასპინძლები თანდათან კვლავ სთავაზობენ სტუმრებს შთაბეჭდილებებს ფიზიკური მონაწილეობით. ამის მიუხედავად, პანდემია არ დასრულებულა, ამიტომ მნიშვნელოვანია, ყველამ გამოვიჩინოთ პასუხისმგებლობა და ერთმანეთის ჯანმრთელობასა თუ უსაფრთხოებაზე ვიზრუნოთ. აქედან გამომდინარე, ჯანდაცვის მსოფლიო ორგანიზაციისა და აშშ‑ის დაავადებათა კონტროლის ცენტრების რეკომენდაციების საფუძველზე, Airbnb შთაბეჭდილებების მასპინძლებისთვის შევიმუშავეთ მითითებები, რომლებიც COVID‑19‑ის პირობებში ჯანმრთელობისა და უსაფრთხოების დაცვას ემსახურება.

• ატარეთ ნიღაბი და დაიცავით სოციალური დისტანცია ადგილობრივი კანონმდებლობისა თუ ოფიციალური მითითებების შესაბამისად.
• შეზღუდეთ მონაწილეების მაქსიმალური რაოდენობა 10‑მდე (მასპინძლებისა და თანამასპინძლების ჩათვლით).
• შეასრულეთ Airbnb‑ს მიერ მომზადებული მითითებები დასუფთავებასთან დაკავშირებით — დაასუფთავეთ აქტივობისთვის განსაზღვრული სივრცე და აღჭურვილობა როგორც მასპინძლობისას, ისე ცალკეულ ღონისძიებებს შორის. ვრცლად.

Airbnb გაერთიანების წევრების ჯანმრთელობისა და უსაფრთხოების დაცვის მიზნით, სხვადასხვა წესი თუ პროგრამა შევიმუშავეთ, თუმცა ჩვენ მიერ მიღებული ზომების მეშვეობით ყველა საფრთხის აღმოფხვრა შეუძლებელია — განსაკუთრებით, თუ შედარებით მაღალი რისკის ჯგუფს მიეკუთვნებით (მაგ., 65 წელზე უფროსი ასაკის ხართ ან გაქვთ ქრონიკული დაავადებები, როგორიცაა დიაბეტი ან გულ‑სისხლძარღვთა დარღვევები). ამ შემთხვევაში, Airbnb შთაბეჭდილების შეთავაზების შესახებ გადაწყვეტილების მიღებისას, გაიარეთ კონსულტაცია ექიმთან და დაიცავით უსაფრთხოების დამატებითი ზომები.

ჩვენი გაერთიანების წევრების ჯანმრთელობისა და უსაფრთხოების დაცვის ხელშეწყობის მიზნით, Airbnb მასპინძლები (და თანამასპინძლები) არ უნდა მასპინძლობდნენ და არც ესწრებოდნენ მომავალ ღონისძიებებს, ხოლო სტუმრები არ უნდა მონაწილეობდნენ, თუ:

• ამჟამად ინფიცირებული არიან COVID‑19‑ით ან ბოლო 14 დღის განმავლობაში ტესტზე დადებითი პასუხი მიიღეს
• ეჭვი აქვთ, რომ COVID‑19‑ით დაავადებული არიან (ან ინფიცირების საფრთხის ქვეშ იყვნენ) და ამჟამად ტესტის პასუხს ელოდებიან
• აქვთ COVID‑19‑ის სიმპტომები ან ფიქრობენ, რომ შეიძლებოდა დაინფიცირებულიყვნენ
• ბოლო 14 დღის განმავლობაში ჰქონდათ მუდმივი, მჭიდრო კონტაქტი პირთან, რომელიც დანამდვილებით ან სავარაუდოდ ინფიცირებულია COVID‑19‑ით

ჯანმრთელობისა და უსაფრთხოების დაცვის მიზნით შემუშავებული მითითებების შესასრულებლად, შესაძლოა, გარკვეული ცვლილებების შეტანა მოგიწიოთ როგორც ღონისძიებაში, ისე მისი ჩატარების ადგილზე.

გაითვალისწინეთ შემდეგი:

• მჭიდრო კონტაქტი: შეცვალეთ პროგრამა იმგვარად, რომ გამორიცხოთ მჭიდრო კონტაქტი როგორც სტუმრებს, ისე სტუმრებსა და მასპინძელს შორის.
• ჰიგიენა: შესთავაზეთ სტუმრებს ხელების დაბანის პირობები, ასევე, თან იქონიეთ ხელის დამატებითი ანტისეპტიკური საშუალება. სანიტარიული წესით დაამუშავეთ აღჭურვილობა (სამზარეულო ინვენტარი, სამაშველო ჟილეტები, სკამები და ა.შ.), როგორც ღონისძიებების დაწყებამდე, ისე მის შემდეგ.
• მდებარეობა:
  • შენობაში შეთავაზებული შთაბეჭდილებების შემთხვევაში, უმჯობესი იქნება, თუ სტუმრები მხოლოდ იმ სივრცეებით ისარგებლებენ, რომლებიც აუცილებლად სჭირდებათ. ამ გზით ვირუსის გავრცელების რისკსაც შეამცირებთ და შემდეგ ნაკლები სივრცის დასუფთავება მოგიწევთ.
  • ჩაატარეთ ღონისძიება გარეთ, ან შეცვალეთ შეხვედრის ადგილი და მარშრუტები, რომ თავიდან აიცილოთ ხალხმრავალი ადგილები. მოიფიქრეთ, როგორ გადაადგილდეთ ისე, რომ არ მოხვდეთ პიკის საათში და სტუმრებთან სათანადო დისტანცია დაიცვათ.
  • თუ საზოგადოებრივი ადგილების (მაგ., ძეგლების, პარკების, ქალაქის ცენტრის და ა.შ.) მონახულებას გეგმავთ, შეამოწმეთ ადგილობრივი ხელისუფლების და ჯანდაცვის ორგანოების რეკომენდაციები როგორც ჯავშნების მიღებისას, ისე მასპინძლობამდე. ზოგან შესასვლელად საჭიროა ვაქცინაციის დამადასტურებელი დოკუმენტი. ამას გარდა, გირჩევთ, მუდმივ მოძრაობაში იყოთ, ვიდრე ერთ ადგილას ისხდეთ.
• საჭმელ‑სასმელი:
  • თუ სტუმრებს შთაბეჭდილებას საჭმელ‑სასმლის თანხლებით სთავაზობთ, იზრუნეთ, რომ საჭმლის ან სასმლის მირთმევისას მონაწილეებმა დაიცვან სოციალური დისტანცია.
  • შეძლებისდაგვარად, სტუმრებმა საჭმელი/სასმელი უნდა მიირთვან გარეთ ან თან წაიღონ.
  • მოერიდეთ საჭმლისა და სასმლის შეთავაზებას თვითმომსახურებით. გაყავით კერძები ინდივიდუალურ ულუფებად, ოჯახურ სტილში სადილობისა თუ შვედური მაგიდების ნაცვლად.
  • გამოიყენეთ ერთჯერადი დანა‑ჩანგალი და თეფშები. თუ ვერ ახერხებთ, გარეცხეთ ყველაფერი ხელთათმანებით, ცხელ წყალში და შესაბამისი სარეცხი საშუალებით, ან ისარგებლეთ ჭურჭლის სარეცხი მანქანით.
• ვენტილაცია: შენობაში მასპინძლობის შემთხვევაში შეამოწმეთ, რომ ვენტილაციის სისტემა გამართულად მუშაობს, ასევე, შეძლებისდაგვარად, გააღეთ ფანჯრები და კარები, რომ ჰაერი თავისუფლად ცირკულირებდეს.

შთაბეჭდილების გვერდის განახლებას გაითვალისწინეთ დოკუმენტი კონტენტის დებულებისა და კორონავირუსის შესახებ. მაგალითად, შეგიძლიათ აღნიშნოთ, რომ უსაფრთხოების დამატებით ზომებს იღებთ, მაგრამ დაუშვებელია იმის მტკიცება, რომ სტუმრები კორონავირუსისგან სრულად დაცული იქნებიან.

მითითებები შთაბეჭდილებების სტუმრებისთვისაც შევიმუშავეთ. სტუმრებმა უნდა დაიცვან ადგილობრივი კანონები და მითითებები, დაიბანონ ხელები მასპინძლის თხოვნით, თან იქონიონ ანტისეპტიკური საშუალება, დაიცვან უსაფრთხო დისტანცია როგორც მასპინძლისგან, ისე სხვა სტუმრებისგან, ასევე, გააუქმონ ჯავშანი და დარჩნენ სახლში, თუ თავს შეუძლოდ გრძნობენ. თუ სტუმარი უარს იტყვის ადგილობრივი კანონებისა და მითითების დაცვაზე, უფლება გაქვთ, ღონისძიების დატოვება სთხოვოთ.

უსაფრთხოებასთან დაკავშირებული ახალი მითითებების შესაბამისად შთაბეჭდილების შეთავაზებამდე გაეცანით სტუმრებისთვის თანხის დაბრუნების წესებს. გაითვალისწინეთ, რომ სტუმრებს შეუძლიათ თანხის დაბრუნების მოთხოვნა, თუ მასპინძელი თავად არ დაიცავს მითითებებს უსაფრთხოებასთან დაკავშირებით და არც ყველა სტუმარს სთხოვს მათ დაცვას.

თუ ახლახან COVID‑19 დაგიდასტურდათ ან მისი სიმპტომები შენიშნეთ, შეატყობინეთ როგორც კომპეტენტურ ადგილობრივ უწყებებს, ისე ყველას, ვისაც აღნიშნული შეიძლებოდა შეხებოდა.