ხარისხის შენარჩუნება

მაღალი შეფასებები და დადებითი მიმოხილვები, შესაძლოა, მეტი ჯავშნისა და შემოსავლის მიღებაში დაგეხმაროთ. საცხოვრებლიდან გასვლის შემდეგ სტუმრებს საშუალება აქვთ, შეაფასონ როგორც ზოგადად სტუმრობა, ისე მისი ცალკეული ასპექტები — კერძოდ, სისუფთავე, სიზუსტე, დაბინავება, კომუნიკაცია, მდებარეობა და ფასის შეფარდება ხარისხთან.

მართალია, შეფასებები სტუმრობის ხარისხის ერთადერთი მაჩვენებელი არ არის, თუმცა მნიშვნელოვანია, ისინი მაღალი იყოს ამ ექვსივე კატეგორიაში.

სტუმრები მოელიან, რომ საცხოვრებელში მოცემული ფოტოები, საყოფაცხოვრებო პირობები და აღწერილობები რეალობასთან ახლოს იქნება. თუ გარკვეული პირობა მხოლოდ კონკრეტულ სეზონზეა ხელმისაწვდომი (მაგალითად, საცურაო აუზი), არ დაგავიწყდეთ განცხადების ჩასწორება, როცა მისით სარგებლობა ვერ მოხერხდება.

სამანტას, სუპერმასპინძელს ბელფასტიდან (მენი, აშშ), განთავსებული აქვს 20 განცხადება. სტუმრებისთვის სათანადო მოლოდინის შესაქმნელად მას დეტალურად აქვს აღწერილი თითოეული საცხოვრებელი და დართული აქვს უახლესი ფოტოები. „ამას გარდა, ვცდილობ, საყოფაცხოვრებო პირობების ჩამონათვალიც რეგულარულად განვაახლო, რომ სტუმრებმა ზუსტად იცოდნენ, რა დახვდებათ“, — ამბობს ის. სამანტა ყოველ სეზონზე ცვლის ფოტოებს და ყოველთვიურად აახლებს სხვა ინფორმაციას განცხადებებში.

შეავსეთ დაბინავების ინსტრუქცია თითოეული საცხოვრებლისთვის. საჭიროებისამებრ, დაურთეთ მას დეტალური მითითებები და ფოტოები. თუ თქვენთან შესაძლებელია გონიერი საკეტების ინტეგრაცია, დააკავშირეთ თავსებადი საკეტები თქვენს ანგარიშს Airbnb‑ზე, რომ თითოეული სტუმრობისთვის ავტომატურად შეიქმნას უნიკალური კოდი.

კორინს, სუპერმასპინძელს პერსელვილიდან (ვირჯინია, აშშ) შედგენილი აქვს მოკლე შეტყობინება ინფორმაციით საცხოვრებლისა და დაბინავების პროცედურის შესახებ Airbnb‑ს პლატფორმაზე მის მიერ განთავსებული 36 განცხადებიდან თითოეულისთვის. აღნიშნული შეტყობინებები სტუმრებს დაბინავებამდე 3 დღით ადრე ეგზავნებათ ავტომატურად და თავიდან არიდებს მასპინძლებს ბოლო წუთის შეკითხვებს, სტუმრებს კი დაუბრკოლებლად დაბინავებაში ეხმარება.

სცადეთ, შექმნათ დეტალური საკონტროლო სია თქვენ მიერ განთავსებული საცხოვრებლებისთვის, რომ დამლაგებლები ყოველთვის ერთსა და იმავე პროცედურას მიჰყვნენ და მათ არაფერი გამორჩეთ. კორინს მსგავსი საკონტროლო სიები მის მიერ განთავსებული თითოეული საცხოვრებლისთვის აქვს მომზადებული.

ამას გარდა, ის ბითუმად ყიდულობს პირველადი საჭიროების ნივთებს და მათ ცენტრალურ ადგილას ინახავს. „როცა რომელიმე საცხოვრებელში რაიმეს მარაგი იწურება, დამლაგებელი მომდევნო ვიზიტისას ავსებს მას“, — ამბობს კორინი.

გამოხმაურების სიხშირე ასახავს, რამდენად ოპერატიულად პასუხობთ დაჯავშნით დაინტერესებებსა და დაჯავშნის მოთხოვნებს. დრო რომ დაზოგოთ, ისარგებლეთ მზა პასუხებისა და დაგეგმილი შეტყობინებების ფუნქციებით.

„რამდენიმე მზა პასუხი მაქვს, რადგან სტუმრები ხშირად მეკითხებიან კოცონის დასანთები ადგილისა და ჰიდრომასაჟის აუზის შესახებ, ღირსშესანიშნავ ადგილებამდე მანძილიც აინტერესებთ ხოლმე“, — ამბობს კორი, სუპერმასპინძელი ჩიკაგოდან, რომელსაც განთავსებული აქვს შვიდი განცხადება.

მნიშვნელობა არ აქვს, თქვენ მიერ განთავსებული საცხოვრებელი ქალაქის ცენტრში მდებარეობს თუ მისგან საკმაოდ მოშორებით — მთავარია, ამის გარკვევა მარტივად იყოს შესაძლებელი საცხოვრებლის აღწერილობიდან. ამას გარდა, მდებარეობასთან დაკავშირებით გარკვეული მოლოდინის შექმნა შეგიძლიათ განცხადების სათაურსა და ფოტოებისთვის დართულ წარწერებში.

„ჩემ მიერ განთავსებული პირველი საცხოვრებელი ქალაქის ცენტრიდან შორს მდებარეობდა. იმის გამო, რომ სტუმრები პიკის საათის დროს საცობებში ხვდებოდნენ, დაბალ შეფასებებს ვიღებდი. საკმაოდ დიდი დრო დამჭირდა საცხოვრებლის იმგვარად აღწერაზე, რომ სტუმრებს რეალისტური მოლოდინი შეჰქმნოდათ“, — იხსენებს ტატია, მრჩეველ მასპინძელთა საბჭოს წევრი და სუპერმასპინძელი ბანგკოკიდან (ტაილანდი), რომელიც ახლა 5 საცხოვრებლის მასპინძელი და 44 საცხოვრებლის თანამასპინძელია.

სისუფთავე, სიზუსტე, დაბინავება, კომუნიკაცია და მდებარეობა აისახება თქვენ მიერ განთავსებული საცხოვრებლების საერთო ხარისხზე. თუ ამ ხუთივე კატეგორიაში მაჩვენებლების გაუმჯობესებაზე იზრუნებთ, პარალელურად კი დიზაინისა და საყოფაცხოვრებო პირობების აქტუალობასაც მიაქცევთ ყურადღებას, სტუმრები უფრო დიდი ალბათობით იგრძნობენ, რომ სტუმრობაში გადახდილი ფასი ხარისხის შესაბამისი იყო.

„ვფიქრობ, რომ სურათებითა და სრული აღწერილობებით შესაძლებელია იმის გადმოცემა, თუ როგორი იქნება სტუმრობა და როგორ შეესაბამება ფასი ხარისხს“, — ამბობს კორი და დასძენს: „წარმოვაჩენ, რომ სამზარეულოები სრულად აღჭურვილია, საცხოვრებლის გარშემო კი შესაძლებელია მეგობრებთან ერთად შეკრება. იმასაც ხაზს ვუსვამ, რომ დეკორის ელემენტები საგანგებოდ შეირჩა თითოეული საცხოვრებლისთვის“.

ექვსივე კატეგორიაში თქვენი მაჩვენებლების გასაკონტროლებლად დაიხმარეთ „ანალიტიკის“ ჩანართი, რომელზეც მოცემულია დეტალური ინფორმაცია თქვენთან დასრულებული ყველა სტუმრობის საფუძველზე.

თუ თქვენთან სტუმრობა 5 ვარსკვლავზე მიმდინარეობს, სტუმრებს შეტყობინებებზე ოპერატიულად პასუხობთ და რეგულარულად აახლებთ კალენდარსა თუ დაჯავშნის პარამეტრებს, გაუქმების შემთხვევები თავიდან რომ აიცილოთ, მაშინ სუპერმასპინძლის სტატუსსაც მალევე მოიპოვებთ. ჩვენი დაკვირვებით, „სუპერმასპინძლის“ ნიშანი ხელს უწყობს შემოსავლის 4%‑ით გაზრდას.*

*ეფუძნება სუპერმასპინძელთა შეფასებებს 2021 და 2022 წლებში

თუ API‑ს მეშვეობით დაკავშირებულ პროგრამულ უზრუნველყოფას იყენებთ, ამ ფუნქციებით სარგებლობას თქვენთვის ჩვეული ინტერფეისიდანვე შეძლებთ (თუ პროგრამული უზრუნველყოფის მომწოდებელს ისინი ინტეგრირებული აქვს). თუ ფუნქციები ჯერ არ არის ინტეგრირებული, მიმართეთ პროგრამული უზრუნველყოფის მომწოდებელს და შეიტყვეთ, როდის იგეგმება ეს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.