წესების ნაკრებებისა და ფასდაკლებების კომბინირება
როცა სტუმრობის მსურველებს რამდენიმე ფასდაკლებას სთავაზობთ, ფასდაკლებებსა და წესების ნაკრებებს აერთიანებთ, ან ინდივიდუალურ პრომოაქციას აწესებთ, ფასი ერთ ღამეზე გამოითვლება რამდენიმე ფაქტორის გათვალისწინებით.
ფასდაკლებების პრიორიტეტულობა
თუ ერთსა და იმავე პერიოდზე რამდენიმე ფასდაკლებას დააწესებთ, ერთ ღამეზე მხოლოდ ერთი ფასდაკლება იმოქმედებს. ყოველთვის აირჩევა ყველაზე პრიორიტეტული ფასდაკლება, დანარჩენები კი უგულებელყოფილი იქნება.
ფასდაკლებათა პრიორიტეტი განისაზღვრება შემდეგი თანმიმდევრობით:
- პრომოაქცია „ახალი განცხადება“
- ინდივიდუალური პრომოაქცია
- ფასდაკლება გრძელვადიან ჯავშნებზე
- ფასდაკლება ადრეულ დაჯავშნაზე
- ბოლო წუთის ფასდაკლება
მაგალითად:
- თქვენი ინდივიდუალური პრომოაქცია ივლისში ითვალისწინებს 20%‑იან ფასდაკლებას ერთი ღამის ფასზე (თავდაპირველი ფასი: 120 აშშ დოლარი).
- თქვენ მიერ დაწესებული ფასდაკლება გრძელვადიან ჯავშნებზე ითვალისწინებს 30%‑იან ფასდაკლებას ერთი ღამის ფასზე (თავდაპირველი ფასი: 120 აშშ დოლარი).
- სტუმრობის მსურველი, რომელიც საცხოვრებელს მთელი ივლისით დაჯავშნის, ისარგებლებს ინდივიდუალური პრომოაქციით (ანუ 20%‑იანი ფასდაკლებით), რადგან მას უპირატესობა აქვს გრძელვადიან ჯავშნებზე დაწესებული ფასდაკლების წინაშე.
- სტუმარი გადაიხდის 96 აშშ დოლარს ერთ ღამეში.
წესების ნაკრებებისა და ფასდაკლებების კომბინირება
წესების ნაკრები ყოველთვის პირველი გამოიყენება. ნებისმიერი შესაძლო დამატებითი ფასდაკლება წესების ნაკრებში განსაზღვრულ ფასზე გავრცელდება.
მაგალითად:
- თქვენი წესების ნაკრების მიხედვით, ივლისში ფასი ერთ ღამეზე 100 აშშ დოლარია 120 აშშ დოლარის ნაცვლად.
- თქვენი ინდივიდუალური პრომოაქცია ითვალისწინებს 20%‑იან ფასდაკლებას.
- სტუმრობის მსურველისთვის 20% დააკლდება ერთი ღამის 100 აშშ დოლარად განსაზღვრულ ფასს, რადგან ინდივიდუალურ პრომოაქციამდე გათვალისწინებული იქნება წესების ნაკრები.
- სტუმარი გადაიხდის 80 აშშ დოლარს ერთ ღამეში.
ფასდაკლება არაანაზღაურებადი ვარიანტის არჩევისას
არაანაზღაურებადი ვარიანტის არჩევის შემთხვევაში მოქმედი 10%‑იანი ფასდაკლება ერთი ღამის ფასზე გავრცელდება დანარჩენი ფასდაკლების გათვალისწინების შემდეგ.
მაგალითად:
- თქვენი წესების ნაკრების მიხედვით, ივლისში ფასი ერთ ღამეზე 100 აშშ დოლარია 120 აშშ დოლარის ნაცვლად.
- თქვენი ინდივიდუალური პრომოაქცია ითვალისწინებს 20%‑იან ფასდაკლებას წესების ნაკრებში განსაზღვრულ ფასზე, ანუ ერთი ღამის ფასი ხდება 80 აშშ დოლარი.
- სტუმრობის მსურველი არაანაზღაურებად ვარიანტს ირჩევს, რა შემთხვევაშიც დამატებით 10% აკლდება ფასდაკლებულ ტარიფს (80 აშშ დოლარს).
- სტუმარი გადაიხდის 72 აშშ დოლარს ერთ ღამეში.
ფასების გამოთვლა ინდივიდუალური პრომოაქციების შემთხვევაში
ინდივიდუალური პრომოაქციის დაწესების შემთხვევაში, ფასი ერთ ღამეზე განისაზღვრება 60 დღის მედიანური ფასის საფუძველზე. ჯერ ზრდადობით ვალაგებთ ყველა იმ ფასს, რომელიც პრომოაქციის მოქმედების პერიოდში დაგიწესებიათ, შემდეგ კი ვიღებთ შუა მნიშვნელობას, რომელსაც მედიანური ეწოდება.
მაგალითად:
- ბოლო 60 დღიდან 30 დღის განმავლობაში ერთი ღამის ფასად დაწესებული გქონდათ 100 აშშ დოლარი, დანარჩენი 30 დღის განმავლობაში კი — 125 აშშ დოლარი.
- Airbnb ამ ორი ფასის საშუალოს გამოთვლის, რომ განსაზღვროს მედიანური ფასი — 112,50 აშშ დოლარი.
- თქვენ მიერ დაწესებული პრომოაქციის ფარგლებში, 20% დააკლდება მედიანურ ფასს (112,50 აშშ დოლარს).
- სტუმარი გადაიხდის 90 აშშ დოლარს ერთ ღამეში.
თუ რომელიმე ღამისთვის 60 დღის მედიანური ფასის დადგენა ვერ მოხერხდება, მასზე ვერ გავრცელდება ინდივიდუალური პრომოაქცია ან ბოლო წუთის ფასდაკლება. თარიღი უნდა იყოს:
- განბლოკილი მიმდინარე პერიოდში;
- განბლოკილი ბოლო 60 დღიდან 28 დღის განმავლობაში;
- მიმდინარე თარიღიდან 90 დღის ფარგლებში.
პოპულარიზაციის ზოგიერთი საშუალება (მაგალითად, გადახაზული სტილი), შესაძლოა, არ გამოიყენებოდეს ზოგიერთ გეოგრაფიულ რეგიონში. ამას გარდა, ფასდაკლებების პრიორიტეტულობა არ იმუშავებს იმ განცხადებების შემთხვევაში, რომლებიც იმართება API‑ს მეშვეობით დაკავშირებული პროგრამული უზრუნველყოფით და სტუმრობის ხანგრძლივობაზე დაფუძნებულ ფასწარმოქმნის მოდელს იყენებს.
სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.