სიახლეები პროფესიული მასპინძლობისთვის

რედაქტორის შენიშვნა: სტატია გამოქვეყნდა Airbnb‑ს 2023 წლის ზაფხულის განახლების ფარგლებში. ინფორმაცია, შესაძლოა, შეცვლილიყო მისი გამოქვეყნების შემდეგ. შეიტყვეთ ვრცლად ჩვენი პროდუქტის უახლესი ვერსიის შესახებ.

Airbnb‑ს 2023 წლის ზაფხულის განახლების ფარგლებში, მასპინძლებს წარვუდგინეთ 25 სიახლე და დამატებით 8 ახალი ფუნქცია მათ, ვინც API‑ს მეშვეობით დაკავშირებულ პროგრამულ უზრუნველყოფას იყენებს. სიახლეების მიზანია, გაგიმარტივოთ ხარისხის მაჩვენებლების გაკონტროლება და მასპინძლობასთან დაკავშირებული ყოველდღიური ამოცანების შესრულება.

რვავე სიახლით სარგებლობას პირდაპირ თქვენი პროგრამული უზრუნველყოფიდან შეძლებთ, თუკი მომწოდებელს ისინი ინტეგრირებული აქვს. თუ ახალი ფუნქციები ჯერ არ არის ინტეგრირებული, მიმართეთ პროგრამული უზრუნველყოფის მომწოდებელს, რომ შეიტყოთ, როდის იგეგმება ეს.

დაამატეთ საცხოვრებლიდან გასვლის დეტალური ინსტრუქცია პირდაპირ თქვენი დაკავშირებული პროგრამული უზრუნველყოფიდან, ზუსტად ისე, როგორც სახლის სტანდარტულ წესებს უთითებთ. ასარჩევად ხელმისაწვდომია შემდეგი სტანდარტული ამოცანები:

• გამოყენებული პირსახოცების შეგროვება
• ნაგვის გადაყრა
• ყველაფრის გამორთვა
• კარის დაკეტვა
• გასაღების დაბრუნება

თითოეულ ამოცანას შეგიძლიათ დეტალური ინფორმაცია დაურთოთ. მაგალითად, შეგიძლიათ მიუთითოთ, რომ სტუმრებმა ორგანული ნაგავი ერთ კონკრეტულ ურნაში ჩაყარონ, ხოლო ის, რაც გადამუშავებას ექვემდებარება — სხვა რომელიმე ურნაში. ამას გარდა, შეძლებთ დამატებითი თხოვნების მითითებას, თუ, ვთქვათ, სტუმრებმა წასვლამდე აუცილებლად უნდა დააფარონ თავსახური გრილს.

საცხოვრებლიდან გასვლამდე ერთი დღით ადრე სტუმრებს ავტომატურად შევახსენებთ როგორც საცხოვრებლიდან გასვლის დროს, ისე შესასრულებელ ამოცანებს. სახლის წესების მსგავსად, სტუმრობის მსურველებს საცხოვრებლიდან გასვლის ინსტრუქციის გაცნობა ჯავშნის გაფორმებამდე შეეძლებათ. საცხოვრებლიდან გასვლის შემდეგ სტუმრები ღილაკზე ერთი შეხებით ან დაწკაპუნებით შეძლებენ, შეგატყობინონ, რომ წავიდნენ.

Airbnb‑ს 2022 წლის ზამთრის განახლების ფარგლებში, მასპინძლებსა და სტუმრებს ერთმანეთისთვის უფრო დეტალური გამოხმაურების დატოვების საშუალება მივეცით. კერძოდ, ორივე მხარისთვის შესაძლებელი გახდა ვარსკვლავებით დაფიქსირებული შეფასების დაწერა რამდენიმე კატეგორიის მიხედვით, მათ შორის, იმის დაკონკრეტება, თუ რა მოეწონათ და რის გაუმჯობესებას ისურვებდნენ. მაგალითად, სტუმრები, რომლებიც მასპინძელთან კომუნიკაციას ხუთი ვარსკვლავით შეაფასებენ, დამატებით შეძლებენ, აირჩიონ სხვადასხვა თეგი, ვთქვათ, „ყოველთვის ოპერატიული იყო“ ან „ყველა მითითება სათანადო იყო“.

აღნიშნული ფუნქციები ამიერიდან ხელმისაწვდომია დაკავშირებული პროგრამული უზრუნველყოფის საშუალებითაც. თქვენ შეძლებთ სტუმრებისთვის უფრო დეტალური მიმოხილვების დატოვებას, მათგან კი შეიტყობთ, განსაკუთრებით რა მოეწონათ და რის გაუმჯობესებას ისურვებდნენ.

თუ თქვენ მიერ განთავსებული რომელიმე განცხადების შემთხვევაში დაირღვევა მასპინძლებისთვის მოქმედი ძირითადი წესები, თქვენს პროგრამულ უზრუნველყოფაში შემოგთავაზებთ პრობლემური ბოლოდროინდელი სტუმრობების ჩამონათვალს. მაგალითად, თუ სტუმარი დაბინავების პროცესს ორი ვარსკვლავით შეაფასებს, რადგან მან საცხოვრებელში შესვლა ვერ მოახერხა, ამ შემთხვევას ჩავინიშნავთ და გირჩევთ, რა მოიმოქმედოთ მომავალში მსგავსი პრობლემების თავიდან ასაცილებლად.

საცხოვრებელთან დაკავშირებით დაფიქსირებული პრობლემები ვლინდება დაბალი შეფასებების, სტუმრების მიერ მხარდაჭერის გუნდისადმი მიმართვებისა და მასპინძლის მხრიდან ჯავშნების გაუქმების შემთხვევების საფუძველზე. ამას გარდა, აღნიშნული ჩამონათვალიდანვე შეიტყობთ, ემუქრება თუ არა კონკრეტულ განცხადებას მოქმედების შეჩერების ან წაშლის საფრთხე.

თუ თქვენ მიერ განთავსებულ რომელიმე განცხადებას მოქმედების შეჩერების ან წაშლის საფრთხე დაემუქრება მასპინძლებისთვის მოქმედი ძირითადი წესების დარღვევის გამო, აღნიშნულის შესახებ შეგატყობინებთ როგორც ელფოსტის საშუალებით, ისე push‑გაფრთხილების სახით პირდაპირ თქვენი პროგრამული უზრუნველყოფის ინტერფეისში. მიღებული გაფრთხილებიდან საშუალება გექნებათ, გადახვიდეთ საცხოვრებელთან დაკავშირებული პრობლემებისა და მათი გამოსწორების ხერხების ჩამონათვალზე.

ამას გარდა, შეგატყობინებთ, როდის იქნება შესაძლებელი განცხადების ხელახლა ამოქმედება (თუ მას მოქმედება შეუჩერდა) და როგორ გაასაჩივროთ განცხადების წაშლის შესახებ მიღებული გადაწყვეტილება. ამ ტიპის გადაწყვეტილებების გასაჩივრებას მხოლოდ Airbnb‑ს მეშვეობით შეძლებთ.

Airbnb კატეგორიები ეხმარება სტუმრობის მსურველებს, აღმოაჩინონ მილიონობით უნიკალური საცხოვრებელი მსოფლიოს სხვადასხვა კუთხეში. 60‑ზე მეტი კატეგორია თავს უყრის საცხოვრებლებს, რომლებიც შერჩეულია სტილის, მდებარეობისა და მოგზაურობის კუთხით საინტერესო აქტივობებთან სიახლოვის მიხედვით.

ამიერიდან თქვენი პროგრამული უზრუნველყოფიდანვე შეგიძლიათ შეიტყოთ, რომელ Airbnb კატეგორიაშია თქვენ მიერ განთავსებული თითოეული საცხოვრებელი. სწორედ ამ ფუნქციას ითხოვდნენ მასპინძლები ყველაზე ხშირად, რადგან მათ აინტერესებდათ, რა გზით არის წარმოდგენილი მათი განცხადებები Airbnb‑ზე.

დაკავშირებული პროგრამული უზრუნველყოფის მეშვეობით ამიერიდან მიიღებთ გაფრთხილებებს, როცა თქვენი მხრიდან საჭირო იქნება რაიმე ფორმის შევსება ანდა ინფორმაციის მოწოდება თქვენი საქმიანობისა თუ სხვა საკითხების შესახებ.

Airbnb‑ზე რეგისტრირებული ბიზნესსუბიექტების ინფორმაციის შეგროვებასა და დადასტურებას ადგილობრივი კანონმდებლობა გვავალდებულებს. ზემოაღნიშნული სიახლის წყალობით კი პირდაპირ თქვენი პროგრამული უზრუნველყოფიდან შეიტყობთ, რა მოთხოვნები მოქმედებს თქვენთან და როგორ დააკმაყოფილოთ ისინი.

თქვენგან შევიტყვეთ, რომ გჭირდებოდათ იმის დაკონკრეტება, თუ რამდენ შინაურ ცხოველთან ერთად სტუმრობა დაიშვება. ამიერიდან მარტივად შეგიძლიათ მიუთითოთ შინაური ცხოველების მაქსიმალური რაოდენობა (ხუთამდე).

თქვენგან ისიც შევიტყვეთ, რომ გსურდათ, პირდაპირ თქვენი პროგრამული უზრუნველყოფიდან შეგეთავაზებინათ სტუმრობის მსურველებისთვის პრომოაქცია „ახალი განცხადება“ ამიერიდან თავისუფლად შეძლებთ, დააწესოთ 20%‑იანი ფასდაკლება პირველ სამ ჯავშანზე, როცა ახალ განცხადებას შექმნით.