ჯანმრთელობასა და უსაფრთხოებასთან დაკავშირებული მითითებები Airbnb საცხოვრებლების სტუმრებისა და მასპინძლებისთვის

COVID‑19‑ის პანდემიის პირობებში ჯანმრთელობასა და უსაფრთხოებაზე ზრუნვა განსაკუთრებით მნიშვნელოვანია, ამიტომ ჯანდაცვის მსოფლიო ორგანიზაციისა და აშშ‑ის დაავადებათა კონტროლის ცენტრების რეკომენდაციების საფუძველზე Airbnb მასპინძლებისა თუ სტუმრებისთვის შევიმუშავეთ COVID‑19‑თან დაკავშირებული უსაფრთხოების ზომები, რომელთა მიღებაც სავალდებულოა. ამასთანავე, სასურველია, იცოდეთ ზოგადი მითითებები ჯანმრთელობისა თუ უსაფრთხოების საკითხებთან დაკავშირებით COVID‑19‑ის პირობებში და პერიოდულად გაეცნოთ ოფიციალურ სამოგზაურო შეზღუდვებსა და რჩევებს, ასევე, შეასრულოთ სახელმწიფო თუ ადგილობრივი მითითებები.

Airbnb გაერთიანების წევრების ჯანმრთელობისა და უსაფრთხოების დაცვის მიზნით, სხვადასხვა წესი თუ პროგრამა შევიმუშავეთ, თუმცა ჩვენ მიერ მიღებული ზომების მეშვეობით ყველა საფრთხის აღმოფხვრა შეუძლებელია — განსაკუთრებით, თუ შედარებით მაღალი რისკის ჯგუფს მიეკუთვნებით (მაგ., 65 წელზე უფროსი ასაკის ხართ ან გაქვთ ქრონიკული დაავადებები, როგორიცაა დიაბეტი ან გულ-სისხლძარღვთა დარღვევები). ამ შემთხვევაში, Airbnb საცხოვრებლის ან შთაბეჭდილების დაჯავშნის შესახებ გადაწყვეტილების მიღებისას, გაიარეთ კონსულტაცია ექიმთან და დაიცავით უსაფრთხოების დამატებითი ზომები. დეტალურად გაეცანით ჯანმრთელობასა და უსაფრთხოებასთან დაკავშირებულ მითითებებს Airbnb შთაბეჭდილებების მასპინძლებისა და მონაწილეებისთვის.

კორონავირუსთან დაკავშირებული უსაფრთხოების ზომები (სავალდებულო)

ატარეთ ნიღაბი და დაიცავით სოციალური დისტანცია ადგილობრივი კანონმდებლობისა თუ ოფიციალური მითითებების შესაბამისად

გათვალისწინებულ შემთხვევებში ყველა მასპინძელი თუ სტუმარი ვალდებულია:

• სხვებთან მჭიდრო ურთიერთობისას ატარონ ნიღაბი ან პირბადე
• მუდმივად შეინარჩუნონ 2‑მეტრიანი დისტანცია ერთმანეთთან

შეასრულეთ Airbnb‑ს მიერ მომზადებული განსაკუთრებული დასუფთავების 5‑ეტაპიანი პროცედურა სტუმრობებს შორის

ყველა სტუმარი და მასპინძელი ვალდებულია, დაეთანხმოს კორონავირუსთან დაკავშირებით ზემოთ აღწერილი უსაფრთხოების ზომების დაცვას, მასპინძლებმა კი სტუმრობებს შორის, ასევე, უნდა შეასრულონ Airbnb‑ს მიერ მომზადებული განსაკუთრებული დასუფთავების 5‑ეტაპიანი პროცედურა. მასპინძლებისა თუ სტუმრების მიერ მითითებების რეგულარულად დარღვევას მოჰყვება უფრო სერიოზული სანქციები (ანგარიშის მოქმედების შეჩერებისა და ჩვენი გაერთიანებიდან გარიცხვის ჩათვლით).

დამატებითი მითითებები კორონავირუსის პირობებში მოგზაურობასთან და მასპინძლობასთან დაკავშირებით

არ იმოგზაუროთ და არ უმასპინძლოთ, თუ კორონავირუსით ინფიცირების საფრთხის ქვეშ იყავით ან მისი სიმპტომები გაქვთ

ჩვენი გაერთიანების წევრების ჯანმრთელობისა და უსაფრთხოების დაცვის მიზნით, მასპინძლები (და სხვა გარეშე პირები) არ უნდა შევიდნენ სტუმრებისთვის შეთავაზებულ საცხოვრებლებში და არც მჭიდრო კონტაქტი ჰქონდეთ სტუმრებთან, ხოლო სტუმრები არ უნდა დაბინავდნენ, თუ:

• ამჟამად ინფიცირებული არიან კორონავირუსით ან ცოტა ხნის წინ ტესტზე დადებითი პასუხი მიიღეს
• ეჭვი აქვთ, რომ კორონავირუსით დაავადებული არიან (ან ინფიცირების საფრთხის ქვეშ იყვნენ) და ამჟამად ტესტის პასუხს ელოდებიან
• აქვთ კორონავირუსის სიმპტომები ან ფიქრობენ, რომ შეიძლებოდა დაინფიცირებულიყვნენ
• ბოლო დროს ჰქონდათ მუდმივი, მჭიდრო კონტაქტი პირთან, რომელიც დანამდვილებით ან სავარაუდოდ ინფიცირებულია კორონავირუსით

დეტალურად რომ შეიტყოთ, როგორ გამოიჩინოთ პასუხისმგებლობა მოგზაურობისას კორონავირუსის პანდემიის პირობებში, გაეცანით ჩვენს სტატიას კარანტინის გავლისა და იზოლაციის მიზნით სტუმრობების შესახებ.

რეგულარულად დაიბანეთ ხელები

დაიბანეთ ხელები შეძლებისდაგვარად ხშირად, განსაკუთრებით, თუ გარეშე პირებთან ურთიერთობთ ან საზიარო თუ საერთო დანიშნულების სივრცეებში ზედაპირებს/ნივთებს ეხებით.

• დაიბანეთ ხელები საპნითა და წყლით მინიმუმ 20 წამის განმავლობაში
• თუ ვერ ახერხებთ, გამოიყენეთ ხელის ანტისეპტიკური საშუალება სპირტის მინიმუმ 60%‑იანი შემცველობით (დაიტანეთ საშუალება ხელებზე და შეიზილეთ, სანამ არ გაშრება)

დაიცავით ადგილობრივი კანონმდებლობა და ოფიციალური მითითებები საერთო დანიშნულების ან საზიარო სივრცეებში პირბადის ტარებასთან და სოციალურ დისტანცირებასთან დაკავშირებით

საერთო დანიშნულების ან საზიარო სივრცეებში ყოფნისას (მასპინძლის ან სტუმრის სტატუსით), ადგილობრივი კანონმდებლობისა თუ ოფიციალური მითითებების შესაბამისად, ატარეთ ნიღაბი და დაიცვათ სოციალური დისტანცია გარეშე პირებთან. მასპინძლებმა სტუმრებს, შეძლებისდაგვარად, უკონტაქტოდ დაბინავების საშუალება უნდა მისცენ.

თუ ფიქრობთ, რომ ცალკე ოთახში ან საზიარო სივრცეში სტუმრობისას თავს არაკომფორტულად იგრძნობთ, გირჩევთ, დაჯავშნოთ საცხოვრებელი მთლიანად. თუკი მასპინძელი ხართ და ცალკე ოთახის/საერთო სივრცის სტუმრებისთვის შეთავაზება თქვენთვის მოუხერხებელია, გამოაქვეყნეთ მთლიანი საცხოვრებლის განცხადება ან დროებით შეწყვიტეთ სტუმრების მიღება.

ამას გარდა, მასპინძლებმა უნდა შეასრულონ ადგილობრივი მითითებები როგორც სტუმრებისთვის ცალკე ოთახების/საზიარო სივრცეების შეთავაზებასთან, ისე საცხოვრებელში ერთდროულად შეკრებილი ადამიანების რაოდენობასთან დაკავშირებით.

დამატებითი მითითებები მასპინძლებისთვის, რომლებიც სტუმრებს ცალკე ოთახებს ან საერთო სივრცეებს სთავაზობენ

თუ სტუმრებს ცალკე ოთახს ან საერთო სივრცეს სთავაზობთ, დამატებით გირჩევთ:

• ადგილობრივი კანონმდებლობისა თუ ოფიციალური მითითებების შესაბამისად, შეზღუდოთ სტუმრების რაოდენობა, რომ დაიცვათ სოციალური დისტანცია საერთო დანიშნულების ყველა სივრცეში
• დასუფთავების 5‑ეტაპიანი პროცედურის მიხედვით გაანიავოთ საერთო დანიშნულების სივრცეები სტუმრობის განმავლობაში, თუ ეს არ ეწინააღმდეგება უსაფრთხოების ნორმებს
• შეძლებისდაგვარად ხშირად დაასუფთაოთ და სანიტარიული წესით დაამუშაოთ საერთო დანიშნულების სივრცეები (როგორიცაა სააბაზანოები და სამზარეულოები)

სტუმრებისთვის ცალკე ოთახის შეთავაზებაზე ზოგიერთ ქვეყანაში, შესაძლოა, ვრცელდებოდეს გარკვეული შეზღუდვები ან დამატებითი ვალდებულებები/მოთხოვნები. გაეცანით უახლეს ოფიციალურ რეკომენდაციებს უსაფრთხოებისა და დასუფთავების საკითხებთან დაკავშირებით და დაიცავით შესაბამისი სტანდარტები.

როგორ მოვიქცე, თუ სტუმრობის დროს ან მის შემდეგ კორონავირუსი დამიდგინდა?

თუ ახლახან კორონავირუსი დაგიდასტურდათ ან მისი სიმპტომები შენიშნეთ, მიმართეთ მედიკოსს და შეატყობინეთ როგორც კომპეტენტურ ადგილობრივ უწყებებს, ისე ყველას, ვისაც აღნიშნული შეიძლებოდა შეხებოდა.