შემოთავაზებულ შედეგებზე წვდომისთვის გადადით წინ
    ეს კონტენტი თქვენ მიერ არჩეულ ენაზე მიუწვდომელია, ამიტომაც ამჟამად იმ ენაზე გთავაზობთ, რომელიც მასთან ყველაზე ახლოსაა.

    საცხოვრებლის პოპულარიზაცია სოციალურ ქსელებში

    შეიტყვეთ, როგორ მიიღოთ მეტი ჯავშანი სოციალური ქსელების დახმარებით.
    ავტორი: Airbnb (22 მაი, 2019)
    7-წუთიანი საკითხავი
    განახლების თარიღი: 14 მაი, 2021

    ყველაზე მნიშვნელოვანი

    • საცხოვრებლის სახელი უნდა იყოს დასამახსოვრებელი და კარგად მოფიქრებული

    • თქვენ მიერ შეთავაზებული საცხოვრებლით მეტი ადამიანი რომ დაინტერესდეს, გამოაქვეყნეთ ლამაზი, მაღალხარისხიანი ფოტოები

    • ითანამშრომლეთ ადგილობრივ ინფლუენსერებთან კონტენტის სანაცვლოდ საცხოვრებლების ფასდაკლებით შესათავაზებლად

    • შემოიკრიბეთ მიმდევრები — გააზიარეთ ინტერნეტში, რასაც თქვენი კუთხის სტუმრებს სთავაზობთ

    • დაიხმარეთ ჩვენი სრული გზამკვლევი მასპინძლობის დონის ასამაღლებლად

    სოციალურ ქსელებში ნავიგაცია ზოგჯერ ისეთ განცდას იწვევს, თითქოს ტყეში დაიკარგეთ. ფიქრობთ, საიდან დაიწყოთ და როგორ შექმნათ შესანიშნავი კონტენტი, რომ მეტი ჯავშანი მიიღოთ. სწორედ ეს გზა გაიარა ტომ ფელდმანმაც, როცა სტუმრებს სკაიკომიშში (ვაშინგტონი) Tye Haus შესთავაზა. ის საკუთარი გამოცდილებით მოგიყვებათ, როგორ შემოიკრიბოთ მიმდევრები და შესთავაზოთ საცხოვრებელი, რომლის მონახულებაზეც უარს ვერავინ იტყვის:

    მასპინძლობა 2012 წელს დავიწყეთ, როცა ჩვენი პირველი A‑ს ფორმის Tye Haus შევიძინეთ, გავარემონტეთ და სტუმრებს Airbnb‑ს მეშვეობით შევთავაზეთ. ამას გარდა, Instagram ანგარიშიც გავხსენით და საცხოვრებლის ფოტოებთან ერთად თვალწარმტაცი ადგილობრივი ხედების (სალაშქრო ბილიკების, ადგილობრივი ღირსშესანიშნაობებისა თუ სხვა საინტერესო ადგილების) სურათები გავაზიარეთ. მალევე პოპულარული ფოტოგრაფი ალექს შტროლი დაგვიკავშირდა და თანამშრომლობა შემოგვთავაზა. ჩვენთან ორი თვით სტუმრობა მისთვის შთაგონების ერთგვარ წყაროდ იქცა, სანაცვლოდ კი ჩვენს არხზე გასაზიარებლად სურათები გადაიღო. როცა ალექსის ფოტოების გამოქვეყნება დავიწყეთ, ჩვენი პოპულარობაც გაიზარდა. ამის შემდეგ კიდევ უამრავი ერთობლივი პროექტი და კონკურსი ჩავატარეთ.

    ოჯახთან ერთად ამჟამად სამ A‑სებრ ხის სახლს ვმართავ. ინფლუენსერები მთელი მსოფლიოდან გვსტუმრობენ დასასვენებლად და თავგადასავლების მოსაწყობად, მასპინძლობის სანაცვლოდ კი სოციალურ ქსელებში სასარგებლო კონტენტს აზიარებენ. ამ მარკეტინგულ მეთოდს ყველაზე ხშირად ვიყენებთ. დაკავებულობის მაჩვენებელი მისი დახმარებით 30%‑დან თითქმის 100%‑მდე გაგვეზარდა. სტუმრები სამუშაო დღეებშიც გვყავს და არასეზონურ პერიოდშიც, ჩვენი ონლაინ-მიმდევრების რაოდენობა კი უკვე 115 ათასს აღწევს. გთავაზობთ რამდენიმე რჩევას სოციალურ ქსელებში საცხოვრებლის პოპულარიზაციისთვის:

    1. მოიფიქრეთ საცხოვრებლის სახელი

    საცხოვრებლის პოპულარიზაციის პირველი ნაბიჯი შეიძლება მარტივად მოგეჩვენოთ, თუმცა მნიშვნელოვანია. საჭიროა, მოიფიქროთ შესატყვისი სახელი, რომელიც უნიკალური და დასამახსოვრებელი იქნება. ის თქვენი ბრენდი გახდება და მომხმარებლის სახელადაც გამოიყენებთ Instagram‑ზე.

    სახელის მოფიქრებაში რამდენიმე შეკითხვა დაგეხმარებათ:

    • რა ტიპის საცხოვრებელს სთავაზობთ? შალეს, პლაჟისპირა ვილას, ტიუდორების სტილის საცხოვრებელს თუ ლოფტს?
    • განსაზღვრული გაქვთ თემატიკა? იგრძნობა ინტერიერში კონკრეტული სტილი? მაგალითად, მეკობრეების თემატიკა. დიახ, ასეთი გაფორმებაც არსებობს!
    • საცხოვრებელს თქვენს რეგიონთან ან ქალაქთან რაიმე ხომ არ აკავშირებს? შესაძლებელია, რომ ეს კავშირი სახელში ჩანდეს?
    • საცხოვრებელს ისტორიული მნიშვნელობა აქვს? შესაძლოა, იდეალური სახელი სწორედ წარსულში იმალებოდეს.

    მოიძიეთ ინტერნეტში ინფორმაცია სხვა საცხოვრებლების შესახებ, ასევე, გაეცანით მათ სახელებს სოციალურ ქსელებში. მაგალითად, ჩვენ მიერ სტუმრებისთვის შეთავაზებული პირველი ხის სახლი უახლოესი მდინარე ტაის სახელს ატარებს. სახელის მეორე ნაწილი (Haus) გვიკარნახა ბავარიული სტილის ახლომდებარე ქალაქმა, ლევენვორტმა. ასე მოვიფიქრეთ Tye Haus.

    2. დაიწყეთ ლამაზი ფოტოებით

    სახელის მოფიქრებისა და სოციალურ ქსელებში ანგარიშების შექმნის შემდეგ დროა, ლამაზი სურათების განთავსებაზე გადახვიდეთ. არცერთ შემთხვევაში, ვიმეორებ, არცერთ შემთხვევაში არ დაიწყოთ დაბალხარისხიანი ფოტოებით. პირველად ყველა თქვენს არხზე განთავსებულ სურათებს გაეცნობა, პირველი შთაბეჭდილება კი ყველაზე მნიშვნელოვანია! სწორედ სურათებზეა დამოკიდებული, თუ რამდენ ადამიანს დააინტერესებთ. ფოტოები უნდა იყოს:

    • თანმიმდევრული: ფოტოები უნდა იყოს ერთ სტილში და გამოირჩეოდეს მაღალი ესთეტიკური ღირებულებით.
    • მაღალხარისხიანი: გამოაქვეყნეთ მკვეთრი, მკაფიო, მაღალი დონის სურათები და ვიდეოები (ნუ გამოიყენებთ გრანულირებულ ან ბუნდოვან ფოტოებს).
    • ზუსტი: კონტენტი სტუმრებისთვის შეთავაზებულ საცხოვრებელს კარგად უნდა ასახავდეს.

    ეცადეთ, აღბეჭდოთ ის, რაც თქვენ მიერ შეთავაზებულ საცხოვრებელს გამოარჩევს. ეს შეიძლება იყოს ინტერიერი, თავისებურებები ან მდებარეობა — ყველაფერი, რაც სტუმრებს დააინტერესებს. გახსოვდეთ, რომ მხოლოდ საცხოვრებელს კი არ უწევთ რეკლამას, არამედ თქვენს რეგიონს, ღირსშესანიშნაობებსა და ყველაფერს, რაც სტუმრებზე დაუვიწყარ შთაბეჭდილებას მოახდენს. თუ ფოტოების გადაღება კარგად არ გამოგდით, გირჩევთ, პროფესიონალი ფოტოგრაფი დაიქირაოთ.

    3. განავითარეთ შემოქმედებითი პარტნიორობები

    კონტენტის მომზადების კიდევ ერთი ხერხი ინფლუენსერებთან თანამშრომლობა და კონტენტის სანაცვლოდ მათთვის საცხოვრებლის ფასდაკლებით შეთავაზებაა. გირჩევთ, გაეცნოთ და დაუკავშირდეთ ადგილობრივ ფოტოგრაფებს, ბლოგერებს, ვიდეოგრაფებსა თუ კონტენტის შემქმნელებს.

    ეს სტრატეგია ჩვენს გვერდზე შემომავალი ტრაფიკის ერთ-ერთი მთავარი წყაროა. თქვენ მიერ შეთავაზებულ საცხოვრებელს ინფლუენსერების მიერ გაზიარებული პოსტების მეშვეობით ახალი მომხმარებლები აღმოაჩენენ.

    ინფლუენსერებთან დაკავშირებისას:

    • გამოიჩინეთ პროფესიონალიზმი. იყავით მომზადებული და შესაბამისი ცოდნით აღჭურვილი. სწორი შეკითხვების დასმა თანამშრომლობის განვითარებაში დაგეხმარებათ.
    • კომუნიკაცია უნდა იყოს მკაფიო. აი, მარტივი მაგალითი: „გამარჯობა! ძალიან მომწონს, რასაც აკეთებთ. Airbnb‑ზე განცხადება გამოვაქვეყნე და სტუმრების დაინტერესებას ვცდილობ. თანამშრომლობას ხომ არ ისურვებდით? თქვენი სახელით გამოქვეყნებული სურათების ან ტექსტის სანაცვლოდ საცხოვრებელს უფასოდ გთავაზობთ“.
    • ხაზგასმით აღნიშნეთ, რა მოლოდინი გაქვთ. შეადგინეთ ორმხრივი შეთანხმება, რომელიც ორივე მხარეს სწორ მოლოდინს შეუქმნის და ზუსტად გეცოდინებათ, რა სარგებელს მიიღებთ. შეთანხმება უნდა მოიცავდეს ისეთ დეტალებს, როგორიცაა ჩაბარების თარიღები, სურათებთან დაკავშირებული საავტორო უფლებები, მონიშვნა, სურათების/ვიდეოების რაოდენობა, ფაილის ტიპები და ა.შ.
    • შეთანხმება ყველასთვის მომგებიანი უნდა იყოს. თქვენი მიდგომა უნდა იყოს თანამშრომლური, პარტნიორობა კი — ორივე მხარისთვის სასარგებლო.

    კიდევ ერთი რჩევა: ყოველთვის გქონდეთ რაიმე შესათავაზებელი. თუ თავისუფალი თარიღები დაგრჩებათ, ისარგებლეთ ამ შესაძლებლობით და გამოიყენეთ მარკეტინგისთვის. მოიწვიეთ ადგილობრივი ინფლუენსერი, რომ ამ დროის განმავლობაში თქვენი არხისთვის დამატებითი კონტენტი მოამზადოთ.

    4. შემოიკრიბეთ მიმდევრები

    მას შემდეგ, რაც ონლაინ-აუდიტორიის წინაშე საკუთარ თავს წარადგენთ და არხიც შესანიშნავი სურათებით გექნებათ სავსე, დროა, ცნობადობის ამაღლებაზე იზრუნოთ. ეს სხვადასხვა ხერხით მიიღწევა:

    • გააზიარეთ ინტერნეტში, რასაც თქვენი კუთხის სტუმრებს სთავაზობთ. იპოვეთ შესაფერისი ონლაინ-წრეები და გაწევრიანდით. Tye Haus‑ის შემთხვევაში გვაინტერესებს ადგილობრივი კომპანიების გვერდები სოციალურ ქსელებში და ახლომდებარე ადგილების თეგები. მაგალითად, ვეცნობით ახლომდებარე სათხილამურო კურორტის გვერდს, დაინტერესებულებს შეკითხვებზე ვპასუხობთ და ზოგჯერ კომენტარშიც ვუწერთ: „როცა ქალაქში მოხვდებით, გვესტუმრეთ“.
    • ითანამშრომლეთ სხვადასხვა ბრენდთან კონკურსების მოსაწყობად და საჩუქრების გასაცემად. მეტი მიმდევრის შემოსაკრებად კონკურსებს და პრომოაქციებსაც ვაწყობთ. გამოიჩინეთ შემოქმედებითი მიდგომა, რომ თქვენი „ბრენდის“ შესაფერისი პარტნიორები იპოვოთ. ერთობლივი მარკეტინგის საწარმოებლად ჩვენ რამდენიმე კომპანიასთან ვთანამშრომლობთ. მათგან ერთი საბნების, მეორე თეთრეულის, მესამე კი დანა-ჩანგლისა და კოვზების მწარმოებელია. პირდაპირ დავუკავშირდით და ვუთხარით: „ინფლუენსერების დაინტერესებას ვაპირებთ, თქვენს პროდუქტზე რომ ისაუბრონ. ხომ არ ითანამშრომლებდით? საცხოვრებლის უფასოდ შეთავაზებაც შემიძლია“. დაბოლოს, არ დაგავიწყდეთ ელფოსტის მისამართების ბაზის შედგენა.

    5. იყავით გულწრფელი

    როგორც წესი, თვითპოპულარიზაცია ონლაინ თუ ფიზიკურ სივრცეში დიდ მოწონებას არ იმსახურებს, ამიტომ მნიშვნელოვანია ყოველთვის გულწრფელი იყოთ. აუცილებელი არ არის, კომენტარები ყველა ინფლუენსერის პოსტზე დატოვოთ. არც სპამ-შეტყობინებები დაგზავნოთ ყველა ანგარიშზე, რომელსაც წააწყდებით. საქმიან შემოთავაზებასა და შემაწუხებელ რეკლამას შორის ვიწრო ხაზი გადის, გულწრფელობით კი საჭირო ადამიანებს დააინტერესებთ.

    მაგალითად, ვცდილობ, რომ ჰეშთეგები ზედმეტად არ გამოვიყენო. ფოტოში რამდენიმე აქტუალურ არხს ვნიშნავთ, პოსტს კი სულ 5‑10 ჰეშთეგს ვამატებთ. პოპულარიზაციისთვის ზოგჯერ ფოტოზე ყველას და ყველაფერს ნიშნავენ, თუმცა მე უფრო ორგანულ მიდგომას ვამჯობინებ.

    გახსოვდეთ, რომ საკუთარი აუდიტორიის შექმნას დრო სჭირდება და ეს ერთ ღამეში ნამდვილად არ მიიღწევა. გაითვალისწინეთ ეს რჩევები, იაზროვნეთ შემოქმედებითად და სოციალურ ქსელებში ნამდვილად მეტ მიმდევარს შემოიკრებთ, რაც თქვენ მიერ შეთავაზებული საცხოვრებლის დაკავებულობის მაჩვენებელზეც აისახება.

    წარმატებულ მასპინძლობას გისურვებთ!
    ტომი

    ყველაზე მნიშვნელოვანი

    • საცხოვრებლის სახელი უნდა იყოს დასამახსოვრებელი და კარგად მოფიქრებული

    • თქვენ მიერ შეთავაზებული საცხოვრებლით მეტი ადამიანი რომ დაინტერესდეს, გამოაქვეყნეთ ლამაზი, მაღალხარისხიანი ფოტოები

    • ითანამშრომლეთ ადგილობრივ ინფლუენსერებთან კონტენტის სანაცვლოდ საცხოვრებლების ფასდაკლებით შესათავაზებლად

    • შემოიკრიბეთ მიმდევრები — გააზიარეთ ინტერნეტში, რასაც თქვენი კუთხის სტუმრებს სთავაზობთ

    • დაიხმარეთ ჩვენი სრული გზამკვლევი მასპინძლობის დონის ასამაღლებლად
    Airbnb
    22 მაი, 2019
    სასარგებლო იყო?

    გაეცანით სხვა თემებს