ინკლუზიური პრაქტიკა სტუმრების კომფორტისთვის

Airbnb‑ს მეშვეობით მასპინძლები თავიანთი სახლის კარს უღებენ ადამიანებს მთელი მსოფლიოდან, რაც სწორედ ინკლუზიურობის პრინციპებს ეფუძნება.

წარმატებულ მასპინძლებს კარგად ესმით, რა არის საჭირო იმისთვის, რომ ნებისმიერი წარმომავლობის სტუმარმა თავი შინაურულად იგრძნოს. ჩვენი გაერთიანებისთვის განსაკუთრებით მნიშვნელოვანია, შინაურობის განცდა შევუქმნათ და პატივისცემით — განსჯისა თუ მიკერძოების გარეშე — მოვეპყროთ თითოეულ სტუმარს, მისი რასის, რელიგიის, ეროვნული კუთვნილების, ეთნიკური წარმომავლობის, შეზღუდული შესაძლებლობის, სქესის, გენდერული იდენტობის, სექსუალური ორიენტაციისა თუ ასაკის მიუხედავად.

ინკლუზიურობას წარმატებული მასპინძლობისთვის გადამწყვეტი მნიშვნელობა აქვს. ამაში იგულისხმება:

• ნებისმიერი წარმომავლობის სტუმრის მასპინძლობა;

• ყველასთვის თანაბარი პირობების შექმნა და სტუმრების საჭიროებების შეძლებისდაგვარად დაკმაყოფილება;

• სტუმრებთან დაახლოება ყველა განსხვავებისა და მსგავსებების გათვალისწინებით;

• თავისუფალი შეხედულებებისთვის კარის გაღება და სტუმრების საჭიროებებით დაინტერესების სურვილი.

Airbnb‑მ თავი მოუყარა მასპინძლებისგან, სტუმრებისა და ექსპერტებისგან მიღებულ სასარგებლო რჩევებს, რომლებიც დაგეხმარებათ ინკლუზიური სტუმარ‑მასპინძლობის პრაქტიკაში დანერგვასა და სტუმრების მიმართ თბილი დამოკიდებულების გამოჩენაში ყველა ეტაპზე — განცხადების შექმნიდან სტუმრისთვის მიმოხილვის დატოვებამდე. თუ ყველაფერს გაითვალისწინებთ, ფარული მიკერძოების შემთხვევებსაც შეამცირებთ და სტუმრებთან კარგი ურთიერთობის დამყარებასაც შეძლებთ.

როცა მკაფიოდ მიუთითებთ, რომ ნებისმიერი წარმომავლობის სტუმრებს მიესალმებით, ისტორიულად მარგინალიზებული ჯგუფების წარმომადგენლები უფრო მშვიდად შეძლებენ თქვენ მიერ განთავსებული საცხოვრებლის დაჯავშნას. სტუმრებისგან შევიტყვეთ, რომ სწორედ აღნიშნული ჯგუფების წარმომადგენლები ეძებენ განცხადებებში ინკლუზიურობის ნიშნებს ყველაზე ხშირად.

გთავაზობთ ინკლუზიურობის შესახებ სტუმრების ინფორმირების რამდენიმე იდეას:

• მკაფიოდ მიუთითეთ, რომ ნებისმიერი წარმომავლობის სტუმრებს მიესალმებით. სასურველია, ეს საცხოვრებლის აღწერილობის დასაწყისშივე აღნიშნოთ (გაეცანით მაგალითებს ქვემოთ).

• ზუსტად აღწერეთ საცხოვრებელში არსებული ადაპტირებული პირობები და განაახლეთ ფოტოები.

• მიუთითეთ პროფილში, თუ როგორ მოგმართონ სტუმრებმა (მაგალითად, ინგლისურის შემთხვევაში, she/her, he/him, they/them და ა.შ.). ამით სტუმრებსაც მიანიშნებთ, რომ თავადაც ისე მიმართავთ, როგორც მათ ურჩევნიათ.

• ჩართეთ მომენტალური დაჯავშნის ფუნქცია. ამგვარად სტუმრებს წინასწარი დასტურის ლოდინის გარეშე შეეძლებათ თქვენ მიერ განთავსებული საცხოვრებლის დაჯავშნა. ამას გარდა, ეს იქნება ერთგვარი ნიშანი, რომ, დაჯავშნის კრიტერიუმების დაკმაყოფილების შემთხვევაში, მზად ხართ, უმასპინძლოთ სტუმრობის ნებისმიერ მსურველს.

• გაუგზავნეთ წინასწარი დასტური მათ, ვინც ჯავშნის გაფორმებამდე გიკავშირდებათ, მიმოწერისას კი გამოიჩინეთ კეთილგანწყობა. სტუმრობის ზოგიერთი მსურველი მასპინძლებს წინასწარ მხოლოდ იმისთვის მიმართავს, რომ გაარკვიოს, რამდენად თბილად დახვდება ის მომავალში.

• დაჯავშნის მოთხოვნის უარყოფამდე დაფიქრდით, რატომ ეუბნებით უარს სტუმრობის მსურველს — შეძლებდით მიზეზის მისთვის პირისპირ ახსნას?

მრავალი მასპინძელი განცხადებებში ინკლუზიურ ფორმულირებებს იყენებს. სურვილისამებრ, თქვენც შეგიძლიათ მათი ადაპტირება. გთავაზობთ მაგალითებს, რომლებიც მრჩეველ მასპინძელთა საბჭოს წევრებმა გაგვიზიარეს:

1. პიტერი სან‑ფრანცისკოდან წერს: „უმცირესობებისა თუ მარგინალიზებული ჯგუფების ყველა წარმომადგენელს უსაფრთხოდ შეუძლია იგრძნოს თავი ჩემ მიერ შემოთავაზებულ საცხოვრებელში. ყველა რასის, აღმსარებლობის, გენდერისა და სექსუალური ორიენტაციის სტუმრებს ვმასპინძლობ“.

2. „ჩემს განცხადებაში მეორე ფოტოზე ნაჩვენებია ძეგლი, რომელზეც წერია: „თქვენ ერთ‑ერთი ჩვენგანი ხართ““, — აღნიშნავს შინია იაპონიის ქალაქ ოსაკიდან. შინიას სხვა ფოტოზე იკითხება „მე პატივს ვცემ პიროვნულ მრავალფეროვნებასა და ვიღვწი წინასწარგანწყობებისგან თავისუფალი დამოკიდებულებისკენ“. ამის მითითება ფოტოსთვის დართულ წარწერაშიც შეგიძლიათ.

როგორც კი თქვენ მიერ განთავსებული საცხოვრებელი დაიჯავშნება, გაუგზავნეთ სტუმარს თბილი მისასალმებელი შეტყობინება. წინასწარ ნურაფერს დაასკვნით და იყავით გულისხმიერი.

• მისასალმებელ შეტყობინებას ინდივიდუალური ელფერი რომ შესძინოთ, გამოიყენეთ ინფორმაცია სტუმრის პროფილიდან. ამასთან, შეგიძლიათ სტუმარს დაუსვათ შეკითხვები მისი ინტერესების, მშობლიური ქალაქისა თუ ჰობის შესახებ.

• გამოიყენეთ გენდერისა და ორიენტაციის თვალსაზრისით ნეიტრალური ლექსიკა, როცა სტუმრებს მიმართავთ. კარგი იქნება, თუ სტუმრის გენდერთან ან პირად ცხოვრებასთან დაკავშირებით წინასწარ არაფერს დაასკვნით.

• თუ სტუმარი მისთვის საჭირო ადაპტირებული პირობების შესახებ დაგისვამთ შეკითხვას, აუცილებლად უპასუხეთ და დაინტერესდით, სხვა რამ ხომ არ სჭირდება.

იდეებისთვის დაიხმარეთ სხვა მასპინძლების მიერ სტუმრებისთვის გაგზავნილი შეტყობინებები. აი, ორი მაგალითი:

1. მაიკლი სტუმრებს ირლანდიის ქალაქ ფალკარაში მასპინძლობს. მისი პრიორიტეტი სტუმრებთან თავიდანვე თბილი და მეგობრული ურთიერთობის დამყარებაა. „სტუმრებს ყოველთვის მადლობას ვუხდი იმისთვის, რომ ჩემ მიერ განთავსებულ საცხოვრებელში სტუმრობა გადაწყვიტეს“, — აღნიშნავს ის და დასძენს: „შემდეგ ვეუბნები, რომ მათ კიდევ შევეხმიანები, როცა დაბინავების დრო მოახლოვდება, დღის სასიამოვნოდ გატარებას ვუსურვებ და შევახსენებ, რომ საჭიროების შემთხვევაში ჩემთან დაკავშირება არ მოერიდოთ“.

2. სიუზანი დენვერიდან წერს: „ჩვენი სახლი თქვენი სახლია. იგრძენით თავი კომფორტულად, როგორც საკუთარ სახლში. თუ რაიმეს გამოსწორებას ისურვებდით, შეგვატყობინეთ“.

ქვემოთ გთავაზობთ რამდენიმე მაგალითს, რომლებიც სტუმრებმა (განსაკუთრებით, ისტორიულად მარგინალიზებული ჯგუფების წარმომადგენლებმა) გაგვიზიარეს იმასთან დაკავშირებით, თუ რა აგრძნობინებთ მათ თავს შინაურულად.

• მიეცით სტუმრებს დამოუკიდებლად დაბინავების შესაძლებლობა, თუ ამის საშუალება გაქვთ. ამასთან, ისიც ჰკითხეთ, ხომ არ ურჩევნიათ, პირადად დახვდეთ.
• არ ეწვიოთ სტუმრებს საჭიროების გარეშე. ამის ნაცვლად, უზრუნველყავით მათთვის პირადი სივრცე და მკაფიოდ აღნიშნეთ, რომ საჭიროების შემთხვევაში კონტაქტზე იქნებით (პირადად ან ონლაინ).

Airbnb‑ს გაერთიანების წევრებს შორის ნდობის ჩამოყალიბება დიდწილად მიმოხილვებს ეფუძნება. სტუმრების მიმოხილვა მადლობის გადახდის შესაძლებლობაცაა და მათთვის სასარგებლო რჩევის მიცემის საშუალებაც.

• ყველა სტუმარს ერთი სტანდარტით მიუდექით, როცა მათი შეფასება გიწევთ.

• შეძლებისდაგვარად უმასპინძლეთ Airbnb‑ზე ახლახან დარეგისტრირებულ სტუმრებს, სტუმრობის შემდეგ კი დაუტოვეთ მიმოხილვა. ერთი მიმოხილვაც კი მნიშვნელოვნად დაეხმარება ახალბედა სტუმარს, რომ მომავალში ჯავშნები დაუდასტურდეს.

• სთხოვეთ სტუმრებს, დატოვონ მიმოხილვები. ისტორიულად მარგინალიზებული ჯგუფების წარმომადგენლების თქმით, მათთვის მიმოხილვები განსაკუთრებით მნიშვნელოვანია, რადგან სწორედ მათი მეშვეობით არკვევენ, თუ რამდენად თბილად დახვდა ესა თუ ის მასპინძელი მათი ჯგუფის სხვა წარმომადგენლებს.

აუცილებლად დაიცავით ინკლუზიური მასპინძლობის აღნიშნული პრინციპები, განსაკუთრებით, თუ ახალბედა მასპინძელი ხართ. გახსოვდეთ, რომ შინაურობის განცდის შესაქმნელად მთავარია, დაინტერესდეთ სტუმრების საჭიროებებით და კონტაქტზე იყოთ.

ზოგჯერ ისიც კი საკმარისია, რომ ჰკითხოთ, რა სჭირდებათ იმისთვის, რომ საცხოვრებელში თავი კომფორტულად და შინაურულად იგრძნონ. ვიმედოვნებთ, რომ ამგვარად მათ გადაწყვეტილების მიღებასაც გაუმარტივებთ და შესანიშნავადაც დაამახსოვრებთ თავს.