რთულ ვითარებაში აღმოჩენილი ადამიანებისთვის დროებითი საცხოვრებლის პოვნის ხელშეწყობა
როცა სტიქიური უბედურებები ან მასშტაბური კონფლიქტები ადამიანებს სხვაგან გადახვეწას აიძულებს, მათთვის საცხოვრებლის პოვნა ერთ‑ერთი ყველაზე მნიშვნელოვანი საკითხია. დროებით საცხოვრებლებში ისინი მშვიდად შეძლებენ თავიანთ ცხოვრებისეულ პრიორიტეტებზე კონცენტრირებას და გრძელვადიანი გეგმების დასახვას. ასეთი ადამიანების დახმარება თქვენც შეგიძლიათ — მაგალითად, საგანგებო ვითარებაში მათთვის დროებითი საცხოვრებლის შეთავაზებით ან თანხის გაღებით Airbnb.org‑ის სასარგებლოდ.
რა არის Airbnb.org?
Airbnb.org არის აშშ‑ში რეგისტრირებული 501(c)(3) კატეგორიის არაკომერციული ორგანიზაცია, რომელიც Airbnb‑სგან დამოუკიდებლად ფუნქციონირებს. მას საფუძველი ჩაეყარა 2012 წელს, როცა შელიმ, ერთ‑ერთმა მასპინძელმა ბრუკლინიდან (ნიუ‑იორკი, აშშ), გადაწყვიტა, უფასოდ შეეთავაზებინა საცხოვრებელი ქარიშხალ „სენდის“ შედეგად ევაკუირებული პირებისთვის. Airbnb‑მ, თავის მხრივ, მხარდაჭერისთვის სხვა ადგილობრივებსაც მიმართა — ქარიშხლით დაზარალებულთა დროებით დაბინავების ინიციატივას 1000‑ზე მეტი მასპინძელი გამოეხმაურა.
შელის მაგალითზე შევქმენით პროგრამა, რომელიც საშუალებას მისცემდა მსოფლიოს სხვადასხვა კუთხეში მცხოვრებ მასპინძლებს, დროებითი საცხოვრებლით დახმარებოდნენ ადამიანებს კრიზისული ვითარებების დროს. 2020 წელს პროგრამა გარდაიქმნა Airbnb.org‑ად, არაკომერციულ ორგანიზაციად, რომელსაც თავისი მისია აქვს და დირექტორთა დამოუკიდებელი საბჭო მართავს.
დღესდღეობით Airbnb.org საერთაშორისო მასშტაბით თანამშრომლობს სხვადასხვა სამთავრობო, არასამთავრობო და ჰუმანიტარულ ორგანიზაციასთან, ადამიანებს დროებითი საცხოვრებელი რომ აპოვნინოს. ის ფინანსდება დონორების მიერ და იყენებს Airbnb‑ს ტექნოლოგიურ პლატფორმას, მასპინძლების საერთაშორისო გაერთიანების დახმარებით კი შესაძლებელი ხდება სტიქიურ უბედურებებზე, სამხედრო კონფლიქტებსა და სხვა საგანგებო სიტუაციებზე სათანადო რეაგირება.
Airbnb.org‑მა დროებითი საცხოვრებელი უკვე 1,6 მილიონზე მეტი ღამით უზრუნველყო 250 000‑ზე მეტი ადამიანისთვის, რომელთა შორისაც იყვნენ ლტოლვილები და სტიქიური უბედურებების შედეგად იძულებით გადაადგილებული პირები. მხარდაჭერა სულ უფრო და უფრო მეტ ადამიანს სჭირდება.
როგორ გავიღო თანხა Airbnb.org‑ის სასარგებლოდ?
თანხის ერთჯერადად გაღება შესაძლებელია იმის მიუხედავად, გაქვთ თუ არა სტუმრების მასპინძლობის საშუალება. თუ Airbnb‑ს მეშვეობით რეგულარულად მასპინძლობთ, შეგიძლიათ თითოეული ანაზღაურებიდან გარკვეული პროცენტი გაიღოთ. ორივე შემთხვევაში, თქვენ მიერ გაღებული თანხა მთლიანად მოხმარდება დროებითი საცხოვრებლის უზრუნველყოფას საგანგებო ვითარებებში (და არა Airbnb.org‑ის საოპერაციო ხარჯების დაფარვას).
როგორ ვუმასპინძლო სტუმრებს Airbnb.org‑ის ფარგლებში?
თუ Airbnb‑ს მეშვეობით სტუმრებს უკვე მასპინძლობთ, Airbnb.org‑ისთვის შეგიძლიათ გამოიყენოთ თქვენი ამჟამინდელი განცხადება, ან შექმნათ ახალი, სხვა საცხოვრებლის შესახებ. Airbnb.org‑ის ფარგლებში საცხოვრებლის შეთავაზებას შეძლებთ როგორც უფასოდ, ისე ფასდაკლებით.
ამას გარდა, შეგიძლიათ მხოლოდ და მხოლოდ Airbnb.org‑ის ფარგლებში მასპინძლობისთვის დარეგისტრირდეთ, რა შემთხვევაშიც მხოლოდ საგანგებო ვითარების დროს დაეხმარებით ადამიანებს დროებითი საცხოვრებლით და მხოლოდ უფასოდ.
Airbnb.org‑ის მეშვეობით გაფორმებულ ჯავშნებში სტუმრები თანხას არ იხდიან. ისინი სხვების მიერ გაღებული თანხებით ფინანსდება. ამრიგად, სტუმრებისთვის საცხოვრებლის უფასოდ ან ფასდაკლებით შეთავაზებით ხელს შეუწყობთ იმას, რომ დროებითი საცხოვრებელი მეტი ადამიანისთვის და უფრო დიდი ხნით მოიძებნოს გაღებული თანხებით.
Airbnb ფარავს Airbnb.org‑ის ყველა საოპერაციო ხარჯს, ამიტომ გაღებული თანხები მთლიანად ხმარდება დროებითი საცხოვრებლის უზრუნველყოფას. Airbnb არ იტოვებს თანხას ამ ტიპის სტუმრობებიდან, ჯავშნებს კი იცავს AirCover მასპინძლებისთვის.
ვისთვის ფორმდება ჯავშნები Airbnb.org‑ის მეშვეობით?
Airbnb.org‑ის ფარგლებში სტუმრები, ხშირ შემთხვევაში, არიან იმ ორგანიზაციათა მიერ გადმომისამართებული ან მხარდაჭერილი პირები, რომელთა სპეციალიზაციაც კრიზისულ სიტუაციებზე რეაგირება და ლტოლვილთა განსახლებაა. Airbnb.org‑ის მეშვეობით დროებითი საცხოვრებლის მოთხოვნა უშუალოდ სტუმრებს არ შეუძლიათ.
სტუმრობის კრიტერიუმებს შეესაბამებიან:
- მასშტაბურ უბედურებათა შედეგად დაზარალებული პირები და ისინი, ვინც ოფიციალურ რანგში მონაწილეობენ მომხდარის შედეგების ლიკვიდაციაში.
- ლტოლვილები, თავშესაფრის მაძიებლები, სპეციალური საიმიგრაციო ვიზის მფლობელები ან ანალოგიური ჰუმანიტარული მიზნით სხვა საიმიგრაციო სტატუსის მქონე პირები.
სტუმრებმა, რომლებიც კრიტერიუმებს აკმაყოფილებენ, შესაძლოა, მიიღონ სპეციალური ბონუსი Airbnb.org‑ის ფარგლებში დროებითი საცხოვრებლის დასაჯავშნად. ამას გარდა, სტუმრების სახელით ჯავშნის გაფორმება და მასპინძელთან კომუნიკაცია ჩვენს პარტნიორ არაკომერციულ ორგანიზაციებსაც შეუძლია.
თქვენ მიერ შეთავაზებულ საცხოვრებელში სტუმრებს საჭირო კომფორტის პოვნა შეუძლიათ კრიზისული ვითარების დროს. დიმამ, Airbnb.org‑ით მოსარგებლე სტუმარმა ბერლინში, უკრაინა 2022 წელს დატოვა. „პირველ დღეებში ძალიან ვღელავდი“, — იხსენებს დიმა და დასძენს: „არც კი ვიცი, რა უფრო მნიშვნელოვანი იყო ჩემთვის: უსაფრთხო ადგილას ცხოვრება თუ ის დიდი მხარდაჭერა, რომელსაც ვგრძნობდი“.
ეცოდინებათ თუ არა სტუმრებს, რომ Airbnb.org‑ის მხარდამჭერი ვარ?
დიახ. თუ დროებითი საცხოვრებლის უფასოდ ან ფასდაკლებით შესათავაზებლად რეგისტრაციას ან ანაზღაურებიდან თანხის რეგულარულად გაღებას აირჩევთ, თქვენს პროფილს, რომელსაც მასპინძლობისთვის იყენებთ, Airbnb.org‑ის მხარდამჭერის სპეციალური ნიშანი დაემატება.
მსოფლიო მასშტაბით მილიონობით ადამიანს უწევს საკუთარი საცხოვრებლის დატოვება სამხედრო კონფლიქტებისა თუ სტიქიური უბედურებების გამო. თქვენ ძალგიძთ, უკეთესობისკენ შეცვალოთ ლტოლვილების, ევაკუირებული პირებისა და სამაშველო სამსახურების მუშაკების ცხოვრება საცხოვრებლის შეთავაზების ან თანხის გაღების გზით.