დასუფთავებასთან დაკავშირებული რჩევები გამოცდილი მასპინძლებისგან

სუფთა საცხოვრებელი ბრწყინვალე მიმოხილვების მიღებაში დაგეხმარებათ. Airbnb‑ს მონაცემების მიხედვით, უარყოფითი მიმოხილვების ერთ‑ერთი უმთავრესი მიზეზი სწორედ სისუფთავის ნაკლებობაა. ამ სტატიაში გთავაზობთ გამოცდილი მასპინძლების რჩევებს საცხოვრებელში უზადო სისუფთავის შენარჩუნებასთან დაკავშირებით.

მნიშვნელობა არ აქვს, დასუფთავებაზე თავად ზრუნავთ თუ ვინმე გეხმარებათ, მთავარია, სტუმრებისთვის შეთავაზებული საცხოვრებელი ყოველთვის საგულდაგულოდ დაალაგოთ, სანამ ვინმეს უმასპინძლებთ.

„თანამიმდევრულობა და საკონტროლო სიები ძალზე მნიშვნელოვანია დამლაგებლებისთვის“, — აღნიშნავს ჯულიეტი, მრჩეველ მასპინძელთა საბჭოს წევრი ნაირობიდან (კენია), და დასძენს: „დასუფთავება უნდა იქცეს ერთგვარ რუტინად, რომელიც ყოველ ჯერზე ამართლებს“.

თუ საცხოვრებლის დასუფთავებაში სპეციალისტი გეხმარებათ, პირველ რიგში, დამოუკიდებლად მიალაგეთ იქაურობა, რომ ზუსტად იცოდეთ, რა უნდა შესრულდეს და რა დაურთოთ საკონტროლო სიებს. არ დაგავიწყდეთ, საკმარისი დრო გამოყოთ ჯავშნებს შორის საგულდაგულო დასუფთავებისთვის. იპოვეთ კიდევ ერთი დამლაგებელი, ან შეიმუშავეთ სათადარიგო გეგმა, იმ შემთხვევისთვის, თუ ძირითად დამლაგებელს ამა თუ იმ დღეს არ ეცლება.

საცხოვრებლის სტუმრებისთვის დასუფთავება დეტალებისადმი გაცილებით მეტ ყურადღებას მოითხოვს, ვიდრე მაშინ, როცა მას თქვენთვის ასუფთავებთ. გირჩევთ, პერიოდულად საგულდაგულო დასუფთავება დაგეგმოთ, რომ სტუმრობებს შორის რუტინულ ამოცანებს ნაკლები ძალისხმევა დასჭირდეს და გაწეული სამუშაო უფრო შედეგიანი იყოს.

ჯულიეტი აღნიშნავს, რომ დასუფთავებისას აუცილებელია, განსაკუთრებული ყურადღება მივაქციოთ კონკრეტულ ზონებს.

• დაიწყეთ იმ სივრცეებით, სადაც ადამიანები ინტენსიურად გადაადგილდებიან. „სამზარეულოსა და სააბაზანოებს საგანგებო ყურადღება უნდა მიექცეს, რადგან მათ ყველაზე ხშირად იყენებენ“, — ამბობს ჯულიეტი. სააბაზანოებში იდეალური სისუფთავის მიღწევის შემდეგ სამზარეულოს ჯერია, სადაც დამლაგებლები შეგროვებულ ჭურჭელს რეცხავენ ხოლმე. „ყველაფერს საფუძვლიანად ვასუფთავებთ“, — აღნიშნავს ჯულიეტი.
• შემდეგ გადადით საძინებლებზე. დამლაგებლები, რომლებიც ჯულიეტს ეხმარებიან, ამოწმებენ უჯრებს, იხედებიან საწოლების ქვეშ და ზრუნავენ, რომ არაფერი გამორჩეთ. „ამის შემდეგ საწოლებს თეთრეულს ვხსნით და ვალბობთ, მთლიანად ვაღებთ ფანჯრებს და ვანიავებთ სახლს“, — გვიყვება ჯულიეტი.
• დაბოლოს, გაასწორეთ საწოლები. „მატრასებს აქვს დამცავი შალითა, ბალიშებსაც, ამიტომ მთელ კომპლექტს ვცვლით“, — გვიზიარებს ჯულიეტი.

წარმოიდგინეთ თავი სტუმრის ადგილას. მაგალითად, ტამი, მასპინძელი სიეტლიდან (აშშ), აღნიშნავს, რომ საშხაპის ფარდის სისუფთავის შესახებ ყველას ხშირად ავიწყდება. „პოლიეთილენის ფარდა მაქვს, რომელსაც სპეციალურ საშუალებას ვასხურებ და ისე ვწმენდ, რამდენიმე თვეში ერთხელ კი ახლით ვცვლი“.

ანალოგიურად, არ გამოგრჩეთ ზედაპირები, რომლებსაც ხშირად ეხებიან — მაგალითად, ჩამრთველები. „მსგავს ზედაპირებზე ძალიან სწრაფად გროვდება ჭუჭყი, მაგრამ ეჩვევი და ვერ ამჩნევ“, — ამბობს ადამი, მასპინძელი ატლანტიდან (აშშ), და დასძენს: „სპირტით გაწმენდა შველის ხოლმე“.

საცხოვრებელში სხვისი თმის პოვნა არავის სიამოვნებს. სიუსა და ჯონს, მასპინძლებს სოლტ‑ლეიკ‑სიტიდან (აშშ), ამ კუთხით ერთი რჩევა აქვთ. „თეთრეულის გარეცხვის შემდეგ წებოვანი გორგოლაჭით ვწმენდთ ზეწრებს, ბალიშის პირებსა და საბნებს“, — აღნიშნავენ ისინი.

ლორა, მასპინძელი კოტონვუდიდან (არიზონა, აშშ), გვირჩევს, დავივიწყოთ შვაბრა. „ხელით მორეცხეთ იატაკი სააბაზანოში, მუხლებზე დამდგარმა“, — ამბობს ის და დასძენს: „გამოიყენეთ უხეში ჯაგრისი ან მიკროფიბრის ტილო. ეს უფრო სწრაფიც არის და მარტივიც, თანაც თმის არცერთი ღერი არ გამოგრჩებათ“. აქვე, ნურც სააბაზანოს წყალსადინრების გაწმენდა დაგავიწყდებათ, სანამ ახალ სტუმარს უმასპინძლებთ.

აი, რას გვირჩევენ გამოცდილი მასპინძლები დასუფთავების კუთხით:

• პირველ რიგში, ჩაყარეთ სარეცხი სარეცხ მანქანაში. „ჯერ თეთრეულსა თუ პირსახოცებს ვაგროვებ და სარეცხ მანქანაში ვყრი, რომ გაირეცხოს, სანამ ვალაგებ“, — ამბობს ემა‑კეიტი, მასპინძელი სან‑ფრანცისკოდან (აშშ), და დასძენს: „შედეგიანია“.
• გააპრიალეთ ხის იატაკი. „მერქნის იატაკი მაქვს, ამიტომ რეგულარულად ვაპრიალებ, ოდნავ რომ ბზინავდეს“, — ამბობს ტამი, მასპინძელი სიეტლიდან (აშშ), და დასძენს: „სისუფთავის შთაბეჭდილებას ტოვებს და სტუმრები მშვიდად არიან“.
• მოკეცეთ ტუალეტის ქაღალდი. „ტუალეტის ქაღალდის ქვედა ნაწილს ვკეცავ“, — გვიზიარებს ემა‑კეიტი და დასძენს: „თითქოს წვრილმანია, მაგრამ ახალივით გამოიყურება და სტუმრებს აგრძნობინებს, რომ მათზე ზრუნავთ“.
• შეავსეთ თხევადი საპნისა და შამპუნის ბოთლები. „სასიამოვნოა, როცა სააბაზანოში ნივთები თითქმის ახალივითაა“, — ამბობს ალექსი სან‑ფრანცისკოდან და დასძენს: „სავსე და კარგად დახურული ბოთლები ისეთ შეგრძნებას ტოვებს, თითქოს, მათ პირველად შენ ხსნი“.