შემოთავაზებულ შედეგებზე წვდომისთვის გადადით წინ

    სახლის სასარგებლო წესების შედგენა

    შეიტყვეთ, როგორ დაიცვათ საცხოვრებელი და სტუმრებსაც უკეთესი გარემო შეუქმნათ.
    ავტორი: Airbnb (1 დეკ, 2020)
    2-წუთიანი საკითხავი
    განახლების თარიღი: 13 მაი, 2021

    ყველაზე მნიშვნელოვანი

    • სახლის წესების მეშვეობით შეგიძლიათ სტუმრებს უსაფრთხოებასთან დაკავშირებული რეკომენდაციები შეახსენოთ და სათანადო მოლოდინი შეუქმნათ

    • განაახლეთ სახლის წესები
    • დაიხმარეთ ჩვენი სრული გზამკვლევი ეფექტური განცხადების შესაქმნელად

    სახლის წესები პირობების უბრალო ჩამონათვალი არ არის, ისინი სტუმრებს საცხოვრებლისა და მასპინძლობის თქვენეული სტილის შესახებ წარმოდგენას უქმნის. სახლის წესების წაკითხვის შემდეგ სტუმრები წინასწარვე გადაწყვეტენ, შესაფერისია თუ არა მათთვის საცხოვრებელი, ხოლო ვინაიდან მათი დაცვა მნიშვნელოვანია, სტუმრები დაჯავშნამდე ეცნობიან მათ.

    თუ სახლის წესების შედგენაში დახმარება გჭირდებათ, გაითვალისწინეთ სხვა მასპინძლების შემდეგი რჩევები:

    წერეთ მარტივად

    გამოიყენეთ მარტივად გასაგები ენა. „სახლის წესები სამართლებრივ დოკუმენტს არ უნდა ჰგავდეს, ასე მათ არავინ წაიკითხავს, პოტენციური სტუმარი კი მომდევნო განცხადებაზე გადავა“, — ამბობს რენატა, მასპინძელი რიო‑დე‑ჟანეიროდან.

    მარტივი ენით რომ წეროთ, დაფიქრდით, როგორ უნდა მოიქცეს სტუმარი საცხოვრებელში და როგორ აუხსნიდით ამას პირისპირ საუბრის შემთხვევაში.

    ზედმეტად ბევრმა წესმა, შესაძლოა, სტუმრები დათრგუნოს, ამიტომ ყურადღება გაამახვილეთ ყველაზე მნიშვნელოვანზე, ხოლო დანარჩენი სხვა საშუალებით ამცნეთ.

    „წესებში არ ვეხები ისეთ მეორეხარისხოვან საკითხებს, როგორიცაა, მაგალითად, სად დატოვონ სტუმრებმა პირსახოცები და რა უყონ თეთრეულს“, — ამბობს ანეტი, მასპინძელი პრესკოტიდან (არიზონა) და დასძენს: „ასეთ დეტალებს მაშინ ვუყვები, როცა ბინას ვათვალიერებინებ, ზოგჯერ კი წერილს ვუტოვებ“. შედარებით ნაკლებად მნიშვნელოვანი, მაგრამ სასარგებლო ინფორმაციის გასაზიარებლად შეგიძლიათ შექმნათ სტუმრის ცნობარი.

    სახლის წესები სამართლებრივ დოკუმენტს არ უნდა ჰგავდეს, ასე მათ არავინ წაიკითხავს.
    J Renata,
    რიო‑დე‑ჟანეირო

    უსაფრთხოებასთან დაკავშირებული შეხსენებები

    ავტომატურად ნუ ჩათვლით, რომ სტუმრები უსაფრთხოების რისკების მიმართ ისეთივე ყურადღებით იქნებიან, როგორც თქვენ. აქედან გამომდინარე, კარგი იქნება, თუ ამ საკითხთან დაკავშირებულ ინფორმაციას სახლის წესებში მიუთითებთ. აი, როგორ მოიქცა ზოგიერთი მასპინძელი:

    • „გასვლისას დახურეთ ყველა ფანჯარა და კარი“, — დეივი და დები, ედმონტონი, კანადა
    • „ნუ დაანთებთ სანთლებს. საერთოდ. ჩვეულებრივი სანთლების ნაცვლად გთავაზობთ ელექტრონულს, რომლებიც ბატარეებზე მუშაობს“, — ჰეზერი, ითაკა, ნიუ‑იორკი

    ამას გარდა, მნიშვნელოვანია, ხაზი გაუსვათ ჯანმრთელობისა და უსაფრთხოების დაცვასთან დაკავშირებულ მოთხოვნებს COVID‑19‑ის პირობებში. სახლის წესებში შეგიძლიათ შეახსენოთ სტუმრებს პირბადის ტარებასთან და სოციალურ დისტანცირებასთან დაკავშირებული სავალდებულო მოთხოვნების შესახებ, ასევე, მიუთითოთ დამატებითი რეკომენდაციები საერთო სივრცეებისთვის.

    მიაწოდეთ სტუმრებს მნიშვნელოვანი ინფორმაცია

    თუ სტუმრები შორიდან ჩამოდიან, მათ, შესაძლოა, არ იცოდნენ თქვენი რეგიონისა თუ კულტურის ზოგიერთი თავისებურების შესახებ. სახლის წესები საშუალებას გაძლევთ, მნიშვნელოვანი ცნობები მიაწოდოთ სტუმრებს. აი, რა მიუთითეს სხვა მასპინძლებმა:

    • „სტუმრებს ვთხოვთ, სიჩუმე დაიცვან, განსაკუთრებით ღამით და სიესტის დროს“, — ბეატრის‑ელენა, მედელინი, კოლუმბია
    • „სახლში ფეხსაცმლით ნუ შემოხვალთ. ტაილანდში ასეა მიღებული“, — ნუტი, ჩიანგმაი, ტაილანდი
    • „ფაილების უკანონო ჩამოტვირთვა აკრძალულია. ბრალის დამტკიცების შემთხვევაში, თითოეული ჩამოტვირთული ფილმისთვის დაახლოებით 1700€-თი დაჯარიმდებით“, — ბრანკა და სილვია, ზაგრები, ხორვატია

    წარმოაჩინეთ თქვენი ინდივიდუალურობა

    სახლის წესებიდან შესაძლებელია მასპინძლობის თქვენეული სტილის შესახებ გარკვეული დასკვნების გამოტანა, რის საფუძველზეც სტუმრები შემდეგ წყვეტენ, შესაფერისია თუ არა მათთვის საცხოვრებელი. აქედან გამომდინარე, შეეცადეთ, მაქსიმალურად გულწრფელი იყოთ.

    თუ მასპინძლობისადმი მშვიდი და მხიარული მიდგომა გაქვთ, დაიხმარეთ იუმორი. ფორმალური ტონი და წესრიგი გირჩევნიათ? მაშინ მკაფიოდ გაუსვით ამას ხაზი.

    ემიმ, მასპინძელმა ნეშვილიდან, სახლის იუმორნარევი წესები შეადგინა:

    „ძვირფასო სტუმრებო, მოიქეცით ზრდასრული ადამიანებივით:
    • არ გადაწვათ სახლი
    • არ სცემოთ ძაღლს
    • მაგიდასთან არ ჭამოთ ისეთი არაფერი, რაც შეიძლება ზედ დაეწვეთოს
    • სახლში რამდენიმე სანაგვე ურნაა, ამიტომ მაინცდამაინც უნიტაზს ნუ გამოიყენებთ“.

    სახლის წესები დაგიცავთ

    სტუმრებთან უთანხმოებები იშვიათია, თუმცა ასეთ შემთხვევებში უკმაყოფილების დასაბუთებას სახლის წესების მოხმობით შეძლებთ. თუ სტუმარი სახლის რომელიმე წესს დაარღვევს, ჯერ შეეცადეთ, საკითხი უშუალოდ მასთან მოაგვაროთ. თუ ვერ შეთანხმდებით, მიმართეთ Airbnb‑ს მომხმარებელთა მხარდაჭერის გუნდს.

    შენიშვნა: სახლის ყველა წესი თანხვედრაში უნდა იყოს Airbnb‑ს წესებთან და პირობებთან (მათ შორის, მომსახურების პირობებთან და ანტიდისკრიმინაციულ პოლიტიკასთან). ვრცლად.

    სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

    ყველაზე მნიშვნელოვანი

    • სახლის წესების მეშვეობით შეგიძლიათ სტუმრებს უსაფრთხოებასთან დაკავშირებული რეკომენდაციები შეახსენოთ და სათანადო მოლოდინი შეუქმნათ

    • განაახლეთ სახლის წესები
    • დაიხმარეთ ჩვენი სრული გზამკვლევი ეფექტური განცხადების შესაქმნელად
    Airbnb
    1 დეკ, 2020
    სასარგებლო იყო?

    სხვა საინტერესო

    სხვა საინტერესო

    გაეცანით სხვა თემებს