რას გულისხმობს Airbnb ოთახები?

თავისუფალი საცხოვრებელი სივრცე შემოსავლის მიღებისა და ახალი ადამიანების გაცნობის შესანიშნავი საშუალებაა. თუ, მაგალითად, თავისუფალი საძინებელი გაქვთ, შეგიძლიათ შექმნათ განცხადება, რომ სტუმრებს უმასპინძლოთ ხოლმე.

„სტუმრებისთვის ოთახის შეთავაზებას ბევრი დადებითი მხარე აქვს და არა მხოლოდ ფინანსური კუთხით“, — ამბობს ერიკი, სუპერმასპინძელი ლოს‑ანჯელესიდან (აშშ), და დასძენს: „კალიფორნიაში ჩამომსვლელებს თავიანთი თავგადასავლები აქვთ დაგეგმილი, თუმცა მათი მასპინძლობა ჩვენთვისაც ერთგვარი თავგადასავალია, რადგან წინასწარ არასოდეს ვიცით, ვინ იქნება კარს მიღმა. მსოფლიოს სხვადასხვა კუთხის შესახებ ბევრ საინტერესოს ვიგებთ“.

ოთახები დიდი პოპულარობით სარგებლობს მთელი მსოფლიოს მასშტაბით — გაფორმებული ჯავშნების რაოდენობის მიხედვით ისინი მესამე ადგილზეა Airbnb‑ზე განთავსებული საცხოვრებლების ტიპებს შორის.* სტუმრობის მსურველებს ოთახების პოვნა და დაჯავშნა შეუძლიათ როგორც შესაბამისი Airbnb კატეგორიის არჩევით, ისე საძიებო ფილტრიდან „ოთახების“ მონიშვნით.

თუ სტუმრებისთვის ოთახის შეთავაზებას აპირებთ, ამ სტატიაში მოცემული ინფორმაცია პირველი ნაბიჯების გადადგმაში დაგეხმარებათ.

ოთახი ნიშნავს, რომ სტუმარს მასპინძლის საცხოვრებელში ექნება საკუთარი საძინებელი და საერთო დანიშნულების (ზოგჯერ საზიარო) სივრცეებით სარგებლობის შესაძლებლობა.

საცხოვრებელი „ოთახების“ კატეგორიაში რომ მოხვდეს, ის უნდა აკმაყოფილებდეს ყველა შემდეგ კრიტერიუმს:

• სტუმარს უნდა ჰქონდეს ცალკე საძინებელი, რომელიც იკეტება კარით.

• სტუმარს უნდა ჰქონდეს საკუთარი ან საზიარო სააბაზანო.

• სტუმარს სარგებლობა უნდა შეეძლოს მინიმუმ ერთი საერთო დანიშნულების სივრცით — მაგალითად, სამზარეულოთი, მისაღები ოთახით ან უკანა ეზოთი.

• განცხადებაში მითითებული უნდა იყოს მასპინძლის ნამდვილი სახელი და არა კომპანიის ან სხვა რაიმე სახელი.

• საცხოვრებლის ან ოთახის ტიპად განცხადებაში მითითებული უნდა იყოს „ოთახი“.

• ცალკე ოთახი არ უნდა იყოს საზიარო ოთახი, სასტუმროს ნომერი, კურორტი, კარავი, ავტოფურგონი, ცალკემდგომი ნაგებობა (მაგალითად, ბუნგალო უკანა ეზოში) ან სხვა ტიპის ობიექტი ამ სიიდან.

თუ საცხოვრებელი არ აკმაყოფილებს ზემოაღნიშნულ კრიტერიუმებს, განცხადების მომზადებისას აირჩიეთ საცხოვრებლის სხვა ტიპი.

თავისუფალ ოთახებს არა მხოლოდ მტვრის დაგროვება თუ ზედმეტი ნივთების შენახვა შეუძლია. სტუმრობის მსურველთათვის მათი შეთავაზებით შეგიძლიათ, მაგალითად:

• შემოსავლის მიღება. მასპინძლებმა, რომლებიც სტუმრებს ოთახებს სთავაზობდნენ, 2022 წელს მსოფლიო მასშტაბით 2,9 მლრდ აშშ დოლარზე მეტი შემოსავალი მიიღეს, ხოლო მათი მედიანური შემოსავლის ოდენობა 20%‑ით მეტი იყო 2021 წელთან შედარებით.**

• ადამიანებთან ურთიერთობა. საცხოვრებლის გაზიარება, ინტერესებისა თუ კულტურის განხილვა და ადგილობრივი რჩევების მიცემა, შესაძლოა, მრავალ საინტერესო საუბარს დაედოს საფუძვლად.

• არსებული სივრცის ათვისება. თავისუფალი ოთახის სახით სტუმრებს გარკვეული თანხის სანაცვლოდ შეგიძლიათ კომფორტული საძილე სივრცე შესთავაზოთ, თანაც ისე, რომ საწყის ეტაპზე იმაზე ნაკლები ხარჯის გაღება მოგიწევთ, ვიდრე სტუმრობის მსურველთათვის საცხოვრებელი მთლიანად რომ შეგეთავაზებინათ.

„დიდი სახლი მაქვს და მარტო ვცხოვრობ, საცხოვრებლის მდებარეობა და ზოგადი სიტუაცია კი იდეალურია მასპინძლობისთვის“, — გვიზიარებს რუთი, მასპინძელი პერთიდან (ავსტრალია), და დასძენს: „საწოლების ყიდვაზე, ოთახების გადაკეთებაზე, ავეჯის გადაადგილებასა და სხვა მსგავსზე ბევრი არ დამიხარჯავს“.

შეეხეთ ქვემოთ მოცემულ ღილაკს, რომ შექმნათ ახალი განცხადება ოთახის თაობაზე, ან დაასრულოთ უკვე დაწყებული.

*ეფუძნება Airbnb‑ს მიერ 2022 წლის მაისიდან 2023 წლის მარტამდე საერთაშორისო მასშტაბით შეგროვებულ მონაცემებს

**საერთაშორისო მასშტაბით ყველა იმ მასპინძლის მედიანური შემოსავალი, რომელიც სტუმრებს ოთახებს სთავაზობს

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.