მასპინძლობისადმი მიდგომის გაუმჯობესება მიღებული მიმოხილვების საფუძველზე

სტუმრების მიერ დატოვებული დადებითი მიმოხილვებიდან შეიტყობთ, რა მოეწონათ მათ სტუმრობაში ყველაზე მეტად. მართალია, უარყოფითი მიმოხილვების მიღება არცთუ ისე სასიამოვნოა, თუმცა ისინიც დაგეხმარებათ მასპინძლობისადმი მიდგომის გაუმჯობესებაში, რაც შეგიძლიათ პირველივე მიმოხილვიდან დაიწყოთ.

„უკუკავშირი ძალიან მნიშვნელოვანია“, — აღნიშნავს ჯულიეტი, მრჩეველ მასპინძელთა საბჭოს წევრი ნაირობიდან (კენია), და დასძენს: „ჩვენ პრაქტიკოსები ვართ, ჩვენი საქმიანობა კი სავსეა მოულოდნელობებით. აქედან გამომდინარე, საჭიროა საცხოვრებელზე მუდმივი ზრუნვა. სწორედ ამ კუთხით არის მიმოხილვები მნიშვნელოვანი მაჩვენებელი“.

მიმოხილვები ჩვენი გაერთიანების წევრებს შორის ნდობას ამყარებს, თქვენ კი ბიზნესის განვითარებაში გეხმარებათ. მიმოხილვებიდან საგულისხმო ინფორმაციის მისაღებად:

• გაეცანით სტუმრებისგან მიღებულ თითოეულ მიმოხილვასა და პირად გამოხმაურებას.

• გამოიყენეთ დადებითი მიმოხილვები განცხადების გასაუმჯობესებლად. მაგალითად, თუ სტუმარი შეაქებს სამზარეულოს, რომელშიც მას ყველაფერი აუცილებელი დახვდება, უკეთ წარმოაჩინეთ სამზარეულო ფოტოებზე. ფოტოსთვის დართულ წარწერაში მიმოხილვიდან ციტატის მოხმობაც კი შეგიძლიათ.

• უარყოფითი მიმოხილვები ან პირადი გამოხმაურება/შეტყობინებები დაგეხმარებათ, განსაზღვროთ, რა შეცვალოთ საცხოვრებელსა თუ მის აღწერილობაში. ამას გარდა, შეგიძლიათ საჯაროდ უპასუხოთ უარყოფით მიმოხილვას, რითაც ხაზს გაუსვამთ, რომ კონსტრუქციულად უდგებით კრიტიკას.

წარმატებული მასპინძლები მეტისმეტი შელამაზების გარეშე უთითებენ საცხოვრებელთან დაკავშირებულ ინფორმაციას, შემდეგ კი მაქსიმალურად ზრუნავენ სტუმრების კომფორტზე. „ყოველთვის ვცდილობ, ზედმეტი დაპირებები არ მივცე სტუმრებს, შემდეგ კი მათ მოლოდინს გადავაჭარბო, რომ უმნიშვნელო პრობლემებს ყურადღება არ მიაქციონ“, — გვიზიარებს მაქსი, სუპერმასპინძელი ბონგარიდან (ავსტრალია).

გთავაზობთ სტუმრებისგან მიღებული გამოხმაურების ზემოაღნიშნული მიზნით გამოყენების რამდენიმე მაგალითს:

• თუ სტუმარი თავის მიმოხილვაში აღნიშნავს ქუჩიდან შემომავალი ხმაურის შესახებ, ჩაასწორეთ საცხოვრებლის აღწერილობა და მიუთითეთ, რომ ქუჩა ზოგჯერ ხმაურიანია (რომ არაფერი გააზვიადოთ).
• ახალი სტუმრის დაბინავების შემდეგ დაახვედრეთ მას ყურის ხმაურისგან დამცავები ან თეთრი ხმაურის გენერატორი (მოლოდინს რომ გადააჭარბოთ).

თუ პოტენციური პრობლემების თაობაზე გულახდილი იქნებით, უფრო დიდი ალბათობით გეწვევიან სტუმრები, რომლებისთვისაც ყველა პირობა მისაღებია, რაც, თავის მხრივ, დაგეხმარებათ უარყოფითი მიმოხილვების თავიდან აცილებაში.

„სტუმრები გვწერენ, რომ სტუმრობა შესანიშნავი იყო, თუმცა იმასაც აღნიშნავენ, რა შეიძლებოდა ყოფილიყო უკეთესი ან უფრო კომფორტული“, — ამბობს კეშავი, მრჩეველ მასპინძელთა საბჭოს წევრი ნიუ‑დელიდან (ინდოეთი), და დასძენს: „მიღებულ გამოხმაურებას პრაქტიკაში ვიყენებთ. რეალურ სტუმრებთან საუბრებიდან ბევრ რამეს ვსწავლობ“.

შეინარჩუნეთ კონტაქტი სტუმრებთან მათი დაბინავების შემდეგ — აგრძნობინეთ მათ, რომ ხელმისაწვდომი იქნებით, თუ რაიმე შეკითხვა ან პრობლემა ექნებათ. აქვე რამდენიმე რჩევაც:

• ისარგებლეთ დაგეგმილი შეტყობინებების ფუნქციით, რომ სტუმრებს თქვენგან ავტომატურად დაეგზავნოთ შეტყობინებები ისეთ მნიშვნელოვან ეტაპებზე, როგორიცაა ჯავშნის გაფორმება, დაბინავება და საცხოვრებლიდან გასვლა.

• სტუმრობის პირველი ღამის შემდეგ გაარკვიეთ სტუმრებთან, ყველაფერი წესრიგში აქვთ თუ არა ან რაიმე ხომ არ სჭირდებათ. გრძელვადიანი ჯავშნების შემთხვევაში, მოიკითხეთ სტუმრები კვირაში ერთხელ მაინც.

• თუ სტუმარი რაიმე პრობლემის შესახებ აღნიშნავს, შეეცადეთ, მალევე მოაგვაროთ ის. სტუმრების უმეტესობა გაგებით ეკიდება პრობლემებს, მთავარია, დროულად აგრძნობინოთ, რომ მათ გამოსწორებაზე მუშაობთ.

„მნიშვნელობა არ აქვს, დადებით მიმოხილვას მივიღებ თუ უარყოფითს, თითოეულ მათგანზე პასუხს დროს ვუთმობ“, — ამბობს ომარი, სუპერმასპინძელი მეხიკოდან (მექსიკა), და დასძენს: „პასუხებს ხომ პოტენციური სტუმრები წაიკითხავენ?!“.

სწორედ სტუმრისგან მიღებული გამოხმაურების საფუძველზე აღმოაჩინა ომარმა საცხოვრებელში წყლის ტემპერატურის პრობლემა, რომელიც მალევე მოაგვარა, იგივე სტუმარი კი რვა თვის შემდეგ კვლავ ეწვია მას. „კონსტრუქციული მიმოხილვები ყოველთვის უნდა გავითვალისწინოთ“, — ამბობს ომარი.

მიმოხილვების ყურადღებით წაკითხვა მასპინძლობის კუთხით გაუმჯობესებაში დაგეხმარებათ. „მიმოხილვა ზოგჯერ უარყოფითია, თუმცა ეს არ არის კატასტროფა“, — ამბობს ალესანდრო, მასპინძელი ლომბარდიიდან (იტალია), და დასძენს: „გაანალიზეთ ძირითადი გამომწვევი მიზეზი და გამოასწორეთ, რაც საჭიროა“.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.