სამოქმედო რჩევები უარყოფითი მიმოხილვის მიღების შემთხვევაში

უარყოფითი მიმოხილვები არასასიამოვნოა, თუმცა ზოგჯერ მათ მაღალი შეფასების მქონე მასპინძლებსაც კი უტოვებენ. გთავაზობთ რამდენიმე რჩევას იმასთან დაკავშირებით, თუ როგორ მოიქცეთ სტუმრებისგან უარყოფითი გამოხმაურების მიღების შემთხვევაში.

მოკლე და მეგობრული საჯარო პასუხით სტუმრობის მსურველებს აგრძნობინებთ, რომ მათი მოსაზრებები თქვენთვის მნიშვნელოვანია.

„არ მოველი, რომ რომელიმე მასპინძელს 100%‑ით დადებითი მიმოხილვები ექნება“, — ამბობს ენდრიუ, სტუმარი და სუპერმასპინძელი ბერლინიდან, და დასძენს: „უფრო ის მხიბლავს, როცა კრიტიკულ გამოხმაურებას მასპინძელი სერიოზულობით ეკიდება“.

უარყოფით მიმოხილვებზე პასუხის გაცემისას გაითვალისწინეთ შემდეგი:

• გადაუხადეთ სტუმრებს მადლობა გამოხმაურებისთვის. მარტივი შეტყობინებაც საკმარისია, მაგალითად, შემდეგი ტიპის: „გმადლობთ, ვაფასებთ, რომ დრო გამონახეთ და თქვენი სტუმრობის შესახებ მოსაზრება გამოთქვით“.
• აღნიშნეთ, რის გამოსწორებას აპირებთ. მაგალითად, შეგიძლიათ, ასეთი რამ დაწეროთ: „ვწუხვარ, რომ საწოლები არაკომფორტული იყო. მშვიდი ძილი მნიშვნელოვანია, ამიტომ მატრასს თხელი ლეიბები დავამატეთ“.

თუ ფიქრობთ, რომ თქვენ მიერ მიღებული რომელიმე მიმოხილვა არღვევს მიმოხილვის წესებს (მაგალითად, ის შურისძიების მიზნით დაიწერა), მისი წაშლის მოთხოვნა შეგიძლიათ.

სიზუსტესა და სისუფთავესთან დაკავშირებული პრობლემები ორი ყველაზე გავრცელებული მიზეზია, რომელთა გამოც სტუმრები მასპინძლებს 5 ვარსკვლავზე დაბალ შეფასებებს უტოვებენ. გამოიყენეთ სტუმრებისგან მიღებული გამოხმაურება მასპინძლობისადმი თქვენეული მიდგომის დასახვეწად.

აგრძნობინეთ სტუმრებს, რომ მათ მოსაზრებებს ითვალისწინებთ და მზად ხართ, გააუმჯობესოთ სხვადასხვა ასპექტი:

• აღიქვით გამოხმაურება გაუმჯობესების შესაძლებლობად. სტუმრებისგან ზოგჯერ ისეთი ნიუანსების შესახებ შეიტყობთ, რომლებზეც არც კი გიფიქრიათ. მაგალითად, შესაძლოა, საჭირო იყოს დაბინავების პროცედურის გამარტივება ან მეტი პირსახოცის დახვედრება.

• იყავით გულწრფელი. ფოტოები და საცხოვრებლის აღწერილობა ყოველთვის უნდა შეესაბამებოდეს ამჟამინდელ სიტუაციას. აუხსენით სტუმრებს, როგორ უმკლავდებით პოტენციურ პრობლემებს (ვთქვათ, უტოვებთ ყურის საცობებს, თუ ქუჩა ხმაურიანია).

• დაიცავით ინკლუზიური მასპინძლობის პრინციპები. თითოეულმა ადამიანმა თავი სასურველ სტუმრად რომ იგრძნოს, გამოიყენეთ გენდერულად ნეიტრალური ლექსიკა და წარმოაჩინეთ საცხოვრებლის ადაპტირებული პირობები.
• იყავით კავშირზე სტუმრობის მთელი პერიოდის განმავლობაში. ისარგებლეთ დაგეგმილი შეტყობინებების ფუნქციით, რომ მოიკითხოთ სტუმრები, საჭიროებისამებრ კი ოპერატიულად მოუგვარეთ მათ პრობლემები.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.