რჩევები Airbnb-ზე უარყოფითი მიმოხილვის მიღების შემთხვევაში

უარყოფითი მიმოხილვები მართლაც არასასიამოვნოა, თუმცა მათ ყველაზე სტუმართმოყვარე მასპინძლებიც კი იღებენ ზოგჯერ.

მსგავს გამოხმაურებას ყოველთვის შეგიძლიათ საჯაროდ უპასუხოთ. კონსტრუქციული პასუხით ყველას აგრძნობინებთ, რომ სტუმრებისგან მიღებული გამოხმაურება თქვენთვის მნიშვნელოვანია. ამას გარდა, შეგიძლიათ მიიღოთ გარკვეული ზომები უარყოფითი მიმოხილვების თავიდან ასაცილებლად.

უარყოფით მიმოხილვაზე მოკლე, მეგობრული გამოხმაურება საშუალებას მოგცემთ, საჯაროდ აგრძნობინოთ სხვებს, თუ რის გაუმჯობესებას აპირებთ მასპინძლობის კუთხით.

სტუმრების თქმით, როცა ისინი ამჩნევენ, რომ მასპინძელი პასუხობს მის მიერ მიღებულ გამოხმაურებას, ჯავშნებს უფრო თამამად აფორმებენ, რადგან ხვდებიან, რომ მასპინძელი ღიაა დისკუსიისთვის.

მიმოხილვაზე პასუხის გაცემა ნებისმიერ დროს შეგიძლიათ. გთავაზობთ რამდენიმე რჩევას, თუ როგორ უპასუხოთ მიმოხილვას:

• პირველ რიგში, მადლობა გადაუხადეთ სტუმარს გამოხმაურებისთვის. მაგალითად, ასე: „გამარჯობა, დავით! დიდი მადლობა, რომ სტუმრობის მიმოხილვისთვის დრო გამონახეთ“.

• მოჰყევით, რა გააუმჯობესეთ საცხოვრებელში. შეგიძლიათ, ასეთი რამ დაწეროთ: „ვწუხვარ, რომ საწოლები არაკომფორტული იყო. მშვიდი ძილი ნამდვილად მნიშვნელოვანია, ამიტომაც თქვენი მიმოხილვის შემდეგ მატრასს კომფორტული თხელი ლეიბები დავამატეთ“.

„როცა თავად ვარ სტუმარი, არ მოველი, რომ მასპინძელს 100%‑ით იდეალური მიმოხილვები ექნება. ჩემს მოწონებას უფრო ისინი იმსახურებენ, ვინც კრიტიკას ჯანსაღად ეკიდება და გამოსწორების პირობას დებს“, — ამბობს ენდრიუ, სუპერმასპინძელი ბერლინიდან.

მიმოხილვები, შესაძლოა, წაიშალოს, თუ ისინი არღვევს მიმოხილვის წესებს. სურვილისამებრ, შეგიძლიათ შეგვატყობინოთ იმ მიმოხილვის შესახებ, რომელიც, თქვენი აზრით, ჩვენს წესებს ეწინააღმდეგება. ამას გარდა, ნებისმიერ დროს შეგიძლიათ გაასაჩივროთ შურისმაძიებლური მიმოხილვები, რომლებსაც, როგორც თვლით, წინ უძღოდა სტუმრების მხრიდან გარკვეული წესების უხეშად დარღვევა.

დადებით მიმოხილვებზე საჯარო გამოხმაურებაც ცხადყოფს, რომ ყურადღებიანი მასპინძელი ხართ.

უარყოფითი მიმოხილვები განსაკუთრებულ ყურადღებას მიიქცევს, თუ მხოლოდ და მხოლოდ მათ უპასუხებთ, ამიტომ, კარგი იქნება, დადებით მიმოხილვებსაც გასცეთ პასუხი. უბრალო ფრაზა, როგორიცაა, მაგალითად, „მადლობას გიხდით სტუმრობისთვის!“, სავსებით საკმარისია.

ზოგჯერ უარყოფით მიმოხილვას განსხვავებული მოლოდინი განაპირობებს. ყოველი სტუმრობა სტუმართმოყვარეობის გამოვლენისა და ინკლუზიურობის პრინციპების დაცვის შესაძლებლობაა.

უარყოფითი მიმოხილვისგან დაზღვეული არავინაა, მაგრამ მასპინძლობის კონკრეტული ასპექტების გაუმჯობესების რამდენიმე ხერხი არსებობს.

• გადაუღეთ საცხოვრებელს რეალისტური ფოტოები, რომლებიც მის დადებით და უარყოფით მხარეებს ასახავს.
• გულახდილად აღწერეთ საცხოვრებელი და შეადგინეთ სახლის წესები, რომ სტუმრობის მსურველებს სწორი მოლოდინი შეუქმნათ.
• საცხოვრებლის აღწერილობაში ყურადღება გაამახვილეთ უარყოფით მიმოხილვებში ნახსენებ ასპექტებზე — განსაკუთრებით, იმ საკითხებზე, რომლებიც თქვენზე არ არის დამოკიდებული, მაგალითად, ხმაურზე ქუჩაში.
• გამოიყენეთ მიღებული გამოხმაურება საცხოვრებლის გასაუმჯობესებლად — მაგალითად, დაამატეთ პირსახოცები, თუ სტუმარმა აღნიშნა, რომ მათი არასაკმარისი რაოდენობა დახვდა.
• იყავით კონტაქტზე სტუმრებთან Airbnb‑ს აპის მეშვეობით, რომ სწრაფად და მარტივად მოუგვაროთ პრობლემები, რომლებიც თავს იჩენს სტუმრობის განმავლობაში.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.