როგორ აიმაღლოთ ეკოლოგიური პასუხისმგებლობა

ჩვენ ყოველთვიურად გაგიზიარებთ მრჩეველ მასპინძელთა საბჭოს სიახლეებს და გაგაცნობთ მის წევრებს.

გამარჯობა,

მე ვარ ანა ჯონსი, მრჩეველ მასპინძელთა საბჭოს წევრი და ეკოლოგიური მდგრადობის კომიტეტის კოორდინატორი. ბოლო რამდენიმე თვეა, Airbnb‑ს ხელმძღვანელებს ვხვდებით და განვიხილავთ, როგორ დავეხმაროთ მასპინძლებს ეკოლოგიური პასუხისმგებლობის ამაღლებაში.

მოხარული ვარ, რომ სწორედ 22 აპრილს, დედამიწის დღეს, მომეცა ჩვენი გეგმების გაზიარების საშუალება.

რა თქმა უნდა, ბევრმა არ იცის, საიდან დაიწყოს. ეკოლოგიური პასუხისმგებლობის თემაზე უამრავი ინფორმაციაა, რაც ხშირად დამაბნეველია.

მრჩეველთა საბჭოში გაწევრიანებისას ჩემი ერთ‑ერთი მიზანი იყო, რომ გასაგებ ენაზე ამეხსნა მასპინძლებისთვის ეკოლოგიური მდგრადობის პრინციპები. ნამდვილად მჯერა, რომ ერთმანეთის მხარდაჭერითა და გამხნევებით ბევრი სარგებლის მოტანა შეგვიძლია.

Airbnb‑სთან ერთად ვმუშაობთ შემდეგ პროექტებზე:

• საგანმანათლებლო სერია მასპინძლობისას ეკოლოგიური პასუხისმგებლობის შესახებ: გაეროს გარემოსდაცვით პროგრამასთან, ბუნების მსოფლიო ფონდთან, მსოფლიოს წამყვან გარემოსდაცვით ორგანიზაციასთან, და მრჩეველ მასპინძელთა საბჭოს ეკოლოგიური მდგრადობის კომიტეტთან მჭიდრო თანამშრომლობით Airbnb‑მ შექმნა საგანმანათლებლო კონტენტი მასპინძლებისთვის. აღნიშნული მოიცავს როგორც ახალ სტატიებს (მაგალითად, გზამკვლევს დამწყებთათვის მასპინძლობისას ეკოლოგიური პასუხისმგებლობის შესახებ), ისე რჩევებს სტუმრებთან მდგრადი ტურიზმის საკითხების განხილვასთან დაკავშირებით. სერიას ახალი მასალები მთელი წლის განმავლობაში დაემატება, ამიტომ დაელოდეთ სიახლეებს, რომ მეტი შეიტყოთ ეკოლოგიური პასუხისმგებლობის შესახებ.
• სხვა მასპინძლების გამოცდილების გაზიარება: გარემოს დაცვის პრაქტიკა, შესაძლოა, რადიკალურად განსხვავდებოდეს იმის მიხედვით, თუ სად ცხოვრობთ და რა რესურსები გაქვთ. აქედან გამომდინარე, გადავწყვიტეთ, რეგულარულად გაგვეზიარებინა თქვენთვის იმ მასპინძლების გამოცილება, რომლებიც მსოფლიოს სხვადასხვა კუთხეში, სხვადასხვა ტიპის საცხოვრებლებში ზრუნავენ გარემოზე. დასაწყისისთვის გაგაცნობთ სუპერმასპინძელ ტიფანის, რომელიც კალიფორნიაში, ჰოლივუდ‑ბიჩში, სტუმრებს პლაჟზე მდებარე სახლს სთავაზობს.
  
• პარტნიორობა განახლებადი ენერგიის სფეროში: განახლებადი ენერგია მასპინძლებისთვის უფრო ხელმისაწვდომი რომ გახდეს, Airbnb იკვლევს პარტნიორობის შესაძლებლობებს კომუნალური მომსახურებების მომწოდებელ იმ კომპანიებთან, რომლებიც გარემოზე ზრუნავენ. Airbnb მალე დაიწყებს საპილოტო პროგრამას აშშ‑ში, ხოლო თუკი ის გაამართლებს, ალტერნატიულ ვარიანტებს საერთაშორისო მასშტაბით შევთავაზებთ მასპინძლებს.

მიხარია, რომ ეს მხოლოდ დასაწყისია! ეკოლოგიური მდგრადობის კომიტეტი აგრძელებს მუშაობას, რომ დაეხმაროს მასპინძლებს გარემოს მიმართ პასუხისმგებლობის ამაღლებაში, თანაც ისე, რომ მაქსიმალურად დაზოგონ თანხა. წლის განმავლობაში ამ საკითხთან დაკავშირებით დამატებით ინფორმაციას მოგაწვდით.

უელსის ქალაქ პემბროკშირში ზღვის პირას ცხოვრებამ ახალი გატაცება გამიჩინა და გადამაწყვეტინა, მეტი პასუხისმგებლობით მოვკიდებოდი ეკოლოგიას. სხვა მასპინძლებსაც სიამოვნებით ვეხმარები ცხოვრების ახალი წესის დამკვიდრებაში. აი, მოკლედ ჩემ შესახებ:

ჯერ კიდევ 2017 წელს ოჯახთან ერთად ვფიქრობდით, როგორ შეგვეცვალა ჩვენი ცხოვრება — ძალიან გვინდოდა Airbnb‑ზე განცხადების განთავსება. მოგვიანებით ეს ლამაზი, ძველი ფერმა გამოჩნდა, რომელმაც მაშინვე დაიპყრო ჩვენი გულები. აქ ყველა შენობა 1650 წლით თარიღდება, ამიტომაც დაჰკრავს სიძველის შარმი და სიმშვიდის გრძნობას იწვევს.

საქმე მხოლოდ გასაოცარ ლანდშაფტსა და სანაპირო ზოლს არ ეხება. ადგილობრივებიც დიდ აღფრთოვანებას იწვევენ ჩემში — მათ მჭიდრო კავშირი აქვთ თავიანთ მიწასთან და საქმესთან. ეს გადამდებია! ამ მხარეში სტუმრობა წარმოუდგენელია ისე, რომ შეხება არ გქონდეთ ადგილობრივ კულტურასთან — იქნება ეს აქაური წარმოების საპონი, უელსელი მხატვრების ნამუშევრები თუ სხვა.

ორი განცხადება გვაქვს. დიზაინსა და სტილზე მე და დედა ვზრუნავთ, მამა კი სარემონტო სამუშაოებს ასრულებს. ერთ გუნდად ვართ შეკრული და ბოლომდე ვართ ჩართული პროცესში. ძალიან გვიყვარს აქაურობა.

მასპინძლობისადმი ეკოლოგიური მიდგომა შევიმუშავე, რომელსაც ჩვენს განცხადებებში აღვწერთ. სტუმრებს ამობეჭდილ ვერსიებსაც ვახვედრებთ, რომ უკეთ გაეცნონ ჩვენს საქმიანობას. ბუხრისთვის სპეციალურად ხეებსაც კი ვზრდით.

მე ვარ ერთ‑ერთი დამფუძნებელი Airbnb გაერთიანების საბჭოსი, რომელმაც 2019 წელს დაიწყო თავისი საქმიანობა გაერთიანებულ სამეფოში. ამას გარდა, Airbnb‑ს გუნდთან და არაერთ ბრიტანელ მასპინძელთან ერთად ვხელმძღვანელობ ინიციატივებს მასპინძლობისას ეკოლოგიური პასუხისმგებლობის კუთხით.

ბუნებასთან სიახლოვე მართლაც ჯადოსნურია. სეზონების ცვლასა და ზღვის რიტმს მშვენივრად ვეწყობი — ეს კი აისახება ყველაფერზე, რასაც ვაკეთებთ.

აქ ჩამოსული მრავალი სტუმარი არა მხოლოდ ბუნებასთან, არამედ საკუთარ თავთანაც პოულობს კონტაქტს — ზოგჯერ თავი კუპიდონი მგონია, ამდენ ადამიანს პემბროკშირს რომ ვაყვარებ და დაბრუნების სურვილს ვუჩენ!

მრჩეველ მასპინძელთა საბჭო მომდევნო თვეში დაგიბრუნდებათ მეტი სიახლით, მანამდე კი, იმედი მაქვს, დაიხმართ პუბლიკაციების ახალ სერიას ეკოლოგიური პასუხისმგებლობის საკითხზე!

ყოველივე საუკეთესოს გისურვებთ! (ან, როგორც უელსში ვიტყოდით, „Iechyd da!“)

ანა ჯონსი

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.